Monday, June 11, 2007

عروسة بدرجة سكرتيره


لما كنت بتفرج زمان على مسلسل "مطلوب عروسة" بتاع أحمد بدير واسمع اغنية التتر" مطلوب عروسة على المقاس عنيها خضراء بشعر اصفر متكونش وش بهدلة وعنيها خضراء بشعر اصفر"..

كنت بقعد اضحك اوي وبقول ده تمثيل وخلاص مش معقولة في حد كده .. يطلب مواصفات بالدقة دي وتكون دي أولوياتو .. يعني عروسة بشعر أصفر وعيون خضراء وبيضاء وشيك والمصيبة ان الحجات دي أولويات ولابد منها ..


وداااااااااااار بيا الزمن واكتشفت ان فعلا في ناس كتيره كده

اكتشفت ان في كتير من الشباب القادم على الزواج بيطلب مواصفات شريكة حياته .. ولا مطالب مدير عام لسكرتيره خاصة بمؤسسة كبرى وطبعا الشاب ياعيني بيلاقي صعوبة في العرايس اللي من النوعية دي نظرا لاننا نعيش في جو بارد شتاءا وحار صيفا ومعتدل ربيعا.. ده غير ان الاحتلال البريطاني خلاص انتهى والحمد لله والنوعية دي راحت من زمان

فتلاقيه داير باعلانات وسط اهلو وناسوا وحبايبوا للبحث عن شريكة حياته والكل يبحث عن ذات الشعر الاصفر والبياض الناصع والعيون الخضراء ومفيش مانع لو كانت زرقاء مش هتقف على لون العين يعني

والشاب ياحرام بيبقى ناقص يطبع ورق من بتوع طلبات الوظائف الخالية للبحث عن سكرتيره بشركة كبرى .. أقصد للبحث عن عروسة بدرجة سكرتيره ويقول فيها ( مطلوب عروسة حسنة المظهر عشان افرجها لاصحابي .. ناصعة البياض من أجل تحسين النسل .. ملفوفة القوام .. تجيد اللغات " عربية فصحي وعامية ، فرنسية ، انجليزية ، المانية" توفيرا لمصاريف مدارس اللغات .. لبقه ومتحدثة عشان تكبسني في الكلام.. تجيد استخدام الحاسوب عشان العيال اللي هتخلفهم .. لايزيد السن عن 24 عاما .. يخلو وجهها من حب الشباب تحسبا لوقوع عدوى.. ذات بشرة ناعمة توفيرا لكريمات الوجه.. خالية من الامراض.. لايشترط التفرغ التام ) .. وعلى رأي محمد هنيدي ياريت تكون50% قشطة.. 30% ذبدة.. 20% حليب .. والاكيد انها مش 100% بقرة ..


أنا بس عايزة أعرف اللي بيطلب عروسة بالمواصفات دي بيبقى عايز يتجوزها ويكونوا اسرة سعيدة صالحة ولا عايز يعينها في مصلحة الضرايب

كارثة ان تكون المواصفات دي هي الاولويات عند شباب اليومين دول طب راح فين التربية والاخلاق اللي لازم تتسم بيه الزوجة اللي هتحمل اسمك .. والدين اللي هتربي على أساسه اولادك ويكون لك ذرية صالحة ..

مش معنى كده اني بقول ان الجمال ملوش لازمة .. اكيد الشاب بيكون عايز زوجتو جميلة على الاقل عشان عينو متزوغش بره .. ويعف نفسوا.. بس في اعتدال يعني المواصفات دي مش اساس الجمال زي ما كتير فاكر ..

يالهوي هتجوز ازاي ياعالم انا وبنات مصر اللي معظمهم بشره قمحي وعيون سوداء و بني وشعر أسود
وللاسف نوعية الشباب دي موجودة كتير في واقع أيامنا الحلوة

26 comments:

قلوب حائرة said...

شوشو حبيتي احيكي على موضوعك مرتين اللي لفتي اليه الانظار وخصوصا ان الموضوع ده بقى منتشر قوي اليومين دول وبقت حاجة تجنن والواحدة لوفينا طلبت واحد وسيم وطول بعرض يقولها انتي هتعملي بيه ايه مش المهم يكون راجل وخلاص وثلنيا انك ابدعتي في كتبتك للموضوع وتحياتي لكي ولنا الله يابنتي احنا وجميع بنات المصريين لو كانت هذه المواصفات القياسية للعروسة العصرية ولا عزاء للسمروات

Anonymous said...

لا يا شيري.. فعلا النوعية دي موجودة في الحياة لكنها ليست لأغلب الشباب ، مازال هناك من يبحث عن الاخلاق والالتزام ..

