Saturday, November 29, 2008

رحلة سعيدة


بالرغم من تشددي الشديد وتصميمي على عدم طلوع أي رحلة مهما تكن الاغراءات وذلك بسبب ذكريات اليمة مرت في حياتي يوم 20 ابريل عام 2007 وهو يوم طلوعي رحلة الى وادي الريان في محافظة يطلق عليها " بلد الكتاكيت" والتي جعلتني اقول "توبة من دي النوبة " إلا انني تراجعت وتزحزت عن موقفي بالرغم من ان كلمتي عمرها مانزلت الارض ابدا الا اني قررت ان افعصها في الارض هذه المرة عندما اعلنت المؤسسة الصحفية التي اعمل بها عن رحلة الى الاسماعيلية مجانا للعاملين فقط "فرصة" وهنا ياحضرت وقفت امام الاعلان وقولت "ابدا لاننكن افوت الرحلة دي ابدا" وعزمت على ان امحي الماضي من ذاكرتي وابدأ حياة جديدة وانسي ما تسببته لي رحلتي الاخيرة من الالم نفسية وجسمانية حيث انني لازلت اعالج نفسي مما حدث لي من هبوط في الامعاء اللمفوية وضغط حاد في ذاكرتي العقلية هذا بالاضافة الى اصابتي بروماتيزم في ضفر صباع رجلي الصغير.
فقد قررت ياحضرت ان اقوم بمجازفة كانت من الممكن ان تقضي علي اذا واجهت نفس مصير الرحلة الاخيرة ولكنها والحمد لله محت الكثير من الامراض التي رسخت بداخلي فقد بدأنا اليوم بركوب سيارة الرحلة والتي كان سائقها مغرم باغاني الزمن الجميل فكان لديه ما لذ وطاب من شرائط لعبد الحليم حافظ وام كلثوم وبدأها "بجانا الهواء جانا" ولكن للاسف اغرقني النوم الى ان صحوت على "نار ياحبيبي نار" .
وعندما وصلنا الى الاسماعيلية التي تتمتع حقا بجو هادئ دافئ استقرينا في مكان على الشاطئ الذي يتمتع بمياه زرقاء اللون وسماء صافية فهنا من نزل البحر وهنا من يجري وهنا من يلعب بالكرة وهنا من يركب المركب وللحق انا لم افعل كل هذا الا انني اكتفيت بركوب المراجيح التي وجدتها انتختي
اميرة باعجوبة حيث جاءت الينا مسرعة "وجدتها وجدتها" فذهبنا جميعا الى المراجيح ولكني حزنت لفشلي في ايجاد زحاليق .
ثم توجهنا جميعا الى المطعم لنأكل "هم هم" ، استمتعت حقا بتلك الرحلة خاصة بجلوسي على الشاطئ والنظر الى البحر والتامل في مخلوقات الله ، ولكن شئ واحد كان يعكر علي صفو رحلتي وهو انشغالي الشديد طوال الرحلة بضياع شبشب احد الزملاء الذي كان ينادي عليه بحرقه شديدة في المايك بتاع الدي جي والشبشب المدعو " لونه اسود في برتقالي " وعلى من يجده التوجه الى الدي جي حيث ان صاحبه لايستطيع دخول البيت بدونه خوفا من زوجته " ادي الستات ولابلاش"، وللاسف انتهي اليوم دون ان يجد الشبشب المذكور .
وتجمعنا مرة اخرى عند سيارة الرحلة وركبنا جميعا في اماكننا وفي هذه المرة عاد السائق لنا باام كلثوم "رجعوني عنيك" فاغرقني النوم ولكني صحوت على صقفة من الجماهير" للست " .
تنويه: من وجد شبشب اسود في برتقالي يضعه امام باب المدونة

Wednesday, November 12, 2008

مكياج اسلامي

كحلي عينيك بعدم النظر إلى الحرام

ضعي على شفتيك روجا" احمر يمنعك من الكذب والغيبه

ضعي على وجهك كريم أساس من الإسلام والأحكام الشرعيه

مسكري ( ضعي ماسكارا ) رموشك بالدموع عند ذكر الله خوفا من ناره وعذابه

اصبغي أظافرك بماء الوضوء الدائم

سرحي شعرك بالحجاب غير الفاتن

مارسي رياضة العباده بكثرة السجود والركوع حفاظا على رشاقة
جسمك

البسي ثوب الحشمه الفستان الطويل المطرز بالأعمال المستحبه

حني يديك بالدعاء وارفعيها إلى السماء حتى يستجيب الله لك

Monday, November 3, 2008

Monday, October 27, 2008

عريس ولكن؟



رسالة على الموبيل: اتصلي بيا ضروري في البيت لحسن عدة التليفون بايظة بتستقبل بس..
موضوع هام

خير يارب استر

الو ايوه ياخالتو ..
انتي عاملة ايه خير خضتيني
جيبالك حتة عريس انما ايييييييه هيعيشك عيشة ملوك يابنتي
عيشة ملوك ليه هو من أي عصر
بطلي هزار بقى وركزي معايا اوي بكره ان شاء الله هتلاقيني طابه عليكم انا والعريس وامه عايزاكي تستحمي كده وتلبسي كويس بلاش دور سيدة اللي انتي عايشة فيه ده
مالها سيدة على الاقل كانت بتحب سي حمدي وبتقوله (سمس)
سي حمدي مين يابت بطلي بقى العريس ده مهندس ديكور وبيشتغل في الامارات وحيلة امه واهله وجدوده بشوات ووووووووو...............
يالهويز كل ده طب وده ايه اللي هيخليه ينطس في نظره ويخطبني ياخالتو ده احنا بالنسبة له هنبقى بوابين القصر
لالا متقلقيش اصله عنده عيب بسيط كده وتافه فمش بيدق على حاجة المهم انه عايز واحدة كويسة وبنت ناس
اها عيب ايه ده .. هو بس قصير شوية
قصير طولي يعني
اه يعني او اقصر حاجة بسيطة اوي
طيب عامة اما نشوف ياخالتو وكله نصيب والقصر مش عيب

