Saturday, April 21, 2007

رحلة عمري

الصورة دي للمنظر الساحر الذي يتمتع به وادي الريان
نظرا لحالة الهلع التي أصابت كل من ذهب الى بلد "الكتاكيت" .. ولااعرف من الذي أطلق عليها هذا المسمي
بالرغم من بحثي طوال هذا اليوم عن كتكوت واحد ولم أجده .. أحب ان أهنئي السادة الزملاء الذين حالفهم الحظ لعدم طلوعهم تلك "الرحلة" .. التي أطلق عليها هذا المسمى "رحلة" ..

مش عارفة ليه تذكرت اغنية المطرب مصطفي كامل وهو بيقول "رحلة عمري"
بفرحي، بجرحي
دا حلوه بمر
رحلة عمري
لازم غصب عني تمر
هي حياتنا
نقط وحروف
حبة حب
وحبة خوف
نحزن
تكسرنا الظروف
الإنسان مش دايما حر

اااااااااه يامصطفي ياكامل جيت على الجرح .. أصل الحكاية باختصار اني في ذات الايام قررت اني اطلع رحلة تبع شغلي وخير اللهم اجعلوا خير .. كنت بحلم اني اشوف الشلالات اللي في "بلد الكتاكيت" ..(الفيوم) .. أصلي من ساعة ما شفت احمد السقا في فيلم "أفريكانو" وهو بيرمي نفسو من الشلال قدام منى ذكي وبيقولها بحببببببببببببك .. وانا بحلم باليوم ده باجماعة .. ومحدش يفهمني غلط ويقول اني بحلم بحد بيرمي نفسوا عشاني من الشلال .. لاطبعا انا كنت عايزة اشوف الشلال بس ولو حد عايز يرمي نفسو هو حر بقي انا ماليش دعوة ..

يوم في حياتي

يوم الجمعة الموافق 20إبريل سنة 2007 .. اليوم ده مش عايزاكوا تنسوه ابدا .. عايزاكم تفضلو فاكرينوا طول العمر .. لان ربما يكون اليوم ده هو اللي بيطلقوا عليه انو يوم " كذبة إبريل" اصل كان المفروض اني اشوف الشلالات اللي قلتلكم عليها.. ولكن الحظ لم يحالفني .. المنحوس منحوس يااخونا..

أحلام اليقظة

كنت نايمة في العربية بتاعت الرحلة وحلمت حلم جميل "شفت منى واحمد في أفريكانو وشفت احمد وهو بيرمي نفسوا في الشلال" للمرة الالف في حياتي .. وفجأة لقيت حد بيصحيني بعنف قومي قومي وصلنا شوفي المنظر .. ايه ياجماعة هو أحمد السقا جه بجد ولا ايه .. وخير اللهم اجعلو خير لقيت نفسي في صحراء الشمس من فوقنا والرمال من تحتنا والبحر بعيد عننا .. ايه ده احنا فين .. احنا وصلنا "لوادي الريان" .. صحيح هو مش الريان ده اللي نصب على الناس قبل كده زماااااان .. يمكن كان عامل المكان ده لذكراه .. ما علينا طيب فين الشلالات ياجماعة ده حلم عمري .. وكانت الاجابة ان مفيش شلالات .. يالهووي يعني مفيش شلال .. ولا أحمد السقا حتى .. وبالرغم من كده مزعلتش قلت مش مشكلة ابقي اروح "افريقيا" في "رحلة" بردوا وأشوف الشلال هي هتقف عليه يعني .. وبالمرة كمان الواحد يتعرف على الناس الافارقة الحلوين دول معرفة الناس كنز لايفنى..

توزيع الوجبة

تم توزيع الوجبة بانتظام وهي عبارة عن أرز بالجمبري والسمك والسلطات... وكل اللي ياخد وجبتوا يمشي بقي في اي حتة في الصحراء .. أقصد "الوادي" .. وادي الريان ياجماعة ركزوا بقى .. عند الركن البعيد الهادئ .. على رأي الست أنغام..

البحث عن الحقيقة

كل واحد ماسك في ايدوا وجبتوا وماشي مش عارف رايح فين بالظبط .. .. الشمس واقفة على رؤسنا جميعا أشعر بان ذلك اليوم هو "يوم القيامة" وتملأنا الذنوب .. انها ساعة العذاب .. دموعي تريد ان تنطلق .. ولكن جاءت الساعة التي لاينفع فيها الندم ..

