Tuesday, November 6, 2007

حسبنا الله ونعم الوكيل


أولا حسبي الله ونعم الوكيل

وثانيا حسبي الله ونعم الوكيل

وثالثا حسبي الله ونعم الوكيل بردو

اما رابعا اقولكم ليه انا بقول حسبنا الله ونعم الوكيل


رحت اشتري فاكهة من اكبر فكهاني فيكي يامنطقة
وقولتلوا لو سمحت ثلاثة كيلو موز

حاضر ياابلة

يحضرلك الخير ياخويا

وزنلي الموز وعيني على الكيس مغفلتش

وخدت الموز بكل ثقة واديتو اللي فيه النصيب

وروحت البيت


وبكل عنطظة دخلت من باب شقتنا اسمعوا وعووووووووووو .. هاتو كاميرا وصوروا هذه اللحظة التاريجية

انا جبتلكم فاكهة دفعت فيها دم قلبي

وياريت وانتو بتاكلو تدعولي

وتفتكروني دايما بالخير

ومتفتكروش انها اول ولا اخر مرة لا انا هجبلكم كده كل شهر

انا لازم ابركم ايون انا سمعت درس بيقول ان المفروض تدخل السرور على اهل بيتك قولت خلاص مفيش مفر لازم ارم بعظمكم شايفاكم هفتانين اليومين دول


اخويا .. بس بس ايه الفضايح اللي انتي عملاها دي

ايه طلعت منك انت ياخويا

لا بس خلاص مكنوش كام كيلو فاكهة يعني

لا يااستاذ دي مش اي فاكهة بص وشوف

يعععععععععععععععععععععععع اووووووووووووووووووووووووف اعععععععععععععععععععععععععع

لقد احمررت خجلا وابتللت كسوفا

ايه ده موز ده ولا عصير قصب حمضان

يالهووووي لالالالالالالالا مش ده الموز اللي انا اشتريتو

ده الراجل وازن قدامي موز زي الفل بيلعلط كده ازاي افتح الشنطة الاقي المنظر المروع ده


اتاري ان الفكهاني ياحضرات المدونين غير كيس الموز اللي بيلعلط واداني كيس موز لو البط والفراخ شافوه هيغمى عليهم منو


وتلك هي الحكاية

مش عارفة ازاي غير كيس الفاكهة اصلا وازاي في ناس تقبل على نفسها كده تدخل فلوس حرام على اولادها على العموم خذوا حذركم وقد اعذر من أنذر كل واحد يشتري فاكهة يبص في الكيس كويس قبل ما يخدوا انا بقى عن نفسي عمري ما هقرب لاي فاكهانية تاني


مش بقولكم أيامنا حلوة


يلا كلو معايا حسبنا الله ونعم الوكيل

28 comments:

قلوب حائرة said...

شيررررررررين اتنصب عليها ياردااااالة ادي جزاء الي بيوفر ما كنت بتبريهم بدستة جاتوه لما شغلتي وش البخل والسحتتة ادي جزاك مطلعة ليكي لساني اهو وبعدين متبقيش تتنفخي عيلهم قوي كده وانتي داخلة عليهم متقولش جايبة الديب من ديله ولا تقولش قبضة الالف جنيه كفاية كده عليكي النهاردة

sendbad said...

ههههههههههههههههههههههههههههههههههههههه
لا حول ولا قوة الا بالله بس اكيد النية ما كانتش قد كده صح ولا ايه
معلش خيرها في غيرها

Ahmed Mubarak said...

يبقى انت أكيد ..أكيد في مصر
:D

أُكتب بالرصاص said...

تعيشي وتشتري غيرها

انا مرة اشتريت كام كيلو مانجة ، ولما رجعت البيط فتحتالكيس
طلع لي بطيخة


عادي
بتحصل
امال ليه سموها ام الدنيا؟؟؟

hamsaa said...

