Sunday, May 27, 2007

الاتوبيس


يلا يلا يلا بسرعة الاتوبيس جه .. حاسب لو سمحت سبني اركب انا الاول مش تذوق كده .. ايه ده اوف .. اوعي كده يااخي ..ياااه الحمد لله لحقتلي كرسي قبل ما الدنيا تتزحم ..
ايه الهنا الي انا فيه ده انا راكبه الاتوبيس وقاعده كمان عمار يامصر !!!يلا ياعم السواق اطلع بقي الله يكرمك عايزيين نلحق معاد الشغل ...
ايه الزحمة دي اوف هو مفيش غير الاتوبيس ده في البلد دي ولا ايه..يلا اهي توصيلة والسلام ..يادي النيلة في ايه انا راكبة سحلفة مال السواق مش قادر يزوق ولا ايه ..
شد حيلك شوية ياعم انا اتاخرت علي شغلي .. السواق: "في ايه الي مش عاجبوا ينزل يركب تاكسي دي هيئة نقل عام ياأنسه مش عربية بابي".... تاكسي.. ايه الي بيقولوا الراجل ده انا اركب تاكسي ليه مفيش اتوبيسات درجة ثالثة في البلد ولا ايه.. معلش ياريت تسرع شوية يااسطى .. حاضر من عنيا ياأمورة .. هياااااااااااااااااااااااااااه قال اني أمورة السواق ده كويس
مش عارفة ليه الناس بيتخنقوا كده ومش طايقيين بعض ايه ده وصلت للضرب كمان وتقطيع الهدوم والدم سايل على الارض .. ايه ده كلو ضرب ضرب ضرب مفيش شتيمه ولا ايه .. اخ هنطلع علي القسم .. لا ارجوك يااسطي بلاش القسم الله يخليك هترفد من شغلي .. السواق: "ابدا لازم نطلع علي القسم عشان نربي الاشكال الي زي دي" .. الله يخليك ياعم بلاش اقسام ابقي ربيهم في وقت تاني..
الحمد لله الناس الي اتخانقو اتصالحوا خلاص اول ما عرفوا انهم هيروحوا القسم "قالو قفا الشعب ولا قفا الحكومة" علي الاقل الشعب هيكون قلبو علي قفا التاني انما الحكومة بقي معندهاش غالي..يلا الحمد لله عدينا نص الطريق فات القليل ما بقي الا الكتير .. اخ ايه الي وقف الاتوبيس كده كتييييييييير في ايه يااسطي امشي بقي .. السواق : "امشي فين يعني اطير ولا اعمل ايه .. بصوا قدامكم ياحضرات الطريق كلو واقف .. في حادثة كبيرة والكل واقف مش بيتحرك".. اااااااااه اصلها ناقصة.. الشارع واقف علي الاخر لاحد عارف يدخل ولا يطلع .. متهيالي شوفت الفيلم ده قبل كده بس الناس كانت محشورة في اسانسير مش اتوبيس هيئة النقل العام..عدت ساعة كاملة .. والاتوبيس زي ما هو محلك سر.. والكل عمال ينفخ والمحمول اشتغل والاتصالات ابتدت .. تأجيل مواعيد واعتذارات للتأخير .. الناس خلقهم ضاق علي الاخر مش مستحملين دبانة تعدي .. وفي فئة تانية من الركاب مبسوطين اوي لان الروس كلها اتساوت يعني الي راكب تاكسي زي الي راكب مكروباص زي الي راكب الاتوبيس الشعب كلو متعطل .. بفكر اخدها جري لحد الشغل .. شغل ايه بقي ما خلاص اليوم راح والحمد لله ..

