Friday, June 1, 2007

أنا والمدونين


ياااااااه الامتحانات ابتدت اعمل ايه بس مذكرتش اي حاجة خالص ومش لاقيه وقت اذاكر فيه والامتحان بكرة يعني غدا من الاخر الامتحان توموروووووووووووووووو ...

يالهووووووووووووي دماغي صدعت اعمل ايه اعمل ايه فضلت دايخة كده ومن كتر دوخاني وقعت واترميت على الديسك توب قومت بسرعة قبل ما اتخبطت في اي ايقونة

قلت طب ما انا اخبط على صفحة النت اكيد صاحية عشان الامتحانات .. قومت دخلت على مدونتي أيامنا الحلوة قعدت أبص على بوستاتي وعنيه مدمعه .. اعمل ايه يابوستاتي مش عارفة اذاكر ومش لاقيه اي
ملخصات عشان الحق اجمع اي حاجة .. قلت اجرب كده واروح اشتكي لسمسم في بيتوا القديم واقولوا على اللي جرالي واني معنديش القدرة على القراية راح سمسم كتر الف خيروا وعدني بمذكرة من سطر واحد هتتباع على باب مدونتوا.. قلت الحمد لله اتحلت .. وخير الكلام ما قل ودل وسطر واحد هينفع برضوا اي سؤال اكتب السطر ده والسلام ..

وبعدين قعدت ادور على ادوات الامتحان القلم والمسطرة والاستيكية .. وجه في دماغي علطول اخد من مدونة اكتب بالرصاص القلم بتاعو انا عارفة انو مش هيعزوا عليا بس تراجعت على اخر لحظة قولت خليني ماشية جمب الحيط لحسن اسقط مينفعش اكتب بالرصاص في الامتحان اروح في داهيه وممكن .. اروح في الرجلين .. والامر ما يسلمش البلد مكهربة اليومين دول

وبعدين قعدت ادور على اجندة اتسند عليها كده واراجع فيها .. قلت لو كنت طلبت من البنوتة المجنونة حبتين اجندتها الحمرا كانت هتبعتهالي على الايميل في السريع بس للاسف اللون الاحمر مينفعش في الامتحانات ممكن اروح في داهيه بس لو كانت الاجندة سوداء ولا زرقا مش كانت نفعتني دلوقتي.. يلا بقى ملناش نصيب

طب وبعدين قلت اروح اخبط على مدونة جروووووووم يمكن الاقي عندو اي حاجة تنفعني .. لقيتوا مش فاضي بيدور على عروسة وتايه على الاخر ال ايه عايز يتجوز ..

طب اروح فين ولا اجي منين ياربي قولت اروح لمدونة برويد بس اروح ازاي ده الراجل كان معتزل التدوين ولسه راجع بلاش ادوش دماغوا بقى خلي عندي دم ....

قلت مفيش غيرها أميرة البلطجية اروح احتمي في مملكتها الصغيرة واحكيلها أزمتي يمكن تبعت حد من حراسها يمتحن بدالي ولا حاجة .. بس رجعت تاني لقيت على باب مدونتها حراس ماسكين مطاوي وسكاكين ومناشير وحجات كده قلت أرجع أحسن يفتكروني من حزب معارض ويعتقلوني ..

وبالصدفة كده لقيت أبو العربي يتحدث قدامي قلت احكيلوا على المشكلة اللي أنا فيها دي .. يمكن الاقي عندو حل .. لقيتوا بيقولي انا ضد الظلم .. ولازم أوصي عليكي الامم المتحدة واخلي كونداليزا رايس تراقب عليكي في اللجنة وتوزع عليكم براشيم في الامتحان كمان .. قلتلوا اشمعنى رايس يابو العربي قالي اصل ساركوزي بتاع فرنسا مرشحهالو عروسة .. من الاخر جواز صالونات يعني .. بيني وبينكم .. حسيت انو بيفشر عليا .. قلت شوية شوية بقى يقولي ان الريس اتنازل عن الحكم .. وابتسامة عريضة كده معناها بطل فشر بقى يابو العربي ده امتحان مش لعبه امتحااااااااان .. وخلعت منو ..