موضوعك مهم ولعله يفيق بعض الغافلين من من الشباب

أميرة

شيرين-أيامنا الحلوة said...

قلوب حائرة
&&&&&&&&&&
السمار نصف الجمال يابنتي والاكيد ان البياض الجمال كلو طبعا هههههه .. الحكاية للاسف مش حكاية بياض وسمار لا حكاية ان الشاب بقى ينظر للمظهر اكثر من الجوهر .. ولاعزاء للسمروات

تحياتي

أميرة
&&&&
طبعا اكيد في شباب تبحث عن الاخلاق والدين ومينمنعش برضوا الجمال .. بس انا بتكلم عن نوعيه اكتر شوية من دول بيدوروا على المظهر فقط .. وشكرا ليكي على تعليقك يامرمر بالرغم من اعتزالك التدوين في هدوء

تحياتي واتمنى التواصل .. اكيد ما انتي قاعدة جمبي هههههههه

MaMaDo said...

و الله الجمال جمال الروح و ده الى هركز عليه لما ادور عليها

انما الشكل ف يعنى مش لازم يكون لدرجه دى


و عندك حق فى ناس لحد الوقتى بدور على المواصفات دى بس و مش همه انها تكون كويسه و لا حاجه
كل همه الشكل
و بس


لو الراجل ده لاقى واحده بالمواضفات الى مكتوبه دى خليه يشفلى واحده معاه
ههههههه

sendbad said...

دي اسمها تفاهة وخواء وعقل فاضي واحد عايز يفرج نفسه وعرضه للناس زي ما قلتي فين الاخلاق فين الاصل فين الايمان ياعزيزتي احنا بنعيش عصر الخواء الفكري للاسف
تحياتي لبوستاتك ذات الطبع الهادف

شيرين-أيامنا الحلوة said...

مامادو
$$$$$$
اهوه ده الكلام ولابلاش الجمال جمال الروح

ههههههه لما نلاقي المواصفات دي هبعتلك متقلقش

تحياتي

سندباد
$$$$$$
للاسف فعلا احنا في عصر الخواء الفكري للاسف
واشكرك جدا على تعليقك اللي بيزيد البوست تألقا

تحياتي

ضد الظلم said...

لا مش كله اهم حاجة جمال الروح اى نعم
بس متجوزش

وحده شبه واحد صحبى يعنى فى ناس بتدقق فعلا فى الكلام ده لدرجه تخنق بس بجد والله اهم حاجة الروح فعلا والله

mlame7 said...

سلام عليكم

حلو جداً البوست يا شيري
_____________________

في بعض الناس زي ما انت بتقولي اهم حاجه عندهم الشكل والمظهر.
وفي طبعا وتقريباً الغالبيه اهم حاجه عندهم الاخلاق.

وجمال الروح والاخلاق وجوهر الانسان اهم كتير من شكله.

واساس الاختيار الصحيح هو اللي بيكون على اساس الدين والاخلاق.

وقال رسول الله صلى الله عليه وسلم : "
" لا تزوجوا النساء لحسنهن فعسى حسنهن أن يرديهن، ولا تزوجوهن لأموالهن فعسى أموالهن أن تطغيهن، ولكن تزوجوهن على الدين ، ولأمة ـ جارية ـ سوداء ذات دين أفضل"
=========================
mlame7.blogspot.com

اجندا حمرا said...

ايامنا الحلوه
موضوع جامد اوي بحييكي عليه
فعلا مقاييس زوجه المستقب ل بقت غريبه اليومين دول
طبعا انا مش بعترض علي اللي بيطلب واحده تكون مقبوله الشكل عشان ديه مش حاجه سطحيه بالعكس
بس فيه فعلا مواصفات اهم مفروض تكون موجوده في شريكه الحياه عن نفسي شخصيا لازم يكون فيه كميستري جامد بينا الكليك الاولاني فهماني؟ده مهم اوي
يكون فيه استظراف
نقط مشتركه بينا نتكلم فيها مش معقوله حنقعد ساكتين علي طول صح؟
ممكن ناس نقابلهم مايكونوش ملكات جمال بس عندهم جاذبيه كبيره ده اللي بتكلم عنه
ان روحها تكون حلوه
بحييكي علي موضوعك المثير للاهتمام و علي فكره انتي واحشاااااني اوي اوي
تحياتي ليكي ياجميله
:))))

shahy said...

عندك حق في كل كلمة
ايوة الكثير من الشباب بيهتموا بالمظهر وبس وبيقولو بكل صراحة
انا عاوز العروسة بيضة وشعرها ناعم وعنيها ملونة ولو بنت ناس ومتدينة يبقى كويس
وبعدين في حاجة اسمها قبول يعني في بنات بتبقى امورة جدا واول لما تبدا تتكلم نصف جمالها بيضيع وطبعا العكس صحيح

ربنا يهدي الشباب ويرزق البنات بالازواج الصالحين

شيرين-أيامنا الحلوة said...