ايه الشاب الحليوة ابو شعر حرير لصقوا بسمنة "النخلتين" الي قاعد جمبي ده شكلو مش وش بهدلة الاتوبيسات قاعد مضايق اوي عمال يتصل بالموبيل بتاعو ويقول هتاخر ساعة او ساعتين وبينفخ .. عايزة اقولوا متزعلش نفسك كلنا لها .. فجأة لقيتو بيقول "معلش ياانسه انا شايفك مضايقة اوي دلوقتي الاتوبيس يطلع وكلو يبقي تمام".. ايه ده ياحلولي ياحلولي ده بيكلمني بس علي مين انا بنت مؤدبة مش برد على شبان " نعم خير بتقول ايه حضرتك" ؟.. اخ بصلي بكل خجل وسكت ولقيتو بعد كده نزل بسرعة .. ايه الي انا عملتو ده يعني انا طفشتوا قبل ما يصارحني ويقولي انو بيشوفني كل يوم في المواصلات ومعجب بيا وعايز يجي يطلب ايدي من بابا .. ياخسارتك يابو شعر سايح .. يلا خيرها في غيرها ..
ايه ده الاتوبيس اتحرك احمدك يارب .. ياااااااااااه ايه الحادثة دي .. ده فعلا لازم الطريق يبقي واقف كده لبعد بكره كمان.. دي عربية انابيب كبيرة خبطة في عربية نصف نقل والعربيتين سدين الطريق علي الاخر .. والشرطة مش راضية تحرك حاجة من مكانها هيرفعو البصمات ولا ايه .. مش فاهمة ليه التعطيل ده .. ياسبحان الله الشعب كلو اتعطل عن شغلوا والطلبة اتعطلوا عن محاضرتهم بسبب الحادثة دي طيب فيها ايه لو الشرطة تخلص الموضوع بسرعة ويفتحوا الطريق .. مش امة محمد كلها تتعطل ونبقي بالمنظر ده.. بجد موقف غير متحضر بالمرة..يامسهل يارب .. يلا ياعم السواق عايزين همتك معانا امشي شوية بقي لحسن خلاص اتخنقنا .. السواق: "من عيني ياعسل"..
غريب اوي السواق ده هو مفيش غيري في الاتوبيس ولا ايه كل شوية يأمورة وعسل يعني ياربي مفيش شاب حليوة هو الي يقولي الكلام ده .. يلا مش مشكلة اهوه راجل برضوا وليه وجهة نظر ..وأخيرا وصلت ونزلت من الاتوبيس الي قررت اني عمري ما هركبو تاني حتي لو الحكومة قررت انو يكون بالمجان .. مالو المشي ده حتي رياضة مفيدة !!! .. وده يوم من واقع أيامنا الحلوة

20 comments:

علاء said...

اسلوبك شيق جداً على فكرة ما شاء الله
يلا شدي حيلك و اعملي مجموعة قصصية اسمها ايامنا الحلوة
-----
موضوع الزحمة ده بيخنق
و القاهرة بالذات خلاص فاضلها شوية و هتنفجر
انا مرة كنت جاي من المطار و قعدت 3 ساعات و نص بس على كوبري أكتوبر

اسكندرية و المنصورة أحلى ألف مرة :)

ربنا يباركلك يارب

اجندا حمرا said...

ايامنا الحلوه
وحشتيني ياجميله
و الله موضوع في الصميم و اسأليني انا علي المواصلات و البهدله من اقل حاجه و هي الخنقه في المواصلات كأن مفيش غير الاتوبيس اللي بركبه في البد و المضايقات و الاستظراف بتاع الشباب الكوول و التلزيق في البنات و حاجات تقرف بجد و ووقوفنا في الاشاره ميت سنه لحد ماتفتح و خصوصا بتاعت جامعه عين شمس مصيبه لوحدها
مش ممكن حتي المكيف اللي كنا بنقول عليه عدل بقه بيوقف الناس و لا كأنه اتوبيس نقل عام من اللي ب50 قرش حتي التكييف بايظ اغلب الوقت
حاجه منعشه بجد و احنا داخلين علي صيف جميل
بحييكي علي موضوعك الرائع عزيزتي و بالتوفيق دايما و سلامي ياجميله ليكي

The Groom said...


لا حول ولا قوة الا بالله

فكرتيني لما حتة من كوبري الجامعة قدام جامعة القاهرة وقعت في النيل

وروحت يوميها من الجامعة لمدينة نصر في اربع ساعات

دخلت البيت مع نشرة 9 وانا سايب الكلية الساعة 5

عموما ربنا يكرمك

المرة الجاية متزوقيش الولد وتكشري في وشه أبو شعر سايح ده

ربنا يرزقك يا رب

تحياتي لك من ماناساس البلد

سجدة said...

