Monday, December 3, 2007

مزاد علني بمدونتي


خير اللهم اجعلو خير كنت نايمه في امان الله وبحلم (الحلم العربي) عارفينو طبعا الحلم ده ماعلينا ...
ليقت باب المدونة عمال يترزع ويتهبد قومت اتنطرت من مكاني في ايه زلزال زلزال لا مش زلزال ده اكيد الاسرائيليين عرفوا اني كنت بحلم بالحلم العربي طيب اعمل ايه افتح ولا اعمل ايه قولت ولايهمني هما كمان هيحسبونا على الحلم .... قومت فتحت الباب لقيت ناس كتيييييييير بس الحمد لله مطلعوش اللي في بالي قولتلهم خير ياجماعة انتو تقريبا غلطانين في العنوان


قالو لاء ابو العربي قال هنا في مدونة ايامنا الحلوة .... ابو العربي قالكم تجولي قالولي اه يلا خلصينا وقوليلنا سعر الشقة اللي على سطح القمر عايزين نتف ... يععععععععع تتفو وجاين تتفولي هنا ولا ايه لاحول ولاقوة الا بالله استهدو كده بالله قمر ايه وبتاع ايه ياجماعة بس هو انا لسه نايمة ولا ايه ... الاقي واحد تاني يقول

قوليلي من فضلك المواصلات لسطح القمر سهلة ولا صعبة ارجوكي متخبيش عليا لان انا شغلي في ستة اكتوبر وخايف اشتريها تكون بعيدة عن شغلي واتبهدل كل يوم ... يالهوووووووووووي ايه اللي بتقولوه ده ياجماعة ... وبعدين الاقي واحد تاني يقولي هيه فعلا الشقة بتطل على قصر الرئاسة يعني لما اجي اتف التفة هتوصل مباشرة للقصر ... يادي النيلة .... وبعدين واحد ثالث يقولي طب قوليلي من فضلك التنين اخرو كام .. يالهوووووووووي تنين ..... من فضلك خلصيني انا الاول انا هدفع كاش ..............
وووووووووووووووووووووووو

بسسسسسسسسسسسسسسسسسسسسسسسسسسس........ شط اب مش عايزة اسمع صوت حد ولانفس في اايه...

قولت مبدهاش رحت قولتلهم استنو هنا
وجريت على مدونة ابو العربي ملقتوش موجود بس ليقتو كاتب بوست بيبيع فيه ممتلكاته وكاتب للناس يجوا مدونتي للاستفسار والاستعلام

اتاري ياحضرات المدونين ان السيد ابو العربي افتقر بعد رفضه حضور مؤتمر أنابوليس عشان كده قرر البيع .. مع انو لو كان خد بنصحتي من الاول كنت اقولوا يحضر وكان هياكل ويشرب ويتصور ويتفسح على حس المؤتمر ويقول اللي في نفسو كمان بس تقولوا ايه بقى في حماسة شباب اليومين دول تهور ....

يعني فيها ايه لو كان راح حضر المؤتمر وكان حرق دم ليفني زي ما عمل بتاع السعودية ومسلمش عليها
او كان بص لاولمرت من تحت لتحت كده
او كان مسك بوش من قفاه وعلقوا في افتتاحية المؤتمر ويخليه عبره لكل واحد يطرح مبادرة للتفاوض ارض على فلسطين

ولا كان مسك الوفد اللبناني وهزقهم وقالهم عيب عليكم تيجو لحد هنا وسايبين بلدكم كده لحد دلوقتي من غير رئيس

عارفين لو كان راح وقال اللي في نفسو في وش بوش واتباعه كانوا الغرب هيحترموه واحتمال يدولو البيت الابيض هدية ومكنش بقى ده حالو اهوه عمال يبيع في حتة البيت اللي عندو على سطح القمر .. وحتة التنين اللي طلع بيه من الدنيا

الخلاصة ياحضرات المدونين البيت اللي بيطل على القصر الرئاسي محجوز عليه من الرئاسة نفسها ومتشمع بالشمع الاحمر وباقي الممتلكات معروضة في نفق تحت الارض بين الحدود الفلسطينية الاسرائيلية ....

بس سؤال تفتكرو لو كان ابو العربي راح المؤتمر كان هيرجع من هناك اصلا بعد مايقول اللي في نفسو؟!!!


زرونا تجدو مايسركم.. أيامنا الحلوة

24 comments:

Anonymous said...

