Monday, May 11, 2009

نصائح غلاوية


الصبح وانتي رايحة على شغلك وهو لسه نايم والمفروض انه يصحي بعدك بساعتين يروح شغله هو كمان تعمدي اسقاط اى شئ او اخبطي الباب بصوت عالى علشان تصحيه هو كمان اشمعنى انتي فين المساواة ؟

لو بتتفرجي على التلفزيون وهو عايز يغير القناة قوليله معلش الحلقة دى مهمة جدا واحدة صحبتى شافتها على القناة
الفضائية وقالتى ان الحلقة دى هى المسلسل كله.

ولو كنتي بتتفرجي على برنامج للطبخ هيبقى الموضوع أسهل لان كل ما المذيعة تجيب مقدار من المقادير قوليلوا معلش
ثوانى ياحبيبي أصل المقدار ده سر الطبخة.

لو انتي عاملة رجيم وجوزك بياكل عادي زي المفجوع ومش بيراعي شعورك ونازل هم هم وعمال يشتري في حلويات
وجاتوهات قصادك ومستمتع اوي قومي عقبيه بأسبوع أكل كميائي بحجة انه صحي ومفيد وكتري في الزبادي والخيار
لحسن يموت منك.

ولو رفض ينشر معاكي الغسيل قومي بعد ما تخلصي نشر الهدوم ادخلي عليه وقوليله انا نازلة ياحبيبي اجيب هدومك
اللى وقعت منى فى الشارع وعشان تسبكي الحكاية ويحس انها مقصودة قوليله ان في فردة من شرباتك وقعت مع
هدومه علشان متبقاش مقصودة منك !

وانتي بتمسحي الارضيات فى البيت وهو مش مراعي تعبك طول النهار وعمال رايح جاي على المناطق المبلولة
وبيرغي في التليفون مع واحد صاحبه قومي حطي جاز على السيراميك يقوم هو متزحلق تقومي تتنطري وتتخضي عليه
وتقوليله سلامتك يابعلي

12 comments:

بسمه عبدالباسط said...

ههههههههههههههههههههههههه

ايه يا بنتى الغل ده كله
حرااااااااااام عليكى جبتية منين ده

:)))))))))))

قلب ينبض بالحب said...

و بكده هنتطلع من الكلام الي فوق ده ايه ياكتاكيبت ... هنستنتج انه هيقولها لمي هدومك وعلى بيت بابا ولما تقعدي زي القلم الرصاص تبقى تيججي... عليكي عمار البيوت يا شوشو هانم

أيامنا الحلوة said...

بوس بوس
********
هههههههههه ده غل جواني مزروع منذ الصغر يابسمة

تحياتي

أيامنا الحلوة said...

قلب ينبض بالحب
*************
لا ماهي الحجات دي تتم بحنكة انتي ناسيه ولا ايه يابدورة ان كيدهم عظيييييييم

تحياتي

عمرو said...

الخبره واضحه الحقيقه جدا فى النصائح الرهيبه دى ..
ربنا يستر :)

بيتنا القديم said...

ولو عاوزة تحجزي سرير في عنبر الكسور في قصر العيني شدي حيلك واعملي بالنصائح دي بجد كل الهوانم اللي رجليهم في الجبس ومتشعلقة اعترفوا انهم طبقوا نصيحة او اتنين من دول..لاسيما بتاعة الجاز والسيراميك..وعلى فكرة واحدة منهن اعترفت ان آخر حاجه فكراها قبل ما عنيها تغمض ويغمن عليها..صيحات جوزها الهيسترية وهو بيدربها على رياضة مسح السيراميك بالجلابية..دي رياضة حديثة بتيجي مع العشرة والوقت..!!
(:
ربنا يوفقكم
ويجعلو عامر

على الطريق said...

احم احم

انه من خلاصة حنكتي وفرط خبرتي وتفذلك حضرتي أؤكد لكي عزيتي الزوجة ولك عزيزي الزوج أن الجريمة لا تفيد
وأنه من الأفضل أن يخصص الزوجان ركنا للقمص والتشنجات يفرغان فيه كل طاقتهما العصبية وبعدها يعودان بصفاء وهدوء إلى مسيرة الحياة الدورانية الحلزونية المية مية
والسلام عليكم
شكرا لتصفيقكم

أيامنا الحلوة said...

عمرو
*****
لاخبرة ولاحاجة ده احنا لسه بنشق طريقنا دعواتك بقى

تحياتي

أيامنا الحلوة said...

بيتنا القديم
***********
لعلمك بقى أثبتت الدراسات العلمية التي أجراها معهد العكننة الزوجية ان أفضل رياضة على الاطلاق للزوجة هي رياضة مسح السيراميك بالجلابية مما يعطي قوة للعضلات اللمفوية المؤدية الى ضربة في الوش قوية مسفرة عن اصابة الجمجمة اصابة موتية

تحياتي ياسمسم وتيك كير

أيامنا الحلوة said...

على الطريق
**********
دستور دستور يامرمر فعلا الجريمة لاتفيد واكيد انتي سامعة تصفيق الجماهير وزغاريط الزوجات

عين حمرة ووش مبرق

تحياتي

شهووووده said...

ههههههههههههه.. لا ونعم النصايح..
حلوة بجد

أيامنا الحلوة said...

شهووووووده
***********
يلا أي خدمة احنا ميهمناش غير عمار البيوت طبعا

تحياتي