Thursday, April 26, 2007

تاج



ارسلت لي صديقتي الانتيخ أميرة صاحبة مدونة "على الطريق" http://altareek.blogspot.com تاج من اللي بنشوفوا في المدونات ده .. وعايزاني أجاوب عليه عشان نقب على وش النت ونبقى من مشاهير المدونين .. وطبعا اكيد انا هاخدوا بردوا وابعتهولها كوبي بست عشان هي كمان تجاوب وده طبعا حفاظا على ماء الوجه على حد قولها .. أميرة حبي أنا .. شكرا على التاج المسروق ده .. أقصد التاج اللي انت سلفاه من مدونة "نفسي أبقى مسلم بجد" .. ويلا معايا عشان نشوف التاج..
ماهو
اسمك؟
شيــــــــــرين
عمرك ؟
لحد دلوقتي 23سنة
مجال دراستك؟
الصحافة والاعلام
اسم مدونتك؟
متهيالي الاسم مكتوب بالبنط العريض.. أيامنــــــــــــــا الحلوة
لماذا سميتها بهذا الاسم؟
دعوة للتفائل لا للتشاؤل على رأي عمرو موسى
لماذا دخلت عالم التدوين من الاساس؟
دعوة لقتل فراغي عن عمد مع سبق الاصرار والترصد
هل تفكري في اغلاق المدونة؟
انا لسه بقول ياهاااااااااادي ..
هل أنتي راضية عن مدونتك شكلا وموضوعا؟
بصراحة لا

من هو:



أحب شخص لقلبك فى الدنيا؟
في ناس كتير بحبهم .. مممممممممممم .. يعني بابا وماما دول اغلى ناس عندي طبعا واخواتي .. واصحابي .. والجيران .. اصل انا قلبي مساكن شعبية على رأي عمنا محمد منير

انسان مستعد تضحي بحياتك –ركز فى كلمة حياتك- عشانه؟
يالهووووي حياتي .. تفي من بوقك .. بس على العموم انا مش عارفة ممكن اصلا أقدر في يوم من الايام أضحي بحياتي عشان حد ولا لاء .. بس عارفين بفكر كتييييير ازاي الشباب الفلسطينيين اللي بيقوموا بعمليات استشهادية بيقرروا انهم يضحوا بحياتهم في لحظة وبيبقوا مبسوطين .. يمكن عشان انا مش في نفس ظروفهم .. بس انا وطنية صدقوني .. تحيا جمهورية مصر العربية

اسم أول حب؟واسم اخر حب (حتى الان)؟
أول حب في حياتي كانت جدتي الله يرحمها .. بجد كنت بموت فيها .. اللهم اغفر لها وارحمها.. اخر حب محمود اخويا حاجة كده صغننة بتاع أربع سنين ومحدش يضحك ويقول كل دي وعندها أخ عيل كده .. على العموم انا لما بمشي بيه في الشارع بيحسبوه ابني.. بس عادي ولا يهمني

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
محبش الكره ده ابداااااااااا .. وياااااااااااااي انا ابص على جثة .. طب دا انا لو شفت جثة ده انا ممكن اموت جمبها من الخضة..
الاكلة المفضلة؟
المكرونة بالبشاميل
اكتر ست حاجات بتكرهيها؟
الخيانة
الكذب
التظاهر بالتدين
الغرور
الشيطان
الشر
اكتر ست حاجات تحبيها؟
أسرتي
الاخلاص
الصراحة
التواضع
التدين
الحب
ما هو:

اسم أجمل كتاب كتبه بشر قرأته ومحتفظ به حتى الان؟
طب ليه الاحراج ده .. انا الكتاب الوحيد اللي عندي هو كتاب "الخبر الصحفي" عندي من ايام أولى جامعة يعني بقالو عندي كده يعني اللهم لاحسد ست سنين .. بس كنت بحب اقراء لتوفيق الحكيم جدااااااااااااا

اهم جهاز منزلى انت متعلق بيه او بتستخدمه كتير؟
اكيد اكيد من غير نباهه.. الكمبيوتر قاعدة عليه ليل نهار.. في الشغل والبيت.. لحد ما هيجيلي عته