ضد الظلم
$$$$$$$$
كلامك مظبوط .. ربنا يكملك بعقلك يابوا العربي..وربنا يهدي نوعيه الشباب التانية دي

تحياتي

ملامح
$$$$
منورة ياجميل.. اكيد اساس الاختيار الصحيح هو الدين والاخلاق .. اللهم ارزقنا بازواج صالحة

تحياتي

اجندة حمرا
$$$$$$$$$
اخجلتم تواضعنا يافندم .. يجد انتي اللي ليكي وحشة كبيرة وبتنوريني دايما بتعليقك وكلامك فعلا مظبوط ورلابنا يرزقك بزوج صالح ويكون في بينكم كميستري

تحياتي

شاهي
$$$$$
كلامك مظبوط جدا القبول انا ممكن اشوف واحد جميلة جداااااااا واول ما اتكلم معاها الاقي جمالها نصفو بيروح .. وفي واحدة تتكلمي معاها تحسي انها اجمل بنت قدامك

تحياتي

علاء said...

يا ميس شيرين
المسألة دي أذواق
أنا مثلا مش باطيق الشعر الأصفر و العيون الخضرا
يعني كلمة جميلة تختلف مواصفاتها من واحد للتاني

و منكرش اني عايز اللي هاتجوزها تكون جميلة بس مش عشان افرجها لاصحابي :)
انما عشان مابصّش بره
و يبقى جوه مش مخليني محتاج ابص لبرّه
و طبعا ده مش معناه اني هابص لبره و لا حاجة بس الفكرة ان الانسان عايز اللي تعيش معاه على الاقل يكون في قبول من ناحيتها يعني لما يبص في وشها يستريح مش يتعكنن

مش كده ولا ايه ؟
:)

علاء said...

طبعا ارجع و أقول ان دي مش الأولويات لأن الاولوية الأولى انها تكون متدينة و على خلق
لكن برده الجمال او القبول على الاقل شيئ أساسي

Anonymous said...

شيرين ايامنا الحلوة

علاء
$$$$
مستر علاء .. مالك بس متنرفز ليه اديك لفيت لفيت وقولت اللي انا عايزة اقولوا وهو ان الجمال مش هي الاولويات ومش معنى كده اني بقول الشكل مالوش اهمية لاطبعا اكيد الشاب عايز واحد حلوة يعف نفسو والفتاة كذلك بس للاسف دلوقتي الشاب مش لابيدور غير على المظهر ومش بيبص على الجوهر غير في الاخر خالص ويوم ما بيوصى حد يشوفلو عرسة اول حاجة بيقولها عايزة عروسة بيضاء جميلة جدا وشيك بس كده وبيكتفي بهذا القدر
انا بناقش شئ واقعي فعلا بيحصل

وربنا يرزقك بزوجة تقيا اولا وجميلة ثانيا

تحياتي

soha said...

ازيك ياشوشو ياحببتي الموضوع بتاعك جميل قوي ويشد الانتباه فعلا لان في شباب كتير بتفكر كده وده طبعا تفكير غلط واللي بيفكر كده ميعرفش حاجه لان جمال المراءه في شخصيتها ورحها مش في شكلها والدليل علي كده ان معظم ملكات الجمال في المسابقات مش جميلات بالقدر الكافي وعلي فكره معظمهم من اصحاب البشره السمراء

bocycat said...

يابنتى المواصفات دى بتتغير ساعة الجد وعلى فكرة اللون القمحى والعيون السود والبنى والشعر الاسود فيهم جاذبية انا كنت اتمنى اكون كدة بس انا بقى بيضاء وعيونى عسلى ده مش اعلان عن نفسى انا اتجوزت من زمان __ عقبالك __ بس تلاقى اللى يستاهلك ويقدرك ويحبك وطبعا لازم تحبيه ... قولى آآآآآآآآآمين

شيرين-أيامنا الحلوة said...

سها
$$$$
اكيد جمال المرأة في روحها وبرضو منكرش ان الشكل والمظهر العام ليه عامل لكن اللي عايزة اوصلوا ان مش مواصفات محدددة في الانسان هي اللي بتحدد نسبة جمالو يعني مش لون البشرة ولا لون العيون والشعر هو مقياس الجمال واتمنى ان يكون قصدي وصل للناس صح

ونورتيني بتعليقك بجد واتمنى التواصل
تحياتي

بوسي كات
$$$$$$$$$
منورة ياجميل..ياستي لو قمحي او اسود او ابيض كلهم حلوين انا اللي قصدي اقولوا ان مفيش مقياس معين للجمال يعني واحدة بيضة ممكن تكون جميلة جدا ووممكن غيرها تكون مش حلوة وواحدة سمراء ممكن تكون جميلة جدا وغيرها سمراء برضوا تكون مش حلوة .. ياريت يكون قصدي وصل بجد

ونورتيني ياجميلة ياصاحبة العيون العسلية ههههه وربنا يكرمك في حياتك الزوجية

تحياتي

The Groom said...


