Saturday, March 29, 2008

شوافة شمسية


بالرغم من الضائقة المالية التي أعاني منها وانتظاري لحسنة قليلة من محسن اللي قعدت أنادي عليه البوست اللي فات ومردش لحد دلوقتي ومن المحتمل ان يتم الحجز على بيتنا مما يضطرني الى الانضمام الى جماعة ارهابية لتفجير أي كشك عيش من اللي نزل جديد في منطقتنا وأخلص نفسي من ديوني وأخلص الناس من الطوابير اللي مبتخلصش ... فقد قمت ياحضرات المدونيين باقتراض مبلغ ما من أحد بنوك منزلنا المبجل وبمنتهى الاستهتار وعدم اتقان للمسؤولية قمت بشراء شوافة شمسية وطبعا زي ما كلكم عارفين السلف تلف والرد خسارة وبما اني مبيعشليش شوافات شمسية وكل ما اشتري واحدة تلقي مصرعها في التو والحال .. وأيضا بما ان الحياة حلوة نويت والنية صادقة على نصباية كبيرة لعمل مشروع يقلب موازين حياتي وهيخليني اسدد ديون شوافتي الشمسية
ونويت شراء أكبر كميات من العيش ابو خمس قروش أي شلن بالعملة المصرية ثم القيام بتخزينه في ثلجات حتى يتم نفاذ الكمية في البلد وبعدين لما الاقي الناس جعانة وبتاكل في بعضها هفرج عن العيش المخزون اللي عندي وهبيع الرغيف على جنية وربع وبما ان الشعب المصري قلبه طيب ويستطيع التكيف مع أي ظروف مهما كانت ومش هيرضي انه يموت من الجوع هيضطر يشتري مني وبكده أكون حققت حلم حياتي وابقى غنية وأسدد ديون شوافتي الشمسية

25 comments:

ضد الظلم said...

تمتع بالقرض الحلال من ابوالعربى
سدد ديونك
كفايه كسوف
محرج من الناس
يبقى خلاص ابوالعربى بيقدملك قرض حلال ميه ال ميه بدون فوائد ولا ضمانات
على الراغب فى المبلغ المالى الضخم الحضور امام القصر الجمهورى والتقدم بالطلب الى الرئيس شخصيا وهو هيوصله ليا شخصيا
هذا العرض خصيصا لمدونه ايمنا الحلوه

اى خدمه ياشرين
بس مشروع جامد
بس فى ناس عملتو
الحقى نفسك بقى
وهو لازم فزلكه يعنى وتستلفى عشان شوافه عالم بتاعت مظاهر صحيح
لو نظر كنا قولنا ماشى لكن شمسيه
تحياتى

في حب مصر said...

السلام عليكم
اولا حمد لله على السلامة.. ايه الغيبة الطويلة دي عن المدونة؟؟؟؟؟؟
وبعدين ايه حكاية الفلوس معاكي انتي مش قولتي انك قبضتي الشهر اللي فات هو انتي عايزة كل شهر تقبضي.. ايه يا اخويا الطمع والجشع اللي مالي قلوب الناس ده؟؟؟؟؟؟؟؟؟؟
وكمان عايزة تتاجري في قوت الناس الغلابة وتخزني العيش ابو شلن؟؟؟؟؟؟؟؟؟؟ ههههههههه ابقي قابليني وانتي انشاء الله هتقدري تجيبي العيش ازاي الاول علشان تخزنيه، ده اللي بيحصل رغيف دلوقت بياخد على الاقل طعنتين بالمطوة؟؟؟؟؟؟
وايه حكاية الشوافة دي؟؟؟؟ يعني ايه شوافة؟؟؟؟؟؟ انا اعرف نظارة شمسية لكن شوافة اول مرة اسمعها؟؟؟؟؟؟؟؟؟ وليه أصلا تشتريها، نوع من المنظرة، ولا خايفة من جاذبية عينيكي على البشر؟؟؟ لو الخيار التاني انا موافق اسلفك وبسعر فايدة سبعة في المية؟؟؟؟؟؟؟؟؟؟؟؟؟؟؟
عامة حمد لله على السلامة ونورتي النت ببوستاتك الجميلة
مصري غلبان

أيامنا الحلوة said...

