Friday, June 15, 2007

عريس لقطة


بما ان عندي جمود فكري اليومين دول قررت انزلكم بوست كنت بعتوا لبرايد في بيت العرايس والعرسان بس هي منزلتهوش قلت خلاص انزلوا انا عندي في أيامي الحلوة

القصة دي حقيقية من واقع أيامي بس فيها حبة تحابيش بسيطة كده لزوم الكتابة

المهم نبتدي الحكاية

في ليلة من ذات الليالي لقينا جرس الشقة بيرن فتحت اختي الصغيرة لقيت طنط جارتنا داخله والابتسامة عررررررريضة على وشها ..
وبتقولي ازيك ياعروستنا ياامورة انا جيبالك حتة عريس هدية والنبي هدية وبقولك ايه اول ما تتخطبيلوا لازم تجبيلي هدية قيمة كده مش عايزة بخل اصلي محبوش ابدا والعريس اللي انا جيباهولك بقي ايه متريش على الاخر وقمر وصغير ومفهوش غلطة ..

استني ياطنط اهدي كده براحة عليا عريس ايه اللي بتتكلمي عنو ..

ده ياستي ضابط في القوات المسلحة وعندو 29سنة وأمور وعندو عربية احدث موديل وشقتوا جاهزة في مصر الجديدة يعني مش هتقولي عليه بم ..

اااااه طيب ..

طنط: يعني ايه ياعروستنا موافقة عليها لولولولووووووووووووي ...

استني استني في ايه بس هتلمي عليا الدنيا هو انا شفتوا ولا هو شافني ..

طنط: خلاص ما انا اتفقت معاه خلاص اننا نروح النادي بكره الساعة 6 كلنا كده ويشوفك هناك..

ايه اتفقتي ازاي بس ياطنط تتفقي على حاجة زي دي من غير ما تقوليلي الاول..

لقيت ماما برقتلي كده وقالت خلاص بكره بكره مفهاش حاجة يمكن يطلع ده كويس يابنتي وافرح بيكي ..

قلت خلاص نشوف محدش واخد منها حاجة

الساعة 6 بالظبط كنا في النادي انا وماما وجارتنا ..

لقينا حد جاي من بعيد شيك جداااا وطول بعرض كده ووقار لقيتو داخل علينا بابتسامة رقيقة ..

سلام عليكم ..
وعليكم السلام ..

طنط: اهلا ياحبيبي اعرفك بقي على الناس الحلوة دي الانسة "شيرين" ودي الست ماماتها ..

العريس: اهلا وسهلا تشرفنا ..

والنبي ياخويا انا اللي اتشرفت ده واضح ان زي ما طنط قالت انو عريس لقطة وشكلو كده هادئ ورظين وانا بحب الناس الرظينة دي طبعا الكلام ده بقولوا في سري ..
الجرسون جه : تشربوا ايه يافندم ..

انا : اشرب اي حاجة فريش ..

العريس أحب اعرفك بنفسي اسمي: شريف واحلي حاجة اكتشفتها دلوقتي ان اسمي قريب من اسمك ههههههههههههههههههههههههه

انا ضابط في القوات المسلحة وساكن في مصر الجديدة وعندي عربية هتعجبك اوي شاريها غالية اوي ومش هقولك على ثمنها لحسن يغمي عليكي ههههههههههههههههههههههه


وعندي 29 سنة طبعا عجوز واكيد بتقولي ده فاتو قطر الجواز هههههههههههههههههههه

انا والدي كان قاضي واخويا مستشار واختي مهندسة
اخويا متجوز واختي لسه معندكيش عريس ليها بقي ههههههههههههههههههههه


لقيت فجاة الجرسون جه ..

الحمد لله انو جه في الوقت المناسب عشان يوقفوا شوية عن الكلام والضحك اللي نازل عمال على الفاضي ده في ايه مالو ده ..
الجرسون نزل الطلبات ومعاهم ازازة ميه معدنية لقيت ده بقي فجأة لالالالا من فضلك شيل المية مش محتاجنها ..
اصل ياانسة المية هنا غالية على الفاضي البوفية في النادي ده حرامية شوية فيها ايه لو يجيب مية من الحنفية ده حتي النيل روانا والخير جوانا ههههههههههههههههه

في انت بخيل اهلالالالا في سري طبعا

من اولها كده موقف غير موفق يعني المية هي اللي هتزودلك الحساب .. ازاي يخلي الراجل يشيل المية كده ده انا اصلا هموت من العطش وعايزة اشرب ماية احد احد .. طب اقول للجرسون يسيب المية وانا هدفع حسابها ولا اعمل ايه ياااااااااختي هفرقع وعايزة امشي
العريس: ها يلا بقي عرفيني على نفسك .. انا صحفية وعندي 23سنة ..
العريس : بس بس ههههههههههههه كفاية كده المعلومات دي تكفيني اصلي انا عايز واحدة صغيرة بصراحة كنت عايزاها اصغر من كده كمان بس سنك كده كويس ..
هو حضرتك ملكش اي طلبات في العروسة غير السن وبس
العريس: ههههههههههه لا طبعا اكيد في حجات تانية بس اصل السن عندي مهم اوي اصل عايز واحدة صغيرة عشان تمشي على طبعي يعني ياريت متزعليش اني صريح بس انا احب كلمتي هي اللي تمشي والصغيرة بقي هعرف اشكلها على مزاجي غير كده السن الصغير للبنت احسن مستقبلا عشان تفضل وردة مفتحة قدامي

