Thursday, April 5, 2007

حمدا لله على سلامتي

الصورة دي انا الي مصورها ساعة الغروب على شاطئ العجمي
ياااااااه بقالي كتير مكتبتش اي حاجة خالص علي مدونتي .. وده نظرا لاني كنت مسافر ومعملتش حفلة مع ان أمي مكنتش معايا اصلا عشان تيجي علي غفلة .. ولكن أبي العزيز هو الي كان معايا .. عارفين رحت فيييين عند المية والهواء "الاسكندرية" .. حد بقي هيقولي ايه العبيطة دي رايحة اسكندرية في الشتاء في عز الثلج اقولكم ان اسكندرية تحفة بجد في الشتاء هي سقعة اه وثلج مقولتش حاجة ومطر كمان ما انكرتش ده غير ان الاسانسير كان عطلان واحنا ساكنين بعيد عنكم في سادس دور وطلعناهم بعد طلوع الروح ده غير كمان انهم بيهدوا الدنيا في منطقة العجمي حيثما كنت استعدادا لموسم الصيف القادم ولكني في الحقيقة استمتعت جدااااااااااااااا.

سفر مفاجئ
فجأني ابي بسفرية الاسكندرية فرحت بها كثيرا نظرا لان حالتي النفسوية مش أد كده قلت اغير جو بقي واطلع من دور الكأبة الي بمثلو في فيلم "الحياة المرة" ده ،وهب شلت شنطتني وجريت علي البيت حضرت ملابسي البسيطة وانجشت بابا وطيران علي الاسكندرية وأول حاجة حصلتلي اننا كنا هنعمل حادث مروع لان السواق كان بعيد عنكم في سابع نومه وهو بيسوق بينا في الطريق الزراعي بس ربنا ستر وصحي قبل فوات الاوان ، ولما وصلنا قولنا الشهادتين وأخذنا نقبل بعض انا وابي من كثرة الفرحة اننا وصلنا بالسلامة فابتسمنا وقولنا خير ان شاء الله رحلة سعيدة ولما وصلنا لحد باب العمارة رقصت قلوبنا تحيا العدل وصلنا هيه هيه هيه طبعا انا الي بهلل كده مش بابا ، بس بصراحة التهليل ده وقع علي دماغي اصل لما وصلنا للاسانسير لقيناه عطلان لقيت بابا بيبحلقلي كده عايز يقولي نقيتي فيها يافالحة ولقيتوا بيشاورلي على السلم وبيقولي يلا اتفضلي ، اااااااااااااااااااااااااه صعب اوي السلم ياجماعة نفسنا اتقطع بس قلت موش مهم خير رحلة سعيدة وابتسمت انا وبابا بس بصراحة الابتسامة المرة دي مكنتش بنفس بس يلا عدت الليلة دي .

ليلة اعمار الصحراء .. أقصد تنظيف الشقة
بدون تفاصيل كانت ليلة عجب .. أتهديت فيها الشقة مهجورة من الصيف الماضي وعليكم ان تتخيلو.

البمبة

زملائي الاعزاء ادوني بمبة اصلهم قالولي انهم هيجوا يوم يقضوه معايا في الاسكندرية ولكن في الحقيقة مجووووووووووش ، راحت عليهم اكله السمك الي بابا كان ناوي "يطفحهلهم" أقصد ياكلهلهم .

الخروجات

أولا: زيارة المطاعم والمقاهي .. بهدف الاكل والشرب

ثانيا: زيارة شاطئ العجمي الساحر وقت الغروب وتصويره


الرجوع الى ارض الوطن " القاهرة"

رجعت بالسلامة ورحت شغلي واستقبلني زملائي في العمل بكل حفاوة ، وبالاخص "أم جاكي" ، بالمناسبة "جاكي" لسه متولدتش بس احنا مستنينها بفارغ الصبر وكأنها ابنتنا ، ادعولها توصل بالسلامة هي هتيجي بعد ثلاث شهور.

طبعا كلككم هتقولو ايه دي فسحة اقولكم بجد بجد استمتعت علي الاقل غيرت جو وغيرت الوشوش الي بشوفها كل يوم ، وعقالباكم

6 comments:

Anonymous said...

حمد الله على السلامة عقبال السفرية الجاية بس مش مع باباكي بقى غيري يعنى ممكن يكون ان شاء الله مع زوجك العزيز كفاية بابا وماما ، وطبعا مجيتك بالسلامة دة شئ كويس لكن انك متجبيش حاجة معاكى لينا اهو دة مش كويس خالص عموما شكرا.
وفعلا اسكندرية بتبقى روعة في الشتاء خصوصا لما بيكون فيها برق ورعد مع البحر خرافة

Anonymous said...

أنا خالت جاكي أي "جوعلوظة" ربنا يجبهالنا بسلامة .. ألف حمد لله علي السلامة يا شيرويت وفعلاً الرحلة شكلها ممتعه جداً أنا نفسي أستمتعت بيها وأنا بقرأ . اه علي فكرة الصورة إللي أنت مصورها جميلة أوي عقبال صورة زفافك وأنا إللي أصورها

Anonymous said...

حمد الله على سلامتك يا شيري .. بجد افتقدتك في الكام يوم دول .. بس ما افتكرتيناش حتى بسردينة من هنالك .. وما طمرش فيكي الرصيد اللي حولتهولك من دم قلبي .. ان شاء الله الرحلة الجاية لو جوزك مكانش معاكي نقضيها سوا .. ولو معاكي بردوه مش هاسيبك

سمسم said...
This comment has been removed by the author.
شيرين said...

مجهول ومش مجهول لاني اعرفك طبعا عن قرب

الله يسلمك ومش مهم اني اجيب معاكي حاجة من الاسكندرية اهم شئ اني انا جيت ونورت البيت

خاله جاكي
الله يسلمك ياقمر وعقبالك عندك يارب والصورة دي فعلا انا حباها لاني صورتها في ساعة تجلي

مجهول

الله يسلمك يامرمر نسيتي تكتبي اسمك بس احب اعرف السادة القراء انك اميرة .. علي فكرة انا لقيت السردين مضر للصحة فعشان كده مش جبتلك يامرمر خفت علي صحتك

Anonymous said...

معلش يا شوشو يا حيبتى قبلى عندك تعيشى وتاخدى غيرها.. واهه ماحدش بيتعلم ببلاش.