ايه ده ياناس هاتولي الشوافة بتاعتي عشان اتاكد ان ابو العربي اول واحد يعلق عندي ... منور ياابو الرجولة والشهامة والمجدعة
وكفاية اعلاناتك لحسن كده هتوديني وراء الشمس مش عايزة قروض خلاص انا هنفذ مشروعي وهنفذوا ازاي ده بقى بطريقتي الخاصة برزتين كده من تحت شوال الدقيق وكله هيبقى تمام ويكون افرن العيش اللي فيكي يامصر هتتنقل لمخازن ايامنا الحلوة

وبالنسبة للشوافة ادعيلي بس ربنا يطولي في عمرها لحسن مش بيعمر معايا شوافات

تحياتي

أيامنا الحلوة said...

في حب مصر
*********
الله يسلمك .. معلش بقى انت عارف مشغوليات ومكدبش عليك احيانا كتيرة بفكر اني اقفل المدونة كلها بس برجع احن تاني ومش بقدر ابعد عن مدونتي ولا المدونين ... المهم
انا قبضت فعلا بس القبض راح على تسديد الديون ودلوقتي اختك مفلسة .. والمشروع بتاعي هو اللي هيحللي الازمة بتاعتي تحب تشاركني قول متتكسفش
انت تقف في طابور العيش وانا اهرب بيه في عربية نقل
والشوافة دي جاية من الشوف سلامة الشوف
ياتري جايباها منظرة ولاخايفة من الناس على سحر عنيا ... ممممممم ايون هيه الثانية دي سحر عيوني كمني انا شبه نانسي عجرم في فيلم لاتسألني من انا

منورني يامصري ياغلبان
الا قولي صحيح انت من لناس اللي هتعمل اضراب يوم 6 ابريل ولا ايه ظروفك
http://www.moheet.com/show_news.aspx?nid=106397&pg=1

في حب مصر said...

تصدقي انا كان عندي احساس من الأول انك بتشتغلي في محيط مش عارف ليه؟؟؟؟؟؟؟؟؟؟؟؟؟؟؟
على فكرة انا كان نص اصحابي زمان بيشتغلةهناك
بالنسبة لموضوع الإضراب ده انتي عارفة طبعا اني في الإمارات يبقى هشارك في الاضراب ليه بقى؟؟؟؟؟؟ الحمد لله العيش هنا كتير. هههههههههههه
وبعدين انتي عايزاني انا أقف في طابور العيش علشان اخد مطوة في رقبتي وانتي بس تستني في العربية، موافق بس يبقى انا ليا 90% من المكسب.هههههه

أيامنا الحلوة said...

في حب مصر
********
كان عندك احساس اني بشتغل في محيط هههههههههههههههههه ليه الاحساس ده جالك عشان القبض يعني ولا ايه .. ما هو طالما كان ليك اصدقاء بيشتغلوا في محيط زمان يبقى انت اكيد عارف المستخبي دعواتك بقى ايام زمان دي مترجعش تاني

وبالنسبة لموضوع الاضراب فالدعوة للمصريين اللي في اي مكان بالخارج ولا انت مش معتبر الامارات دي من الخارج ..
وكمان عايز تاخد 90% من المكسب ليه حد قالك اني هعمل المشروع ده سبيل وبعدين ده انا حتى صاحبة الفكرة يعني ليك 10% مكسب واي مطواة هتاخدها في رقبتك هصلحها على حسابي قصدي هعالجك يعني متقلقش وكله بالحساب

تحياتي

Computadores said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Computador, I hope you enjoy. The address is http://computador-brasil.blogspot.com. A hug.

Doba said...

شششششششششش
انا مجيتش هنا ولا حاجة

انتى يابنت
هاتى ودنك

مع العيش خبى
الرز
والزيت
والمعكرونة

احسن كله هيبقى ناااااااااااااااار

لا
لا
لا
وطى صوتك متفضحيناش
وحشتينى يا لمضة هانم

يوسف باعتلك بوسة كبيرة
وبيقولك هابى فالنطين

سلام
هبة

في حب مصر said...

