Monday, February 25, 2008

أغلى كيلو جزر في مصر


انا بقى عندي عقدة مكلكعة من ساعة قصتي مع الموز واللي متابع المدونة طبعا كله عارفها واللي مش متابع يدخل هنا حسبي الله ونعم الوكيل

انتختي قلوب حائرة اتبرعت بانها تطلع الكلكوعة اللي عندي دي وحاولت كتير معايا وقعدت تدني في جلسات نفسوية كتيرة

وفي يوم نيمتني قلوب حائرة على الشيزلونج وحاولت تطلع العقدة اللي جوايا تجاه شراء اي فاكهة وبعد ما خلصنا جلسة العلاج

قالتلي يلا قومي انتي بقيتي زي الفل ولا اجدع فاكهاني ولا اي بياع هيعرف ينصب عليكي تاني

بس انا بردو لسه قلقانة وخايفة حد من الاخوة دول ينصب عليا

ولايهمك قومي واتشجعي كده

قومت وجبت ماية وخدت حبوب الشجاعة وبلبعتها.. ورجعتلي الثقة تاني

وقومت زي عبد الفتاح القصري كده .. انا لاننكن حد ينصب عليا ابداااااااااااا

يامجنون ياجزر
*********
واحنا ماشيين في الشارع انا وانتختي قلوب حائرة اول ماعيني وقعت في الشارع وانا ماشية وقعت على جزر قولت الجزر بيقوى النظر ومفيد وانا بقى واخده حبيبات شجاعة من هنا للسنة اللي جاية ولا اي حد فيكي يامحروسة هيعرف ينصب عليا
ورحت للراجل وقولته

كيلو جزر لو سمحت

دول اربعة كيلو خديهم على بعض بقى ياابلة

لا من فضلك انا عايزة كيلو واحد بس

ليه كده ياابلة اسمعي الكلام وخديهم كلهم

يوووووووووووه لاياعم هات كيلو بقى وخلصني

طيب ياابلة حاضر بس خليكي فاكرة انتي اللي قولتي

يحضرلك الخير

واداني الكيلو وخد الفلوس وخلاص
زميله بقى اللي معاه كان راشق عينه في الشنطة وشاف معايا عشرينتين يعني اربعين جنية

لو سمحتي باابلة الله يخليكي هاتي الفلوس اللي معاكي ده افكهالك

لا ياسيدي مش عايزة افك الفلوس

الله يخليكي انا محتاج اجمد الفلوس اللي معايا لحسن كلهم فكة

لا معلش

ربنا يكرمك طيب اديني بس افكلك عشرين واحدة

والله مش عايزة افك معلش

الله يخليكي ربنا يكرمك هاتي افكلك انا معايا فكة كتير عايز اخلص منها وخدي الجزرتين دول هدية اهوه زيادة ياستي

لاحول ولاقوة الا بالله

معلش هاتي افكلك ربنا يكرمك

حاضر ياسيدي
وبحسن نية اديته يفكلي
خد عشرنتين اهم

وبعد الفلوس اللي ادهالي فكة لقيتهم 39 جنية

ايه ياعم دي الفلوس ناقصة جنية

ناقصة جنية ازاي وريني كده

وعد الفلوس قدامي انا وانتختي قلوب حائرة
وادهوملي تاني وقالي يلا ياستي ادي الجنية اللي كان ناقص اتفضلي

وخدت الفلوس في الشنطة ملفوفين بعد ما شوفته بعيني اللي هتخرمهم الدود دول بيعدهم صح قدامي وقدام انتختي ومشيت بدون اي خوانة
وبفتح الشنطة في المترو عشان اطلع فلوس التذكرة والاقي الفلوس ناقصة عشرين جنية