شىء تحس بالراحة النفسية عندما تنظر اليه؟
السمــــــــاء .. بجد بحس براحة فظيعة وانا ببص على السماء الصبح وهيه صافية
اجمل مدينة زرتها داخل مصر؟
هتكون مدينة نصر يعني .. اكيد اسكندرية
أجمل مكان طبيعي رأيته داخل مصر؟
مش فاكره بصراحة .. بس انا بحب النيل جدا ولما بركب مركبة في النيل بتأمل فيه .. (سبحانك يالله )
شخصية كارتونية بتحبها؟
بحب توم اند جيري، وكمان كنت بحب اتفرج على كابتن ماجد، وسلاحف النينجا ، واخرهم طبعا بكااااااااااار

صف ما يأتى:

شعورك لما بتسمع كلمة مصر؟
لسه كنت بتفرج امبارح على الطريق الى ايلات وقعد اعيط لحد ما عنيه باظت خالص .. شكلي كده وطنية

شعورك لما بتسمع كلام عن اليهود؟
بيبقي عندي أمل انو يكون في قنبلة خلصت عليهم كلهم

وكفاية كده بقي دماغي صدعت .. مش بحب الاسئلة الكتيرة .. وخير الكلام ما قل ودل .. معلش انا في حجات كتيرة شلتها من التاج ..

Saturday, April 21, 2007

رحلة عمري

الصورة دي للمنظر الساحر الذي يتمتع به وادي الريان
نظرا لحالة الهلع التي أصابت كل من ذهب الى بلد "الكتاكيت" .. ولااعرف من الذي أطلق عليها هذا المسمي
بالرغم من بحثي طوال هذا اليوم عن كتكوت واحد ولم أجده .. أحب ان أهنئي السادة الزملاء الذين حالفهم الحظ لعدم طلوعهم تلك "الرحلة" .. التي أطلق عليها هذا المسمى "رحلة" ..

مش عارفة ليه تذكرت اغنية المطرب مصطفي كامل وهو بيقول "رحلة عمري"
بفرحي، بجرحي
دا حلوه بمر
رحلة عمري
لازم غصب عني تمر
هي حياتنا
نقط وحروف
حبة حب
وحبة خوف
نحزن
تكسرنا الظروف
الإنسان مش دايما حر

اااااااااه يامصطفي ياكامل جيت على الجرح .. أصل الحكاية باختصار اني في ذات الايام قررت اني اطلع رحلة تبع شغلي وخير اللهم اجعلوا خير .. كنت بحلم اني اشوف الشلالات اللي في "بلد الكتاكيت" ..(الفيوم) .. أصلي من ساعة ما شفت احمد السقا في فيلم "أفريكانو" وهو بيرمي نفسو من الشلال قدام منى ذكي وبيقولها بحببببببببببببك .. وانا بحلم باليوم ده باجماعة .. ومحدش يفهمني غلط ويقول اني بحلم بحد بيرمي نفسوا عشاني من الشلال .. لاطبعا انا كنت عايزة اشوف الشلال بس ولو حد عايز يرمي نفسو هو حر بقي انا ماليش دعوة ..

يوم في حياتي

يوم الجمعة الموافق 20إبريل سنة 2007 .. اليوم ده مش عايزاكوا تنسوه ابدا .. عايزاكم تفضلو فاكرينوا طول العمر .. لان ربما يكون اليوم ده هو اللي بيطلقوا عليه انو يوم " كذبة إبريل" اصل كان المفروض اني اشوف الشلالات اللي قلتلكم عليها.. ولكن الحظ لم يحالفني .. المنحوس منحوس يااخونا..