معلشي يا شيرين اللي يعيش ياما يشوف

عارفة روحي مدونتي وشوفي البوستات بتاعتي عن الموضوع ده وتجاربي في الحاجات دي

تحياتي لك من ماناساس البلد

شيرين-أيامنا الحلوة said...

جروم
$$$$
فينك بقالك كتير غايب يارب تكون بخير ومشكلتك اتحلت
وفعلا صدقت اللي يعيش ياما يشوف

تحياتي

•«ρяoιd»•™ said...

وللاسف نوعية الشباب دي موجودة كتير في واقع أيامنا الحلوة

!!!!!!!!!!!!!

هي كده أيامنا حلوه

طب ازاي

اللي بتقولي عليهم دول

ناس عايزه تتجوز واحده يفرجوا الناس عليها

حسبي الله و نعم الوكيل

الجمال ده حاجه نسبيه

و لو ليه معيار محدد كان 3/4 بنات العالم ملقوش حد يحبهم ولا يتجوزهم

اما بقي المواصفات اللي بتقولي عليها دي

لو مش هيبقي متجوزها عشان يفرجها للناس

يبقي من حق اي حد يحلم بيها

انما لو زي ما هو باين انه هيتجوز مليكان

يمشي يتفشخر بيها

كده تحول ل ديوث

و لن يشم رائحة الجنه ديوث

و بعدين مين اللي قالك ان البشره القمحي و العيون السودا و الشعر الأسود

مش مواصفات للجمال

حد يقدر بنكر ان العيون السود من اجمل العيون

و الشعر الأسود سواد الليل مش في قمة الجمال

معتقدش ان حد يقدر ينكر كده

و زي ما قولت الجمال دي حاجه نسبيه

المهم الأساس

في إنها تبقي اسره شعيده صالحه زي ما قولتي

مش اسره الراجل بتاعها متجوز واحده عايز الكون يتفرج عليها و هي ماسكه في دراعه و يقولوا يا بخته

مش عارف هو بقي ان الناس بتقول ليه يا اهبل

ماشي بمراتك تفرجنا عليا

ربنا يرحمنا يا رب

و معلش طولت عليكي

تحياتي

شيرين-أيامنا الحلوة said...

برويد
$$$$$$
أحنا اللي في ايدينا نخلي ايامنا حلوة هي بالفعل حلوة العيب فينا احنا لازم نغير نفسنا

وطبعا كلامك مظبوط للاسف شباب كتير اليومين دول شايفيين ان الجمال ليه معيار واحد وهو البياض والشعر الاصفر والعيون الملونة

ومش معني كده ان اللي بالمواصفات دي بقول عليهم وحشين زمانهم دلوقتي بيقولوا اني بحقد عليهم ههههههه ... لاابد بس من راي المواصفات دي مش معيار للجمال .... والاهم من الجمال الاخلاق ياريت ندور عليها الاول

تحياتي

أنا حر said...

للأسف الشباب دول مش عارفين قيمة البنت في حد ذاتها من غير المعايير الشكلية دي
انا ولد وبحب جدا وبحترم اي بنت لأن اي بنت عبارة عن ورده جميلة ليها نفس الرقة ونفس الاحساس اللي يخلونا احنا الرجالة مايتيين فيكم

شيرين-ايامنا الحلوة said...

أنا حر
$$$$$$$
ربنا يكرمك بزوجة تقية وجميلة كما تحب

تحياتي

Anonymous said...

حبيبتي أنا مقتنعة أن أي رجل ينظر للجمال في المرأة رقم واحد لا يصلح زوج من البداية .. لأنه سوف يتزوج من برواز رائع وجميل وسوف يمر عليه الزمن والصورة تدوب فيبعد عنها.. "هو ده يصلح زوج" ..

داليا

شيرين-أيامنا الحلوة said...

داليا
$$$$$$
داليا الجمال مطلوب حتى لو كان رقم واحد لازم الرجل يعف نفسو وعينو متبصش على حد بره .. لكن الافراط في المواصفات او النظرة للجمال من زاوية خطأ هو اللي غلط

تحياتي

Anonymous said...

يعنى ابقى انا احلى من العروسه ؟؟ طيب اعمل ايه؟؟ مهو لازم تبقى هى على الاقل فى مستوى جمال اخواتى ويا هتتعقد