مكدبش عليكم فكرت اروح عند سندباد يمكن يطلعني في مغامرة من مغامراتو ويخرجني من المود ده .. بس للاسف لقيتوا غرقان في أحزانو مع بوستاتو .. وبصراحة انا مش ناقصة انا فيا اللي مكفيني

وأخر ما طهقت قلت طب اروح لطهقان وطهقانة اشكي لهم طهقي وبعدين قلت لا دول اصلا هيعقدوني في عيشتي ومش هطلع منهم بمفيد لانهم معقدين ازاي اروح احكي طهقي لطهقانين ..

يوووووووو بقى طب اعمل ايه مفيش قدامي غير انتختي أميرة دي اللي هتطلعني من اللي انا فيه ..بس أميرة دي بقى مش بلطجية .. روحت جريت عليها .. واقترحت اخدها نغير جو كده ونتمشي في مدونتها على الطريق يمكن نفسيتي ترتاح شوية .. بس لقيتها مش فاضية ال ايه رايحة للخياطة تفصل طقم جديد.. وهو ده وقتوا دا احنا في امتحانات ياعااااااااااالم

واخر ما احترت ملقتش قدامي غير انتكتي التانية قلوب حائرة قدامي قولتلها شوفتي اللي انا فيه ورايا امتحان بكره ومذكرتش اي حاجة خالص اهئ اهئ اهئ .. قالتلي متقلقيش انما الاعمال بالنيات انتي صفي قلبك كده وتوكلي على الله .. واكتبي اللي يجي في دماغك .. قولتلها ونعمه بالله ..

وبعدين مرة واحدة كده لقيت في وشي مدونة مش أنا بتاعت علاء دخلت لقيت أدعية حلوة اوووووووي وفعلا لما قريت الادعية دي هديت على الاخررررررررر

وفجأة سمعت صوت معتادة اسمعوا كل يوم ده صوت ميييييييييييين؟

شيريييييييييين انتي يابنتي قومي بقى بقالي ساعة بصحيكي قومي يلا صلي الفجر والحقي انزلي على شغلك .. هتتأخري .. ايه ياماما ده انا اتأخرت على الامتحان ولا ايه .. امتحان ايه يابنتي انتي بتحلمي بالامتحانات ولا ايه انتي مش خلصتي دراسة الحمد لله ..

وجهي يبدو عليه علامات التعجب
ايه ده هو انا خلصت دراسة بجد ياماما ولا بتهزري !!!!!

نعم في ايه مالك ياحبيبتي انتي سخنة ؟

ايييييييييييييييييه صحييييييييييييح انا دا أنا خلصت دراسة ومتخرجة بقالي سنتين .. انا الظاهر كنت بحلم ..

ياربي .. كل سنة في توقيت الامتحانات ده بتجيلي حالة نفسية غريبة وهي الرهبة من الامتحانات مع اني خلصت خلاص الحمد لله..
ده لو كان عليا امتحان بجد وانا على الحالة دي أكيد كنت هبقى في خبر كان ..
ابتسامة عريضة لان الحكاية طلعت حلم مش حقيقة ومفيش امتحااااااااااان .. هييييييييييييييييييييييييييييييه!!

22 comments:

Anonymous said...

ايامنا الحلوه
خيالك واسع اوي ياجميله
و انا فعلا عماله اقول هي مش خلصت الدراسه شككتيني يابنتي في نفسي
LOL
معلش بأه الاجندا طلعت حمرا
انتي عارفه انا كنت بفكر اعملها سودا اهي كانت نفعت في الأيام ديه بتاعت الامتحانات بس قلت حيكون لون كئيب حبتين
المهم ياجميله ربنا يوفقك في حياتك و يعدي ايام الامتحانات علي خير
;)))))
فيكي الخير و الله انك افتكرتيني بس معلش بأه ماعرفناش نوجب معاكي ملحوقه المره الجايه
;)))))))
تحياتي ليكي ياقمر و صباح الفل

Anonymous said...

شيري.. الطقم الجديد انتهى والحمد لله .. قولي مبروك .. انتهت مشغولياتي وسأتفرغ لمدونتي .. تصدقي؟ قرائي اعتقدوا اني مكتئبة .. وانا من هنا اقول لهم ..

