Sunday, October 28, 2007

يوم في حياتي

سكوووووت هنصوت ده من كتر فرحتنا وأيامنا حلوة طبعا واحنا مع قلوب حائرة الي بتجمع المدونيني الحلوين ومنهم دوبا اللي دايما مكانها في القلب وكلنا اتجمعنا كده على البركة عند مفيش حاجة
بالحب اتجمعنا والدنيا هتسمعنا... تم امس السبت بحمد الله لقاء بلوجرزي تحفة بجد حيث تم اقتحام منزل شاهي وزوجها ابو الدراويش اللي قال يافكيك اول ما شاف الاقتحام النسائي البلوجرزي اللي حصل في بيتو وخصوصا السطو المسلح لشرفة منزله راح خدها من قصيرها وخد شنطة هدوموا اقصد شنطة العمل وسابلنا البيت وطفش وراح قعد على كوفي شوب والله ياباو الدراويش صعبت علينا وبجد انت راجل ذوق جداااااا ربنا يكرمك وبنعتذر على الاحتلال اللي حصل لبيتك لمدة خمس ساعات تقريبا.. واحمد ربنا اننا مطولناش عن كده لان بصراحة محسناش بالوقت خالص وكان نفسنا نبات عشان يبقى احتلال بحق وحقيقي

البلكونة اللي تم اقتحامها


اعزائي المدونيين بالرغم من بدء محادثات سرت في طرابلس لحل أزمة دارفور وبالرغم من بدء أشرس واخطر معركة انتخابية في نقابة الصحفيين .. ده غير مشكلة لبنان وسوريا والصومال واللذي منو تركتهم كلهم والقتهم وراء ظهري وقررنا نحن ايامنا الحلوة اخذ يوم اجازة من عملي من اجل الانضمام الى شلة من البلوجرز ... وبالحب اتجمعنا عند شاهي اللي داخت معانا واكلتنا ما لذا وطاب من الحلويات والمشروبات بالاضافة الى حمص شام بس مشربنهوش لانها نسيت

يوم في حياتي عمري ماهنساه لانو فعلا كان يوم تحفة اتمنى يتعاد تاني ابتدبنا اليوم لما قابلنا اوشا اللي في القلب والعقل والروح كمان بجد لو قعد اقول عنها كلام للصبح مش هوفيها حقها ربنا يكرمك يااوشا يارب ودايما صحبتنا تفضل لاخر العمررحنا بعربية اوشا وابنها ادم كان معانا تعب من المشوار ونام مننا في الطريق كتر الف خيروا استحمل كتير الراجل بردوا

ادم مقدرش يقاوم ونام مننا في الطريق

وفي طريقنا لـ6 أكتوبر حيث تطقن شاهي وزوجها ابو الدراويش خدنا مها سكوت هنصوت وقعدنا نلف ونلف ونلف على بيت شاهي وابو الدراويش يالهووووي فين البيت البيوت كلها شبه بعض ياجدعان وشاهي الغلبانة ياعيني عمالة تتصل بينا
ها وصلتو لحد فين واحنا لانعلم من اين اتينا ومن اين ذهبنا وكيف وصلنا ولماذا توهنا




طريق مجهول مجهول ياولدي 6أكتوبر احلى مدينة واللهي

راح ابو الدراويش وشاهي هووب ركبو عربيتهم وياعيني فضلو يلفوا يدوروا علينا لحد ما لقينا بعض وراحنا لبيت شاهي اقتحاااااااااااااام واحتلالالالالالالالالالالالال وسيطرة كاملة على البيت
الله اكبر الله اكبر انطلقوا يافتايات البلوجرز


طبعا احنا غير فرحتنا اننا مع بعض احنا فرحنين اننا لقينا حد يفطرنا هنااااااااااااكل
شاهي بصراحة ياجماعة ست بيت ممتازة ممتازة والله مش مجاملة زوجة بمعني الكلمة ربنا يخليهالك يابو الدراويش



جاءت شاهي بصينة فيها جرادل شاي بلبن وطبق ملئي بالكعك والبسكوت عمايل شاهي الاستاذه ماشاء الله عليها بجد تسلم ايديها اوشا اقترحت عليها تعمل كحك وبسكويت وتبيعوا وقالتلها انها هتكسب كتير من المشروع ده واللهي ياشاهي فكرة وانا ممكن اشترك معاكي واعجنلك العجينة بدل نورة البوابة اهوه بدل مشروع عربية الكبدة اللي كنت ناوية اعملو

بيتي فور جاهز انضم لصواني شاهي الشهية


المهم نزلنا حتتكك بتتك على الشاي باللبن والبسكويت والكحك ده غير علبة البيتي فور وهاتك يااكل وبيني وبينكم هما بقوا يتكلموا وانا اكل اصلي بصراحة اما بكل بيبقي كل تركيزي في الاكل هو انا هفتح بقي لاعز من الاكل الكلام جاي جاي مش كده ولا ايه

