Sunday, June 17, 2007

دماغ أنتختي في خطر


انتختي أميرة اللي اعتزلت التدوين مؤخرا في هدوء تام .. عشان تسبلي الساحة فاضية وأقب على وش النت لوحدي ... جالها صداع فوجائي عبارة عن اثنين بيضربو بعض في نفوخها زي "فتح وحماس" كده قولتلها الحل الوحيد هو طلب اجتماع عاجل لجامعة الدماغ العربية عشان تفض الاشتباك اللي في نفوخك ده لقتها بتحتج جامعة دماغ ايه بس ياشيخة هي بتعرف تحل ولا تربط اي حاجة .. انا عايزة برشام دولي محدش هيقدر على نفوخي غير البرشام الدولي قولتلها يابنتي لما البراشيم الدولية تدخل دماغك كده هيبقي احتلال .. قالتلي احتلال احتلال المهم الاشتباك ينفض بقى انا تعبانة .. وبعدين لقتها اترمت كده فجأة وقالتلي هو البرشام الدولي ده ممكن يضرني ويقسم نفوخي وتبقا زي الكوريتين قولتلها طبعا ممكن جدا لقتها بتبرقلي طب وبعدين ايه الحل قولتلها بصراحة مش عارفة بس انا ممكن أجبلك برشام طوارئ يمكن يجيب نتيجة ويضع حد للانفلات الامني اللي في دماغك ده ... قالتلي طوارئ ايه انتي بتهرجي ده اللي في نفوخي ده لو عملتي معاه الالي مش هيتهد ... طب اعمل معاكي ايه بقى غلبتيني .... لقتها بتتوجع اووووي اااااه يادماغي ااااه يادماغي بطلو اشتباك بقى حرام عليكم هدمروني ... انتو مش هتسكتو غير لما اشرب دواء صهيوني ينزل عليكم طاخ طوخ طيخ ... وفي تلك الحالتين هتدمروني...!!!!!!!!!!........

18 comments:

Anonymous said...

ومازال الصوداع يدمرني ... بينما اكتفت لجنة الدماغ بعمل دماغ بعيد عني .. وانتهى الموقف الطارئ بتشكيل تجمع دموي طارئ أعلن اليمين منذ دقائق


أميرة

Anonymous said...

في دواء كويس اوي للصداع انصح بيه أميرة اسمه "الوحدة ".. مممكن يهدي الخناقة اللي في دماغك ، لكن للاسف مش موجود في اي صيدلية في الوطن العربي ، دوري عليه عند مدحت صالح في كوكب تاني .....

نرمو

Anonymous said...

أميرة
$$$$
سلامة دماغ ياانتختي انشاالله عدوينك... وياستي نتمني ان تشكيل التجمع الدموي الطارئ يجيب فايدة

تحياتي

نرمو
$$$$
الدواء ده ممتاز يانرمو بس للاسف زي ما قولتي مش موجود في الوطن العربي وياريت تأجرلنا أتوبيس نطلع بيه الكوكب التاني بتاع مدحت صالح يمكن نلاقيه هناك

تحياتي

ولــــــــــو said...

المشكله مش هاتتحل بالتدخل الخارجي من الصيدليات المشكله هي ان ابناء الدماغ الواحد مش متجمعين وده بيخلي الدم الفاسد انه يخش مابينهم
كل ده عشان الدماغ نايم وكسول
نصيحتي للعلاج
خللي الدماغ صاحي

Alaa said...

انصح بالفول
هينسيكي كل حاجة و مش هتحسي بأي ألم
و هتبقى زي شكة الدبوس

ربنا يستر على دماغنا جميعا مش انتيختك بس

Anonymous said...

لا لعلاج الاعراض دون علاج السبب

لا بد من القضاء علي الميكروب العميل

خصوصا اذا كان هذا الميكروب الداخلي يلقي دعما غير مسبوق

من ميكروبات خارجية وحاولنا نخليه يبقي ملتزم وهوا مصمم يبقي عميل

يبقي لازم مضاد حيوي قوي والقضاء عليه

Anonymous said...