انا تمام تمام تمام
ولا مكتئبة
ولا عندي انفصام
يلا بقا .. احلى سلام

Anonymous said...

شوشو الجميلة احيكي على بوستك الجميل ده والي جمع عدد من المدونين القريبين الى قلبي وتاتي على راسهم البنوتة المجنونة ومرمر وطريقها الجميل ..وعاوزة اقول لقراء مرمر ياجماعة والله البنت كويسة بخير وقرفانة باخبارها عن فلسطين واسرائيل لانها ماسكة تحرير اخبارهم بس البنت عندها شوية جمود فكري وبعتباري الاخصائية النفسية لصحباتي الحلوين اميرة وشيرين اعلنها لكم ان الاتنين زي القرود ويتمتعون بنفسية هادئة الله اكبر في عيونكم ..بس هقولك حاجة يمكن تستغربيلي ياشيري انا فعلا بحسد كل اللي بيمتحنوا ونفسي اكمل دراستي العليا ادعيلي ارجع لها تاني

Anonymous said...

أجندة حمرا
$$$$$$$$$
صباح الفل ياجميل ..ايه بس الهنا اللي انا فيه ده انتي اول حد يعلق عندي ..
طبعا احنا بندعي لكل الناس اللي بيمتحنو ربنا يوفقهم ويطلعهم من الايام دي على خير لونها بجد ايام حلوة رغم شدة الاعصاب فيها.. وربنا يوفق الجميع

تحياتي

أميرة
$$$$
أميرتي وانتختي وجميلتي.. دوما متألقة بزيك الجديد .. لبست جديدا وعشت سعيدة ومت شهيدة وتزوجتي تقيا..
يلا بقى مستنين جديد في مدونتك اللي انشغلتي عنها عشان خاطر عيون الطقم النبيتي الجديد ههههه .. بس واللهي بجد طقم تحفة .. عمرك شوفتي حد بيفضح اصحابو كده زيي اكيد لا .. يلا بقى معلش قدرك ومكتوبك

تحياتي

قلوب حائرة
$$$$$$$$$$
يادي الخيبة انتي مصحبة قرود .. يابت قولتلك بلاش حديقة الحيوان اللي بتروحيها كل يوم دي هههههه.. وبعدين هو كل حاجة اميرة اميرة مفيش شيرين شيرين
طب انا همتنع عن التدوين اما اشوف حد هيعبرني ولا لا .. ولا أقولك بلاش.. مقدرش ابعد عن بوستاتي الحلوين

وبعدين ايه حكاية الدراسات العليا اللي هتعمليها دي .. على العموم ربنا يكرمك بزوج يقعدك في البيت هاهاهاها الدعوة دي احلى طبعا

تحياتي

Alaa said...

سلام عليكم
أهو اللف على المدونات ده هو اللي خلاكي متذاكريش و لا كلمة
شدي حيلك و توكلي على الله
و ربنا هيوفقك ان شاء الله
و بعد كده يبقى في حاجة اسمها أولويات :)
بالتوفيق

سندباد said...

ايامنا الحلوة
تحياتي للبوست الجميل والخيال اللي ملوش حدود فكرة جميلة وجديدة ومعلش بقي ان كنت مقدرتش اساعدك المرة الجاية وعد هاتلاقي المساعدة والعون
تحياتي

Eric Matt said...


كل اللي أقدر أقوله دلوقتي

:))

تحياتي لك من ماناساس البلد

Anonymous said...

علاء
$$$$
وعليكم السلام
عندك حق هي دي اخرة اللف على المدونات .. ده لو كان عندي امتحان بجد كان زماني في خبر كاااان بس ربنا ستر بقى وطلع حلم الحمد لله
بتنورني بتعليقاتك دايما

تحياتي

سندباد
$$$$$$
ربنا يكرمك متعرفش انا ببقى سعيدة اد ايه لما البوست يعجبكم .. يارب دايما
والمرة اللي جايه بقى هستني مساعدك ماشي ههههه

تحياتي

جرووووم
$$$$$$$
منور بجد .. ويارب يكرمك كده وتخرج من الازمة اللي انت فيها دي .. انا فرحت لما لقيت اسمك ولما قريت تعليقك حسيت اد ايه انت لسه مخرجتش من اللي انت فيه وبدعيلك .. ان شاء الله ربنا يكرمك وترجع جروم بتاع زمان اللي من ماناساس البلد

تحياتي

shahy said...

