Wednesday, May 23, 2007

امشي في جنازة ولاتمشيش في ....؟


الواحد من دول يضرب الجيل في شعروا ويحمي نفسوا بكالونيا خمس خمسات ويلبس الهدوم اللي على الحبل المغسولة بصابونة صن لايت عشان ينور كده ويشعشع .. عشان هيقابل عروسة واحد من معارفوا هيجبهالو.. وتيجي بقى الحلوة الامورة اللي هتشوف العريس اللي جايلها في البيت عن طريق نفس الشخصية تدي البيت الترويقة المعتبرة اللي هيه .. وتعمل حملة نظافة مبكرة لكل فرد في البيت وتجهز الحلويات والمشروبات والمحتاجات اللي هتتقدم للعريس المنتظر .. من الاخر الطرفين بيكونوا مستعدين للمقابلة دي اللي في الاصل السبب فيها فلان صديق الاثنين ..وبعدين يتقابلو العروسين ويعجبوا بعض .. وتتم الخطوبة ويكون الصديق اللي وفق ما بينهم ده حاجة كبيرة اوي عندهم ويعاملوه معاملة الاخ والصديق الوفي .. ولكن سرعان ما يتم الزواج وتأتي المشاكل ويصبح هذا الصديق اكبر عدو للطرفين وطبعا المعاملة تتحول ويعملوه معاملة مرات الاب .. ويقعدوا يدعو عليه في الرايحة والجاية .. هو طول ما هو ماشي في الشقة يقول منك لله ياللي في بالي.. انت السبب اللي وقعتني في الست المفترية دي .. وهي طول ما هي قاعدة تقشر البصل في المطبخ ترفع ايديها للسماء وتقول حسبي الله ونعم الوكيل ياللي في بالي .. انت السبب اللي وقعتني في الراجل الداهيه ده ..

واللي وفقهم ياحرام بقى ممكن لعبة القدر تلعب معاه لعبتها وتجرالو مصيبة فعلا من دعاويهم والحظ يلعلع معاه وتكون السماء مفتوحة

وعلى الرغم من انك بتاخد ثواب كبيييييييير اوي لما توفق راسين في الحلال .. بس للاسف بترجع تندم بعدين .. من كتر عتابهم ليك انك عرفتهم على بعض .. ده غير الدعاوي اللي بتاخدها من الطرفين في غيابك .. وكأنك انت اللي جوزتهم غصب عنهم وقولتلهم ههحط السيخ المحمي في صرصور ودنكم لو متجوزتوش .. وانت نيتك اصلا بتبقى خير عايز تستر الاثنين وتكسب فيهم ثواب ومنها مشاركة برضوا في حل مشكلة العنوسة .. لالا بلاش كلمة عنوسة مش لطيفة .. نخليها مشاركة في حل مشكلة البحث عن عروسة وعريس.. بس في الاخر ترجع تقول لنفسك صدق المثل الشعبي اللي بيقول امشي في جنازة ولاتمشيش في جوازة

بس عارفين انا مش مع المثل ده .. انا مع المثل اللي بيقول اعمل الثواب وارميه البحر

على الاقل لو مشيت وراء الجنازة هصوت وهحزن وممكن تجيلي ازمة قلبية واموت وراء الميت .. انما لو مشيت في جوازة بقى هزغرد وهفرح وهشرب كوكاكولا واحتمال يكون في بوفيه .. بذمتكم انهي الاحسن اقولكم احنا نغير المثل ونقول امشي في جوازة وامشي في جنازة برضوا علشان الواجب بيحتم عليك كده ولا انتو رايكم ايييييييييييييييييييه؟

19 comments:

أميرة البلطجية said...

لا بس مش شرط..مش شرط يحصل مشاكل ومش شرط لما تحصل مشاكل اصابع الاتهام تتجه للموفق راسين ف الحلال
وحقولك حاجة...الناس تعمل اللي عليها وترميه في البحر صحيح...والجواز مسئولية كل متزوج
تحياتي

Anonymous said...

أميرة البلطجية
$$$$$$$$$4$$$
يادي الهنا يادي السرور .. وسع وسع وسع البلطجية عندنا

معظم اللي قابلتهم في حياتي كده .. اول ما تبدي المشاكل اصابع الاتهام تتجه على اللي عرفهم ببعض علطول .. للاسف في ناس كتير بتخاف توفق حد عشان المشاكل دي .. بس البوست ده دعوة للثواب المجاني بتوفيق راسين في الحلال

تحياتي واتمني التواصل

Anonymous said...