اعتصام.. واحتجاج .. ومعارضة .. وانقلاب .. وكل حاجة

بعد فشل عملية البحث عن الحقيقة التي وجدناها سراب قررنا نعمل انقلاب .. هما بتوع موريتانيا احسن مننا في ايه.. لازم نحتج .. المكان لايصلح للاستخدام الآدمي حتي البحر شكلو عامل زي المصرف الصحي .. مستحيل نقعد في المكان ده ..

رحلة أونطة .. عايزيين فلوسنا

التزمنا مقاعدنا في أتوبيس الرحلة مرة أخرى .. لازم نروح مكان افضل من كده .. وبعد انعقاد قمة ذكورية مطولة تشبه القمم العربية في عقدها ولكنها تختلف معاها في اننا خرجنا من قمتنا بنتيجة .. وهي ان كل فرد سوف يدفع مبلغ قليل من المال لنذهب الى مكان اخر أفضل ...

رحلة عذاب من أجل الوصل لقرية الاحلام

عايزة اقولكم اننا عشان نروح مكان تاني في "بلد الكتاكيت" مكان بيقولوا عليه اسموا "قرية الاحلام" .. تقريبا سافرنا سفر جديد .. غير السفر الاولاني .. الى ان وصلنا لمكان لايفرق عن الاخر غير وجود ثلاث مراكب في البحر وكافيتريا للجلوس بها مظلات.. (احسن من مفيش ياجماعة) .. صحيح "قرية احلام" اسم على مسمى.. بس دعيت ربنا كتير اني اصحى من الكابوس ده .. أقصد الحلم

محاولة لرمي الساعات المؤلمة للخلف

حاولنا جميعا الاستمتاع بالوقت .. بركوب المراكب ومشاهدة البحر الذي يتمتع بمياه رصاصية اللون .. على حد قول أحد الزملاء .. ويتمتع ايضا بوجود بعض الدجاجات التي تم اعدامها نظرا لاصابتها بمرض أنفلونزا الطيور.. (تقريبا الطيور مضايقة من ان السمك لسه بخير)... وبالرغم من كده فنحن شعب محب للحياة مهما وقفت امامنا الصعوبات فاخذنا نواسي بعضنا البعض ونشعر بعضا ان اليوم هو أجمل ليالي العمر فلابد من الاستمتاع به .

التمني

أتمني ان ارجع الى بيتي عاجلا .. فأمي دائما تقول "مفيش احسن من قاعدة البيت" .. وأدي أخرة اللي مش بيسمع كلمة ماما تقولها ..

افتكرت مصطفي كامل وهو بيقول

توحشني شمس بلادي
صوت الحنين بنادي
راحل وجاي ف ميعادي
ح افضل لآخر عمري
الطير الحزين الشادي
راضي
برحلة عمري
رحلة عمري
ملحوظة: باب النعي مفتوح في الكومنتات .. منجلكمش في رحلة وحشة ياقادر ياكريم

21 comments:

Anonymous said...

كل كلام العزاء والمواساة لن يكفي لمسح هذه الذكرة يا شيرين ولكن يكفيكي انك عودتي الي ارض محيط سالمة غانمة

شيرين said...

عزيزتي نرمين نسيتي تكتبي اسمك طبعا بس حبيت اكتبهولك انا عشان السادة القراء يعرفوكي اشكرك على نعيك .. منجلكيش في رحلة وحشة ياقادر ياكريم.. وأقدم لكي التهنئة لعدم طلوعك الرحلة

wael elgazawey said...

حلوة اوي يا شيرين والحمد لله اني مكنتش معاكم.. انا مش معاهم.. على راى الفيلم.. مش الاغنية.. المهم انتوا روحتوا المكان الغلط لان بلد الكتاكيت.. ااقصد الفيوم فيها مكان واحد فقط ممكن أن الانسان يروحه.. وهو الشلالت وبعض الاماكن الاخرى التي يزورها الاجانب بتوع فلندا والدول الاسكندنفية.. اللي بيزوروا القاهرة والفيوم

عموما ابشرك بانك باللي انتي كتبتيه ضربتي السياحة بالثلث.. وعلى فكرة اختيار الفيوم في شهر ابريل من الاساس كان غلطة لا تغتفر.. بس انا محبيتش اتكلم قبل الرحلة عشان انا مش طالع اصلا

وعلى فكرة بحيرة قارون ووداي الريان ارحم بكتير من أماكن اخرى في الفيوم.. عموما رحلة بعيدة.. واتمنى أن يكون لها ذكرى سعيدة

وكمان زى ما قولتلك أن الرحلة خلتك تكتبي حاجة جديدة في المدونة ودة شئ كويس

ولا عزاء في الرحلات

Anonymous said...