اااااااااااااااه طيب
وبعدين قلت في سري فيها ايه يابت الراجل شكلو مبسوط منك شويتين وبيضحك والمية الي شالها مش مهم ممكن يكون وطني زيادة عن الللزوم ومقاطع المية المعدنية وبيحب مية النيل .. مشي المركب بقي وفرحي امك الغلبانة اللي قاعدة قدامك دي وعمالة تبصلك نظرات معناها اهدي بالله ومتركبيش دماغك وتحكمي على حد من اول مرة كده
ابتسمت ابتسامة صفراء كده وقلتلو فعلا عند حضرتك حق انا هقاطع المية المعدنية بتاعت النادي ده انا اصلا هقاطع البوفية بتاع النادي كلو
العريس: هههههههههههه برافوا عليكي بداية خير واضح انك مطيعة وهنتفاهم

ااااااااااااااااااااااااااااااه عايزة اصرخ في وشوا مفروسة ياخواتي بس امي وجارتنا قاعدين والغريبة انهم قاعدين لايروا ولايسمعوا ولايتكلموا ..

ها قولي بقي ايه المواصفات اللي تتمناها في زوجتك غير السن الصغيرة الولاء والطاعة

العريس: ههههههههههه واضح انك دمك خفيف اوي بصي ياستي انا عايز واحدة تحافظ عليا وعلى جيبي متكونش مبذرة يعني لانها لو مبذرة هتخرب بيتي

اقولك ايه رايك نتفق على مصروف البيت من دلوقتي احسن عشان تبقي كل حاجة في النور كده ايه رايك في 100جنية في الشهر وانا هجيب كل الاحتياجات والـ100 جنية دول مني ليكي هدية شهرية ههههههههههه انا عارف انهم كتير بس انا عايزك تحوشي منهم بقي..

عايزة اقولكم ان غير الصداع اللي جالي .. قعدة ومبرقة عنيا الاثنين اللي كانو هيطلعو من مكانهم من كتر الذهول ومتسألوش ذهول على مصروف البيت ولا على انو اصلا بيتكلم في حاجة سابقة لاوانها

اكونش خلاص اتجوزتوا ولا ايه وبعدين حكاية البخل اللي شكيت فيها في بداية القاعدة دي ابتدت تبقى أكيده عندي

انا بقي عايزة امشي باي وسيلة عشان اتخنقت ومش عارفة اعمل ايه او اقول ... فجأة لقيت نفسي بقول .. طيب مش يلا ياماما بقي ولا انتي رايك ايه ياطنط...

العريس: ليه بس لسه بدري هو انتو لسه شربتوا المشروبات اللي طلبتوها اشربوا ياجماعة ده انا هدفع فلوس مش ورق ..

لا معلش اشربهم حضرتك او اقولك انت رجعهم البوفية ومش هيحسبوك عليها ...

العريس: ايه ده انتي بتتكلمي بجد شكلك اقتصادية فعلا وهنتفق طيب انا هحاول ارجعهم البوفية ..وانا منتظر بقي تليفون عشان تحددولي معاد مع الوالد..

طنط: ان شاء الله ياحبيبي ومبروك مقدما متنساش الهدية بتاعتي ..

العريس: هاهاها عايزة هدية مرة واحدة ياستي هديتك عند ربنا احسن من اي حد

وخدت ماما في ايد وشنطتي في ايدي التانية

وطنط طالعة تجري ورانا استنوا استنوا ده عريس لقطة مفيش جواز اليومين دول صدقوني ... هو حريص شوية وصريح حبتين فيها ايه بس

13 comments:

علاء said...

و الله العظيم أنا قعدت اضحك متواصل أكتر من عشر دقايق
و بالذات بما قريت الجملة دي
"ده انا اصلا هموت من العطش وعايزة اشرب ماية احد احد "

و كأن سيادتك بتتعذبي و مش راضيين يدوكي ميه
أمال لو اتجوزتيه إيه اللي هيحصل

أولا واضح إن عمونا ده داخل سوبر ماركت مش عايز عروسة لأنه صريح بطريقة تشل

لدرجة إني شاكك إن بعض الكلمات اللي قالها كانت من التحابيش اللي قلتي عليها في الأول

في واااحد يقول "انا هحاول ارجعهم البوفية"
"و يشيل الميه"
ده كلام ؟
و كمان كلمتي اللي تمشي من أولها كده ؟

أنا كمان على فكرة أحب كلمتي تمشي و أكيد مفيش مانع من التحاور و أنا من النوع اللي باقتنع و الحمد لله
بس مش من أول مرة يقول كده
ثم 23 مش كبيرة
هو أصلا عنده 29 يبقى عايزها كام سنة ؟
19 ؟
المهم
أتمنالك طبعاً ربنا يوفقك
و إن كان الموقف ده قريب و العريس ده موجود يبقى نصيحتي ليكي بكل صراحة
نوووووووووووووووو واااااااااااااااي

مش عشان هو وحش .. هو لقطة
بس النوعية دي مش هتعرف تستوعب شخصيتك
ياريت تكون فهمتيني
ربنا يوفقك يااااااارب

شيرين-ايامنا الحلوة said...

