Wednesday, April 30, 2008

تاج فريد من نوعه


جالي تاج جديد وفريد من نوعه من مدونة في حب مصر
استعنّا على الشقى بالله
السؤال الاول
أذكر 10 أشياء عن نفسك
خجولة جدا بالرغم من ان ده يتعارض مع مهنتي لان الخجل، خصوصا لو كان له تأثير على عملك، اكيد بيكون سبب في الفشل

اجتماعية بالرغم من اني عمري ما ابتديت بالصداقة وده راجع للصفة الاولانية الخجل ولكني بحب الناس اوي واحب يكون ليا اصدقاء كتيييير

عندي قدرة على الاستماع لمشاكل الاخرين وده بينقلب ضدي بعدين لان من كتر الاستماع للمشاكل بيعملي انا حالة نفسية سيئة لاني بكون شايلة همهم

صريحة جدا واحيانا الصراحة بتكون عند بعض الناس قلة ذوق بس الحمد لله صراحتي محاوطها الذوقية لاني مش بحب حد يزعل مني

شخصية مرحة ومحبوبة الحمد لله وأكره الكآبة والتشاؤم

كنت بثق في الناس بسرعة وعندي حسن الظن بس حاليا باخد حذري كتييييييير عن الاول

طموحاتي المستقبلية كتيييرة ومهمة وأتمنى أحققها لاني شايفة إني موجودة في الدنيا دي لهدف مش هينتهي لحد ما أموت

بحب أتسوق اووووي دايما بعمل شوبنج حتى وانا معييش فلوس ههههههه عيني تبص على الحاجة وتفضل في دماغي وميهدليش بال غير لما اشتريها
استعانت بانتختي أميرة وقالتلي أني عنيدة وعصبية وكريمة وكمان أنيقة أحمدك ياااااااااارب
السؤال الثاني
اختر 5 أشخاص تهدى لهم التاج
الثالث
لا تهدى التاج لمن أهداك اياه........... اكيد طبعا
الرابع
أترك لصديقك الذى أهداك التاج بان التاج نزل وتعالى شوفه... لا غلاسة بقى هههههههههههههه
واخيرا ... شكرا يامصري ياغلبان على التاج اللذيذ ده (بجز على سناني)

24 comments:

Ahmed Mubarak said...

جالي التاج وكنت ناوي ابعتهولك بعد ما اخلصة بس يلا

خيييير

تحياتي
:D

sendbad said...

واجابتك برضه فريدة من نوعها
لكي تحياتي

في حب مصر said...

ايه الجمال ده يا شيرين

تعرفي ان اجمل حاجة في البنت هي الخجل
وعلى فكرة عمر الخجل ما يتناقض مع أي حاجة، بالعكس بيدي اي حاجة جمال طبيعي.
الخجل بقى ممكن يتعارض مع الصفة التانية وهي الاجتماعية، لان الخجل بطبيعته يخلي البنت مش تتكلم مع الناس التانية وتندمج معاهم بسهولة

الصراحة برضة من الصفات الجميلة جدا يا شيري

حكاية انك مرحة وحبوبة دي انا متفق عليها معاكي تماما، لاني لمست ده بنفسي في بوستاتك وتعليقاتك وابصم عليه بالعشرة

هي الثقة المطلقة بالناس مش مطلوبة، بس انا عايز اعرف ليه بدأت تاخدي حذرك دولوقت.. فيه تجارب مؤلمة ولا ايه يا شيري؟؟؟؟؟
كويس ان الانسان يكون طموح جدا، بس المهم ان طموحه ما يكونش اكتر من اللازم يا شيري، وعامة ربنا يحققك كل احلامك

حكاية حب التسوق دي مقلقة قوي..هههههه.. اوعي الراجل اللي من نصيبك يعرف أحسن يكت ويهرب..ههههههه
وبعدين انا عارف انك بتتسوقي حلو قوي بدليل الجزر اللي اشترتيه قبل كدة ههههههه

عنيدة وعصبية وكريمة صفات كويسة.. وانيقة اجمل حاجة طبعا
بس يا ترى ايه رأيك انتي بقى في أميرة..ههههههه

مبروك عليكي التاج

على الطريق said...

شيري الجميلة .. ربنا يسعدك يا رب .. كلماتك جميلة زيك

أقر وأعترف أن كل ما كتبتيه صحيح وبريئ من الكذب

يا ريت تردي على سؤال في حب مصر عن رأيك فيا

أسأل الله أن يديم صداقتنا قوية نقية

أيامنا الحلوة said...

أحمد مبارك
*********

ههههه معلش خيرها في غيرها التاج اللي جاي عليك خير ابقى ابعتهولي

تحياتي

أيامنا الحلوة said...

سندباد
*****
ربنا يكرمك ياسندباد وياريت تجاوب على التاج ياسندباد لان اكيد حد زيك وفي رومانسيتك كل المدونين واللي بيدخلوا عندك هيكونوا عايزين يعرفو شخصيتك اكتر

تحياتي

أيامنا الحلوة said...