اليوم الموعود


قبل الضيوف ما يجوا بربع ساعة حديث بيني وبين اختي
انا : لما يجو بصي على العريس وابقى ادخليلي قوليلي شكله ايه
حاضر
الحقي دول جم
طيب روحي اجري شوفي وتعالي قوليلي
خرجت ..........وجت
يالهووووووووووي اوعي لا اوعي لا اوعي مش معقول
في ايه يابت
اوعي بجد لالالالالالالا
البت جاتلها حالة فظيعة قولت ده سن الشباب المراهق اللي بقى عايزة شكل تامر حسني وعمرو دياب

الاقي ثواني واخويا بيدخل والضحك كله على وشه
في ايه يامحمد
لاأبد كله تمام وزي الفل
لا مالك بجد انت شكلك عايز تضحك وكاتم الضحكة
اضحك ايه يابنتي انتي مالك بيا انا هطلع بره استني متخرجيش غير لما ماما تيجي تاخدك
طيب

الاقي بابا بعد ثانية دخلي الاوضة وسنانة خارجة بره من الابتسامة
ياه يابابا انت شكلك مبسوط كده ليه
طبعا مش بنتي حبيبتي عريسها بره
عريسها ده ايه انا لسه شوفته
باذن الله كله تمام
ايه حكاية تمام دي

المهم استني ماما تدخلي تقولي اخرجي ابدا وانا هموت واعرف مالهم بيضحكوا ليه وايه حكاية كله تمام دي

لاقيت اخويا جه تاني وقالي تعالي والواد وشه محمر من كتر ماهو كاتم الضحكة
خرجت سلمت على خالتي ثم ام العريس وادور على ابنها مش لاقياه
يالهويز فين العريس ده انا نفسي اشوفه اوي ياجماعة
قولت خلاص بقى اقعد
لاقيتهم بيقولولي سلمي على استاذ ..........
فبصيت لبابا وهزيت دماغي "هو فين ده؟"
الاقي حد بيشد الجيبة بتاعتي ياانسة ياانسة ياانسة
روحت اتنطرت ببص كده اشوف ايه اللي بيشد ده لاقيت واحد زي اللي بشوفهم مع سمير غانم في الافلام " الاقزام" دول اللي بيطلعوا معاه

المهم ايدي ابتدت في الارتعاش ووجهي ظهر عليه الازبهلال وعنيا خرجت بره كالاغبياء والجهاز التنفسي وقف مع دقات سريعة في القلب ونزلت تحت عشان اسلم ولساني اتحرك وقال اهلا وسهلا
وبعدين قعدت وضرب عيني الاقي خالتي قاعدة جمبي وسنانها كلها بره
وتقولي في ودني ايه رايك عريس لقطة ابن بشوات يابنتي هيعيشك ملكة رحت قولتلها هيه ماما هربت ولا ايه مش شايفاها في القاعدة
لا امك بتعمل عصير جوة يافوضحية
اه والله عملت خير
ام العريس... وانتي بقى ياامورة بتشتغلي ايه
انا انا انا انا انا انا نسيت معلش ياطنط اصلي انا كده لما بفرح بنسى كل حاجة
ام العريس .... اكيد انتي تسمعي عن عائلة ......... انتي في الصحافة وعارفة العائلات العريقة دي
انا انا انا انا انا انا انا اه اه طبعا طبعا
ام العريس .... انتي عندك عربية بقى على كده اصل بيتكم بعيد اوي
انا انا انا انا انا انا لا معنديش عربية
ام العريس ... معقولة ازاي بتروحي شغلك كل يوم كده من غير عربية
انا انا انا انا انا انا بتشعلق في الاتوبيس "قرصة من خالتي" اااااه .. لالالالالا اقصد يعني بركب تاكسي
ام العريس ... اااااااااااه طيب

العريس.. الانسة مواليد كام
مردتش
العريس .. بقول الانسة مواليد سنة كام
انا اه فعلا ده انا انا مواليد 83
العريس ... اه كويس
بابا .. وحضرتك مواليد كام
العريس .. 73
انا ... هايل ده انت جيت في سنة مباركة كويس انك محضرتش الحرب
العريس .. نعم ياانسة
احم احم لا يعني سنة 73 دي سنة كلها بركة
خالتي في ودني.. ايه ده كلامك بلدي كده ليه

العريس .. الطريق بعيد اوي على فكرة اشرحولي لما اجي المرة الجاية اجي ازاي بالعربية اصلنا جينا بتاكسي انهرده عشان مش طبعا انا مش عارف الطريق

بابا ... بيوصف
انا ........عدي يالليلة عدي ياليلة عدي ياليلة عدي يالليلة عدي ليلة
فجاة
ام العريس.. والد الانسة يسمح العرسان يقعدوا مع بعض شوية يتكلموا
بابا بصلي وانا عمالة ازغرله واشاوره لالالالالالالالالالا
وبعدين الاقيه يقول اتفضل
شوف الراجل ماشي يابابا مردودالك
العريس.. تشرفت بمعرفة حضرتك
انا ... ربنا يكرمك الشرف ليا
العريس .... كلميني عن نفسك بقى شوية
انا... حضرتك عايز تعرف ايه
العريس.. ياستي أي حاجة المهم تتكلمي انتي ساكتة من الصبح
انا ... لا عادي عامة انا بشتغل ..... وسني ........ ومكان شغلي .......
العريس ايه رايك في السفر
انا .. كويس
العريس.. يعني تحبي تسافري

انا ... ربنا يسهل كلنا هنسافر
العريس ... خير باذن الله
باذن الله
سكوووووووووووووت
طيب هستني ردك
ان شاء الله
خالتي ها ايه رايك
حرام عليكي ياشيخة انتي شايفاني فرعة قدامك جيبالي عريس اد ركبتي
ايه يعني قصير ابقى اقلعي الجزمة في الفرح
ياسلام وانا لو قرفصت حتى هجيبه
افضلي اتبطري بقى وطلعي في كل واحد عيب