أحلام اليقظة

كنت نايمة في العربية بتاعت الرحلة وحلمت حلم جميل "شفت منى واحمد في أفريكانو وشفت احمد وهو بيرمي نفسوا في الشلال" للمرة الالف في حياتي .. وفجأة لقيت حد بيصحيني بعنف قومي قومي وصلنا شوفي المنظر .. ايه ياجماعة هو أحمد السقا جه بجد ولا ايه .. وخير اللهم اجعلو خير لقيت نفسي في صحراء الشمس من فوقنا والرمال من تحتنا والبحر بعيد عننا .. ايه ده احنا فين .. احنا وصلنا "لوادي الريان" .. صحيح هو مش الريان ده اللي نصب على الناس قبل كده زماااااان .. يمكن كان عامل المكان ده لذكراه .. ما علينا طيب فين الشلالات ياجماعة ده حلم عمري .. وكانت الاجابة ان مفيش شلالات .. يالهووي يعني مفيش شلال .. ولا أحمد السقا حتى .. وبالرغم من كده مزعلتش قلت مش مشكلة ابقي اروح "افريقيا" في "رحلة" بردوا وأشوف الشلال هي هتقف عليه يعني .. وبالمرة كمان الواحد يتعرف على الناس الافارقة الحلوين دول معرفة الناس كنز لايفنى..

توزيع الوجبة

تم توزيع الوجبة بانتظام وهي عبارة عن أرز بالجمبري والسمك والسلطات... وكل اللي ياخد وجبتوا يمشي بقي في اي حتة في الصحراء .. أقصد "الوادي" .. وادي الريان ياجماعة ركزوا بقى .. عند الركن البعيد الهادئ .. على رأي الست أنغام..

البحث عن الحقيقة

كل واحد ماسك في ايدوا وجبتوا وماشي مش عارف رايح فين بالظبط .. .. الشمس واقفة على رؤسنا جميعا أشعر بان ذلك اليوم هو "يوم القيامة" وتملأنا الذنوب .. انها ساعة العذاب .. دموعي تريد ان تنطلق .. ولكن جاءت الساعة التي لاينفع فيها الندم ..

اعتصام.. واحتجاج .. ومعارضة .. وانقلاب .. وكل حاجة

بعد فشل عملية البحث عن الحقيقة التي وجدناها سراب قررنا نعمل انقلاب .. هما بتوع موريتانيا احسن مننا في ايه.. لازم نحتج .. المكان لايصلح للاستخدام الآدمي حتي البحر شكلو عامل زي المصرف الصحي .. مستحيل نقعد في المكان ده ..

رحلة أونطة .. عايزيين فلوسنا

التزمنا مقاعدنا في أتوبيس الرحلة مرة أخرى .. لازم نروح مكان افضل من كده .. وبعد انعقاد قمة ذكورية مطولة تشبه القمم العربية في عقدها ولكنها تختلف معاها في اننا خرجنا من قمتنا بنتيجة .. وهي ان كل فرد سوف يدفع مبلغ قليل من المال لنذهب الى مكان اخر أفضل ...

رحلة عذاب من أجل الوصل لقرية الاحلام

عايزة اقولكم اننا عشان نروح مكان تاني في "بلد الكتاكيت" مكان بيقولوا عليه اسموا "قرية الاحلام" .. تقريبا سافرنا سفر جديد .. غير السفر الاولاني .. الى ان وصلنا لمكان لايفرق عن الاخر غير وجود ثلاث مراكب في البحر وكافيتريا للجلوس بها مظلات.. (احسن من مفيش ياجماعة) .. صحيح "قرية احلام" اسم على مسمى.. بس دعيت ربنا كتير اني اصحى من الكابوس ده .. أقصد الحلم

محاولة لرمي الساعات المؤلمة للخلف

حاولنا جميعا الاستمتاع بالوقت .. بركوب المراكب ومشاهدة البحر الذي يتمتع بمياه رصاصية اللون .. على حد قول أحد الزملاء .. ويتمتع ايضا بوجود بعض الدجاجات التي تم اعدامها نظرا لاصابتها بمرض أنفلونزا الطيور.. (تقريبا الطيور مضايقة من ان السمك لسه بخير)... وبالرغم من كده فنحن شعب محب للحياة مهما وقفت امامنا الصعوبات فاخذنا نواسي بعضنا البعض ونشعر بعضا ان اليوم هو أجمل ليالي العمر فلابد من الاستمتاع به .

التمني

أتمني ان ارجع الى بيتي عاجلا .. فأمي دائما تقول "مفيش احسن من قاعدة البيت" .. وأدي أخرة اللي مش بيسمع كلمة ماما تقولها ..

