Saturday, April 14, 2007

كلنا ولاد تسعة وبنسعى



هناك بعض الاشخاص الذين يشعرون بالنقص .. فيقومون بسكبه على هيئة حقد أو حسد .. ولكن خذها مني حكمه وأنزع الحقد والحسد من قلبك .. " كلنا ولاد تسعة وبنسعى"..


طول ما انت ماشي في الشارع قولها خمس مرات "كلنا ولاد تسعة وبنسعى" ..


متتهزش ولاتتراجع لو لقيت عربية أحدث موديل فرملت قدامك مرة واحدة لانها كانت هتخبطك .. بصلها كده بكل أرف وقول لصاحبها "كلنا ولاد تسعة وبنسعى".. طبعا صاحبها هيحس انك انسان حقود وعينك تتدب فيها رصاصة .. بس ولا يهمك تماسك . . انت الاقوى والاغنى أكيد..


وانتي لما عنيكي تقع على فارس الاحلام ومعاه واحدة غيرك .. أوعي تتحصري وتعيطي بقي وتعمليها مناحة .. انتي تبوصلهم كده بقلب جامد وقولي "كلنا ولاد تسعة وبنسعى" ..


لما يجي زميلك في العمل ويقولك انا ابن باشا ابويا صاحب أملاك عمروا ما اشتغل في اي حاجة من الاخر يعملك فيلم "الايدي الناعمة" ويفهمك انو بيشتغل بس لتضيع وقت الفراغ .. رد عليه بكل تناكة وقولوا "كلنا ولاد تسعة وبنسعى"..


لما يجي أمين شرطة ويحط أيدوا على كتفك فجأة زي ما يكون قفشك ويقولك طلع البطاقة ياحضرت انا مشتبه فيك "الدستور اتعدل بقى" .. طلعلوا البطاقة بقلب جامد كده وقولوا "كلنا ولاد تسعة وبنسعى".. ومتقلقش لو خدك على اقرب قسم شرطة قبل ما توصل عشرين جنية في الخباثة كده هيسيبك..ولا اقولك بلاش لحسن دي "رشوة" اتحبسلك يومين وخلاص..

أما المحسود فاقول له .. اصبر على حسد الحسود فان صبرك قاتله
كالنار تأكل بعضها ان لم تجد ما تأكله

6 comments:

Anonymous said...

ارفع لكي القبعة عزيزتي شيرين تقديرا لخفة ظلك في الكتابة والتعبير عن رأيك .. فكثيرا ما نقرأ ولكن قلما يعجبنا ما نقرأ .. وكتابتك من القليل الذي يعجبني .

Anonymous said...

بسم الله ما شاء الله .. عيني عليكي باردة .. روحي يا شيرين يا بنت مامتك .. الهي يفتحها في وشك .. ويجعل بلوجرك عمار

Anonymous said...

ياأخت شيرين هذه المدونة تبين مدى حقدك وحسدك على الناس الاغنياء ودة غلط مفروض تعالجى نفسك ، وغير كدة اتهمك بسرقة حوار بين صديقتين وانتى انتهزتيها وكتبتيها وانا هخليهم يرفعوا قضية حقوق النشر هو انتى اتعودتى تاخدى كل حاجة كوبي وبست

خواطر شاب غاضب said...

كلامك صح يا قمر
ياريت تبقي تقولي رايك في مدونتي بقي

Anonymous said...

ما شاء الله عليكي يا شيرويت ربنا يكرمك ويطلعك من جو الحقد والحسد إللي أنت عيشاه ده ويتوب عليكي

Anonymous said...

رحاب الحبيب
اشكرك جدا على تعليقك واكيد انا سعيدة باعجابك بالمدونة

أميرة

بما اننا ولاد تسعة وبنسعى احب اقولك في وشك كان عندنا كتكوت وكبر يامرمر

مجهول

عزيزتي انا بحاول اعالج نفسي من زمان بس مفيش فايدة ..اما بالنسبة للحديث بتاع الصديقتين فانا بقي هرفع محامي واكسب القضية مش تقلقي

شاب غاضب
اشكرك علي مرورك لمدونتي

مجهول

يارب ادعيلي لحسن المرض مكلبش فيها .. كلنا ولاد تسعة وبنسعى