طب بذمتكم كلكم كل واحد يقول رايه
بابا.. عادي الراجل ميعبوش الا جيبه
ماما اللي هربت من اول القاعدة وفضلت في المطبخ عشان ملمحش نظرة عنيها ... مش مهم الشكل المهم الجوهر
اخويا .. عادي يابنتي ابقي شيليه انتي في الفرح
اختي .. اوعي توافقي
اخويا الصغير "اربع سنين" .. العريس ده تخين اووووووي

يلا اهوه يوم من ايامي الحلوة ........ ياريت القصيريين ميزعلوش انا بشرح حالة معينة

Saturday, October 25, 2008

وقفة مع النفس



وقفة مع النفس لعلها تهدئ


من؟


لما؟


لماذا؟


كيف؟


متى؟


عليك ان تكمل الاسئلة ثم أجب؟

Wednesday, September 3, 2008

أيامنا أحلى مع رمضان


كل سنة وانتو جميعا طيبين

يااااااااااااااه رمضان ده بيفكرني بكل حاجة حلوة بجد فعلا ..

فعلا شهر رمضان ده اللي نقدر نقول عليه ايامنا الحلوة

في كل مرحلة من عمري كان رمضان ليه طعم وشكل تاني خالص بدء من وانا طفلة (ما هو انا زمااان كنت طفلة ) لما كان بابا بيجبلي الفانوس وادخل انا واخواتي اوضة ظالمة نولع فيه الفانوس ونلف حوالين بعض ونقول وحوي ياوحوي اليوحا كان اياميها الفوانيس مش هي اللي بتغني لا احنا اللي كنا بنغني ونعلي صوتنا اووي في الغنا ونضحك من قلبنا ونجري وراء بعض بالفوانيس ونقعد نقارن انهي فانوس احلى من التاني مع ان الفانويس على ايامي مكنش زي بتوع دلوقتي المتقمعين الغلسين دول اللي بصوت نانسي وغيرها بصراحة بالرغم من تطور اشكال الفوانيس دلوقتي الا اني شايفة الفوانيس بتاعت زمان " مش زمان اوي يعني" كانت احلى وليها شكل وطعم تاني ........ ياااااااااااااااه بجد احلى ايام

كان طبعا في كل رمضان يجيلي فانوس جديد والسنة الي بعدها يجيلي فانوس احلى من السنة اللي قلبها لحد ما جه اليوم اللي اطلب فيه انا الفانوس ويتقالي انتي اتسخطتي ولا ايه فانوس ايه وانتي شحطة كده عاااااااااااااااااااااا
طب وفيها ايه لما يجيلي فانوس وانا عندي ربع قرن كده وادخل انا والواد اخويا اللي عنده اربع سنين ده ونطفي النور في الاوضة ونولع الفوانيس ونغني وحوي ياوحوي اليوحا

لما كبرت بقى شوية وطلعت من مرحلة الفوانيس كانت في مرحلة حلوة بردوا كانت فيها الصحبة الصالحة اللي كنت بتجمع معاها في صلاة التراويح كنت بتجمع انا واصحابي اللي كانوا معايا في المدرسة والي كانوا في نفس الوقت جيراني نصلي ونخرج من المسجد نتمشى ونشرب عصير ونروح بيوتنا ونصحي بعض في السحور ونتقابل في صلاة الفجر في المسجد
دلوقتي مفيش اصحاب ومفيش مقابلات بينا ولا حتى تليفونات ياسبحان الله ياتري الايام دي راحت فين وليه مش بنعرف نعوضها .....

يااااااااااااه فينك
ياايامي الحلوة

Saturday, August 2, 2008

شعور غريب


يراودني شعور غريب

لدي رغبة شديدة في قتل مدونتي وأريد أن أمحوها من على وجه النت


ولكن يصعب عليا أيامي الحلوة

Wednesday, June 18, 2008

الرجل والمرأة


المرأة هي أسرة ووطن


الرجل الأمان والقوة


المرأة رقيقة وهي أنثى


الرجل عظيم وهو رجل


المرأة دفئ وحنان وسكن


الرجل أمان وقوة وعطف


المرأة صبر ممزوج بعطاء بلا توقف


الرجل حدة ممزوجة قوة وعطف بلا توقف


المرأة ليست جميلة وهي تؤدي دور الرجل


الرجل لا يبدو وسيماً وهو يؤدي دور المرأة


المرأة دمعة


الرجل أرق من تلك الدمعة ولكن خلف أسوار وقلاع وحصون


المرأة سر سعادة المنزل


الرجل سر سعادة الكون


المرأة تصون عندما لا تخون


الرجل يخون عندما لا يجد من يصون


المرأة تتحدث ليسمعها الرجل


الرجل ينصت ليسمع ما تقوله المرأة


المرأة ابتسامة


الرجل الفنان الذي يرسم تلك الابتسامة


المرأة اليد اليمنى للرجل


الرجل أصابع تلك اليد اليمنى


المرأة أقوى من الرجل بعذوبة أنوثتها


الرجل أقوى من المرأة بعنفوان رجولته


وأخيراً المرأة و الرجل عظماء وهم يؤدون دورهم بلغة التفاهم والصدق والحب .. اللغة التي لا يفهمها سواهما

Saturday, June 14, 2008

مقتطفات


في واحدة صحبتي مشوفتهاش بقالي كتيرأول ما شافتني وسلمت عليا سألتني سؤال مهم ..

ها .. ازي أيامك؟..


