Wednesday, October 24, 2007

لبس البوصة تبقى عروسة

جدتي اعظم عظمات الستات نفسها تفرح ببنات ولادها وطول ما هي قاعدة تدعي ربنا وتقول يارب طول في عمري لحد ما اشوف بنات ولادي في الكوشة وامسك بايدي طرحة فرحهم

............
ياحلوة حلوة
نعم ياتيته
انتي يابنتي مش بتردي عليا ليه
ما برد اهوه ياتيته
رديتي بعد عذاب بعد ما نبحتي صوتي
لا ياتيته ياحبيبتي انتي ندهتي مرتين بس وانا رديت علطول
انتي بتكدبيني ياحلوة
لاياتيه معلش حقك عليا انا اسفه
طب يلا روحي بقى
طيب كنتي عايزة ايه
نسيت هو انا مخي دفتر

ياحلوة ياحلوة
نعم ياتيته
انتي يابنتي ارحميني ده انا ست عجوزة ومش حمل نبح الصوت ده
معلش ياتيته عايزة ايه ياحبيبتي
بقى انا يابنتي نفسي افرح بيكي بقى ده اعز الولد ولد الولد
ربنا يديكي طولة العمر وتفرحي
عايزاكي تتزوقي كده وتتغندري وانتي رايحة فرح بكابوزا جارتنا
ايييييييييييه بكابوزا .. هي بكابوزا هتتجوز ياتيته
امال ايه ياخيبة ياذات الاربعة والعشرون عاما .... .... بكابوزا عندها 16 سنة وهتتجوز وانتي لسه قاعدة في أرابيز امك كده
ايه ياتيته ده انا لسه صغيرة
صغيرة ايه انتي هتضحكي على نفسك ده انا يوم ما اتجوزت كان عمري 12 سنة وامك دي انا مجوزاها 17 سنة وانتي لسه قعدالنا خيبة ايه دي بس
طيب عايزاني اعمل ايه
يابت لبس البوصة تبقى عروسة وانتي قمر بس محتاجة حبة صيانة
ايه ياتيته ده انا احتج
تحتجي ده ايه اتنيلي واتوكسي وروحي الطعيلك حبة احمر وحبة اخضر كده على وشك بدل ما انتي شبه هتلر كده
ايه ياتيته ده انتي لسه فاكره هتلر
هيهيهيهي... امال طبعا فكراه ليت الزمان يعود يوما
طيب بس انا مش بحب احط ميكياج ياتيته شوفيلي حل تاني
لاتاني ولا اولاني ابقى روحي للمزين يحطلك مكياج ولا اقولك نادي اي واحدة من اصحابك الفاقدين دول يدهنولك وشك قصدي يمكيجوكي

عاااااااااااااااااااااااااا يعني هو انا وحشة كده يعني
لا ياخيبة العيب مش فيكي العيب في الدنيا
روحي كده هاتيلك كام طقم يزغللوا عيون الشباب
يابت اسمعي كلامي انا مدوباهم اثنين لبس البوصة تبقى عروسة

طيب بس بلاش حكاية لبس البوصة دي انا مش بوصة ياتيته انا زي الفل اهوه
طبعا طبعا بس اعملي اللي بقولك عليه

بكابوزا في الكوشة....

الف الف مبروك يابكابوزا ياحبيبتي
الله يبارك فيكي ياابلة عقبالك بقى ياابلة
ابللللللللللللللللة.. ابلة ده ايه ... ما علينا انتي عروسة ومش عايزة اشوهك

ام بكابوزا ... اهلا ياحلوة ازيك ياحبيبتي انتي ايه حكايتك مش ناوي تفرحينا بيكي بقى ولا ايه ياشيخة
لا ناوية ان شاء الله ياطنط بس لسه النصيب
لالالالا مالكيش حق دي امك عماله تحكيلي على العرسان اللي داخلة واللي خارجة وانتي اللي بترفضي
مييين ماما اه اه طبعا طبعا عرسان داخله وخارجه بس النفس بقى ياطنط
قوليلي ياحلوة هو انتي اكبر من بنتي بكابوزا باد ايه
مش عارفة ياطنط اصلي نسيت الاله الحاسبة بتاعتي واكيد المجموع هيطلع كبير ومش هعرف احسب هههه على العموم مبروك ياطنط وربنا يتم عليها بخير
الله يبارك فيكي ياحبيبتي ونصيحة مني اقبلي باي حد بقى يتقدملك العمر بيجري ياحبيبتي الحقي نفسك
طيب الحق انا بقى اجري .. اقصد الحق انا بقى تيتة عشان معاد الدواء بتاعها