فكرتنى بمرة كنت راكبة الاتوبيس والسواق قام جاب الشاى للكمسرى والكمسربيقطع التذاكر مش عارف ياخد الشاى منه والسواق يحلف ما هو مدى الشاى لاحد غير الكمسرى واكثر من عشر دقائق على الحالة دى
مفيش اى رقابة ولا كأن الناس دى ليها لازمة

شيرين-أيامنا الحلوة said...

علاء
$$$
ربنا يكرمك ويارب دايما يعجبك الاسلوب .. وبالنسبة للمجموعة القصصية بتاعت ايامنا الحلوة دي افكر فيها بس ياريت الطباعة تكون على حسابك هههههه

بالنسبة للزحام عندك حق في ان خلاص القاهرة قربت تنفجر ربنا يرحمنا برحمتوا ..

تحياتي وتابع البوست القادم سيرة كل المدونين هتكون فيه وانت منهم

أجندة حمرا
$$$$$$$$
اهلا ياجميل منوراني دايما .. بس تصدقي قطعتي قلبي ياشيخة حرام عليكي .. مفيش ولا مواصلة سالكة معاكي كده .. على العموم المشي رياضة صدقيني ههههه

تحياتي

جرووووووووم
$$$$$$$$$$$
عارف أنا برضوا مرة كنت معزومة عند خالتي على الغداء وخرجت من الجامعة على الساعة 3 واللهي مش هزار عارف وصلت امتى زيك في نشرة تسعة كده بس انا الحظ بقى لعب معايا لعبتوا وكان في مسؤول بيعدي طريق مدينة نصر اهئ اهئ حرام عليك فكرتني باليوم ده ليه طبعا العزمة باظت واتعشيت بس

تحياتي

سجدة
$$$$
ههههههههه شاي طب الحمد لله ان الشاي موقعش على حد من الركاب.. يابنتي الدنيا بايظة خالص .. ربنا يرحمنا

تحياتي

sendbad said...

بوست هايل ودمه خفيف بس صعب عليا الواد الحليوة ابو شعر ناعم دايما كده كاسرين نفسنا الله يسامحك

أُكتب بالرصاص said...

ههههه

لا تعليق
بصراحة
ابدعتي

شيرين-أيامنا الحلوة said...

سندباد
$$$$$$$
ربنا يكرمك ومبسوطة اني البوست عجبك .. وياسيدي ميصعبش عليك ابو شعر حرير عادي خيرها في غيرها ههههه

تحياتي

اكتب بالرصاص
$$$$$$$$$$$$
ربنا يخليك .. يكفيني شرف رسم البسمة على وجهكم الكريم ههههه..
بس في مشكلة عندي لسه مكتشفاها حالا شكلي كده مش هنزل يوستات تاني اهئ اهئ عمالة بحاول ادخل الباص وورد على البلوجر ومش راضي يدخل بيقولي انو في حاجة غلط وةمش عارفة اعمل ايه شكلي هودع المدونة ربنا يستر ادعيلي يفتح لحسن اتقهر بجد

تحياتي

أُكتب بالرصاص said...

ماتقلقيش
البلوجسبوت بيعمل حركات قرعة زي دي كتيير
وعملها معايا قبل كدا

اعملي ريسترات للجهاز
لو المشكلة ماتحلتش
انا في الخدمة وومكن اساعد
:)

شيرين-أيامنا الحلوة said...

اكتب بالرصاص
$$$$$$$$$$$$
ربنا يكرمك .. الحمد لله البلوج سبوت فتح بس بعد .. اييييييه .. اتخضيت اوي معرفش ان البلوج عزيز عليا اوي كده للدرجة دي .. بس الحمد لله انتظر بقى البوست اللي جاي عشان سيرتك جاية فيييييييه عشان متبقاش نميمة ههه

تحياتي

mlame7 said...