هههههههه والله فقرية طيب دلوقتي هتديني القصر بكام علشان اتجوز فيه انتي عارفة مبيفرقش معانا فلوس عادي خالص بس المهم فعلا يكون بيطل على عطارد او بلوتو او المريخ وتكون في عفشة ميا ده الاهم يافقرية منك لله هتتقلشي قريب " تؤامك يافالحة "

ولــــــــــو said...

ايه ده
انا جيت امبارح لقيت الجو هوس هوس قلت يبقى النهارده اجازه
اجي النهارده الاقي الحاجات كلها اتباعت
ماكانش العشم
المهم ابو العربي كان ممكن يعمل كل اللي قلتي عليه ده شاب خلاصه وانا عارفه لكن المشكله انهم هنا كانوا هايطلع ف التليفزيون ان الدوله والحكومه غير مسئوله عن تصريحات ابو العربي ويطلعوا شهاده رسميه انه بيعامل معامله اطفال
يرضيكي بقى انه يتفضح على الفضائيات كده
الراجل فضل انه يبيع عفش بيته ولا ان بلده تتطلعه مجنون
عفارم يا ابو العربي
بصراحه البوستين خرافه واجمد من بعض
بس انتي متأكده ان الحاجات محجوزه ولا ضربتي عليها عشان تمطري علي الريس لوحدك

shahy said...

بوست تحفة يافقرية
وواضح انك مش هاتجيبيها لبر
نووي وتفافة
ياعيني ياشيرين انتي مش هاتستحملي البهدلة يابنتي اعقلي
وبعدين خدي هنا يا بت انتي
بتجيبي سيرة ستة اكتوبر لية احنا هانخبط في الحلل من اولها كدة

بوست ابو العربي كمان جميل وفكري كدة بدال مايبيع كل اللي حلتة نلملة قرشين واهو يحتفظ بالتنين على الاقل اصل النوع دة مفيش منة دلوقتي بتاع اليومين دول مغشوش

تحياتي يا برنسيسة

ابو العربى said...

انتى بتبوظى سمعت ابو العربى بتكذبينى مطلعانى نصاب طيب ارجعى فى كلامك بسرعه احسن ابعت نووى على قدك وادمر مدونتك دى
بجد كنت واثق فى روحك الساخره
الى احلى من البوست بتاعى البوست بتاعك روعه

بس بردو ابو العربى عند كلامه ومش هيسيبك

احساس لسه حى said...

عزيزتى
هو الحل تفتكرى فى المؤتمر ولا الحل
ناس تانى هى اللى تروح المؤتمر
طول ما الناس دى موجودة ولا الف مؤتمر ممكن يحل الحل لما يحصل تغير
سلام

شيرين said...

توامي قلوب حائرة
$$$$$$$$$$$$$$$$$$
مش بتفصحي عن هويتك ليه ياهانم بتتبري مني ماشي
عامة الممتلكات محجوز عليها اصلا يعني لاهتشوفي كوكب عطارد ولا حتى المريخ وبعدين ياباشا ابقى اتجوزي في القصر اللي بنتهولك في معاميق قلبي

تحياتي

شيرين said...

ولو
$$$$
ما انت بعد ما مشيت امبارح الناس دي كلها جت وراك .. وبعدين انت هتقولي على ابو العربي بردوا انا عارفة انو شاب خلاصة وكان نفسي ابعتو للبردعي يشوف حالة المعدات بتاعت الوكالة اصلو بيقول ان اصابتها مرض الشيخوخة فكنت عايزاه يحل المشكلة مش ناقصين مصايب الاختبارات النووية كده هتبوز

وبعدين هو مين اللي يعمل شهادة معاملة اطفال لابو العربي ده انا كنت اجبلهم ميت شهادة تثبت العكس من احسن اطباء في سطح القمر
ربنا يكرمك والحمد لله ان البوت عجبك

تحياتي

شيرين said...

شاهي
****

شوشوووووووووو ازيك ياام الشنيور
والله ستة اكتوبر دي احسن مكان وفيه مميزات كبيرة فردت كعب بينها وبين سطح القمر
وبعدين نلم قرشين لمين يابنتي ده ابو العربي يعني يفحت الصخر ويجيب فلوس مش ابو العربي اللي نلملو فلوس بس انا معنديش مانع تلمولي انا ههههههه
التنين بقى هو وعدني انو هيدهولي هدية في عيد ميلادي الخمسين

تحياتي

شيرين said...