افتكرت مصطفي كامل وهو بيقول

توحشني شمس بلادي
صوت الحنين بنادي
راحل وجاي ف ميعادي
ح افضل لآخر عمري
الطير الحزين الشادي
راضي
برحلة عمري
رحلة عمري
ملحوظة: باب النعي مفتوح في الكومنتات .. منجلكمش في رحلة وحشة ياقادر ياكريم

Wednesday, April 18, 2007

اصنع حياتي .. قبل مماتي



اعلم اني موجودة في هذه الحياة كالمفقودة .. احيا ولكني ميتة .. لم احاول ان اصنع واقعي .. لاهدف لي .. كيف اكون مسلمة وربي خلقني في هذا الكون لاكون خليفة له في الارض .. فقد قال ربي تعالي في سورة البقرة " اذ قال ربك للملائكة اني جاعل في الارض خليفة قالوا اتجعل فيها من يفسد فيها ويسفك الدماء ونحن نسبح بحمدك ونقدس لك قال اني اعلم مالاتعلمون" (الاية رقم 30من سورة البقرة)..


كنت أسال نفسي كثيرا لماذا خلقني ربي ؟ .. وما هو دوري في تلك الحياة؟ .. طال الانتظار للحصول على تلك الاجابة حتي صادفتي زميلة لي من أيام الجامعة قالت لي اتشاركينا في جمعية "صناع الحياة" ؟ .. فتعجبت ما معني تلك الكلمة انا اصنع الحياة كيف اصنعها ؟.. فربي خلقني وخلق السماء والارض والشمس والقمر والليل والنهار والنجوم في تلك الحياة فانا أصلي لربي واعبده .. فهذه بالنسبة لي هي الحياة فكيف اصنعها إذن؟ فاجابتني "اصنعي واقعك" .. لقد خلقنا الله في هذه الارض حتي نكون خليفة له ..فالاسلام ليس عبادة فقط ولكنه نجاح في الحياة بالجد والعمل .. فلابد من البحث عن الهدف وعندما نجدته نعمل باخلاص حتي نصل اليه .. حتى تنهض أمتنا

ها هي الاجابة التي كنت انتظرها من قبل فانا اعيش في تلك الحياة مهمشة لا دور لي .. ولكن من تلك اللحظة تعهدت ان احيا من جديد لأصنع واقعي .. حتى لاأفقد وجودي في هذه الحياة .. لذا فانا قررت ان اكون "صانعة للحياة"........... حتي لاأكون زيادة عليها بل أزيدها أنا بعملي فتنهض امتي بسلام ..

فعلي أن ابدأ وابحث عن الطريق الصحيح للوصول الى النجاح .. يقول صلى الله عليه وسلم : " إذا مات ابن آدم انقطع عمله إلا من ثلاث : صدقة جارية أو علم ينتفع به أو ولد صالح يدعو له". صدق رسول الله صلى الله عليه وسلم

فاذا نظرنا الى معني الحديث نجد ان ـ الصدقة الجارية عبارة عن عمل اقتصادي أثناء حياة المسلم

ـ والعلم الذي ينتفع به يأتي بالدراسة والاجتهاد للوصول الى طريق النجاح
ـ والولد الصالح الذي يدعو له يأتي من خلال التربية .. والتربية الصحيحة تكون على أصول الدين

فنجد ان تكامل مسيرة الثواب بعد الموت تأتي من خلال صناعة حياتي قبل مماتي .. لذا فأنا أدعوكم جميعا لنتكاتف سويا لكي نصبح "صانعين للحياة"

Sunday, April 15, 2007

ريا وسكينة


ريا: بنقولك ايه ياسكينة يااختي


سكينة : أيوه ياأوووووختي


ريا : انا راسي بتلف اليوميين دول وعنيا بتزغلل على غوايش الست أم محمد الى قدامنا دي


سكينة: اااااه يااختي د احنا بنبقو هنموتو من الغيظ واحنا شايفين ايديها بطلعلط في الداخله والخارجه والشخللة بتخرم وداني


ريا: طب واحنا مستنيين ايه يااوووختي احنا نسحبوها ونخلصوا عليها


سكينة: ياما كان نفسي بس اديكي يااووووختي شايفة الدنيا متكهربة ازاي والبلد دلوقتي مبقتش امان زي زمان