ده الاكل بس كنا خلصنا على الاطباق عالم جعانة


وبعد ما كلنا قومنا صلينا الظهر جماعة احلي حاجة اننا نتجمع وننبسط على طاعة ربنا من غير اي معاصي وقامت قلوب حائرة بينا الصلاة

وبعد الصلاة مسكتنا بقى دوبا وقعدت في النص كينج ياخواتي وفصصت واحدة واحدة من برجها وقالت عليا اني برج الاسد لوام وقماص الله يسامحك يادوبا هعديهالك عشان يوسف حبيبي اللي مكنش معبرني

يوسف ابن دوبا بيكلم حد غيري خليكو شاهدين ياناس


طبعا كل ده واحنا ماسكين في ايدينا شوب مانجو وبعدين كريم كراميل ده غير العرق سوس خلالالالالالالالاص اتنفخنا

ونيجي بقى للثورجية مها سكووووووووت هنصوت ثورجية فعلا وبنت سكره وشها بيبي فيس خالص امور .. مها معلش ياحبيبيتي انا مضطرة اقولك شئ ممكن يزعلك انتي شبه حنان ترك فعلا بس بعد عملية التجميل انا عارفة انك مش بتحبيها بس دي الحقيقة ايم سووووووووووووري
والله حنان ترك حلوة وامورة صدقيني

صحيح نسيت اقولكم ان
الشنيور ابن شاهي كان هيضربني عشان طلبت ادخل على النت وسالني سؤال محرج هو انتو هتمشوا امتي وكانت الاجابة قربنا نمشي الواد اتحرج قالي لا اقعدو كمان شوية ... شنيور معلش اقتحمت جهاز الكمبيوتر بتاعك وانا عارفة انو مش من حقي ولا مكن حق شاهي ولا ابو الدراويش ذات نفسو
الجبارة
بقى سلمت علينا بكل رقة واللهي عسل ال جبارة ال
والرايقة بقى فعلا رايقة بجد رقة ياخواتي طالعه لامها

فعلا يوم من احلى ايام حياتي وشاهي بجد واللهي مش مجاملة ملاك على الارض وانسانة تتحب كده من اول نظرة زي ما بيقولوا شاهي احبك في الله انتي واوشا ودوبا ومها وطبعا قلوب حائرة
دي تؤامي
وعايزة اقول لابو الدراويش بجد يابختك بزوجتك ربنا يخليكم لبعض ويبارك فيكم


واقول لاوشا فعلا قلبك جميل ويساعي من الحبايب بجد انتي انسانة رائعة وتتحبي بسرعة اوووي ربنا يكرمك
دوبا بقى السكرة بتاعتنا دي ليها مكانها كبيرة ويوسف ابنها ده حبيبي ربنا يخليهولها يااااااارب

مها سكوت هنصوت سعدت بمعرفتك اووي وكفاية تلقائيتك
وده يوم من ايامي الحلوة

34 comments:

Anonymous said...

شوشو فعلا كان يوم من اجمل ايامنا مع بعض الجميل انك تحب حد الحب ده من غير مصلحة او منفعة في زمن طغت عليه المصالح والماديات حاجة بقت نادرة قوي بجد بحبكم في الله كلكم ويارب اكون دايما سبب في اللمة الجميلة دي يارب

ابو العربى said...

ربنا يجعل ايامك كلها حلوة وخير يارب امين بس ركزتى على الاكل جوعتينى حرام عليكى
البوست الجاى لابو العربى هيكون فيه كلمتين عنك ابقى صدقيهم هو تحت الانشاء لسه

تحياتى

3abdo me7tas said...

يااااااااااه
كل ده حصل
ربنا يخليكو لبعض يا رب
بس تصدقى انا كمان لو مين بيعمل ايه جنبة طالما فيه أكل ولا اعرف ابويا حتى
لما ابقى اخلص نبقى نتكلم
هى سايبة ولا ايه
:D
طيب انا رايح آكل بقى لانى لسه جاى من الشغل وجعاااااااااااان
وسع يا جدع

son's egypt said...

السلام عليكم
جميل ان الانسان يعيش مع ناس بيحبهم ويقضي معهم اجمل ايام حياته

shahy said...

اية الوصف الجميل والكلام الحلو دة كلة
انتي تسكتي تسكتي وتطلعي بقنبلة
شكرا يا شيرين على كل الكلام الحلو اللي قلتية ومعلش على المشوار الطويل
انا فعلا سعيدة جدا بالزيارة واتمنى انها تتكرر كتييييييييييير وسيبك من الشغل والكلام الفاضي دة ودعي الخلق للخالق المهم اننا نشوف بعض

سعدنا بكم ونرجو ان نكون اسعدناكم

Anonymous said...

