Sunday, April 15, 2007

ريا وسكينة


ريا: بنقولك ايه ياسكينة يااختي


سكينة : أيوه ياأوووووختي


ريا : انا راسي بتلف اليوميين دول وعنيا بتزغلل على غوايش الست أم محمد الى قدامنا دي


سكينة: اااااه يااختي د احنا بنبقو هنموتو من الغيظ واحنا شايفين ايديها بطلعلط في الداخله والخارجه والشخللة بتخرم وداني


ريا: طب واحنا مستنيين ايه يااوووختي احنا نسحبوها ونخلصوا عليها


سكينة: ياما كان نفسي بس اديكي يااووووختي شايفة الدنيا متكهربة ازاي والبلد دلوقتي مبقتش امان زي زمان


ريا: بالعكس ياخيبة ده دلوقتي الفرص مفتوحة لنا على الاخر على الاقل لما يجوا يدوروا على الي قتل النسوان دول محدش ممكن يشك فينا خالص


سكينة: ازاي ياريا .. فطميني ياختي


ريا: انتي مش متابعة ولا ايه ياسكينة احنا سفاحين اه انما لازم نكون مثأفين ومتابعين للاحداث


سكينة: لالالالا متابعة ياختي بس فكريني كده اصل اليومين دول مش مركزة


ريا: ركزي ياسوكينة الدستور ياختي اتعدل ودلوقتي الدنيا مولعة بين الحكومة والاخوان ومحدش فاضلنا ده غير ان الحكومة بقى اتخنقت من الشعب وعايزة تخلص منو ونزلة اعتقالات في الي رايح والي جاي وخصوصا بتوع الاخوان دول وحتى لو اتقفشنا مش بعيد يدونا جواب شكر


سكينة: كلامك مظبوط ياااااوختي


ريا: ده غير كمان التفجيرات الي شغاله اليوميين دول في الجزائر والمغرب والدول العربية كلها مولعة ياحبيبتي و"القاعدة" مخلياهم بيلفوا حولين نفسهم


سكينة: هعهعهعهعهعهع مش بعيد كمان يتهموا "القاعدة" في قتل النسوان ياريا ونبقوا احنا كده في السليم


ريا: طبعا ياسوكينة


سكينة: طب واحنا مستنيين ايه يلا نقرأ الفاتحة بقى عشان العملية بتاعتنا تتم في سلام


ريا: ايه ده ياسوكينة انتي حافظة الفاتحة من ورايا ولايه


سكينة: اصل الست أم محمد جارتنا الي احنا نويين نخلصوا عليها دي بسمعها كل شوية بتقرأ الفاتحة على حال البلد

8 comments:

Anonymous said...

يابنتي بلاش تكلمى عن احوال البلد احسن "تتعكشي" وتضربي على فين يوجعك او القاعدة تخطط وتستهدفك في احدى عملياتها القادمة عموما هو الموضوع كويس بس متكررهوش تاني... ام جاكي

شيرين said...

جرى ايه ياشابة ياللي اسمك ام جاكي انتي احنا قصدنا نخدموكي ونريحوكي ونريحوا بتوع القاعدة كمان تقومي تفولي في وشي وتقوليلي انهم هيستفهدفوني المرة اللي جاية.. تفي من بوقك بقي

Anonymous said...

داليا.. الموضوع حلو أوي يا شيري وأنا بحبك جداً علشان بتتبعي أسلوب الفنان محمد صبحي، بس خدي بالك من نفسك بقي.

أميرة said...

سأذكر تلك الأيام التي غلفتها ضحكاتنا ونحن متلاصقتين في العمل .. نسخر من تصريحات جنبلاط .. ونندب حظ موسى في الجامعة العربية ..

سأذكر مديرنا الذي يتحمل صرخاتنا الضاحكة من بين جدران المكاتب .. "الصوت يا حضرات"

انا حاسة يا شيرين ان انا وانتي ننفع ريا وسكينة .. ايه رأيك يا شابة .. بس ضحايانا هيكونوا الجبن والكسل والامبالاة ..

شيرين said...

داليا
اشكرك لانك شبهتي اسلوبي بالفنان محمد صبحي لوني كنت احب اكون زي اسماعيل ياسين.. وشكرا لمتابعتك مدونتي المتواضعة

أميرة
اوعي تقولي اننا بنسخر من جنبلاط تاني مرة جنبلاط مش يتقال عليه كده الراجل بس مش بيبقي مركز شوية في تصريحاته ودي مش غلطتوا دي غلطة القنوات الاعلامية اللي بتتهافت عليه عشان يعبرهم بكلمة او نظرة منو.. وبعدين ياشابة حضري نفسك عشان نخلصوا علي الجبن والكسل واللامبالاة

Anonymous said...

شوشو عجبني قوي اسلوبك الساخر في مدونتك بس خدي بالك يا شيروت علشان قضايا العكش في المدونات في تزاااااااااااااااااايد " بيبو "

شيرين said...

بيبو
سبيها على الله.. ولو حصل مش هوصيكي على العيش والحلاوة .. وياريت حبة مخلل معاهم عشان المعدة محتجاها

wael elgazawey said...

عندك رايا يا شابه مثافه اوىىىى ما شاء الله عليها أنما سوكيننه مخبله حالها لا يختلف كثيرا عن حال الشريحة العريضة من الشعب المصري..

ياترى ريا وسكينه هيطلعوا شريط مسجل زى بتاع الظواهري والحج بن لادن اللى بيتقل الابرياء وله خطاب رسمي وبه حشد كبير من كل من السيد والسيد والسيد والسيد في احدى القاعات الفخمة الضخمة التب بنيت من قوت الشعب الذي يبحث عن شوقه (على طريقةو الاسكندرانية)ليعيش فيها مصدرا قرارا بأن كل من يمشي في الشارع فهو ارهابي

عموما ربنا يستر