Monday, April 13, 2009

الحقوا الميكروباص هينفجر




امبارح بعد انتهاء العمل خدت شنطتي وفوريرة على البيت بس حصلي موقف طريف اوي لحد دلوقتي مش قادرة امسك
نفسي من الضحك عليه كنت راكبة الميكروباص لابيا ولا عليا وماشي عادي في امان الله وفجأة لاقينا سواق
ميكروباص بيجري ورانا

وبييييييييييب بيييييييييييب

الحق العربية بتولع

وهوب راح سواقنا ركن على جمب في فزع ونزل يجري قوم اللي جامبو يجري هو كمان يجري ويقول

يلا ياجماعة اجروا الميكروباص هينفجر

يالهوي هينفجر .... مفيش موته تانية ياولاد غير دي مش عايزة بشرتي تتأثر ولاتتشوه

قوم هوب الناس كلها طلعت تجري من الميكروباص بفزع رهيب ويكأننا في العراق

وأنا طبعا مش أحسن من حد وياروح ما بعدك روح مش كفاية قناة الجزيزة اللي قاعدة بسمعها ليل ونهار

وخصوصا اني في اللحظة دي افتكرت حديث بيني وبين احدى زميلاتي في العمل ان العربية ممكن توصل لمرحلة معينة
لما النار توصل لتانك البنزين في الحالة دي العربية بتنفجر فعلا انا بقى افتكرت كده ومفيش قدامي غير صورة
اشلاء .. ساعتها بقى كان هاين عليا انط من الشباك بس للاسف الشباك مقاسه يدوب يجيب رضيع ست شهور
المهم انا اصلا كنت قاعدة في الكرس اللي في النص جمب الشباك اللي ورايا واللي قدامي كلوا جري قوم ايه الراجل اللي
جمبي مش راضي ينزل
ويقولي اهدي ياانسه

اهدي ايه بس انزل

اهدي بس مفيش حاجة

يووووه انزل الميكروباص هينفجر

هينفجر ايه بس دي حاجة بسيطة

ياعم انت سايب الناس كلها وجاي عليا انا تقولي اهدي حاجة بسيطة اوعى كده نزلني

وكل الكلام ده وانا شكل القنبلة بتاعت فيلم بطل من ورق في دماغي وبعد الثواني وبعدها القنبلة هتنفجر واحد اثنين ثلاثة
اربعة قومت هوب خبط الراجل بالشنطة بتاعتي عشان يقوم وينزلني
وقولته انزل بقى يااخي العربية هتنفجر
وطبعا ركبي وقلبي بيخبطوا جامد ، وانا نازلة كانت رجلي تحت والرجل التانية لسه جوه العربية كنت بدعي متنفجرش
غير لما رجلي التانية تنزل واخدها معايا

وفعلا نزلت وجريت مع الناس كلها بعيد

خدلك سااااااااااااااتر

والكل خدلوا ساتر

وبعدين نلاقي عريض من البشر اتلموا على الميكروباص وفطسانين على نفسهم من الضحك والعربية مفهاش حاجة دي
سخنت بس وشربوها ماية

وبعدين السواق قال ياجماعة تعالوا اركبوا مفيش حاجة انا بقى ساعتها كنت هموت من الضحك والكسوف من الراجل
اللي كان قاعد جمبي ولمحته من بعيد بيبصلي وهيموت من الضحك على اللي انا عملتوا فيه وطلعنا العربية تاني وركبت
مكاني والراجل اللي خبطتوا بشنطتي قعد جمبي من جديد والتزمت الصمت مع لوحة دماغي في الشباك عشان اداري
كسفتي يالهوي ده انا كنت هموت الراجل ولو كان معايا مطوه كان زمانهم طلبوني في المحكمة الجنائية الدولية

والحمد لله وصلنا في سلام وأمان

يلا مش مهم بقى المهم حمد لله على سلامتي

يوم من ايامي الحلوة

20 comments:

على الطريق said...

ههههههههههه .. كنت هتنفجري يا شيرين
والمية ابطلت مفعول القنبلة الميكروباصية
حمدا لله على سلامتك وسلامة الراكب اللي كان بيهديكي الراجل بردوه كتر خيره

قلوب حائرة said...