ايه ده فين الفلوس

قلوب حائرة ... شوفي كده يابنتي

فين بس انا اتسرقت

اتسرقتي ازاي


بتاع الجزرسحب من الفلوس عشرين جنية لما خدهم في المرة الثانية

ياخبر خدهم ازاي ده محترف


انا اتسرقت وبمزاجي انا اللي اديتوا الفلوس يفكها

اتارية قعد يلح عليكي


كيلو الجزر وقف عليا بـ21 جنية


اغلى كيلو جزر شوفته في حياتي


تمتمتمممممممممممممممممممممممممممممممممممممممممممممممممم

وطبعا ياحضرات كانت الصدمة اتسرقت بمزاجي
وياخسارتك ياحبوب الشجاعة


اتاري ان اللعبة دي بيعملوها كتير من البايعين تفك فلوس يدهولك ناقصة في الاول جنية وبعدين لما تقولوا عليه يخدهم منك تاني ويعدهم قدامك طريقة ما متشوفهوش منها انه سحب فلوس وبعدين يديك الجنية وبما ان الفلوس اتعدت قدامك للمرة الثانية انت بتخدها
ولما حكيت لاصحابي
قالولي يوووووووه هيه اتعملت فيكي يابنتي دي حاجة معروفة وحكولي بقى عن مصايب اللي اتسرق منها 200 جنية بالطريقة دي وهيه بتشتري مانجو واللي اتسرق منها 100 جنية وغيرو وغيرو
اللي مضايقني بس اني اتسرقت قدام عيني ومشوفتش
وبصراحة الكلكوعة اللي عندي كبرت اوووووووووي ولا اي جلسات نفسوية هتطلع العقدة دي من جوايا

المشكلة كمان اني لما روحت البيت وحكيتلهم طبعا خدوا فكرة صعب اوي عني مرة موز ومرة جزر سمعتي بقت وحشة بقى وحلفوني ما اجرب ولا اشتري اي حاجة خالص من الشارع
تاني يوم داخله البيت بكيس بقسماط لقيتهم كلهم بنفس واحد

انتي مش بتحرمي لسه بتشتري بردو حجات من الشارع


ياجماعة ده بقسماط


اظاهر اني اتحرمت اني اشتري اي نوع من اي حاجة في اي مكان

تفتكروا العيب فيا ولا في الجلسات النفسوية بتاعت قلوب حائرة ولا في حبوب الشجاعة اللي انا بلبعتها ولا في الناس اللي في البلد وبتسرق بعضها ولا في الغش و ايه ولا ايه
بجد مش متصورة الناس بتقبل على نفسها فلوس حرام ازاي

ومازال الصمود يحاوطني ..................ايامنا حلوة عادي بقى خليكوا فريش

30 comments:

على الطريق said...

معلش يا شيري المرة الجاية هاتي جوافة .. واشتري بالفيزا كارت عشان تتأكدي من كل حاجة

ياسيتي
اديكي شوفتي الناس قاعدة كافية خيرها شرها ولا اشترت ولا طلعت فلوس وبردوه اتسرقت .. على الاقل انتي كلتي جزر وما كلتيش في نفسك

همسات دافئه said...

:)
لاء دا انتى حظك فله
عادى ياشيرى بصراحه يعنى ومن غير زعل انتى الى بتستأمنى الناس اوى دا حتى عمر بن الخطاب قال
احترسوا من الناس بسوء الظن انا قريت الموز ده بس قلت لو علقت عمرك ما هتشوفى طبعا كان لازم تفتحى الكيس وكان لازم تعدى الفلوس
الغش والفلوس الحرام الى بيقبلوها ده دلوقتى بقت عادى للأسف
بس واضح ان حلك انك متشتريش حتى باكو لبان لحسن على حالتك ده ممكن يديهولك مستعمل وهتخديه وتروحى عادى
نركز بقى شويه:)وربنا ان شاء الله مش هيهنيه بالفلوس
تحياتى
شيماء:)

نهياوية said...