رديت عليها بسرعة البرق وقولتلها أيامي حلوة !!!! وبعد ما قعدت مع نفسي قعدت أفكر هل فعلا أيامي حلوة طب ايه الحلو اللي فيها ماهو مش معقولة كلها حلوة يعني يبقى أنا بنافق نفسي أوي .. وبالفعل أنا بحس اني انا وايامي في معركة مع بعض وكل طرف عايز يكسب المعركة أينعم هي معركة بدون أسلحة بس بالتاكيد في خسائر

****************************************

أول امبارح حبيت أعمل مكرونة وكبدة .... ولكن قليل البخت يلاقي الامبوبة فاضية

***************************************

رصيدي خلص وأصحابي بيرنوا عليا كتير وانا مش برن عليهم فكرت في استخدام نظام شحتني شكرا بس تراجعت انا محبش اشحت رصيد من حد

*****************************************

بما اني محبش الهزيمة ومعنديش مانع أمر بالتجربة وافشل وأمر وافشل لحد ما اوصل للنجاح رحت اشتري فاكهة واخترت اني اجيب تفاح وقولت أكيد مش هتغش فيه ........... ورحت للفكهاني

اديني اثنين كيلو تفاح

حاضر

انت بتعبي التفاح ليه من الناحية اللي عندك دي هات من اللي هنا ده أحسن واديتلو تفاحتين يحطهم خدهم مني وفجأة لقيت كيس تفاح تاني مليان عن الكيس بتاعي

رحت قفشت الكيس وقولتله انت بدلت الاكياس ... انتو ايه مش بتخافوا من ربنا صدقني مش بينفع ربنا هيحاسبك

وسيبتوا ومشيت ................ وبرغم من اني انتصرت ومتضحكش عليا المرة دي بس اكتئبت اوي

يعني انا مفيش مرة هعرف اشتري حاجة من غير ما الاقي حد يضحك عليا يعني امنع الفاكهة خالص وارميها من حياتي عااااااااااااااااااااااااااااااااااا
*************************************
لظروف ما انا مسؤولة مسؤلية كاملة عن شئون البيت لحد ما ماماتي حبيبتي ترجع من السفر وبجد الله يكون في عون الزوجات اللي بيشتغلوا ........... ربنا يرجعك ليا يامامي ياحبيبتي بالسلامة

Thursday, May 22, 2008

طلب عاجل لجامعة الدماغ العربية


أصابتني حالة من الهلع والارق نتيجة للاحداث اليومية التي اشاهدها واتابعها .. وربما يرجع السبب ايضا الى ارتفاع الاسعار وخصوصا المواصلات اللي خلتني بفكر جديا اخدها جري من حلوان للمهندسين وقريبا من حلوان للمقطم ............ مش عارفة أنام ياناس اعمل ايه بس انا كده ممكن يجرالي حاجة كل شوية احلم باللبنانيين وشوية بالاخوان المسلمين وحبة بالفلسطينيين خلالالالالالالالاص مش قادرة كده انا ممكن ابقى ضحية للنشرات الاخبارية
طب اعمل ايه عشان اعرف انام كويس ومش تجيلي كوابيس شوروا عليا أكيد انا معمولي عمل وحد رماه البحر عشان ميتفكش مممممممم

أنا ممكن أجيب سحلية تكون لسه مطلقة جديد ولونها مقلم وأعدي عليها ... ولا أجيب خنفسة وبيضة فرخة تكون بيضاها يوم السبت وأدقهم على بعض وأعدي عليهم بردوا .... حلول مقنعة بردوا ايه رايكم !!!!

بس لا بلاش الواحد مش يعمل حجات كده من نفسه لحسن العمل يتقلب ضدي
انا استعين بالناس اللي بتفهم في الحجات دي هيه مفيش غيرها لجنة الوساطة العربية هي اللي تحللي المشكلة دي وتفكلي العمل ... وعلى غرار لبنان أطالب اللجنة العربية بحل مشكلتي "من فضلك يالجنة عايزة أنام كويس زي بقية الناس"

وقريبا هرفع طلب عاجل لجامعة الدماغ العربية بس تفتكروا اللجنة هتفكلي العمل اللي معمولي زي ما فكت العمل اللي كان معمول للبنان وتم التصالح بين الفرقاء اللبنانيين وأخيرا هينتخبوا رئيس للجمهورية ممممممممممممم! !!! عامة .. هجرب وأشوف

Wednesday, April 30, 2008

تاج فريد من نوعه


جالي تاج جديد وفريد من نوعه من مدونة في حب مصر
استعنّا على الشقى بالله
السؤال الاول
أذكر 10 أشياء عن نفسك
خجولة جدا بالرغم من ان ده يتعارض مع مهنتي لان الخجل، خصوصا لو كان له تأثير على عملك، اكيد بيكون سبب في الفشل

اجتماعية بالرغم من اني عمري ما ابتديت بالصداقة وده راجع للصفة الاولانية الخجل ولكني بحب الناس اوي واحب يكون ليا اصدقاء كتيييير

عندي قدرة على الاستماع لمشاكل الاخرين وده بينقلب ضدي بعدين لان من كتر الاستماع للمشاكل بيعملي انا حالة نفسية سيئة لاني بكون شايلة همهم

صريحة جدا واحيانا الصراحة بتكون عند بعض الناس قلة ذوق بس الحمد لله صراحتي محاوطها الذوقية لاني مش بحب حد يزعل مني

شخصية مرحة ومحبوبة الحمد لله وأكره الكآبة والتشاؤم

كنت بثق في الناس بسرعة وعندي حسن الظن بس حاليا باخد حذري كتييييييير عن الاول

طموحاتي المستقبلية كتيييرة ومهمة وأتمنى أحققها لاني شايفة إني موجودة في الدنيا دي لهدف مش هينتهي لحد ما أموت

بحب أتسوق اووووي دايما بعمل شوبنج حتى وانا معييش فلوس ههههههه عيني تبص على الحاجة وتفضل في دماغي وميهدليش بال غير لما اشتريها
استعانت بانتختي أميرة وقالتلي أني عنيدة وعصبية وكريمة وكمان أنيقة أحمدك ياااااااااارب
السؤال الثاني
اختر 5 أشخاص تهدى لهم التاج
الثالث
لا تهدى التاج لمن أهداك اياه........... اكيد طبعا
الرابع
أترك لصديقك الذى أهداك التاج بان التاج نزل وتعالى شوفه... لا غلاسة بقى هههههههههههههه
واخيرا ... شكرا يامصري ياغلبان على التاج اللذيذ ده (بجز على سناني)