داليا.. والله يا شيري أنا شايفة أني أمشي في جوازة بالرغم أني والدي ميحبش يمشي في جوازة للبد عن المشاكل.. تحياتي ليكي يا شيري لأنك فتتي الموضوع ده لأنه محتاج أنه يغير في أفكار الناس كلها .

Anonymous said...

حتما ولابد نسعى للخير .. احنا نمشي في الخير عشان بردوه نلاقي اللي يمشيلنا فيه ..

وعلى رأيك امشي في الجنازة وفي الجوازة .. في الأولى هتتعظ من الموت وفي التانية يا تعيش يا تموت

Eric Matt said...


أؤيد و بشدة

:P

ألاقيش عندك عروسة؟

:P

ربنا يكرمك

تحياتي لك من ماناساس البلد

Anonymous said...

داليا
$$$$$
اي خدمة يافندم عايزاكي بقى تديها مترحميهاش وتفتحي عندك مكتب لتوفيق راسين في الحلال
تحياتي

على الطريق
$$$$$$$$$$
عايزة اعيش يابيييييييييييه .. انتختني احنا لازم نمشي في الاثنين عشان ده واجب وطني ههههه

تحياتي

جرووووووووووم
$$$$$$$$$$$$
العرايس كتير بس انت قشر هههههههه .. متقلقش هفتح مكتب لتوفيق راسين في الحلال على القريب ابقى تعالى وقدم ورقك يمكن الحظ يضرب معاك

تحياتي

سجدة said...

هو صحيح لزم الواحد يمشى فى الجوازت زى ما يمشى فى الجنازات
واهو النتيجة فى الاخر واحدة
المقبرة
هههه

Anonymous said...

ياشوشو متمشيش بالمثل ده ياقمرية علشان اللي بيقدم السبت بيلاقي الحد قدامه ماشي يا مان بايياقمرية

Anonymous said...

ايامنا الحلوه
ازيك ياجميله؟
موضوع لذيذ زي كل موضوعاتك
فعلا ساعات الواحد لما يحاول يوفق راسين في الحلال و العمليه ماتمشيش زي ماحبينا بيبتدوا يلومونا و يقولولنا انتم عملتم فينا ايه فالواحد بيريح دماغه و يشيل نفسه من الحدوته دي
بس انا برضو مع ان لو اتيحت ليا فرصه اعرف اتنين ببعض و حاسه انهم ممكن يكن فيه بينهم توافق يبقي شئ جميل و مفيش حاجه مضمونه ممكن حتي لو اتعرفوا علي بعض مش لازم من خلالي مش شرط ان العلاقه تعمر دي بتكون علي حسب الظروف و تشكري ياجميل علي الموضوع و بالتوفيق دايما

الشيطان يعظ said...

هاي مدونتك حلوه قوي
و جامده جدا
يارب تزروني في مدونتي

بيتنا القديم said...

"انا مع المثل اللي بيقول اعمل

الثواب وارميه البحر"

وليه ما ترمهوش عند ربنا

تحياتي

ويجعلوعاااااااااااااااااااااامر

•«ρяoιd»•™ said...

يا بخت من وفق راسين في الحلال

مش فاهم انا ايه راسين دي

هنخيب خرفان يعني ولا ايه

و بعدين يعني

امشي في جنازه و لا تمشي في جوازه

ما الأتنين لهم نفس المصير

و الموت علينا حق

هههههههههههه

تحياتي

Radwa said...

الشخص اللى جمعهم دة مش هو السبب كان ممكن يتجمعوا برضه من غير الشخص دة وتحصل مشاكل برضه

سندباد said...

اعمل الخير في من هو اهل له فان لم يكن هو اهل له فانت اهل له

زحل الفلكي said...