الحق انزل بسرعة بقى ..... وفجاة الحلوة تلاقي قدامها واحدة من الجيران
اهلا ياحلوة
اهلا ياطنط
انتي ايه يابنتي مش ناوية تفرحينا بيكي بقى مفيش حاجة كده ولا كده
لا ياطنط ربنا يسهل دعواتك بقى
يارب يرزقك بواحد يعجب بيكي بقى بدل قعدتك جمب امك كده
طيب ياطنط سلام عليكم اصلي مستعجلة
والحلوة كل ما تنزل سلمة تلاقي حد من الجيران وكل واحدة مش بتسال غير السؤال ده ايه مش ناوية تفرحينا بيكي قريب ولا ايه ؟


يعني انا عايزة افهم في واحدة مش هتبقى ناوية تفرح وتفرح اهلها وتتجوز يعني سؤال سخيف بجد لو في فرح اكيد هيكون في اعلان والناس هتتعزم مفيش داعي للاسئلة دي زي "انتي مش بيعجيلك عرسان ولا ايه، هو انتي ليه متخطبتيش لحد دلوقتي، هو انتي لسه قاعدة ليه ده سنك كبر" وغيرها من الاسئلة ياريت نغير من نفسنا شوية عشان ايامنا تبقى فعلا حلوة
غير كده ساد اوي في مجتمعنا مفهوم ان الي لسه متخطبتس ويكون سنها عدى 25سنة يبقى مفيش عرسان بتخبط على بابها ليه منقولش النصيب مجاش او محدش من اللي بيتقدموا ليها مناسب ليها والاهم ليه بنحشر نفسنا في خصوصيات الغير كده ونقعد نشوف دي ليه اتطلقت من جوزها ودي ليه متخطبتش لحد دلوقتي..
ياريت نتغير شوية
احنا بنعيب على الدنيا وايامها والعيب فينا احنا
ايامنا حلوة

14 comments:

قلوب حائرة said...

معلش يا حبيبتي هما الناس كلهم بيبقوا نفسهم يفرحوا بينا بس متعرفيش هما ناقص يسالونا هو انتي ليه مش بترضي بفلان طب وماله علان هما قلبهم علينا صدقين بيحبوا بس يطمنوا نعتبرهم زي ماما وطنط وابايه

Ahmed Mubarak said...

شر البلية ما يضحك..والزمن دة بليله خالص!!
معلش هما الناس الكبار بيفكروا بالطريقة ..انا تيته اكبر من بابا ب 18 سنه..وطول ماهي قاعدة مورهاش غير الحوار دة..
الجواز نصيب..ولازم نفهم كدة..بوست لذيذة وفيها موضوع

ولــــــــــو said...

بصراحه مش عارف اهنيكي على البوست ولا اواسيكي ان لسه فيه ناس بتفكر كده
جاتهم البلاوي ملوا البلد
على العموم استحملي تيته اهي برضه من الفاموليا
ربنا يهدي الجميع وعقبال مانشوفك زي بكابوزه
ده اسم ده

shahy said...

اية يابنتي الفقر دة
دمك سكر يامضروبة

زي ماانتي قلتي دة نصيب ومفيش حد لة يد فية
ابقي سلميلي على تيتة

Doba said...

على فكرة تيتة دى سكر
وهيه زى كل ست من بتوع ايام زمان تفكيرهم منحصر فى الجواز وخلاص

عارفة ان بمجرد متتجوزى هيسالوكى ها انتى بقى حامل ولا ايه ولو محلصلشى نصيب برده كل واحدة كل لما تشوف وشك تقولك ربنا يعدلهالك

ولما تجيبى البيبى وهما بيباركولك هيقولولك يلا بقى عقبال التانى ولما تجيبى التانى يبقى التالت

هو ده التفكير المحدود لناس زمان
احنا بتوع العصر الجديد ومؤمنين كلنا ان العلم والحياة بقى رتمهم اعلى واسرع وان الشباب يعينى مظلومين باللاقتصاد بتاع البلد

اقصد ان اولا واخيرا ده نصيب
ثانيا زمان كانوا تعليمهم معظمهم متوسط والجواز كان ارخص من دلوقتى بمراحل فمينفعشى يكون فيه مجال للمقارنة

نقطة اخيرا - هناك كثيرين من ضعاف النفوس اللى ممكن تلاقى فى عيونهم شماته
دول بقى كبرى منهم وازعلى عليهم علشان ربنا مديهم عقل فسافيسى مختل فربنا يرحمهم

دمك شربات كالعادة ونصيحتى ابقى هاتى شيكولاتة لتيتة هتفرح بيها قوى اكتر من فرحة العريس

سلام يا برنسيسة
هبة

(green eyes) said...