في حب مصر
********
تصدق اخجلتم تواضعنا يافندم هههههه ايه المدح ده كلوا بس انت هايل ومفيش منك في البلد دي

ربنا يكرمك بس صدقني الخجل فعلا بيتسبب في مشاكل كتيرة دي حقيقة وعن تجربة صدقني

وبالنسبة للحذر فالدنيا ياما بتعلم واكيد حصلتلي مشاكل خلتني اكون اكثر حذرا مع الناس

الطموح مالوش حدود بس الاهم ان الطموحات دي متكونش جنونية ونقدر نحققها والحمد لله انا واقعية

حكاية التسوق دي بقى ربنا يستر عليها ولو العريس هرب عشان الحكاية دي فهو الكسبان بصراحة هههههههه وليه حق ينفد بجلده قبل فوات الاوان

ياكسوفي انت لسه فاكر حكاية الجزر ياعم قلبك ابيض افتكر حاجة حلوة

وشكرا على التاج وعقبال ما اخدمك انا في تاج باذن الله ههههههه

تحياتي

أيامنا الحلوة said...

على الطريق
***********
رنا يكرمك يااميرتي وبالفعل انا جاوبت عن سؤال في حب مصر وقولت رايي فيكي

تحياتي وربنا يديم علينا الصداقة والمودة والحب

في حب مصر said...
This comment has been removed by a blog administrator.
أيامنا الحلوة said...
This comment has been removed by a blog administrator.
Doba said...

يعنى مش لما تدينى تاج تقوليلى يعنى
أفاجأ انا دلوقتى بانك اهديتينى التاج ومن زمان كمان

شريرة
زودى الصفة دى
============

انتى قلبك جميل
وصافية النفس
ربنا يبارك فيكى

سلامى وبوسى نفسك بوستين
هبة

أيامنا الحلوة said...

دوبا
****
مبروك عليكي التاج ياستي تدوبيه في عرق العافية

حلوة صفة اني شريرة دي تصدقي تنفع بردو ههههه

تحياتي ياام يوسف حبيبي وربنا يكرمك

klmat said...

شيرى
تاج جميله واجابات جميله زى شخصيتك
صفات كلها محبوبه
اعذرينى فى الـخير عليك
بس وعد ان شاءالله اقرا كل التدوينات اللى فاتتنى واقولك
ربنا يوفقك ويسعدك ياااارب
خالص تحياتى

أيامنا الحلوة said...

كلمات
*****
ايه النور ده بس فينك وايه الغيبة الطويلة دي كلها

ربنا يكرمك ومتغبيش تاني على ايامي الحلوة

تحياتي

Eric Matt said...


حبيت أسلم بس :)

تحياتي والحمدلله اني نفدت من التاج :P
دي من فوايد الغيبة الطويلة هاهاهاا

تحياتي

Wish I were a Butterfly ... said...

إجاباتك موجزة و لذيذة أوي
:)
معاكي جدااا في النقطة التالتة :) بتتعبني أوي بجد

هو حسن الظن في الناس دة اختفى من بعد حادثة الجزر و لا قبلها؟ :))). انت شخصية بسيطة و جميلة أوي. أتمنى تقدري تحققي كل طموحاتك يا شيري إن شاء الله

تحياتي

momken said...

حلو التاج ده
مع ان اسئلته طويله شويه
اذكر عشر حجات


كتير اوى عشره
دانا ممكن معرفش عشر حجات عن نفسى

بس طبعا هو مسموح فى البلوح باستخدام المراجع
يبقى هيكون سهل شويه

اجاباتك جمله
مليانه حكمه وثقافه وخفه دم
وايمان عميق

تحياتى

أيامنا الحلوة said...

Eric Matt
*********
ياااااه حمدلله على السلامة فينك من زمان منورني ويريت متطولش الغيبة كده تاني

تحياتي

أيامنا الحلوة said...

Wish I were a Butterfly
**************************
ربنا يخليكي .. بقالك كتير مش بتنوري ايامي الحلوة اتمنى تشرفيني دايما واشكرك على كلامك الرقيق

ربنا يكرمك

تحياتي

ايامنا الحلوة said...

momken
*******
ملاحظة ان التاج عجبك انا بقدمهولك هدية ياريت تتقبل ..

ربنا يكرمك شرفتيني بزيارتك لايامي الحلوة

تحياتي

ضد الظلم said...

كل الى فات من الاسئله عادى وتمام والخجل والصراحه متهيألى مبيجتمعوش بس ماشى
اما بقى موضوع انك بتحبى تتسوقى طبعا معروف وبيضحك عليكى وفضحانا على طووول بيتنصب عليكى

تحياتى

ولــــــــــو said...

امممممممممم
اعتقد كمان كل اللي فات اقل من الحقيقي بكتير

ربنا يخليلك نفسك

أيامنا الحلوة said...

ضد الظلم
********
فينك ياابو العربي من زمااااان بقيت تتاخر اوي على فكرة وشكلي كده هبعتلك للدوحة لعقد مؤتمر حوار عشان تعترف فيه بتختفي ليه كتير كده
الصراحة والخجل بيجتمعوا ياابو العربي صدقني مش لازم الصراحة تكون باسلوب مستفز
وماشي بقى كده افتكرلي حاجة كويةس غير التسوق واني بيتنصب عليا دي انت عايزني اتعقد تاني

تحياتي ومتغبش كتير كده تاني

أيامنا الحلوة said...

ولو
****
يااااااااااااه انت غيابك بيطول اوي بجد بقى الشغل يخدك ده كله بردوا يلا ربنا يصلحلك الحال منورني بجد ربنا يكرمك

تحياتي