قلوب حائرة
%%%%%%%%%
انتي السبب في ان اليوم ده يتعمل ياجميل بتجمعك للمدونين الحلوين ربنا يخليكم ليا يارب ويديمها علينا حب ومودة ويجعلنا صحبة صالحة اللهم امين

تحياتي

Anonymous said...

ضد الظلم

انت فينك اختفيت فجأة كده عن التدوين ربنا يكرمك يارب يابو العربي وهتابع البوست الجديد عندك اما نشوف في ايه عني ربنا يسترها

تحياتي

Anonymous said...

عبدو محتاس
$$$$$$$$$
منورني دايما وبعدين طبعا اذا حضر الاكل يخرس الكلام ال كلام ال هو الواحد هياكل ولا يتكلم ههههه
تحياتي وبالهنا والشفا

Anonymous said...

son's egypt
$$$$$$$$$$$
طبعا جميل ان يعيش يوم مع ناس بيحبهم ويستمتع بس الغريب في يومنا ده ان في ناس اصلا اول مرة نشوفهم ويشفونا وبالرغم من كده حاسين كانهم مننا وكلنا بنتصرف بتلقائية شديدة كاننا نعرف بعض من سنين
تحياتي

Anonymous said...

شاهي
$$$
شوفتي ياشوشو انا كنت ساكتة عشان كده بركز عشان تعرفي النصاحة بس ههههه... والله ياشاهي انا موفتلك حقك انتي ما شاء الله عليكي بجد شخصية فعلا رائعة وبجد كنا مستمتعين عندك اوووي وحقيقي انا بعتبرك اخت ليا ربنا يكرمك ياااااارب انتي وزوجك واولادك

تحياتي

Doba said...

وانا عمالة اقول البت شيرين قاعدة ساكتة ليه اتاريكى مركزة فى الاكل ومش متابعانا

ماشى ماشى

لقاءكم من اللقاءات التى ادخلت السعادة بقلبى ولعل هذا اللقاء يتكرر

اشكركم كثيرا على محبتكم الغالية والتى ابادلها من كل قلبى

تحياتى
هبة

Anonymous said...

دوبا

احبك وانتي مركزة كده انا كنت ساكتة طبعا لسببين الاكل والمراقبة عشان اعرف افضح الدنيا على المدونة

سعدت جدا بتجمعنا ويارب يتكرر

تحياتي ياام يوسف

حواء said...

ماشى يا قمر انا عرفت عن اللقاء ده بعد اما تم والست هوبة دى لها عندى ....؟ بس اما اشوفها ازاى تعملوا حاجة زى دى من ورايا والله نفسى اشوفكم واتعرف عليكم بس قريب ان شاء الله .. تحياتى لكم ولليوم الحلو ده

RealMan said...

طيب بدل ما ترموا الراجل الغلبان برا البيت اعزمولوا كام ولد من هنا يسلوه واهو برده ينبنا من طبق الحلويات ده حاجه.

خليكم كويسين كده علشان نبقي نعزمكم احنا كمان.

وعلشان زي ما انتي عارفا التجمعات خطر فلو حصل واتقفشتم تلاقوا حد يجبلكم عيش وحلاوه.

Anonymous said...

بوسي كات
$$$$$$$$$
ان شاء الله المرة اللي جاية تكوني منورانا ياجميل بس ياريت نقضيها تورت وجاتوهات بقى خلينا نعيش ههههه
تحياتي

Anonymous said...

RealMan
$$$$$$$
التجمعات للنساء فقط الرجال نوووو
اصدق فعلا هنحتاج حد يجيب لينا عيش وحلاوة فعلا خلاص على العموم اديني اديتلكم خبر لو لقيتوني غبت على المدونة اد شهرين ثلاثة كده ابقى ابحثوا مع الشرطة

تحياتي

RealMan said...

علي فكره بقي انا كنت ناوي اجبلكم مع العيش والحلاوه بقلاوه.

انما وطالما الموضوع بقي فيه زحلقه جامده اوي كده لا فيه بقلاوه ولا حتي عيش وحلاوه يا حلاوه.

وسلميلي علي اعضاء التنظيم.

Soooo said...

على فكره بقى
اللي ياكلو لوحدهم يزورو
المفروض كنتو تلفو عالمدونين الغلابه اللي زي حالاتي كده وتديلهم اي حاجه في رغيف


اتقو شر الاعين يعني
كان حلو البيتي فور؟؟؟؟



سلامووووز

Anonymous said...

RealMan
$$$$$$$
يالهووي على الحقد وبعدين اعضاء تنظيم ايه انت عايز تودينا في داهيه .. حرام عليك ده المؤتمر السنوي بتاع الحزب الحاكم خلاص هينطلق خلال ساعات يعني كلو ينام خخخخخخخخخخخخخخخخخخ ال تنظيم ال

Anonymous said...