علاء
$$$
واللهي المية المعدنية اتشالت من قدامي وانا عنيا هتخرم الازازة .... هههههههههه عارف برغم ان الموقف كان مضحك جدا بس انا كنت في لحظة الموقف كلو على بعضو هفرقع ووشي عمال يجيب في الوان الطيف بس لما روحنا انا وماما قعدنا نضحك وحسيت انو كوميدي فكتبتو واكتر حاجتين معلمين في مخي هي المية اللي اتشالت ومصروف البيت ... وربنا يوفق الجميع
يلا خيرها في غيرها هههه

تحياتي
وطبعا العريس نووووو واي ربنا يرزقوا بواحدة تانية احسن ان شاء الله

shahy said...

بصي يابنتي
مفيش حد كامل
بس البخل والعين الزايغة والكدب
دول تلات صفات لا يمكن العيشة معاهم وبالزات لما يكونو في الزوج

تحياتي وربنا يرزقك بأبن الحلال ان شاء الله

مصراوي أوي said...

عايزة ايه تاني يا شيرين 100 جنيه مرة واحدة.........كتير أوي ليه الافترا.....ههههههههه


انا اكتر حاجة ضحكتني كلمة انتي وطنية مقاطعة المية المعدنية..........مش ممكن :)

بس يا شيرين شكل التحابيش اللي قلتي عليها دي كتير لان بصراحة دا لو بجد يبقي الله كان ف عونك من الخنقة دي يا ستير يا رب


ادي يا ستي طنطك دي اي هدية علشان تسكت بقي شوية:)

شيرين-ايامنا الحلوة said...

شاهي
$$$$
البخل طبعا ملوش علاج ..... ربنا يكرمك يارب ويخليلك ابو الدراويش جوزك

تحياتي

مصراوي أوي
$$$$$$$$$$$
ايوه انت او ل واحد يعلق على مصروف البيت دي الاكيد اننا كنا هنتجوز في كهف ونعيش حياة بدائية هههه
التحابيش مش كتيرة ولا حاجة .... لكنها تحابيش لابد منها

تحياتي واتمنى التواصل

bocycat said...

هههههههههه هى الحكاية دى بجد ؟؟ ضحكتينى الا البخيل ده انتى ربنا بيحبك عشان بان على حقيقته من اول قاعدة .. ربنا يوفقك

Anonymous said...

تقريبا العريس كان منتظر يقابل نبيلة السيد وتقول :"عريس يا بووووووووووووووووووووي " .. معلش يا شيرين الا الراجل اللي رابط الجنية في جيبه باستيك يطلعه يرجع تاني الحياة معه صعب اوي .. ربنا يوفقك ويرزقك انتي وكل اللي بيكتب تعليق بالزوج الصالح

شيرين-أيامنا الحلوة said...

بوسي كات
$$$$$$$$
ربنا يخليكي ... الحمد لله طبعا ان الحكاية ظهرت من اول قاعدة

تحياتي

مجهولة نرمو
$$$$$$$$$$
هههه حلوة حكاية نبيلة السيد دي يانرمو .... ربنا يكرمك ياحبيبتي ويوفقك يارب ويجازيكي خير على دعوتك دي يارب اللهم تقبل

تحياتي

The Groom said...


الجيش يعلم البخل

هاهاها

وكمان ابعد عن الميري وتف على ترابه

ربنا نجاكي يا بنتي الحمدلله

تحياتي لك من ماناساس البلد

شيرين-أيامنا الحلوة said...

جرووووم
$$$$$$$$
مش كل توع الجيش كده صدقني انا جوز خالتي ضابط في الجيش والراجل زي الفل
ههههه

تحياتي

Anonymous said...

ده عريس رائع ولقطة مفيش زيه اتنين في أيامنا الحلوة هههههههههههه.

ربنا يرزقه عروسة زي حريصة إللي في مسلسل "ونيس"


داليا

أيامنا الحلوة said...

داليا
$$$$$$$
شوفتي يادودو العريس ربنا ما يوريكي ياحبيبتي ابدا حاجة زي كده

تحياتي

S H A H said...

انا مت على نفسي ضحك بجد

بخلاف العريس اللقطة انتي حكيا الموضوع بطريقة تحفة

بس فعلا اسوء شئ في الراجل هو البخل

ربنا يسعدك و بوفقك يا رب مع اب الحلال