واللهي يا شيرين انا كنت هزفر الكثير من الدموع على عدم مشركتي ليكم الرحلةليكتمل الثلاثي بتاعنا ولكني كنت هزفر دموع مضاعفة لو كنت جئت بهذه النتيجة المذرية وادي جزء اللي يطلع رحلة من غير بيبو

شيرين said...

وائل الغزاوي
الله يسامحك لانك كنت عارف باللي ممكن يكون في بلد الكتاكيت ومنبهتناش ..على العموم مجلكش في رحلة وحشة

بيبو
اشعر بشماته في كلماتك التي جعلتني ازرف دموعا .. واشعر ايضا ان حزنك لعدم طلوعك الرحلة معنا تحول الي حقد وحسد وربما يكون هذا هو السبب الذي جعلنا نصل الى هذه الدرجة المذرية .. عموما كان عندنا كتكوت وكبر

أميرة said...

ياااااااااااه يا شيرين .. فيوم وغيوم وسمك وعك .. يوم غريب وعجيب ..

هاقولك على كتبته عن الرحلة عشان صوان العزا يبقا واحد:

خيبة أمل في رحلة عمل
*******************
انتظرناها بلهف .. واعددنا لها الكثير .. وتفاءلنا بها أن تكون منفسا لنا من ضغط الحياة التي نعامل فيها أنفسنا كآلات .. (الفيوم .. وادي الريان) .. كان هذا عنوان الرحلة التي اعلنت عنها الشركة ..

حملتنا الاحلام والأماني أن نعيش يوما بصفاء السماء وجمال البحر ونعومة الرمال .. لكن الحال كان معاكس لهذه الآمال ..

هبطت بنا مركبة العمل في شاطئ أقبح من عشوائيات القاهرة .. وحطمت معها كل أمانينا الزاهرة .. واذا سألني احد عنها اقول {لا تسألوا عن أشياء ان تبدا لكم تسؤكم }.

لاتسألوني كيف أمضينا الساعات .. وكيف كان لنا في هذا اليوم أي ذكريات ..

Anonymous said...

حراااام .. كفاية اللى احنا شوفناة في الرحلة المفروض ان احنا ننسى بس انتى كدة هتخلينا نفتكر
واوعدك ياشيرين ان مش هفتح البلوجر بتاعك تاني عشان مفتكرش اليوم دة تانى .. أم جاكي

Anonymous said...

السلام عليكم ورحمة الله وبركاته
شيري الموضوع جميل جداً وانا بحمد ربنا اني مكنتش معاكم وعلي فكره انا كنت متوقعه ان اللي انتوا شفتيه ده هيحصل لان انا كنت عايزه اطلع وبابا حظرني اني اطلع رحلة الي وادي الريان وعلي العموم يا شيري ده درس يعلمك انك ماتطلعيش رحلة تاني تبع محيط
وانا بوعدك برحلة قريبة بس تكون بعيد عن الشركة اللي عايزه اعرفه يا شيري ازاي الميه كانت لونها رصاصي اكيد ده من تأثير العاصفه اللي حصلت
علي العموم رحلة تفوت ولا حد يموووووت
samah

Anonymous said...

شيرين حرب ..
أنا بقول حاجة واحدة بس "حسبي الله ونعم الوكيل" .. الحمد لله اني رحت الرحلة تقريباً الرحلة دي كانت تكفير ذنوب.

Anonymous said...

داليا.. شيرويت أنت نستيني الرحلة من طريقة كلامك الجميلة وعلي العموم ألف حمد الله علي السلامة .. وزي ما شيرين ما قالت أحنا كفرنا من ذنوبنا في الرحلة.

Anonymous said...

داليا.. شيري أنا عايزة أقول كلام كتير أوي بس الفرحة نستني بقول ايه مخنوقة عايزة أخنوق حد من محيط "عزائي الوحيد الصحبة الحلوة"

wael elgazawey said...

بالرغم من اني غيرل معتاد ان اعلق مرتين على موضوع واحد بس كنت عايز اقولك على حاجة مهمة وهى أن الكتكوت بتاعكوا اللي كبر دة مش هيتحسد لان القرد لا يحسد على ظل الشجر

وكمان موضوع الحقد والحسد والكراهية والشماته ايه السواد دة انتى محسساني اني شيطان مش مواطن

وكمان انك تردي على التعليقات دي محاولة ذكية منك عشان ترفعي عدد المشاركات

شيرين said...