انتي سكر اوي على فكرة ... ضحكتيني بجد ... وفكرتيني بكلام زي دا كتير بيتقالي ... بس على فكرة انا مش بزعل من الناس دي كل الفكرة اني بحس انهم مش لاقيين كلام يقولوه فبيسألوا عن الموضوع دا ... وهتلاقيهم كمان لو انتي متجوزة جديد بيسألوكي مفيش جديد طبعا بيكونوا قصدهم على البيبي.... ولو حتى انتي مخلفة هيسألوكي مش ناوية تخاوية بقى ولا ايه
الناس أسألتها كتييييييييير اوي في الحاجات دي
واكتر من كدا ويزيح ربنا

أيامنا الحلوة said...

قلوب حائرة
$$$$$$$$$$
معلش عقبال ما تطمني عليا وتفرحي بيا وافرح فيكي ياقمر

تحياتي

Ahmed Mubarak
$$$$$$$$$$$$$
فعلا شر البلية ما يضحك ربنا يخليلك تيتة يارب والله الناس دي عسل مفيش زيهم ربنا يديهم الصحة وفعلا كلو في الاول والاخر نصيب بس تقول لميييييين

تحياتي

ولو
$$$
صديقي العزيز واللهي منورني دايما .. بكابوزه ده اسم رائع هتشوف ان ماطلع موضة مبقاش انا ههههه
تحياتي وشكرا لدعوتك لتيته بس انا سرد موضوع بيحصل مع الجميع مش معايا انا بس يعني شوية كلام معايا وشوية حوارات مع بعض صحباتي كده يعني
تحياتي مرة تانية

شاهي
$$$$$
منوراني ياقمر وهسلملك على تيتة حاضر وطبعا كل شئ نصيب ال قوليلي هو انتي ناوية تخاوي ولادك امتي ههههه طبعا بتتسالي كده من ناس كتير
تحياتي

أيامنا الحلوة said...

دوبا
$$$$
فيلسوفة ياخواتي واللهي كلامك ده كلو بالظبط اللي انا عايزة اقولوا بجد الناس مش سايبة حد في حالها ... وبالنسبة لضعاف النفوس دول كتير بقى ما عدلكيش يلا ربنا يرحمنا

تحياتي ياقمر وقوليلي صحيح انت مش ناوي تخاوي الواد يوسف ولا ايه يلا ياشيخة هاتيهم وراء بعضهم كده وانتي لسه صغيرة وبصحتك هههههه بذمتك الكلمتين دول مش بتسمعيهم من الناس

green eyes
%$%$$$$$$$#
انتي اللي سكر واللهي ومنوراني ربنا يكرمك والحمد لله ان البوست عجبك وكلامك صحيح فعلا محدش بيسيب حد في حالو في كل مرحلة من عمرك لازم يسالوا على حاجة معينة وكانك عايشة في الدنيا دي لهدف واحد وبس
تحياتي وربنا يرحمنا

simple girl.. ..simple dream said...

would u plz visit my blog and participate in my poll
i really need ur opinion


with my best regards

khaled adel said...

nice post
بجد الحكاية دي بقت صداع
وعلى فكرة مش البنات بس
والله في واحد صاحبنا خد اعفا ومن ساعيتها ومفيش حد يشوفه غير ولازم يقله الحق اتجوز
رغم ان لسة عنده 22 سنة
بس النظرية ان ده بيبقى غالباً عشان الناس نفسهم يفرحوا بالناس اللي بيحبوهم يعني كلمة عايزين نفرح بيكي او بيك دي مش من باب المجاملة
اعتقد ان اغلب الناس ممكن يقولوها من قلوبهم فعلاً
بس المشكلة محدش بيقدر عواقب كلامه ده ولا بيقدر ان ده مش حقه انه يتدخل فيه اساساً
عامة اهم حاجة اننا نستحمل بعض
وعايزين نفرح بيكي :d

Soooo said...

الا قوليلي ياشابه
انتي ماتجوزتيش ليه
؟؟؟؟؟



انا بهزر اوعي تقفشي علي انا بقول اه
عشان لو قفشتي وكتاب الله اخد بعضي كده واطلع على بكابوزا جارتكم واقوللها انك اتريقتي على فستانها وعلى عريسها وعلى الفرح وعلى كل حاجه
وقد ازعر من انعر


يلا سلامووووووز

أيامنا الحلوة said...

خالد عادل
$$$$$$$$$
يالهوووي حتى الرجالة كمان بيتقلهم كده وكمان صحبك عندو 22 سنة تصدق اللي يسمع بلوة غيرو تهون عليه بلوتو هههه يلا ربنا يهدي

تحياتي ونورتني

ايامنا الحلوة said...

سوووووووووو
$$$$$$$$$$$
بكابوزا كانت قمر 14 انا بريئة يابيييييييه ايه الناس الحقودة دي بس

تحياتي ياسووووووووووووو تصدق عجبني اوي الاسم ده ياسووووووووو

Soooo said...

ياستي اتفضلي خدي الاسم
بس تدفعيلي مبلغ على سبيل القرض الحسن الغير مردود



سلاموووووز