Sunday, June 21, 2009

أبو عادل الكلابجي


يافرحة ما تمت خدها ابو عادل الكلابجي وهوهو ... أكلت لحم فاااااااااااااااااااااسد ياجرعاااااااااان
بقى انا أول مرة في حياتي اتعزم على الغداء بره بيتنا .. وطبعا أبو بلاش كتر منه .. واللي يجي من الصعايدة فايدة بس
تقولوا ايه بقى ايش ياخد الريح من البلاط .. وقليل البخت بيلاقي العظم في الكرشة ..

الحكاية باختصار ان لما المؤسسة الصحفية اللي بشتغل فيها اصدرت قرار بعزومة الموظفين على الغداء في اشهر محل
كبابجي فيكي يامهندسين انا قولت بس ده اكيد مسعى جاد من قبل السلطات لعلاج الحالة النفسوية للموظف الكادح اللي
قاسى كتير من قلة الراتب والناتج عنه بالتاكيد جفاف وحرمان وقولت خلاص بقى ياجرعااااان المسامح كريم ونفتح
صفحة جديدة واكيد دي بداية العلاج للوصول للرضا الوظيفي اللي بيقول عنه الدكتور إبراهيم الفقي
وفي اليوم الموعود قولت لازمن اتأيف بقى والبس اللي على الحبل ده انا رايحة اكل كباب ومش أي كباب ده ابو
عاااااااااااااادل رحت جريت جبت الجزمة الجديدة اللي مخبياها من اختى تحت انبوبة البوتاجاز والطرحة اللي كنت
حطاها في عداد الكهرباء والخاتم النحاس اللي كنت شيلاه في سخان الحمام ولبست اللي على الحبل وكل ما حد من أصحابي ولا من العائلة يتصل بيا أقفل معاهم وأقولهم أسفه انا مشغولة جدا وعندي غداء عمل اليوم .. ونبهت عليهم في البيت انهم ينشروا في العيلة كلها اني انا عندي غداء عمل اه زي اللي بشوفهم في التليفزيون دول بيقعدوا يقولوا غداء عمل غداء عمل اشمعني انا .... المهم بعد ما اتأيفت روحت الشغل
وياأرض هدي ما عليكي ادي كل ما واحدة من زميلاتي تقابلني تقولي.. ياعم رايحة تكلي كباب ياستي حد ادك

ياباااي على القر .. ما انتو معزومين ما تيجوا انتو كمان

لا انا ابني هجيبوا من الحضانة ... لا انا رايحة مشوار .. لا انا مروحش اكل على حساب حد حتى لو كان الشغل
وبكل قلاطة رديت عليهم .. انتو الخسرانين كباب ابو عادل لا يعلى عليه واللي مش هيجي هيندم اشد الندم اشد الندم
خليكوا فاكرينها دي اشد الندم


وهوب وجه ميعاد الغداء وابتدينا رحلتنا عند ابو عادل الكلابجي واول ما وصلنا ترحيب بقى يامرحب بالصحافة يامرحب
بالعمل الالكتروني ونزل الاكل وعنيكوا ما تشوفوا الا النور مسحنا الاطباق وكمان بيبسي كانز يالهوي ده انا كده منكن
يجرالي حاجة طيب ياجماعة مش كده خلي العزومة دي يوم ويوم يعني يوم كباب ويوم كانز مش كله مرة واحدة كده وروحت البيت قعدت اغيظ فيهم وكل اللي يعدي من جمبي يقولي طفسة مش سبتلنا حتة ويبوصولي من تحت لتحت وانا
اطلع لهم لساني اتاري لساني بيطلع كتير كده لان مفعول اللحوم عالي بعد ما كلت لحم هوهو

اصل بعد العزومة دي بحوالي شهر لاقيت منشيط في الجرنال بيقول ان لحوم ابو عادل ده فاااااااااسدة ايون فاسدة شوفتوا بقى انا يوم ما اتأرعن واتعزم بره اروح أكل لحم كلاب وحمير .. ليه امال فين جمعية الرفق بالحيوان .. ده انا لما حتى
شوفت أوباما وهو بيقتل الدبانة وسابها جثة هامدة على ارض البيت الابيض زعلت اوي وقولت هي الدبانة دي مش ليها
حق تعيش وتتعايش وتقوم بدور فعال في المجتمع ولما جمعية الرفق بالدبان شجبت اللي عملوا اوباما بعد حادث مقتل
الدبانة الغلبانة دي فكرت انظم مسيرة سلمية ندين ونشجب .

وبفراسة المفتش كورمبو وحداقة حمبوزوا لاوي بوزوا قدرت احدد نوعية اللحم اللي أكلته في اليوم المشئوم ده وتحت
شعار "نحن نضحي بالحمير عشان الشعب يعيش " ، اتاكدت ان اللحمة اليل كلتها اكيد لحم كلاب وحمير لسبب وهو ان
الريش كانت عريضة وطويلة وده يدل اني تقريبا اكلت نصف حمااااااااااااار


عااااااااااااااااااااااااااااااااااااااااا

ادي اخرة الطفاسة

منك لله ياابو عادل


يوم صعب من ايامي الحلوة

8 comments:

Anonymous said...

يا فرحة ما تمت خدها الحمار وراح


فوفا

قلب ينبض بالحب said...

انا بقول برضه هو أحنا مالنا كده ودانا طولت فجاءة وبقت نفسنا مفتوحة على الدرة والعيش اتاري بقت عندنا ميول حمارية ههههههههههه .. لنا الله من قبل ومن بعد بس ادينا عيشين وزي الفل اهو ياشوشو ولا حوق معانا ابو عادل ولاغيره والبركة في معدة المصريين الي بتهضم مش لحم الحمير وبس لا وكمان خنازير

Anonymous said...

هههههههههههههه تعيشي يا شيرويت وتخدي غيرها .. مش تزعلي أعتبريها تجربه علشان تعرفي الحم السليم والحم الفاسد

داليا

raed said...

دي يدوب لحمة فاسدة .. هي لو طلعت لحم كلاب وقطط هاتعملوا ايه بقى ... :)

أيامنا الحلوة said...

فوفا
****
فعلا يافوفا خدها الحمار وراح يلا ربنا ستر ولسه على قيد الحياة

تحياتي

أيامنا الحلوة said...

قلب ينبض بالحب
*************
هههههههههههه اه شوفتي وانا اقول ايه اللي جرالنا الحمد لله البركة في المعدة المصرية

تحياتي

أيامنا الحلوة said...

داليا
*****
تجربة دينماركية يادودو ويوم ما اجرب اجرب في لحم الكلاب والحمير يعععععع

تحياتي

ايامنا الحلوة said...

استاذ رائد
***********
كويس انه يادوب لحم فاسد مش لحم مسمم ورشينوا بمبيد حشري قضى اخف من قضى

تحياتي وبلاش عزومة تاني يااستاذ رائد الله يخليك هههههه