Tuesday, April 22, 2008

شحاته أخر موديل


ذات يوم استوقفتني امرأة ترتدي ملابس أنيقة تطلب مني أن أعطيها سبعة جنيهات من أجل الذهاب إلى محافظة أخرى ، بحجة أنها لم تعد تملك من المال شيئًا، فاقترحت عليها أن تطلب هذا المبلغ من أحد غيري لاني بحاجة إلى جنيها واحدا كي أعود لمنزلي فثارت في وجهي قائلة:" ألا تريدي أن تتصدقي من أجل مالك وصحتك"، فأقسمت لها أني لاأملك شيئا الآن ، ثم ابتسمت لها وطلبت منها حين الحصول على المال بأن تأتي لي بجزء منه، فنظرت إلي شذرا ثم تركتني، ثم وجدتها في اليوم التالي في نفس المكان وتطلب نفس المبلغ من أناس أخرى فاستوقفتها وقلت :" أنتِ لم تعودي لبيتك منذ أمس ألا تجدي أحدا يعطيكي السبعة جنيهات ، ثم نظرت إلي باستغرب جعلتني أشعر بحماقتي وقالت :" عن ماذا تتحدثي أنا لاأعرفك "، شعرت حينها أن أعراض مرض الزهايمر بدأ يتسلل إليّ مبكرا وفي لطف طلبت منها أن تبتعد عن هذا العمل وتترك مهنة التسول وأن تبحث عن وظيفة تعينها على المعيشة، وفي سخرية قالت لي " هذا أكل عيشي أرجوكي ابتعدي عني الآن".
ده موقف حصل في يوم من أيامي الحلوة

Saturday, March 29, 2008

شوافة شمسية


بالرغم من الضائقة المالية التي أعاني منها وانتظاري لحسنة قليلة من محسن اللي قعدت أنادي عليه البوست اللي فات ومردش لحد دلوقتي ومن المحتمل ان يتم الحجز على بيتنا مما يضطرني الى الانضمام الى جماعة ارهابية لتفجير أي كشك عيش من اللي نزل جديد في منطقتنا وأخلص نفسي من ديوني وأخلص الناس من الطوابير اللي مبتخلصش ... فقد قمت ياحضرات المدونيين باقتراض مبلغ ما من أحد بنوك منزلنا المبجل وبمنتهى الاستهتار وعدم اتقان للمسؤولية قمت بشراء شوافة شمسية وطبعا زي ما كلكم عارفين السلف تلف والرد خسارة وبما اني مبيعشليش شوافات شمسية وكل ما اشتري واحدة تلقي مصرعها في التو والحال .. وأيضا بما ان الحياة حلوة نويت والنية صادقة على نصباية كبيرة لعمل مشروع يقلب موازين حياتي وهيخليني اسدد ديون شوافتي الشمسية
ونويت شراء أكبر كميات من العيش ابو خمس قروش أي شلن بالعملة المصرية ثم القيام بتخزينه في ثلجات حتى يتم نفاذ الكمية في البلد وبعدين لما الاقي الناس جعانة وبتاكل في بعضها هفرج عن العيش المخزون اللي عندي وهبيع الرغيف على جنية وربع وبما ان الشعب المصري قلبه طيب ويستطيع التكيف مع أي ظروف مهما كانت ومش هيرضي انه يموت من الجوع هيضطر يشتري مني وبكده أكون حققت حلم حياتي وابقى غنية وأسدد ديون شوافتي الشمسية

Tuesday, March 18, 2008

عمرو خالد


بالرغم من اني اعاني من ازمة لانظير لها وهي اني لسه مقبضتش لحد دلوقتي واعاني من ضائقة مالية شديد ولله يامحسنين لله حسنة قليلة تمنع بلاوي كتيرة واللي عند ربنا ميروحش يامحسن .. محسن مين ده ماعلينا

انا سعيدة سعيدة سعيدة ده مش اسمي طبعا ... بس دي حالة مريت بيها تعرفوا ليه اصلي شوفت عمرو خالد طبعا هتقولوا وايه يعني اقولكم هو كده مش عارفة ليه لما شوفت الراجل ده من جوايا فرحت .. وبعيدا عن الجدل الدائر حول الداعية عمرو خالد .. الراجل ده فعلا مثال جيد للمسلم يحتذى به .. وحقيقي التبسم في وجه اخيك صدقة الراجل ماشاء الله عليه بجد ابتسامته تشرح القلب ولما بتكلمه بتشعر كانك تعرفه ويعرفك عن قرب .

عامة مش هتكلم كتير عن عمرو خالد عشان عارفة ان هيحصل انقلاب ونقد عليه شديد بس انا بتكلم بعيدا عن أي ايجابيات او سلبيات عملها عمرو خالد .. الراجل ده ادخل الى قلبي السرور
وده حصل في يوم من أيامي الحلوة
وادعولي اقبض بقىىىىىىىىى عاااااااااااااااااااااااااااا

Wednesday, March 5, 2008

قطعة زجاج


عندما تبحث عن الامل رافضا الاستسلام لليأس الذي يحاوطك من كل الاتجاهات
وتستمر في مقولة ابتدعتها انت واتخذتها شعارا لك "ايامي حلوة" فتقولها على اقتناع بان غدا سوف يكون
احلى ويأتي الغد دون تحقيق ذلك ثم الغد ثم الغد، حينها تشعر انك تمتلك خاصية قطعة زجاج قابلة للكسر

Monday, February 25, 2008

أغلى كيلو جزر في مصر


انا بقى عندي عقدة مكلكعة من ساعة قصتي مع الموز واللي متابع المدونة طبعا كله عارفها واللي مش متابع يدخل هنا حسبي الله ونعم الوكيل

انتختي قلوب حائرة اتبرعت بانها تطلع الكلكوعة اللي عندي دي وحاولت كتير معايا وقعدت تدني في جلسات نفسوية كتيرة

وفي يوم نيمتني قلوب حائرة على الشيزلونج وحاولت تطلع العقدة اللي جوايا تجاه شراء اي فاكهة وبعد ما خلصنا جلسة العلاج

قالتلي يلا قومي انتي بقيتي زي الفل ولا اجدع فاكهاني ولا اي بياع هيعرف ينصب عليكي تاني