ايه يا بنتي
رحتي فين اختفيتي كدة مرة واحدة
اوعي يكونوا اعتقلوكي في الاضراب
كل ما ادخل مدونتك ما الاقيش جديد

فينك يا ترى

أيامنا الحلوة said...

دوبا
****
حبيبت قلبي ايه النور ده وحشتيني والله كتيييييييييير ويوسف حبيبي وحشني اوي سلامي وبوسة كبيرة ليه من طنط شيرين يلا ان شاء الله ماعن حد حوش

وبعدين ايه الندالة دي كل ما تيجي تعليقي عندي تتبري كده مني وتقولي انا مجتش هنا .. شوف ياخويا الاصحاب .. قلبي معاكي في غلو الاسعاء ياحبيبتي نصيحة متشتريش مكرونة ولا عيش ولا سمن ولازيت

تحياتي

أيامنا الحلوة said...

في حب مصر
*********
بخ... انا لسه على قيد الحياة متقلقش اصلي انا زي القطط بسع ارواح ههههه
ولابيفرق اضراب معانا

ربنا يكرمك وشكرا لسؤالك بس فعلا انا كنت مشغولة اوي لايام اللي فاتت ومتقلقش الامن مستتب ..

تحياتي

Doba said...

حاضر يا شيرين مش هنشترى ولا حاجة
وهناكل طوب
ونفطر طوب
ونتغدى طوب
ونحلى بحبة زلط عالماشى

سلام يا شوافة
هبة

deja vu said...

عذراً على اقتحام المدونة هكذا لكن كما يقال "للضرورة أحكام"

في حملة فردية أقوم بالمساهمة على نشر وتوزيع فيلم "المُفتِنون" الذي يرد على الفيلم الهولندي "فتنة" ، بإرسال الرابط التالي لكل الداتا لدي من مواقع ومدونات وبريد

أرجو منكم – بعد المشاهدة - المساهمة معي في نشره من خلال قائمتكم أيضاً

شكرا لكم

Sorry for this sudden entrance in here but as said "necessity has its laws"

In a "singular" campaign I am making now to defend against the anti-islam Dutch short movie "Fitna", siting to every possible link and address

I wish that you be part of it by watching and forwarding the link below to all yours as possible, too

Thank you every one

http://dejavupress.blogspot.com/2008/03/blog-post_31.html

سكــر said...

شيرين
ايه دا اسافرلى شهر ونص

ارجع الاقيكى مديونهلطوب الارض كدا


طب اصبرى لما اخد بدل السفر بتاعى واسلفك

تحياتى

احمد سكر

شيماء الجيزى said...

الله
واخيرا وليس اخراً
وجدت من يعشق الشوافات الشمسيه مثلى
وبردو بيكسرها فى السريع
وياريت انضم ليكى فى هذا المشروع الرائع
واظنه ميه ميه واحلى من مشروع الموبيل والدقيقه بخمسين قرش
ويجعله عامر
وياريت يا جماعه حد يسلفنا سوا

والسلام ختام

..............

ضد الظلم
انت دايما فاضحنا كده فى كل حته
انا هتبرى من ابو العربى ده والنبى

رائد said...

"شوافة شمسية" يا شيرين مش هي برضو النظارات الشمسية؟؟؟
اذا كانت هي فأنا متبري منك ليوم الدين :)...شوافة يا شيرين!!!
في طريقة افضل عشان تسدي الدين .. شو رايك تأجريها ..خلينا نحكي اليوم ب 10 جنيه او 5 مثلا .. وبكه تقدري تسدي ثمنها ... ولا قولك بيعيها ب ثلثين السعر ... واشتري واحدة ام الخمسة جنيه مش برضو .شوافهههههههههه".
ولا اقولك اشتري خضار وفواكه وبسطي فيهم في وسط البلد... دي التجارة ام البزنس ... ما تسمعيش لحد.
ولا اقولك اعملي جمعية واشتري تذكرة وتعالي على دبي واشتري 1000 "شوافهههه" وانزلي على وسط البلد وبسطي ... "الشوافات" هون بتراب المصاري
قلبي معك ..لأنو كلن عندي صاحي اشترى "شوافة" وما قدر يسد ثمنها فصابو اكتأب ..وهو يا عيني في صار "ملياردير" ..اصلو جمع مليار غطاء قنينة بيبسي... :)

أيامنا الحلوة said...

