Saturday, June 14, 2008

مقتطفات


في واحدة صحبتي مشوفتهاش بقالي كتيرأول ما شافتني وسلمت عليا سألتني سؤال مهم ..

ها .. ازي أيامك؟..


رديت عليها بسرعة البرق وقولتلها أيامي حلوة !!!! وبعد ما قعدت مع نفسي قعدت أفكر هل فعلا أيامي حلوة طب ايه الحلو اللي فيها ماهو مش معقولة كلها حلوة يعني يبقى أنا بنافق نفسي أوي .. وبالفعل أنا بحس اني انا وايامي في معركة مع بعض وكل طرف عايز يكسب المعركة أينعم هي معركة بدون أسلحة بس بالتاكيد في خسائر

****************************************

أول امبارح حبيت أعمل مكرونة وكبدة .... ولكن قليل البخت يلاقي الامبوبة فاضية

***************************************

رصيدي خلص وأصحابي بيرنوا عليا كتير وانا مش برن عليهم فكرت في استخدام نظام شحتني شكرا بس تراجعت انا محبش اشحت رصيد من حد

*****************************************

بما اني محبش الهزيمة ومعنديش مانع أمر بالتجربة وافشل وأمر وافشل لحد ما اوصل للنجاح رحت اشتري فاكهة واخترت اني اجيب تفاح وقولت أكيد مش هتغش فيه ........... ورحت للفكهاني

اديني اثنين كيلو تفاح

حاضر

انت بتعبي التفاح ليه من الناحية اللي عندك دي هات من اللي هنا ده أحسن واديتلو تفاحتين يحطهم خدهم مني وفجأة لقيت كيس تفاح تاني مليان عن الكيس بتاعي

رحت قفشت الكيس وقولتله انت بدلت الاكياس ... انتو ايه مش بتخافوا من ربنا صدقني مش بينفع ربنا هيحاسبك

وسيبتوا ومشيت ................ وبرغم من اني انتصرت ومتضحكش عليا المرة دي بس اكتئبت اوي

يعني انا مفيش مرة هعرف اشتري حاجة من غير ما الاقي حد يضحك عليا يعني امنع الفاكهة خالص وارميها من حياتي عااااااااااااااااااااااااااااااااااا
*************************************
لظروف ما انا مسؤولة مسؤلية كاملة عن شئون البيت لحد ما ماماتي حبيبتي ترجع من السفر وبجد الله يكون في عون الزوجات اللي بيشتغلوا ........... ربنا يرجعك ليا يامامي ياحبيبتي بالسلامة

16 comments:

A.SAMIR said...

لظروف ما انا مسؤولة مسؤلية كاملة عن شئون البيت لحد ما ماماتي حبيبتي ترجع من السفر
ربنا يكون في عون الناس اللي معاكي في البيت
ههه
تحياتي

mo'men mohamed said...

لما كنت فى ادفينا كنت قاعد لوحدى ومحدش جنبى يعملى اكلى
قعدت اسبوع كامل أكل سندوتاش فول من المطعم
لأنى لا بعرف اطبخ ولا اعمل اى حاجة
خير
السلام عليكم

ولــــــــــو said...

حقيقي ربنا يباركلك ف دماغك
وعادي مش شرط تشتري فاكهه هما اللي اشتروا اخدوا ايه
ان شاء الله مامتك ترجع بالسلامة

أيامنا الحلوة said...

A.SAMIR
********
(وش محمر) يعني ايه الله يكون في عون الناس اللي في البيت فيها ايه يعني لما المكرونة تطلع مالحة والكبدة تطلع دلعة والمحشي يطلع مش مستوي واللحمة تطلع بتشد مش بتتندغ ايه مفيش تعاون اسري كده خالص كل حاجة لازم تكون مظبوطة ايه العالم دي كويس ان في اكل اصلا
ههه
تحياتي

أيامنا الحلوة said...

mo'men mohamed
**************
صدقني سندوتش الفول ارحم خليك متعاون مع نفسك واخدم نفسك بنفسك وبلاش تضيع حياتك في الكازوزة

تحياتي

أيامنا الحلوة said...