بس انا بردو لسه قلقانة وخايفة حد من الاخوة دول ينصب عليا

ولايهمك قومي واتشجعي كده

قومت وجبت ماية وخدت حبوب الشجاعة وبلبعتها.. ورجعتلي الثقة تاني

وقومت زي عبد الفتاح القصري كده .. انا لاننكن حد ينصب عليا ابداااااااااااا

يامجنون ياجزر
*********
واحنا ماشيين في الشارع انا وانتختي قلوب حائرة اول ماعيني وقعت في الشارع وانا ماشية وقعت على جزر قولت الجزر بيقوى النظر ومفيد وانا بقى واخده حبيبات شجاعة من هنا للسنة اللي جاية ولا اي حد فيكي يامحروسة هيعرف ينصب عليا
ورحت للراجل وقولته

كيلو جزر لو سمحت

دول اربعة كيلو خديهم على بعض بقى ياابلة

لا من فضلك انا عايزة كيلو واحد بس

ليه كده ياابلة اسمعي الكلام وخديهم كلهم

يوووووووووووه لاياعم هات كيلو بقى وخلصني

طيب ياابلة حاضر بس خليكي فاكرة انتي اللي قولتي

يحضرلك الخير

واداني الكيلو وخد الفلوس وخلاص
زميله بقى اللي معاه كان راشق عينه في الشنطة وشاف معايا عشرينتين يعني اربعين جنية

لو سمحتي باابلة الله يخليكي هاتي الفلوس اللي معاكي ده افكهالك

لا ياسيدي مش عايزة افك الفلوس

الله يخليكي انا محتاج اجمد الفلوس اللي معايا لحسن كلهم فكة

لا معلش

ربنا يكرمك طيب اديني بس افكلك عشرين واحدة

والله مش عايزة افك معلش

الله يخليكي ربنا يكرمك هاتي افكلك انا معايا فكة كتير عايز اخلص منها وخدي الجزرتين دول هدية اهوه زيادة ياستي

لاحول ولاقوة الا بالله

معلش هاتي افكلك ربنا يكرمك

حاضر ياسيدي
وبحسن نية اديته يفكلي
خد عشرنتين اهم

وبعد الفلوس اللي ادهالي فكة لقيتهم 39 جنية

ايه ياعم دي الفلوس ناقصة جنية

ناقصة جنية ازاي وريني كده

وعد الفلوس قدامي انا وانتختي قلوب حائرة
وادهوملي تاني وقالي يلا ياستي ادي الجنية اللي كان ناقص اتفضلي

وخدت الفلوس في الشنطة ملفوفين بعد ما شوفته بعيني اللي هتخرمهم الدود دول بيعدهم صح قدامي وقدام انتختي ومشيت بدون اي خوانة
وبفتح الشنطة في المترو عشان اطلع فلوس التذكرة والاقي الفلوس ناقصة عشرين جنية

ايه ده فين الفلوس

قلوب حائرة ... شوفي كده يابنتي

فين بس انا اتسرقت

اتسرقتي ازاي


بتاع الجزرسحب من الفلوس عشرين جنية لما خدهم في المرة الثانية

ياخبر خدهم ازاي ده محترف


انا اتسرقت وبمزاجي انا اللي اديتوا الفلوس يفكها

اتارية قعد يلح عليكي


كيلو الجزر وقف عليا بـ21 جنية


اغلى كيلو جزر شوفته في حياتي


تمتمتمممممممممممممممممممممممممممممممممممممممممممممممممم

وطبعا ياحضرات كانت الصدمة اتسرقت بمزاجي
وياخسارتك ياحبوب الشجاعة


اتاري ان اللعبة دي بيعملوها كتير من البايعين تفك فلوس يدهولك ناقصة في الاول جنية وبعدين لما تقولوا عليه يخدهم منك تاني ويعدهم قدامك طريقة ما متشوفهوش منها انه سحب فلوس وبعدين يديك الجنية وبما ان الفلوس اتعدت قدامك للمرة الثانية انت بتخدها
ولما حكيت لاصحابي
قالولي يوووووووه هيه اتعملت فيكي يابنتي دي حاجة معروفة وحكولي بقى عن مصايب اللي اتسرق منها 200 جنية بالطريقة دي وهيه بتشتري مانجو واللي اتسرق منها 100 جنية وغيرو وغيرو
اللي مضايقني بس اني اتسرقت قدام عيني ومشوفتش
وبصراحة الكلكوعة اللي عندي كبرت اوووووووووي ولا اي جلسات نفسوية هتطلع العقدة دي من جوايا

المشكلة كمان اني لما روحت البيت وحكيتلهم طبعا خدوا فكرة صعب اوي عني مرة موز ومرة جزر سمعتي بقت وحشة بقى وحلفوني ما اجرب ولا اشتري اي حاجة خالص من الشارع
تاني يوم داخله البيت بكيس بقسماط لقيتهم كلهم بنفس واحد

انتي مش بتحرمي لسه بتشتري بردو حجات من الشارع


ياجماعة ده بقسماط


اظاهر اني اتحرمت اني اشتري اي نوع من اي حاجة في اي مكان

تفتكروا العيب فيا ولا في الجلسات النفسوية بتاعت قلوب حائرة ولا في حبوب الشجاعة اللي انا بلبعتها ولا في الناس اللي في البلد وبتسرق بعضها ولا في الغش و ايه ولا ايه
بجد مش متصورة الناس بتقبل على نفسها فلوس حرام ازاي

ومازال الصمود يحاوطني ..................ايامنا حلوة عادي بقى خليكوا فريش

Saturday, February 16, 2008

عيد الحب


حب ايه اللي انت جاي تقول عليه انت عارف قبله معنى الحب ايه
اااه فينك ياست تيجي تشوفي الدنيا كلها حب في حب في يوم عيد الحب