ولو
$$$$
عندك حق خلي الدماغ صاحي النوم والكسل هو اللي جايب الدماغ في الارض

تحياتي

علاء
$$$$
حرام عليك يابشمهندس انتي عايز تطير دماغ انتختي مكنش العشم ....
وعندك حق صحيح ربنا يستر على دماغنا

تحياتي

مصراوي اوي
$$$$$$$$$$
دكتور انتي أدرى طبعا محدش يقدر يدخل في تحصصك يافندم .... لابد من القضاء على البكتريا العملية لذلك يجب استخدام المضادر الحيوي ولكن لابد من استعماله في المكان المصاب بالفعل لان لو استعمل في موضوع غير موضعه هيدمر خلايا اخرى سليمة ملهاش ذنب

تحياتي

Eric Matt said...


بكره السياسة قوي

ربنا يحفظك يا رب انت وأنتيختك

تحياتي لك من ماناساس البلد

Anonymous said...

جروووووم
$$$$$$$$$
سياسة ايه بس حد اتكلم في السياسة ياجروم انتي عايز تودينا في داهية .... كل الحكاية ان دماغ انتختي مصدعة شوية ادعيلها تخف بقى

تحياتي

bastokka طهقانة said...

ضفرتي الوجع بالاحداث في ضفيرة اليمة
برافو بجد
فرصة سعيدة
و ان كانت الاحداث العربية غير سعيدة

اوروفوار

سندباد said...

ان لم تستحي فافعل ما شئت
وان لم ترتدع فمحدش يقدر يكلمك
واللي مالوش كبير يعمل وزير
واللي واللي
وفي الاخر احنا اللي بنشيل الطين
اسف علي اللفظ
والف سلامة علي صداع اميرة بلغيها تحياتي

مدونة كسبان said...

الف سلامه
يعنى الصداع
ده مش عندى بس

اللى ملوش كبير يشترى له كبير وهذ للإيضاح

حواء said...

هههههههه اسلوبك حلو اوى ... بس عموما الصداع ده مالوش حل حتى لو عملتى له الللى

Anonymous said...

الف الف سلامه عليكي ياجميله
نصيحتي يابنتي كبري ماتشغليش بالك
سيب الأمور ماشيه
ماتفكريش كتير عشان لما بتفكري مخك حيبتدي يودي و يجيب و حيجيلك صداع
تحياتي ليكي ياقمرايه و الف سلامه عليكي
خودي بقه بوسه اهه يمكن تخفف شويه من الصداع
;)

farfasha said...

مش هاتفرق دوا صهيونى ولا دوا عربي
قال ضربوا الاعور على عينه قال ما هي خسرانه خسرانه
تحاول بقى تتعايش مع الصداع ده

Anonymous said...

طهقانة
$$$$$$
منورانه ياطهقانة...ويارب كده دايما
وادعي بقى لاميرة دماغها تخف

تحياتي

سندباد
$$$$$$
صدقت اذا لم تستحي فافعل ما شئت ...
سلامك وصل لانتختي اميرة وادعي بقى الصداع يروح

تحياتي

مدونة كسبان
$$$$$$$$$$$
الله يسلمك والف سلامة على دماغك انت كمان من الصداع للاسف الدول العربية كلها بتعاني من صداع

تحياتي

بوسي كات
$$$$$$$$
الله يخليكي ياجميل .... اميرة قالت كده برضوا الصداع مش هيروحو لو عمتيلي الللي
تحياتي

أجندة حمرا
$$$$$$$$$
الله يسلمك ياقمر... للاسف الصداع هو اللي بيجي لوحدو الواحد يكون قاعد في امان الله ويلاقي المصايب نازلة على دماغو

تحياتي

فرفشة
$$$$$
مينفعش تتعايش مع الصداع لو فضلت كده ... الوضع هينفجر اكتر لازم يتعالج في اقرب وقت ادعو ياجماعة ادعو ربنا يهدي

تحياتي

احساس لسه حى said...

عزيزتى
ولا اجتماع ولا برشام هيضيع الصداع
الحل تسمعى من ودن واحده
واللى تسمعيه تخرجيه من التانيه
بس لو تقدرى
سلااااااام

Anonymous said...

حسام
$$$$
للاسف ياحسام الصداع بيحي لحد عندك كده بيفرض نفسوا عليك ادعي اميرة تخف بقى

تحياتي