ههههههههههه ، ههههههههههههه
ايه يابنتي الحلاوة دي ، تعوي والله انا لما اكون متعصبة شوية كدة او زعلانة بقيت ادخل مدونتك
بس صراحة اقولك حاجة من حق بتوع البيت يتشاموا صراحة يعني موقفين وراء بعض ومن نس المكان صعب صعب
انا شخصيا بقيت اخا منك
ودي جزاء اللي يروح يتعالج عند "قلوب حائرة" مانتي كنتي معقدة وحلوة كدة وفلوسك معمرة الشنطة
صحيح العلم مهوش ببلاش "اقصد الرجوع للعقد"
تحياتي ياجميل

في حب مصر said...

على فكرة انتي زبونة حلوة قوي انا علشان خاطرك انتي هيغير مهنتي وهابدأ أفكر افتح محل فكهاني جنب بيتكم وكفاية انتي بس تشتري مني
بس انا أعرفلك شخص يفكلك العقدة بتاعة الفاكهة والخضار دي، ممكن يعملك حجاب أو عمل ويربطهولك في ديل سمكة صغيرة في المحيط الهادي ولا أحسن فاكهاني بعد كدة يقدر يضحك عليكي!!!!!!
بس ياريت تجيبلي حاجة من أتر بتاع الموز أو بتاع الجزر علشان العمل يجيب مفعولة؟؟؟؟؟؟؟؟؟

بالشفا وتاخدي غيرها وبعدين ايه يعني 21 جنية في كيلو جزر مش عجبك الجزر خلاص فداكي

مصري غلبان

Ahmed Mubarak said...

مش كفايه الموز يا بنتي

:D

معلش فداكي ولا يهمك

:)

أيامنا الحلوة said...

على الطريق
**********
معلش يامرمر انا عارفة انك مسروقة بردو بس بطريقة تانية عوضك على الله
صحيح اللي يشوف بلوت غيره تهون عليه بلوته

تحياتي

أيامنا الحلوة said...

همسات دافئة
**********
اه فعلا حظي فله مع الاسف مع الالم انا كنت بستأمن عادي يعني مبحطش في بالي بس ده غباء مني اكيد زلام الحذر والواحد مش بيتعلم بسهولة

تصدقي انا اشتريت باكو لبنان انهرده بس الحمد لله مطلعش مستعمل شوفتي بقى الدنيا لسه بخير اهوه ولسه في ناس بيراعوا ضميرهم

تحياتي اتمنى مرورك الدائم على ايامي لحلوة

أيامنا الحلوة said...

نهياوية
******
منورة ياجميل تصدقي انتي بقى بفرح بتعليقك عندي يارب دايما
وبعدين ليه تكتئبي ياهوبة كل ده عشان هنتنقل المقطم ولا يهمك خليكي فريش
ودعواتك بقى ان العقدة تطلع مني

تحياتي

أيامنا الحلوة said...

في حب مصر
*********
هههههههههههههههههههه عايز تفتح فكهاني وانا بس اللي اشتري منك لا اوعى انا خلاص لاننكن حد يعرف يضحك عليا تاني ابدااااااا

وحلوة الفكرة بتاعت الحجاب دي الحقني بيه الله يخليك هو ده اللي هينقذني من البايعين

مصري غلبان منورني ويارب دايما
تحياتي

أيامنا الحلوة said...

أحمد مبارك
**********
اعمل ايه بس يااحمد نصيبي بقى موز وجزر وياعالم بكره في ايه تاني
دعواتك

تحياتي

قلوب حائرة said...

بصوا بقى تقريبا البت شيرين عاملة البوست ده علشان تشكك في مجهود النفساني الي افنيت زهرة شبابي في دراسته بس مش ذنبي انه فشل معاها ، المهم يعني ياجماعة الراجل حس اننا اتنين بهوات كده وماشيين في المهندسين وطبعا لان محفظة ايامنا الحلوة مليانة ورق وصور الراجل افتكر ان تحت القبة شيخ وقال لما اشد منها عشرين جنيه مش هتفرق يعني مش الذنب ذنبي الذنب ذنب مين ياكتاكيت ذنب المحفظة شفتوا بقى الاخصائية النفسية بتجيب الحلول منين ومحدش يصدق البنت شيرين انا استخصاية نفسوية اد الدنيا وابقوا تعالوا واول كشف مجاااااااااااني وبس الرجته بفلوس

أيامنا الحلوة said...