انتي شكلك جديدة في موضوع الشراء بكرة ياما هتشوفي و الله و بالذات من الفكهاني لو بتشتري تفاح هينقيلك اتنين حمر و الباقي اخضرو لو مشمش هينقيلك الحادق و قيسي على كدة و بعدين لو سمعتي كلام قلوب حائرة و اشتريتي حاجة حلوة و الله ما هتسلمي لسه عملها و كان الشربات في بلح الشام ناقص سكر
بس ايه يا عم بعزقت الفلوس دي افتكري زنقة اخر الشهر ممكن تشتريلهم سامبة او اكياس تانج و اهو توفير
بس بجد بجد رائعة
بجد و كلامك حلو
سؤال بس ابقي وريني الراجل اللي نصب عليكي علشان اشكره يا جميل تحياتي ليكي
ريهام

shahy said...

شوفي ياشيري

انتي لازم تروحي للراجل تاني

وتقوليلة في وشة : حسبي الله ونعم الوكيل

بس ابقي خدي حد كبير معاكي علشان لو حصل ضرب يبقى يدافع عنك

صحيح هو اداكي الكيلو بكام؟
احنا عندنا بخمسة جنية


كل مرة وانتي طيبة

انا مش عاوزة الحكاية دي تعملك عقدة وحاولي مرة تانية بس بنية سامحة ومنغير الفرح اللي عملتية يمكن ساعتها ربنا يسترها معاكي

أيامنا الحلوة said...

قلوب حائرة

ياشماتت طنط ظاظا فيا بقى كده يعني تشمتي فيا ده كلو ده بدل ما تطلعلي 20جنية من جيبك وتديها لاختك الغلبانة ماشي لن ولم انسى لكي هذا الموقف

تحيااتي وقولي ورايا حسبنا الله ونعم الوكيل

أيامنا الحلوة said...

سندباد

والله النية كانت كويسةومظبوطة بس زي ما تقول كده الحكاية قرف

وبعدين انا عمري اصلا ما هشتري فاكهة تاني حرمت يابيه

تحياتي ياسندباد العشق

ايامنا الحلوة said...

أحمد مبارك

اه فعلا انا في مصر بس مين اللي قالك

تحياتي مصر ام الدنيا

ايامنا الحلوة said...

اكتب بالرصاص

لا الحمد لله انها جت في الموز عارف لو كان حصلي زيك كده وجت في المناجو كان زماني جالي صرع اصلي بحب المانجو اوي


يلا الحمد لله وبعدين ام الدنيا هتفضل ام الدنيا

تحياتي

ايامنا الحلوة said...

همسة

يادي النور يادي الهنا ريهام بحالها عندي في ايامي الحلوة كان نفسي تكوني موجودة في يوم احلى من كده بس حظك بقى طلع في الموز

على العموم ياريهام انا اصلا لاهجرب فاكهانية تاني ولا حلويات انا هنقط بفلوس اقصد يعني ابقى اديهم الفلوس وهما يجيبو
وبعدين احنا لسه كنا قابضين ياقمر في اليوم ده انتي نسيتي ولا ايه اخر الشهر ده مش بنقرب منو

تحياتي وياريت تنوريني دايما

أيامنا الحلوة said...

شاهي

عمرك اطول من عمري تفتكري وانا سكت انا بعد ما كتبتلكم البوست ده رحتلو وقولتلوا حسبنا الله ونعم الوكيل قالي في ايه ياانسه قولتلوا القصة طبعا اللي هو عارفها وبعدين انكرها قولتلوا على العموم حسبنا الله ونعم الوكيل تفتكري قالي ايه ياشوشو قالي طيب وهو مبتسم

الكيلو عندنا اقل من عندكم بنصف جنية ياريت تعمليلي جمعية وتبعتهالي معونة الشهر

بالنسبة للعقدة انا اتعقد اصها مش اول مرة تحصلي بس بصراحة المرة دي بزيادة شويتين في كل مرة ببقى انا اللي مش بعرف انفي الفاكهة كويس انما المرة دي انا اتخدعت اهئ اهئ اهئ

تحياتي ياجميلة وشكرا للنصائح الغالية

mohamed said...

لو انا منك كنت رحتله بالموز وسبتهوله وقلتله انت حرام عليك وانا هسيبلك الفلوس الحرام دى
خليها تنفعك لما ربنا يسئلك يوم القيامة

احساس لسه حى said...