عااااااا محدش قالي هابي فالنتين ولا حد جابلي وردة صفراء ولا علبة مستطيلة الاضلاع ومغلفة بالجلاد الاحمر وفيها هدية مجهولة زي اللي بشوف البنات مساكها في مترو الانفاق
ماليش دعوة اشمعنى هما وانا لا انا عايزة حد يقولي هابي فالنتين ان شاء الله يكون البواب ويجبلي حتى علبة بسكويت الشمعدان الاحمر ده هدية بس تكون مغلفة
البنات كلها ماشية في الشارع وشايله في ايدها هدايا وورد والدنيا كلها احمر في احمر تقولش الاهلي بيلعب


الغربية اني حاولت انسى مأساتي وانا في الشارع واني ماشية من غير هدية وسط البشر وروحت بيتنا وانا طالعة على السلالم بغني الدنيا ربيع والجو بديع وقفلي على كل المواضيع وقولت ولايهمني انا افتح التليفزيون بقى واتفرجلي على اي فيلم فريحي كده بس تقولوا ايه بقى المنحوس منحوس

افتح بقى التليفزيون الاقي ايييييييييييه

القنوات كلها مورهاش سيرة غير عيد الحب
الاقي اغاني كلها حب في حب _ كله كلام في الهواء قابلوني لو فلحتو_


احول القناة


حلقة عن طبخة يوم عيد الحب _ كمان هو ليه طبخة معينة اكيد كلها صلصة حمراء بردو والسلطة ورد احمر على طماطم _

احول القناة


الاقي برنامج عن تقديم الهدايا في عيد الحب _ بوكيهات ورد وبرفانات بلا وكسة_

احول القناة


برامج دينية عن اييييييه تصوروا عن عيد الحب بردوا وبيناقشوا فيها الاحتفال بالعيد ده حرام ولا حلال _ اهوه كده الكلام اديها مترحموهاش ال عيد الحب ال _

قفلت التليفزيون ولا يهمني مازال الصمود يحاوطني من كل الاتجاهات
الدنيا ربيع والجو بديع قفلي على كل المواضيع قفل قفل _ ده انا بغني_

قولت اعمل بلح الشام عشان عيد ميلاد الواد اخويا محمود هيكمل اربع سنين قولت افرحه
وجبت كتاب ابلة مش عارفة مين كده اهو كتاب حلويات كنت اشتريته بجنية من المترو وقعدت ونفذت التعليمات بيضة بيضة ولا سبت اي حاجة بس متعرفوش طلع عامل ليه كده يععععععععععععععع
فشل فشل فشل مشروع بلح الشام فشل فشل ذريع

قولت يلا هيه جات عليك ولا يهمني
قولت اعمل تورتة طيب عملتها وحطيتها في الفرن وبعديها بربع ساعة اشم ريحة في الشقة واخواتي بيجروا الحقي شوفي في ايه في المطبخ هنموت الاقي ريحة غاز بشعة وصوت طالع من الفرن شديد
يالهوي في ايه
افتحي الفرن
لا لو فتحت التورتة تبوظ
لا افتحي
مش هفتح تبوظ
تبوظ ولا نموت
نموت بس التورتة تعيش
افتحي الفرن
طيب خلاص افتحوا انتو
ياسلام عشان يفرقع في وشنا انتي اللي عملتي كده يبقى انتي اللي تفتحيه
ايه الانانية دي خلاص نفتحو مع بعض
لا لالالالا
افتحي الفرن هنموت
وبعدين قولت مبدهاش هنموت بجد
فتحنا مش عارفة في ايه بالظبط بس قفلنا الفرن وبعدين ولاعناه من جديد وطبعا كل شئ راح وانقضى

عادي ولا يهمني انا متفائلة وايامي كلها حلوة ولن ادع عيد الحب وبلح الشام والتورتة يهزمونني
حاجة اخيرة بقى : مره اثنين بيحبوا بعض فا خرجيين يوم الفالنطين فا قالتله قولى كلام يوقف قلبى
قالها ابوكى وراكى
دار يادار يادار قويللي يادار راحو فين حبايب الدار فين فين _ دي رنة موبيلي اصلها ناقصة كأبة_

Tuesday, February 5, 2008

ماذا تفعل لو كنت مكاني؟


ممكن تبقى قاعدة في امان الله في مواصلاتك اليومية وفجأة تلاقي حد اقتحم عليكي الطريق وطلب ايديك ياحلولي ياحلولي .. عريس يابووووووووي
طوخه بس متعورهوش يابوي

هحكي على ثلاث مواقف حصلو في ثلاث ايام من ايامي .. وطبعا زي ما انتم عارفين ايامنا ايييييييييييييييييييييييييييييييه ... حلوووووووووووة ..........
(مش اوي يعني)!!!!

العريس الاول
************
ياعيني عليه المفروض ينزل في محطته منزلش فضل قاعد لحد مانزل ورايا وكمان ركب معايا ميكروباص تاني لحد ما جه لحد مكان الشغل وكانت فضحتي بجلاجل زمايلي اللي في الشغل كلهم شافوا الاحداث

بس انتي يابس يابس يابس.......
( عادي ده على اساس انه بينادي على قطة)

لو سمحتي ياانسه لو سحمتي ارجوكي ردي عليا انا والله مقصدش اعاكسك خالص

(وانا في سباق جري وكنت على وشك اقع واتدحرج في الارض بس ربنا ستر)
وفجاة نط قدامي
وبعدين يااستاذ ميصحش كده
انا والله مش بعاكس انا بس عايز اعرف حاجة واحدة بس انتي مرتبطة
لاحول ولا قوة الا بالله
من فضلك انا عايز اجي اخطبك انا بشوفك في المواصلات كل يوم بقالي ثلاث او اربع شهور تقريبا ومعجب بيكي وشايفك بتقري قران وشكلك متدين ومحترم
طب لو سمحت بس عايزة اعدي عشان انا عندي شغل
من فضلك انا جاي المشوار ده كله وراكي واول مرة اجي هنا ( محسسني اني جبته في الصحراء )
من فضلك انا عايز رقم والدك وبس انا مش عارف اجيب عنوانك ولا اي حاجة انا اسف للطريقة دي بجد بس مش قدامي غيرها