ريا: بالعكس ياخيبة ده دلوقتي الفرص مفتوحة لنا على الاخر على الاقل لما يجوا يدوروا على الي قتل النسوان دول محدش ممكن يشك فينا خالص


سكينة: ازاي ياريا .. فطميني ياختي


ريا: انتي مش متابعة ولا ايه ياسكينة احنا سفاحين اه انما لازم نكون مثأفين ومتابعين للاحداث


سكينة: لالالالا متابعة ياختي بس فكريني كده اصل اليومين دول مش مركزة


ريا: ركزي ياسوكينة الدستور ياختي اتعدل ودلوقتي الدنيا مولعة بين الحكومة والاخوان ومحدش فاضلنا ده غير ان الحكومة بقى اتخنقت من الشعب وعايزة تخلص منو ونزلة اعتقالات في الي رايح والي جاي وخصوصا بتوع الاخوان دول وحتى لو اتقفشنا مش بعيد يدونا جواب شكر


سكينة: كلامك مظبوط ياااااوختي


ريا: ده غير كمان التفجيرات الي شغاله اليوميين دول في الجزائر والمغرب والدول العربية كلها مولعة ياحبيبتي و"القاعدة" مخلياهم بيلفوا حولين نفسهم


سكينة: هعهعهعهعهعهع مش بعيد كمان يتهموا "القاعدة" في قتل النسوان ياريا ونبقوا احنا كده في السليم


ريا: طبعا ياسوكينة


سكينة: طب واحنا مستنيين ايه يلا نقرأ الفاتحة بقى عشان العملية بتاعتنا تتم في سلام


ريا: ايه ده ياسوكينة انتي حافظة الفاتحة من ورايا ولايه


سكينة: اصل الست أم محمد جارتنا الي احنا نويين نخلصوا عليها دي بسمعها كل شوية بتقرأ الفاتحة على حال البلد

Saturday, April 14, 2007

كلنا ولاد تسعة وبنسعى



هناك بعض الاشخاص الذين يشعرون بالنقص .. فيقومون بسكبه على هيئة حقد أو حسد .. ولكن خذها مني حكمه وأنزع الحقد والحسد من قلبك .. " كلنا ولاد تسعة وبنسعى"..


طول ما انت ماشي في الشارع قولها خمس مرات "كلنا ولاد تسعة وبنسعى" ..


متتهزش ولاتتراجع لو لقيت عربية أحدث موديل فرملت قدامك مرة واحدة لانها كانت هتخبطك .. بصلها كده بكل أرف وقول لصاحبها "كلنا ولاد تسعة وبنسعى".. طبعا صاحبها هيحس انك انسان حقود وعينك تتدب فيها رصاصة .. بس ولا يهمك تماسك . . انت الاقوى والاغنى أكيد..


وانتي لما عنيكي تقع على فارس الاحلام ومعاه واحدة غيرك .. أوعي تتحصري وتعيطي بقي وتعمليها مناحة .. انتي تبوصلهم كده بقلب جامد وقولي "كلنا ولاد تسعة وبنسعى" ..


لما يجي زميلك في العمل ويقولك انا ابن باشا ابويا صاحب أملاك عمروا ما اشتغل في اي حاجة من الاخر يعملك فيلم "الايدي الناعمة" ويفهمك انو بيشتغل بس لتضيع وقت الفراغ .. رد عليه بكل تناكة وقولوا "كلنا ولاد تسعة وبنسعى"..


لما يجي أمين شرطة ويحط أيدوا على كتفك فجأة زي ما يكون قفشك ويقولك طلع البطاقة ياحضرت انا مشتبه فيك "الدستور اتعدل بقى" .. طلعلوا البطاقة بقلب جامد كده وقولوا "كلنا ولاد تسعة وبنسعى".. ومتقلقش لو خدك على اقرب قسم شرطة قبل ما توصل عشرين جنية في الخباثة كده هيسيبك..ولا اقولك بلاش لحسن دي "رشوة" اتحبسلك يومين وخلاص..