ضد الظلم
********
اهلالالالالالالا جيت برجلك .. لو اعرف معاد مجيك المدونة يابو العربي كنت خليت الناس يستنوك عشان يوجبو معاك بعد ما عرفو ان ممتلكاتك محجوز عليها ههههههه
على فكرة انا المدونة بتاعتي معاها الحصانة بتاعت مجلس الشعب يعني النووي مش بياثر معانا

ابو العربي اشكر ثقتك بجد ويشرفني انك ذكرتني بمدونتك الرائعة والله مش مجاملة مدونتك تستحق المتابعة فعلا ربنا يكرمك

تحياتي

شيرين said...

احساس لسه حي
************
المؤتمر ده انعقد اصلا عشان خاطر الناس دي بالتحديد اللي تحضروا امال يعني مين اللي هياكل ويشرب ويتصور

تحياتي

son's egypt said...

السلام عليكم
يروح ابوالعربي المؤتر ولا ميروحش مش مشكلة
لانه مهما يقول ابوالعرببي مش حيعمل حاجة خالص

Doba said...

لا
لا
لا
لا
واخدينى على فين
ده انا جاية لسه اشوف فيه ايه
اى اى

والله معرفها دى كانت معرفة منيلة
اه يا قفايا مليش دعوة والله انا مش عاوزة اتف ولا حاجة

يا نصيبة
يا مجرمة

ممكن أوضة بمنافعها لو سمحتى
سلام ياتحفة
هبة

Desert cat said...

لاء غلطان ابو العربى
ده لو كان راح المؤتمر
كان زمان محدش عارف يكلمكه دلوقتى
بس برضه كويس انه مرحش اصله كان ممكن الاخوة البعدة يملوا دماغه
ويخلوه معاهم على الناس التانيين
انا عارفاهم ايديهم طايله
والز على الودان
وسلامى لابو العربى يا اوختشى

klmat said...

حقيقى تدوينه جميله جدا جدا
شر البليه مايضحك وابو العربى
كمان فكرته هايله بس
انا عايزه شقه محندقه كده وبلاش
تطل على القصر اياه علشان
المرور حايكون صعب
تسلم افكارك وخفه دمك وقوة المعنى
تحياااااااتى

شيرين said...

son's egypt
************
وعليكم السلام .... لالالالالا متقولش كده على ابو العربي ده ابو العربي ده راجل مخلص ميغركش انو افقر

تحياتي

شيرين said...

دوبا
****
هههههههههه ازيك ياجميل وحشتيني كتير معلش هيه اخرة زيارتك لمدونتي كده بس ولايهمك العيش والحلاوة مفيش اكتر منهم اليومين دول ...
وبعدين الاوض كلها محجوزة بس عشان خاطرك هشوفلك ركن جمب كوكب المريخ

تحياتي

شيرين said...

Desert cat
***********
لا ميغركيش ابو العربي ده مفيش زيو ومحدش يقدر يملى ودانو مهما كان بس ربنا يخليكي ابقى حضريلو عيش وحلاوة لاني مش ضامنة بعد الحجز على ممتلكاته ممكن يحصل ايه

تحياتي

شيرين said...

klmat
*****
خطوة عزيزة بس مكنش يتعز الممتلكات بتاعت ابو العربي طلعت محجوز عليها كلها ابقى احاول ادورك على اي اوضة فاضية في كوكب بلوتو اهو محندق على قدك ههههههه
تحياتي

سندباد said...

ايه الاخبار تمام طب كويس الحمد لله
دايما دمك خفيف ودايما بوستاتك ليها طعم خاص
تحياتي

Soooo said...

طب والله انا كان نفسي في تنين
بجد والله مش هزار
يعني الناس كلها يبقى معاها قطط وكلاب وبتاع .. وانا يبقى عندي تنين صغنن قد برج الجزيره العب بيه كده واهشتكه

الله يكرمك لو التنين لسه قاعد ممكن تكلمي ابو العربي يبيعهولي تقسيط؟؟؟


كل سنه وانتي طيبه



سلامووووووز

سندباد said...

كل سنة وانتي طيبة وعيد سعيد
تحياتي

Anonymous said...

سندباد
******
ربنا يكرمك واشكرك على اطرائك لمدونتي

تحياتي

Anonymous said...

سوووووووو
**********
والله ياسوووو ما يغلي عليك التنين بس للاسف التنين بتاع ابو العربي بيعض

وبعدين تقسيط ايه ياراجل عصر التقسيط انتهى خلاص

تحياتي

Anonymous said...

سندباد
*********
كل سنة وانتي بالف خير وسعادة ربنا يكرمك

تحياتي