سووووووووو
$$$$$$$$$$$
يالهوي على القر انا قولت المدونيين دول مش هيسبونا في حالنا هههههه
انا سبتلك اللفة اللي جاية عليك تلف على الرجال المدونيين وتعملو لقاء رجالي زي ما احنا عمالنا لقاء نسائي

تحياتي ياسوووووووووو

والبيتي فور كان تحفة

Soooo said...

يا شيرين انتي مش واخده بالك يا ضينايا
المدونين الرجاله اللي زي حالاتي كده لو لاقيين ياكلو ولا يعزمو بعض ماكانوش عملو مدونات اصلا

ده احنا غلابه وبنكح تراب يابنتي

وغير كده انتي مش واخده بالك من نقطه مهمه
تمانين في الميه من اللي موجودين في عالم التدوين من الجنس الناعم
والعشرين في الميه الباقيين يا اما رجاله متجوزين ومخنوقين من ستاتهم وبيدونو عشان يخرجو الكبت اللي جواهم .. او شباب زي حالاتي فقد الامل انه يتجوز اصلا واتجه للتدوين عشان لما يموت يلاقي اللي يقرا كلامه ويترحم عليه

فخمتو؟؟؟
بس ماقلتليش .. كان حمص الشام مستوي
ولا نص نص؟؟؟؟



سلاموووووووز

Anonymous said...

سوووووووو

نعم انا فخمتو كل حاجة ..... ومتقلقش اخوانك في التدوين معاك وهيقرولك الفاتحة ....... حمص الشام ياسيدي مشربنهوش شاهي نسيت تقدمهولنا مع اني بحب حمص الشام اوي بالشطة والليمون بس يلا المرة اللي جاية بى على خير

تحياتي ياسوووووووو
سلامووووووز

Anonymous said...

دائما متجمعين يارب مع بعض وقلوبكم على الخير وطاعه الرحمن متواعده ولا تتفرقو من بعض ابدا

ولــــــــــو said...

يا نهار ابيض
ايه اجتماع عظماء التدوين ده
بجد انتوا كلكوا وحتى اللي مش اتشرفت بمعرفته تستاهلوا تعرفوا بعض عشان كلكوا ناس محترمه
ربنا يجعل ايامك كلها حلوه
وكتر خيرك اديني شفت الاستاذ يوسف عندك مش عند مامته
ربنا دايما يجمعكوا على الخير

juliet2m said...

ان شاء الله المقابله تتكرر
والمهم انه كان يوم جميل


هستني تعليقك عالجديد


سلاماااااااتي

bastokka طهقانة said...

ربنا يديم الود و يجعل ايامكم كلها سعادة


اوروفوار

Anonymous said...

رئيس جمهورية نفسي

ايه النور ده بس ياخطوة عزيزة .. ربنا يكرمك يارب ويرزقنا جميعا صحبة صالحة
نورتني
تحياتي

Anonymous said...

ولو

عظماء تدوين مرة واحدة ربنا يكرمك يارب .. واي خدمة اديني وريتك يوسف شوفت ماشاء الله قمر ازاي بس الحقيقة كان مش معبرني خالص انا دلقت نفسي عليه هههههههه

ربنا يخليك ياصديقي العزيز وتنورني دايما

تحياتي

Anonymous said...

جوليت

منوراني والله وربنا يكرمك يارب الحمد لله ان اليوم كان سعيد

وان شاء الله ازروك تحياتي

Anonymous said...

طهقانة
يادي النور يادي الهنا طقهانة عندنا في ايامنا الحلوة يامرحبا يامرحبا ربنا يكرمك ويديم الحب والمودة يارب

تحياتي وابقى شلميلي على زوجك الطهقان
اوروفوار

احساس لسه حى said...

عزيزتى
انا عرفت انكم اتجمعتم من عند شوهى
وحبيت امر اقولك يا رب دايمن تتجمعوا
ولا يحصل بينكم خصام
ولا زعل
ولازنب
ولا عين حسود
تتجمعوا فى الخير وللخير دايمن
سلام

Anonymous said...

أحساس لسه حي

منورني ربنا يكرمك يارب وربنا مايجيب زعل ابدا ولا خصام

تحياتي

RealMan said...

مشفهومش وهما ........ شفوهم وهما بيسيحوا لنفسيهم.

يا بنتي الاجتماع خلص علي خير ليه بقا كل السياحه ده كفايه انتوا عايزين تتقفشوا ولا ايه.

اللهم بلغت اللهم فأشهد.

Anonymous said...

RealMan

اجتماع ايه بس دي كانت حلفة شاي بلبن ومعاهم حبة بسكويت على بيتي فور على كحك ... مجتمعين يارب المرة اللي جاية على ديك رومي ودمتم

تحياتي