ههههههه

اول مره اجي المدونة
بجد اسلوبك رائع وخفيف اوي

يعني خلاص حيطير اهو

بالنسبة للموضوع ده يا بنتي و الله الواحد اصلا مما بيصدق يمشي في جوازه ده لو عرف يعني
مش لازم كلنا نحل ازمة الجواز اللي في البلد دي

واهو بقا هو يعمل الخير ده ويدعي ان ربنا يكرمهم
وساعتها حيبقا طاير من السعادة

اه وحياكل من البوفيه ويلف باقي الاكل ويروح بيه كمان
ومينساش يحبس بالكوكاكولا

بوست جامد

Anonymous said...

سجدة
$$$$$
تصدقي عندك حق فعلا النتيجة واحدة مقبرة ههههه يس في فرق في نوعيات المقبرة

تحياتي

قلوب حائرة
$$$$$$$$$$
حلو مثل اللي بيقول قدم السبت تلاقي الاحد ياريت بقى تقدميلي السبت انتي الاول وصدقيني هتلاقي عندي الاحد هههههههه
تحياتي

أجندة حمرا
$$$$$$$$$$
ازيك ياجميل بتنوريني دايما بتعليقاتك ياستي كلامك فعلا مظبوط وياريت الناس تعمل الثواب وترميه البحر
تحياتي

الشيطان يعظ
$$$$$$$$$$$$
اعوذ بالله من الشيطان الرجيم .. دستور دستور ..هو ده اسم الشهرة ولا ايه .. اشكرك لمرورك واتمنى البوستات تعجبكم دايما

تحياتي

سمسم
$$$$
كلامك مظبوط اعمل الثواب وسيبوا عند ربنا ..يلا بقى همتكم ياشعب اعملوا ثواااااااااااب

تحياتي

برويد
$$$$$$
بجد مش مجاملة نورتني ايهه الغيبة دي بس اخيرا رجعت تاني للتدوين حمد لله على السلامة .. وحكاية الراسين دول ياسيدي مش هتفرق المهم التوفيق عشان يموتوا مع بعض الموت علينا حق

تحياتي

رضوى
$$$$
كلامك مظبوط فعلا بس مين بقى اللي يعرف عند المشاكل مفيش حاجة بتيجي في مخهم غير اللي وفقهم مع بعض وبس، نورتيني واتمنى التواصل

تحياتي

سندباد
$$$$$$$
ياسيدي اعمل الخير وخلاص .. هو اهله او مش اهله الواحد يعمل اللي عليه عشان ربنا يكرموا بعدين

تحياتي

زحل الفلكي
$$$$$$$$$$
شرفتني بمرورك واتمنى دايما اسلوبي يعجبك وتتواصل مع ايامنا الحلوة،وحاول توفق راسين في الحلال عشان تاكل من بوفيه الفرح وتحبس بكوكاكولا هههه
تحياتي

Alaa said...

ليه التشاؤم ده كله
واضح ان الموضوع حصل معاكي :)
الانسان بيعمل الخير و يرميه في البحر زي ما حضرتك قبلتي و يسيب الباقي لتساهيل ربنا
الجوزين اتخانقوا بأه او فضلوا كويسين
دي حاجة بتاعة ربنا

مش يمكن يكونوا كويسين جدا مع بعض
انا حصل معايا النوعين من الجوازات
بس ربك بيسهل
و باكون طرف صلح و الحمد لله

دي أول زيارة لمدونتك
ما شاء الله
جميلة أوي
ربنا يباركلك

Anonymous said...

علاء
$$$$
انا متفألة جدا على فكرة .. انا بدعوة الناس للتفأول لا للتشأول .. وفعلا حصلت الحكاية دي بس مش معايا مع والدتي حاولت توفق اثنين مع بعض وحصل مشاكل كبيرة بس في الخطوبة وبعدين اتفسخت وطبعا والدتي خدت لوم من الطرفين وكلام كتييييير طبعا اضايقنا بس مش معنى كده ان كل الناس هيحصل معاهم كده لاطبعا سيبك انت الواحد يعمل الثواب ويرميه البحر.. وشرفتني بجد مدونتك رائعة جدا .. اتمنى التواصل

تحياتي

Anonymous said...

نعم امشي في جنازة توجر بادن الله وامشي في زواجة كذالك توجر بادن الله لان الدال علي الخير كفاعله. أولا خلي دايما عملك للخير لوجه الله . انت ملكشي علاقة بعواقب الزواج طلما عملك مخلص لله . والي قال ولا تمشي في زواجه داء واضح انسان اناني وما يحب الخير للغير وندل !