باين يا بنتي حد قر علينا في رحلة الاسكندرية والوقت الي قضناه هب يجيلك حادثة الميكروباص حمد لله على سلامتك ومتخافيش ياوزة الانفجار مش بياثر على جمال البشرة خالص هو بيجيب من الاخر وبياخد الجثة كلها

نهياوية said...

هههههههههههههههههههههه
ايوة كدا عودة للايام الحلوة وانا كان فيها انفجار كاد ان يقع

أيامنا الحلوة said...

على الطريق
**********
الله يسلمك يامرمر الحمد لله ربنا ستر والامن مستتب ومصر بلد الامن والامان خصوصا في حلوان

تحياتي

أيامنا الحلوة said...

قلوب حائرة
**********
دورة حبيبتي كان عندنا كتكوت وكبر اللي يجازي الحسوديين .... وربنا يكفينا شر تشوه جمال البشرة

تحياتي

أيامنا الحلوة said...

نهياوية
*******
ربنا يكرمك ياهوبه .. وربنا يبعد عنك الانفجارات يااوختشي لحسن دي خضة كبيرة اوي اساليني انا

تحياتي

A.SAMIR said...

هههههههههههههههههه
فعلا والله
يوم من الايام الحلوة
ربنا يحلي ايامك كمان و كمان

أيامنا الحلوة said...

A.SAMIR
*********
ربنا يكرمك يارب ويحلي أيامك يلا دعوة حلوة اهيه ده انت لسه عامل معايا واجب البوست اللي فات وكنت عايز تشتري المدونة وتدهالي تاني ههههه

تحياتي

bos bos said...

ههههههههههههههههههههههههههههههه

حرام عليكى موتينى من الضحك والله انا لو مكانك كنت قتلت الراجل ايه البرود ده بس
ههههههههههههههههههههههههههه

bos bos said...

وبعدين هو كل اللى مخوفك البشرة هيحصل لها ايه هو اصلا مش هيبقى فيه بشرة
ههههههههههههههههههههههههههههههه

mostafa rayan said...

طيبكنتي اسمعيه قبل ما تخبطيه بالشنطة
لأنه كان ممكن ينفعل عليكي وياذيكي
يلا حصل خير وحمد لله على سلامتك

خمسة فضفضة said...

السلام عليكم ورحمة الله وبركاته

ههههههههههههه

كل ا اتخيل الموقف مش قادره ابطل ضحك

الحمد لله انها جت سليمه

المفروض تذبحي حاجه فدو ان شالله فرخه

هههههههههههه

أيامنا الحلوة said...

بوس بوس
*******
والله يابوس بوس جيتي للحق الراجل كان كويس انا اللي جبانة وبعدين انتي عارفة جمال المرأة في بشرتها والتشوة وحش يااوختشي

تحياتي

أيامنا الحلوة said...

mostafa rayan
*************
الله يسلمك الحمد لله وهو طلع راجل محترم وكويس انه منفعلش عليا بعد الضربة القاضية بتاعتي اكيد كان مقدر حجم الانفجار اللي كان هيحصل للميكروباص

تحياتي

أيامنا الحلوة said...

خمسة فضفضة
**********
وعليكم السلام ورحمة الله وبركاته
اضحكي ياستي ده انا بقالي ثلاث ايام بضحك من الموقف اصل اللي يشوفوه بقى هيعرف اكتر اد ايه الموقف مضحك

والحمد لله تدقي بفكر ادبح ارنب

تحياتي ومنوراني

Ahmed Mubarak said...

مشكله
انتي مشكله

انا اساسا لو مكانك كنت اتعلمت الكونج فو على حسه ..

وانا فرحان بجد علشان ايامك رجعت حلوه

أيامنا الحلوة said...

أحمد مبارك
*********
ياهلا ياهلا بصديق ايامي الحلوة ... شوفت بقى يااحمد اللي حصلي عشان تعرف اني صامدة وبواجه اي انفجار من غير الكونج فو

تحياتي ويارب يحلي أيامك

bos bos said...

عندى ليكى هدية فى اخر موضوع عندى روحى خديها

أيامنا الحلوة said...

بوس بوس
********
علم وينفذ يافندم قلبي ربنا يستر

Ahmed Essawy said...

:D