عزيزتى
الظاهر انتى وصحابك ملهمش حظ فى الفاكهه
وعلى العموم دينا مخلاش شئ الا وضحه وبين عذابه واللى يغش اتقال عليه ايه
من غشنا ليس منا
اظن ده كفايه وقيسى ده على كل شئ بنتغش فيه من الالف الى الياء
تحياتى
سلام

أيامنا الحلوة said...

محمد

انا فعلا رحتلو من غيظي بس مكنش معايا الموز اصلا اترمي مكنش ينفع يبات في البيت كفاية عليه اني قولتلوا حسبنا الله ونعم الوكيل في وشو بس تصدق ولا اتاثر الناس اللي زي دي مش بيهمها ربنا يهديهم

تحياتي

أيامنا الحلوة said...

احساس لسه حي

تصدق ليا واحدة صحبتي ما شاء الله عليها اروبة بتجيب احلى فاكهة ..

الغش مش هينفع والله ياريت الاشكال دي تعرف كده ربنا يهدي الجميع

تحياتي

Anonymous said...

ya zajh ya 6e6e

ya mchwa nchawe al7alwah ya

Doba said...

اول مرة واخر مرة
متعمليش كده تانى

ها

انا قلت وخلاص
يلا باى
هبة

أيامنا الحلوة said...

مجهول

في الواقع وفي الحقيقة انا مش فاهمة حضرتك كاتب ايه بس عامة لو كلامك شتيمة الله يسامحك ولو مدح يبقى كتر الف خيرك

وممكن تكتبلي باللغة العربية او الانجليزية واسمح احيانا بالفرنسية انما غير كده مش هقدر افيد ولا استفيد
وياريت في الاخر يكون في امضاء

تحياتي

أيامنا الحلوة said...

دوبا

حاضر يافندم دي اخر مرة واللهي انا اللي شوفتوا خلاني عندي حساسية من الفاكهة وخاصة الموز

تحياتي

emz said...

عظيمة يا مصر :D

Soooo said...

يافضيحتك قدام المدونين يافضيحتك
وبتقوليها في موضوع كمان
يالهوووووي
بالك .. انا لو مكانك كنت رحت للراجل وبما اني كده كده خلاص مش هاكل الموز .. اديلو الكيس واقولو شكران .. وامشي

وبعدين علمك علمك علمك
المشكله مش في الراجل
اطلاكا
ولا في الموز
ابسلوتلي
المشكله في البواب بتاع بيتكم اللي شافك شايله الموز وراح ناقرك عين .. جابت داغ الموز وحولته لثاني اكسيد الموزاييك

نصيحه ليكي .. غيرو البواب


سلاموووووووووز .. بس موووووز سليم

أيامنا الحلوة said...

emz
****
طبعا عظيمة اعظم عظمات البلاد

تحياتي

أيامنا الحلوة said...

سووووووووو
**********

تصدق انا ادركت ان العيب في البواب
مع العلم اننا معندناش بواب اصلا ولذلك قررنا نعزل من العمارة كلها

تحياتي ياسووووووووووووووووووووووووووووووووووووووو

Soooo said...

والله خير ماعملتي
فعلا قرار انك تعزلو من عمارتك عشان البواب اللي هو مش موجود اصلا قرار صاااااااائب ميه في الميه
وتاخدو شقه جنب بتاع الموز




سلاموووووووز

أيامنا الحلوة said...

سوووووووووووو
**************
فعلا ياسووووو الشقة الجديدة جمب بتاع الموز عشان ارقبوا واوقف حالو ومخليش اي حد يشتري منو والموز اللي عندو كلو يبقى عصير قصب

تحياتي وسلامووووووووووز

في حب مصر said...

على فكرة الحكاية دي عادي جدا واحمدي ربنا انها تمت مع ناس تعرفيهم لأنها حصلت معايا بس كنا رايحين زيارة لناس واشتريت ساعتها خمسة كيلو مانجة بالرغم من انها كانت غالية قوي ساعتها وبعد ما روحنا من الزيارة عرفت ان الناس رموا كيس المانجة زي ما هو واتقال كلام مش ظريف طبعا
فاحمدي ربنا
مش بقولك بكرة أحلى

مصري غلبان

أنا إنسان said...

حسبنا الله ونعم الوكيل