أما المحسود فاقول له .. اصبر على حسد الحسود فان صبرك قاتله
كالنار تأكل بعضها ان لم تجد ما تأكله

Thursday, April 5, 2007

حمدا لله على سلامتي

الصورة دي انا الي مصورها ساعة الغروب على شاطئ العجمي
ياااااااه بقالي كتير مكتبتش اي حاجة خالص علي مدونتي .. وده نظرا لاني كنت مسافر ومعملتش حفلة مع ان أمي مكنتش معايا اصلا عشان تيجي علي غفلة .. ولكن أبي العزيز هو الي كان معايا .. عارفين رحت فيييين عند المية والهواء "الاسكندرية" .. حد بقي هيقولي ايه العبيطة دي رايحة اسكندرية في الشتاء في عز الثلج اقولكم ان اسكندرية تحفة بجد في الشتاء هي سقعة اه وثلج مقولتش حاجة ومطر كمان ما انكرتش ده غير ان الاسانسير كان عطلان واحنا ساكنين بعيد عنكم في سادس دور وطلعناهم بعد طلوع الروح ده غير كمان انهم بيهدوا الدنيا في منطقة العجمي حيثما كنت استعدادا لموسم الصيف القادم ولكني في الحقيقة استمتعت جدااااااااااااااا.

سفر مفاجئ
فجأني ابي بسفرية الاسكندرية فرحت بها كثيرا نظرا لان حالتي النفسوية مش أد كده قلت اغير جو بقي واطلع من دور الكأبة الي بمثلو في فيلم "الحياة المرة" ده ،وهب شلت شنطتني وجريت علي البيت حضرت ملابسي البسيطة وانجشت بابا وطيران علي الاسكندرية وأول حاجة حصلتلي اننا كنا هنعمل حادث مروع لان السواق كان بعيد عنكم في سابع نومه وهو بيسوق بينا في الطريق الزراعي بس ربنا ستر وصحي قبل فوات الاوان ، ولما وصلنا قولنا الشهادتين وأخذنا نقبل بعض انا وابي من كثرة الفرحة اننا وصلنا بالسلامة فابتسمنا وقولنا خير ان شاء الله رحلة سعيدة ولما وصلنا لحد باب العمارة رقصت قلوبنا تحيا العدل وصلنا هيه هيه هيه طبعا انا الي بهلل كده مش بابا ، بس بصراحة التهليل ده وقع علي دماغي اصل لما وصلنا للاسانسير لقيناه عطلان لقيت بابا بيبحلقلي كده عايز يقولي نقيتي فيها يافالحة ولقيتوا بيشاورلي على السلم وبيقولي يلا اتفضلي ، اااااااااااااااااااااااااه صعب اوي السلم ياجماعة نفسنا اتقطع بس قلت موش مهم خير رحلة سعيدة وابتسمت انا وبابا بس بصراحة الابتسامة المرة دي مكنتش بنفس بس يلا عدت الليلة دي .

ليلة اعمار الصحراء .. أقصد تنظيف الشقة
بدون تفاصيل كانت ليلة عجب .. أتهديت فيها الشقة مهجورة من الصيف الماضي وعليكم ان تتخيلو.

البمبة

زملائي الاعزاء ادوني بمبة اصلهم قالولي انهم هيجوا يوم يقضوه معايا في الاسكندرية ولكن في الحقيقة مجووووووووووش ، راحت عليهم اكله السمك الي بابا كان ناوي "يطفحهلهم" أقصد ياكلهلهم .

الخروجات

أولا: زيارة المطاعم والمقاهي .. بهدف الاكل والشرب

ثانيا: زيارة شاطئ العجمي الساحر وقت الغروب وتصويره


الرجوع الى ارض الوطن " القاهرة"

رجعت بالسلامة ورحت شغلي واستقبلني زملائي في العمل بكل حفاوة ، وبالاخص "أم جاكي" ، بالمناسبة "جاكي" لسه متولدتش بس احنا مستنينها بفارغ الصبر وكأنها ابنتنا ، ادعولها توصل بالسلامة هي هتيجي بعد ثلاث شهور.

طبعا كلككم هتقولو ايه دي فسحة اقولكم بجد بجد استمتعت علي الاقل غيرت جو وغيرت الوشوش الي بشوفها كل يوم ، وعقالباكم