جميل جداً البوست يا شيري واسلوبك ممتع.
ربنا يوفقك ياااااااااااااارب.
mlame7.blogspot.com

ضد الظلم said...

يعنى اول مره ادخل المدونه وشدنى اسم ايمنا الحلوة القى الموضوع دة فين بقى ايمنا الحلوة بقالى ساعه عمال ادعى يارب الاتوبيس يوصل بسلامه الله واخيرا وصل
تحياتى

أميرة البلطجية said...

لو اليوم ده خلص وانتي لسه فيكي الروح الجميلة دي اللي كتبتي بيها البوست تبقي فعلا ايامنا حلوة وانتي احلى
تحياتي

شيرين-أيامنا الحلوة said...

ملامح
$$$$$
ربنا يخليكي ياجميل .. ويارب دايما تعجبك بوستاتي

تحياتي

ضد الطلم
$$$$$$$$
صدقني هي دي ايامنا الحلوة .. بحلوها وبمرها لازم نعيشها ونقبلها .. وكمان احنا نخليها احلي.. اشكرم لمرورك على ايامنا الحلوة واتمنى التواصل

تحياتي

أميرة البطجية
$$$$$$$$$$$$
ربنا يخليكي ياجميل انتي الاحلى طبعا.. بس بيبني وبينكم انا اتخنقت اصلا والدقيقة للي بتمر عليا في الاتوبيس كانها ساعة بس الحمد لله نزلت ولما نزلت فرحت ولما فرحت كتبت البوست وطلع كده .. تفائلو تجدو خيرا ..

تحياتي

e7na said...

الشعب المصرى تعود على الشكوى دائما
ولا يعجبه شىء
ما الاتوبيسات زى الفل واحسن من المشى

شيرين-أيامنا الحلوة said...

a7na
$$$$
تصدق انا فرحنالك اوي انك شايف الاتوبيسات زي الفل كده .. ابقى قولي هي فين النوعية دي عشان ابقى اروح اركب من هناك تاخد عليا ثواب
اشكرك لمرورك على ايامنا الحلوة واتمنى التواصل

تحياتي

أنا حر said...

بصراحة مفيش أحلى من كده ايام بنات زي القمر بيركبوا معانا الاتوبيس يهونوا علينا كل اللي انتي حكيتيه ومش كده وبس كمان بندخل في جولة عالمية ا بين حوادث وزحمه وسرقة وخناقة وتسبيل ومعاكسات وموبايلات والله ده كتير احنا لازم نشكر هيئة النقل والمواصلات على مجهودها الجبار ده ونشكرها كمان مرة انها خلتك تكتبي البوست الجامد ده
تحياتي

shahy said...

اسلوبك جميل قوي ودمة خفيف خالص

انا بقى شفت حادثة حصلت نتيجة حادثة تانية.............ازاي .... اقولك

كان في على المحور حادثة
عادي بيحصل على المحور حوادث كتير
الغريب ان الناس اللي راكبين عرابيتهم في الناحية التانية كانوا بيهدوا لما يعدو من جنب الحادثة علشان يتفرجوا فخبطوا في بعض حوالي اربع عربيات وبقت حادثتان واحدة رايح وواحدة جاي
وتقوليلي الشرطة تدخل
الشرطة هاتعمل اية لناس مخها بايظ
ودة مش دفاع عن الشرطة لاسمح الله

سلام يا عسل

مـحـمـد مـفـيـد said...

ممتاز جدا البوست ده

شيرين-أيامنا الحلوة said...

أنا حر
$$$$$$$
الله يجبر بخاطرك .. وباسيدي شكرك وصل لهيئة النقل العام .. بس ابقى حاسب على محفظتك وانت راكب الاتوبيس هههههه

تحياتي

شاهي
$$$$$
نورتي المدونة .. واشكرك على التعليق .. وبالنسبة للحوادث فده خلاص شئ اعتدنا عليه .. ربنا يسترها بقى

تحياتي واتمنى التواصل

محمد مفيد
$$$$$$$
اشكرك جدا على تعليقك واتمنى التواصل مع ايامنا الحلوة

تحياتي