أميرة
$$$$$$
فعلا خيبة امل في رحلة عمل .. وشكرا لانضمامك لصوان العزاء

أم جاكي
$$$$$$$
خلاص معلش حقك عليا حاولي تنسي بقي .. مش علشاني انا لا عشان خاطر جاكي

samah
$$$$$$$
ما انا ماما قالتلي كده بردوا ياسماح وادي اخره الللي مش بيسمع كلمة ماما تقولها .. بس انتي طلعتي كويسة عشان سمعتي كلام باباكي واوعدك انها مش هتتكرر تاني هشيل كلمة رحلة من قاموس حياتي

شيرين حرب
$$$$$$$$
فعلا ياشيرين هي كانت تكفير للذنوب .. اللهم اغفر لنا جميعا

داليا
$$$$$$
بلاش موضوع الخنق ده مش ناقصين .. خلي قلبك ابيض


وائل الغزاوي
$$$$$$$$$$$$
لقد حدث سوء فهم .. لاني لم اقصدك بالحسد والحقد الكلام كان موجهة لزميلة هي معلقة باسم "بيبو" وطبعا انا بهزر معاها .. واذا رجعت قراءة ردودي علي التعليقات سوف تعرف انك تسرعت لاني لااقصدك انت.. وبالرغم من انك دخلت فيا شمال .. اشكرك لمرورك المدونة مرة اخرى

سمسم said...

انا لله وانا اليه راجعون

عليكي بالإستغفار من طلوع هذه الرحلة

والندم علي انك صدقت المكتوب في الإعلان

والعزم الا تطلعي رحلة اخري الا لما

تتأكدي ان المعلن يساوي الموجود بالفعل

ومش كل وادي يتألوه يا ريان

حمدالله علي السلامة

ويجعلوعااااااااااااااااااااامر

شيرين said...

سمسم
$$$$
توبة من دي النوبة .. خلاص انا شلت كلمة رحلة من قاموس حياتي خلاص.. وشكرا لانضمامك لصوان العزاء

هالة الدسوقي said...

بجد بجد يا شيرين اهنيكِ جدااااااا على اسلوبك الرائع، اول مرة اقرا لك بس بجد استمتع، وصفك ممتع وغير ملل.
ونعزيك ونعزي انفسنا علي هذه الرحلة بس في النهاية احنا استمتعنا بالفعل في قرية الأحلام وفوقنا من الأحلام ورجعنا لبيوتنا سالمين فالحمد لله علي كل شيء.
تعيشي وتخدي غيرها يا شيري

mlame7 said...

حمدالله على السلامه يا شيري ما تزعليش وان شاء الله الرحله دي تتعوض واهم حاجه رجوعك بالسلامه.

mlame7.bkogspot.com

Anonymous said...

هاي انا محمد معلش نسيت اسمي من الي حصل
اولا يا شيرين تحمدي ربنا انتي كنتي في نا
زرزارة وكان هيحوطو عليكو بسلك ويعملوكو فرجة للرايح واللي جاي ويعتبروكم ضمن الثروات الطبيعية ويكتبو اهلا بكم في بلد المحبوب اما بالنسبة للشلال اللي انتي كنتي عايزة تشوفيه هم خدوه علشان يقوم بدور مهم في فيلم جعلوني اهبلا وبالنسبة للمراكب اللي شوفتيها بعدين دي الملاحة بتاعة فيلم العار بس حلقولهاوكمان انا نسيت اقولك انتي رجعتي طيران ولا سباحة

Anonymous said...

كل الحزن والالم والمواساةلن تكفى لتمحى هذا اليوم التعيس من ذاكرتك لاكن اهم شىء انكم رجعتم بالسلامة ---------وبعدين يااخت شرين بالنسبة لبلد ام الكتاكيت بتقولى مشفتيش ولا كتكوت يعنى هتشوفيهم ازى وهم لسة زرعينهم جديد ان شاء الله الرحلة الجاية هتشوفيهم بيبقو طلعو وكبرا-----هههههههههههههههه للضحك فقط باسم

wael elgazawey said...

فعلا حدث سوء تفاهم من عندي مفيش شكر على اني بمر على مدونتك لانها فعلا جميلة والى الامام يا روميل لؤخذة يا شيرين

شيرين said...

هالةالدسوقي
$$$$$$$$$$$
هالة كويس انك استمتعتي في قرية الاحلام الحمد لله انك خرجتي من اليوم المفترج ده بحاجة كويسة.. واتمني مرورك دايما علي مدونتي

mlame7
$$$$$$
الله يسلمك.. تحياتي

محمد
$$$$
اللي متعرفوش انهم نقلوا زرزاره للهند فالحمد لله ان الرحلة كانت داخل جمهورية مصر العربية .. وعلي فكرة احنا جينا مشي .. منجلكش في رحلة وحشة

باسم
$$$$
اشكرك على نعيك ..ومنجلكش في رحلة وحشة

وائل الغزاوي
$$$$$$$$$$$$
حصل خير .. ونتمني زيارتك دائما