(عريس يابوي بس اعمل ايه انا في موقف لااحسد عليه وبصراحة الراجل شكله محترم ومش بيهرج ولا بيعاكس ) تممممممممم تممممممممممممممممم اعمل ايييييييييييه ... صمدت ومرضتش اقول بردو ومشيت

المهم الراجل طلع مش بيعاكس فعلا وعرف عنواني بردو بطريقة ما واتقدم فعلا ومحصلش نصيب لاسباب امنية

عريس تاني مرة ومن نفس الاتوبيس
*********************
نزل ورايا


ياانسة لو سمحتي


بصيت كده بكل خضة وطلعت اجري طلع ورايا وركب معايا الميكروباص اللي بيوديني لحد الشغل وبعدين قعد جمبي واكل ودني من الكلام وانا رزعة وشي في الازاز بتاع الميكروباص لحد ما راسي اتلوحت
انا اسف للطريقة دي بس فعلا مش عارف اعرف عنوان حضرتك منين انا عايز اجي اخطبك انا بشوفك بقالي تقريبا ثلاث اسابيع وبعدين مش عارف اوصلك ازاي من فضلك ردي عليا انا مش اقصد اي شئ وحش خالص
وبعدين ياحضرت
مش عايز من حضرتك اي شئ غير رقم والدك بس
(يادي لنيلة ايه حكاية رقم والدك ده) .. في سري طبعا
(وطبعا الدنيا كلها بتتفرج عليا في الميكروباص)

وبعدين مينفعش كده بجد من فضلك
قال متكسفنيش لو سمحتي انا والله زيك محرج بس مفيش قدامي غير الطريقة دي
انا عايز اخطبك

تخطبني ازاي وانت متعرفنيش اصلا

انا لقيت فيكي مواصفات الزوجة اللي بتمناها ولو معندكيش مانع يكمل تعارفنا من خلال الخطوبة

والله ياحضرت مش عارفة اقول ايه

متقوليش حاجة اديني بس رقم والدك

بصراحة كنت على وشك اديله رقم الوالد بس مش عارفة لقيت نفسي بقول اني بعتذر انا محبش ارتبط بالطريقة دي

(مالها الطريقة دي خليني كده قاعده جمب امي)


يعني بترفضي

معلش انا بعتذر للمرة الثانية
زهق وبعدين قالي طيب استاذنك سلام عليكم
وعليكم السلام
*******************************************

كلاكيت عريس ثالث مرة

********************
ده بقى مكلفش نفسه ومشي ورايا لحد الشغل
جه قعد جمبي بكل عنطظة في الاتوبيس ....


سلام عليكم
عليكم السلام
ممكن اسال سؤال
اتفضل
حضرتك مرتبطة
نعم
بقولك حضرتك مرتبطة
بتسال ليه حضرتك
عايز اعرف بس
سكووووووووت
انا عايز اتعرف على حضرتك ممكن
لا والله مش ممكن
نعم
بقول لحضرتك مش ممكن
طيب
وبعدها بخمس دقايق
انا ياانسه قاصد خير..
عايز ايه يعني
دلوقتي عايز اتعرف
وانا مش بتعرف علي حد
الله ما طولك ياروح ...........عايزة انزل من الاتوبيس ده
طيب ياانسه انا كنت عايز بس اعرف عنوان بيتكم بالتفصيل
سكوووووووت
انا عايز اخطبك
سكووووووووووت
طيب ردي عليا
سكوووووووووت
وبعدين بشخطة كده .. ها هتقولي ولا ايه
( زي ما يكون بيذلي وعايز يقولي احمدي ربنا اني كلمتك اصلا هتتكلمي ولا اسحب رغبتي في الارتباط بيكي)
رديت بقى اعمل ايه اتشخط فيا وانا بحب الرجالة اللي بتشخط
ياستاذ الموقف ده مش ظريف خالص بجد
معلش انا عارف بس انتي متوترة زيادة عن اللزوم الموقف مش يستدعي كل التوتر ده
( ياسلالالالالالالالالالالالالالالالالام)

بصراحة بصراحة العريس ده شكله جنتل خالص واحسن من الاثنين اللي فاته بس بجد الموقف محرج جدااااا والطريقة دي مش بتخلي البنت تعرف تتصرف
لو سمحت بقى منفعش بجد اللي عايز يتربط بحد بيتصرف ويعرف عنوانه
المهم انه الراجل نفسه طلع قصير ونزل وسابلي الاتوبيس وطفش

انا بقى مسلمتش من التريقه بتاعت الشوباب الامور اللي كانه متابعين الفيلم العربي ده
اللي يقول هو نزل ليه مش كان حاول مرة اخرى
والتاني يقول ليه حق والله
والثالث يقول معلش هيه لحظة الفراق صعبة
وكلام بقى جميل خالص

وحلفت ما هركب الاتوبيس ده تاني مع ان دي اسهل مواصلة لشغلي وبتعب عقبال ماالاقي مواصلة تانية بس يلا محدش بياكلها بالساهل

يلا معلش هي ايامنا كده حلووووووووووووة
السؤال المهم بقى ممكن الشاب يعجب بواحدة بيشوفها في المواصلات وميعرفش عنها اي حاجة خالص ويحاول يعرف عنوانها ويتقدملها.. طيب يتقدملها على اساس ايه هو ميعرفش عنها اي حاجة خالص ؟
والسؤال الاهم ماذا تفعل لو كنت مكاني؟

Saturday, January 5, 2008

لا اعلم


اهلا بك ومرحبا


ليس بيدي شيئا سوى الترحيب بك

افتح ذراعي لك مضطرة .. حاضنة ما تجمعه لي من افراح واحزان لم اعرفها بعد

لااعلم ماذا سوف تفعل بايامي

لا اعلم ماذا ستاخذ مني وتترك لي

لا اعلم ماذا تحمل لي من هدايا

لا اعلم ماذا تحمل لي من احزان

اعلمك اني خائفة منك

نعم اهابك بشدة

فمع وجودك باول يوم ... جئت لي برعد وبرق يخيفني

ولا اعلم ماذا تفعل بايامي القادمة

فرفقا بي عام 2008