قلوب حائرة
***********
متحوليش خلاص جلساتك فشلت بلاش تروجي بقى لنفسك وتخدي زبائين من عندي
وبعدين انا محفظتي خلاص شيلت منها الورق والصور وكل حاجة عشان محدش يتغش فيا تاني ويفتكر ان تحت القبة شيخ ياخسارة جلساتك هههههه

انتختي لولا انك كنتي معايا وشوفتي الحدث بتفاصيله كانت جاتلي صدمة عصبية وفقدان للثقة بالنفس بعد كده نمشي انا وانتي علطول ولا نبص يمين ولا شمال لاجزر ولا موز

تحياتي واحلى من الجزر مفيش

ولــــــــــو said...

ههههههههههه
والله انتوا ناس تمام
الواحد لازم يعرف انتوا بتشتغلوا فين وييجي يسرح عندكوا بفاكهه وخضار
واهو الواحد يستريح من مرمطة السفر

بس عارفه انت مش لوحدك احنا كمان كان هايحصل معانا موقف قريب من كده
امبارح كنا بنشتري هدوم وصاحبي بيخليني انا اللي احاسب فالمهم اختارنا والراجل قاس وكله تمام وجه وقت الحساب فطلعت الفلوس واديتهالوا وهو بدوره قام مديها للراجل اللي جنبه اللي المفروض انه البياع بس للاسف طلع مش هو
احنا بقى مسكتنا كريزة ضحك لما الراجل قالنا الحساب وكده واترمينا انا واصحابي على الارض من الموقف
فعايزك تتطمني
مش لوحدك اللي بتتخمي
اجدع ناس ف الدنيا بينضحك عليها
والدليل
قالوله

جميز said...

واضح انك مسمعتيش المثل اللى بيقول ( اللى يتلسع من الموز ينفخ فى الزبادى )

على فكرة , العيب مش فيكى ولا فى الجلسات النفسية , عادى يعنى , و بتحصل فى أحسن العائلات , مع العلم بأن الجماعة النصابين و الحرامية بيجيدوا شغلتهم أوى و يقدروا يخموا التخين

تعيشى وتاكلى غيرها

تحياتى

Wish I were a Butterfly ... said...

سلام عليكم

معلش يابنتي تعيشي و تاخدي غيرها
:))
بس ابقي خدي بالك شوية انت كدة طيبة و سهلة أوي و الدنيا مش ينفع معاها كدة الأيام دي خالص

بس مش تستسلمي...كل شوية اشتري حاجة لحد ما تفاجئي عائلتك بإنك بتجيبي أحلى فاكهة :)، و لو الموضوع مش نافع أنصحك تكتفي باللب و السوداني و خلاص بأة

على فكرة دمك خفيف أوي
:)
تحياتي

أيامنا الحلوة said...

ولو
****
ياااااااه فينك من زمان تعليقك ليه رونقه على المدونة ياصديقي العزيز
الشغل بتاعنا في المهندسين ومخصوص عشان الاخوه البائعين هنتنقل الى المقطم عن قريب عاجل عشان يبقى مننا والجبل ومشوفش اي بايع

تحياتي وربنا يبعد عننا وعنك النصابيين

Zika said...

بصي من اصول وقواعد الشراء من السوق
انك تبطلي تشتري من السوق وتبداي تعتمدي علي السوبر ماركت علشان يقل طبعا النصب بتاع التجار , انا لو منك كنت رجعت للراجل وخدت بالعشرين الجنيه كلها جزر
وما اخذ بالنصب لا يسترد بغير النصب

أنا إنسان said...

لا يلدغ المؤمن من جحر مرتيبن
:)

ضد الظلم said...