ولو
***
على رايك هما اللي اشتروا فاكهة خدوا ايه
ربنا يباركلك ويارب ماماتي تيجي بالسلامة
تحياتي

نهياوية said...

ربنا يجعل ايامك كلها حلوة

وبمناسبة المسئولية عن شئون المنزل
عايزة اسالك سؤال
"لما بتوع بيتكم بياكلوا بعد كده بيروحوا فين ؟؟؟؟؟؟؟

انا عارفة الاجابة


تحياتي ياجميل

أيامنا الحلوة said...

نهياوية
******
ربنا يخليكي ياهوبة ..... مممممممم انتي عارفة بقى مصير البيت بيكون فين بعد الاكل بتاعي بس صدقيني الظفر عمره ما يخرج من لحمه واكيد اهلي هيسامحوني
هههههه

تحياتي

في حب مصر said...

السلام عليكم
ازيك يا شيرين
يا ترى مختفية كدة ليه؟؟؟؟

انا عملت مكرونة وكبدة السبت اللي فات؟؟ اتفضلي معايا
وبعدين أمبوبة ايه.. ده الغاز الطبيعي وصل شبرا مصر بقالة يجي خمس سنين.. لسة ما وصلش حلوان؟؟؟

بالنسبة للفاكهة.. سيبك منها خالص.. هي مش من نصيبك باين كدة.. حد عاملك فيها عمل وربطة في ديل سمكة؟؟

بما انك بقيتي ست بيت لحد مامتك ما ترجع بالسلامة انا هاعزم نفسي عندكم على الغدا.. ونشوف بقى تنفعي تبقي ست بيت ولا ؟؟؟؟؟؟؟ ههههه

والله يكون في عون اللي في البيت؟؟؟؟؟

تقبلي مروري

Ahmed Mubarak said...

شيرين
شيرين مسؤوله عن البيت
يا ترى ديه احد اوابع الجزر والموز والكيكه الي فتحتي عليها البوتجاز
؟؟
بس انا متاكد انك هتعجي الازمه الكبيره

ايه يا شيرين .. ضحكتيني

بس ربنا يخلي ايامك حلوه
تحياتي
:D

أيامنا الحلوة said...

في حب مصر
*********
تصدق لسه عندنا غاز الامبوبة الطببيعي موصلش لسه عندنا ... وبعدين في موضوع العمل اللي معمولي في ديل السمكة دي حد يصطادها بقى ويريحني
نفسي اكل فاكهة
تنور وتشرف وانا ممكن كمان اعملك حلة محشي واسيبهالك على باب المدونة بس انت الجاني على نفسك

تحياتي

أيامنا الحلوة said...

أحمد مبارك
********
شوفت قى يااحمد ادي اخرتها ابقى مسؤولة عن البيت بس الحمد لله ايام وعدت ياااااااه


ربنا يكرمك ويحلي ايامك انت كمان

تحياتي

عاشقة الحب said...

ربنا يعينك ع الايامالحل و الوحشة

تحياتي

أيامنا الحلوة said...

عاشقة الحب
********
ربنا يكرمك ويجعل ايامك كل حلوة

تحياتي

Soooo said...

حلوه المقتطفات دي
خصوصا موضوعك مع بتاع التفاح
واللي بيؤكدلي انك مش ماشيه مع الفواكه وبانصحك تخشي على الخضار يمكن ربنا يجعل في وش الخضار القبول والبياعين يكونو لسه عندهم ضمير

وربنا يرجعلك والدتك بالسلامه ويباركلك فيها ويباركلها فيكي



سلاموووووووووووز

أيامنا الحلوة said...

سوووووووو
************
تصدق انا مكدبتش خبر ودخلت على الخضار وعشان وقدمت على خطوة جريئة جدا واشتريت حزمتين بقدونس وكيلو خيار وارك الله فيما رزق
اه انا خلاص اتعلمت ولاننكن حد يضحك عليا ابداااااااااا

ربنا يبارك فيك ياسو ويكرمك وتنورني دايما

تحياتي