دوبا
*****
سلامتك من اكل الطوب والظلط يادوبا .... ان شاء الله ابو العربي وانتي لا هههههههه

منوراني ياقمر وربنا يفرجها عليكي وعلى المصريين جميعا ويهدي الاسعار

تحياتي

أيامنا الحلوة said...

سكر
****
ادي الناس ولا بلاش ... يلا مستنيه تديني السلفة بسرعة ابعتهالي على باب المدونة

وحمدللع على السلامة ياسكر

تحياتي

أيامنا الحلوة said...

شيماء الجيزي
***********
يادي النور يادي الهنا شيماء الجيزي عندنا ... وكويس انك بتعشفي الشوافات مثلي شوفي بقى حد يعطف عليا انا وانتي ويسلفنا

هههههه
تحياتي واتمنى تنوريني دايما في ايامي الحلوة

أيامنا الحلوة said...

رائد
*****
لا ايه ده حقيقي ولا خيال استاذ رائد عندي في مدونتي هاتولي الشوافة بتاعتي بسرعة عشان اتأكد
منورررررررررررررررررررني ... ليك وحشة كبيرة من قسم الخارجي والله يااستاذ رائد وسلامك وصلنا

بالنسبة للشوافة بتاعتي فمفتكرش ان في منها في الاردن اصلها نادرة الوجود بشباك حديد ومتفهمنش غلط وتقول تلاقيها شوافة لحام ولا حاجة هههه

بس بجد فكرة الايجار دي تحفة ممكن ااجرها فعلا واكسب دهب بس تفتكر مع ارتفاع الاسعار اليومين دول حد هيفكر ياجر شوافتي الشمسية !!!!!!

تحياتي واتمنى مرورك على ايامي الحلوة دايما ....

أنا مش موافق said...

عزيزتى
الكل بيمر بضائقه ماليه ونفسية

وبلاش تفجرى اى شئ بالذات لو كشك الواحد ما بيصدق

واما مشروعك ده مكتوب ليه الفشل لانك لو بقيت غنية ممكن تتقدمى لمحاكمة عسكرية ويقولوا عليكى شغاله تنظيف اموال بقه

خليناغلابه نعيش غلابه ونموت غلابه

والديون بتتسدد كده كده
حت لو مجتش فلوس

تحياتى

سلام

ولــــــــــو said...

اولا انتي اخر حد ينفع يعمل المشروع ده
انتي ماشي هاتشتري العيش بمبالغ هائلة وماشي هاتستني لحد ما العيش يختفي بس ساعتها هاتقومي توزعي العيش ببلاش على الناس المحتاجه وبكده يبقى عليكي جبل ديون
ساعتها هاتتحبسي بس وانتي معاكي ملايين الدعوات من الناس اللي انتي ساعدتيهم
تقدري تستحملي كده ولا بلاش احسن
خليهم يحجزوا على النذارة اسهل

سلام يا ام قلب طيب

aya said...

كل ده عشان تشترى شوافة شمس؟

امال لو كنتى ناوية على حاجة اكبر من كده

لاب توب مثلا؟
كنتى عملتى ايه

على العموم بقى اى نقص فى عدد الارغفة
فى مصر

هاقول انتى السبب على طول

وانا هادعيلك من قلبى تنفك ازمتك المالية

وبالتالى ادعيلى انتى كمان
والا شكلى هاجى اشترى العيش معاكى ونخزنه سوا


ربنا يفك ازمات البناتيت المصرية المالية

سعيدة للغاية بمرورى

الله معك

mohamed said...

مبروك الشوافة بس على فكره فيه مشكلة فى الفكرة بتاعتك انتى هتعرفى تجيبى العيش اللى انتى هتخزنيه ازاى وبعدين انتى معاكى كام شلن عشان تجيبى عيش يا ستى خلى الطابق مستور

Anonymous said...

amal