يادى النيله السودا يا بنتى انتى على طووول كده الموز طلع مينفعش يتاكل و اولنا ربنا هيكرمها وتحط العقل فى رسها والمره الجايه لاننكن ابدااا حد ينصب عليها يتنصب عليكى فى 20 جنيه والله ده انا بطل مره جبت عنب اقرب الى عصير بس بعد كده بقيت استعطف قلب البياع وقلو حرام عليك خد الى انت عيزه بس ادينى حاجة كويسه وافضل احلفه بكل الايمانات اتعلمى منى بقى
والدكتوره قلوب حائره الى مبيتنصبش عليها ابداا عملت ايه
ابقى احفظى دعاء السوق بقى
وقولى للبياع

من غشنا فليس منا

تحياتى

رئيس جمهوريه نفسى said...

الغلط فى مين الغلط فى بيبو قلوب حائره انا متاكد من ده :D يارب ما تقرى الكلام ده
الازمه مش فيكى ولا فى الى اتفك منه 200 ولا 100 جنيه هى ازمه ضمير بقى عمله نادره فى المجتمع

أيامنا الحلوة said...

zika
****
لا خلاص حرمت لاسوق ولا سوبر ماركت انا محتاجة اريح اعصابي ونفسويتي من اللي بيحصلي شوية
منور ايامي الحلوة واتمنى التواصل
تحياتي

أيامنا الحلوة said...

انا انسان
*********
عندك حق بس تقول ايه بقى في حسن النية
تحياتي

أيامنا الحلوة said...

ضد الظلم
********
ايه الغيبة الطويلة دي كلها انت كنت معتقل ولا ايه هههههه منور يابو العربي
زدعاء السوق والله بقوله بس متعرفش بقى اللي بيجرالي ده من ايه
وهعمل بنصيحتك واستعطف البياع واحلفه يديني الفاكهة كويسة بس تصدق اللي زي دول ماهما يحلفوا مفيش فايدة انا افر منهم احسن

تحياتي

أيامنا الحلوة said...

رئيس جمهورية نفسي
****************
عندك حق الغلطة في جلسات قلوب حائرة يارب تقرأ كلامك انا بهدي النفوس هههههههه

فعلا الضمير اصبح منعدم في مجتمعنا للاسف ولكن عند البعض

تحياتي

أيامنا الحلوة said...

جميز
***
الحمد لله يعني مش انا لوحدي اللي بتخم طمنت قلبي

ربنا يعبد عنك وعننا النصب قول اميييين

تحياتي

أيامنا الحلوة said...

Wish I were a Butterfly
***********************
لب وسوداني ايه بس خلاص مبقاش ينفع منه لله بتاع الموز وبتاع الجزر سببلي مشكلة هعاني منها طول حياتي ادعيلي ان عقدتي تتفك

تحياتي وربنا يكرمك ويارب دايما تنوري ايامي الحلوة

سكــر said...

ههههههههههه
معلشى تعيشى وتاخدى غيرها

ابقى خلى بالك المره الجايه

وكويس انها جت فى عشرين جنيه

تحياتى ليكى

ولحفة دمك اللذيذه

احمد سكر

احساس لسه حى said...

عزيزتى

بجد مش متصورة ازاى الناس بتقبل فلوس حرام على نفسها

انتى مش عارفة ان البلد مليانة حرامية ومرتشين ونصابين

مش عاوز اقولك دلوقتى اللى بيقبل بالحرام بقه شئ عادى

وجربى انسى موبيل فى تاكسى وقوليلى ممكن يرجعلك بنسبة كام فى المية ودول نسبة الشرفاء فى مصر

خربوا البلد بسرقتها خلوا الناس كلها بتحلل لننفسها السرقه

ربنا يعوض عليكى
سلااااااااااااام

أيامنا الحلوة said...

سكر
***
ربما يكرمك ودعواتك بقى مش عايزة نصب تاني

تحياتي

أيامنا الحلوة said...

احساس لسه حي
************

يالهوي اجرب وانسي موبيلي في المواصلات انت عايزني اضحي باغلى ممتلكاتي
وحسبنا الله في النصابين والمرتشيين وبتاع الموز والجزر

تحياتي