حرام عليكي دوختيني وراكي رايحة جاية وداخلة خارجة

بس فكرة حلوة وجميلة وجديدة


تحياتي

ابو العربى said...

يعنى هى الحياه كدة انا غلطان وبكره هبعتلك البرادعى يفتش عليكم فى اللجان وهطالب بنزع البرشام والمجتمع الدولى كله معايا
مع تحيات ابو العربى

Anonymous said...

شاهي
$$$$
معلش بقى دوخة تفوت ولاحد يموت أهم شئ انك وصلتي في الاخر ونورتيني بتعليقك ..

تحياتي

ضد الظلم
$$$$$$$$
ياالف اهلا والف سهلا بابو العربي .. بقى انت عايز تبعتلي البرادعي يفتش عليا وينزع البراشيم كمان .. ولايهمني انا معايا برشام نووي يابني اسأل نجاد

تحياتي لك ياابو العربي

Anonymous said...

اولا الف شكر اني وردت في أحلامك،
ودا يعني ان العقل الباطن بيشوف مدونات بيعنها وتنحفر في دهاليزه

وعلى فكرة حكاية الاحلام بالامتحانات دي طبيعي
لاني حصلت معايا برضه في اول سنتين من التخرج
وباقوم من النوم وانا باقول
خير اللهم اجعله خير
كانه كابوس


أكتب بالرصاص

تحياتي

Anonymous said...

اكتب بالرصاص
$$$$$$$$$$$$$
لاشكر على واجب.. يشرفني يافندم ان مدونتك تكون في دهاليز عقلي الباطن

انت هتقولي على كوابيس الامتحانات .. يلا الحمد لله ان الواحد طلع منها على خير ..

تحياتي

تامر حسين said...

موضوع جميل بيفكرني بموضوع شبيه كتبته من فتره في مدونتي اسمه خايف من بكره
تحياتي واتمني اشوفك في مدونتي

Anonymous said...

تامر حسين
$$$$$$$$$$
اهلا بيك ومنور ايامنا الحلوة.. وسعيدة ان موضوع البوست عجبك .. وان شاء الله ازورك في مدونتك
واتمني التواصل

تحياتي

الكلام نوعان :كلام فارغ وكلام مليان كلام فارغ said...

زي العسل والله بس دي اسمها فوبيا الامتحانات بتيجي لاى واحد فينا مش مصدق انه خلص التعليم او ندمان انه خلص وهايتصدم يا ولداه في الحياه العمليه اللى زي....العسل دي
يلا هانقول ايه بقى
ربنا يعدينا منها على خير
وتخلص بقى
تحياتى

سجدة said...

معلش يا بنتى من كتر اللى شفناه فى ايام الدارسة بقه عندك فوبيا الامتحانات ربنا يصلح حالك وتنسى يارب

Anonymous said...

الكلام نوعان
$$$$$$$$$$$
ايه الغيبة دي كلها بس انا قلت نسيتينا خلاص .. منوراني واللهي .. وادعيلي بقى من فوبيا الامتحانات اللي عندي

تحياتي

سجدة
$$$$$
اميييييييييين .. يارب يسمع منك ربنا وتروح من عندي فوبيا الامتحانات ومن عندك الجميع ياااارب
منورة ومتغبيش علينا تاني كده

تحياتي

Anonymous said...

داليا.. ربنا يشفيكي يارب أنا عارفة دكتور كويس متخصص في الحالات ديه..

"رائع يا شيري"

مـحـمـد مـفـيـد said...

ايه يا بنتي الابداع ده
حلوه اوي

bastokka طهقانة said...

:))
mashy ya gameel

Anonymous said...

داليا
$$$$$$
ميرسى يادودو على الدعوة الحلوة دي ربنا يشفيني يارب
تحياتي

محمد مفيد
$$$$$$$$$
من بعض ما عندكم يافندم ....
تحياتي

طهقانة
$$$$$$$
منوراني ياقمر .... ويعني ايه ماشي دي انتي لحقتي هههه
تحياتي