Tuesday, April 20, 2010

اه يارجلي



اه يارجلي
ده مش مطلع اغنية ده انا بتوجع
اي والله بتوجع
اصلي خير اللهم اجعله خير خرجت من الشغل انا وانتكتي اللي طبعا بدعيلها من كل قلبي بالرحمة والمغفرة واتغذينا بره غدوة معتبرة تملى بطن الأسد ولاني كنت عاملة رجيم فاشل وبوظته جتلنا فوكيرة مهببة وهو اننا نمشي من محطة البحوث للدقي وبالفعل تمقوم اول ما نوصل للدقي انتكتي تقولي دي محطة الاوبرا اهيه قربت تعالي نكمل قولت ومالو خلي الاكل اللي كلتوا يطحن ويطلع على شكل سعرات عرقية وطول ما انا ماشية حاسة برعشة في رجلي وتمزق في ركبي
فين يابنتي المترو
قربنا المترو هنااااااااااااااااااااااااااااااااااااااااااك اهوه
مش شيفاه فين ده
يابنتي والله هنااااااااااااااااااك عند الاوبرا
وفعلا جينا عند الاوبرا فين المترو يابنتي رجلي خلاص موش قادرة
انتي جرالك ايه قولتلك عند الاوبرا
الله مش دي الاوبرا
لاطبعا دي رأس الاوبرا
ياسلالالالام راس الاوبرا هما سابوا راسها هنا وجسمها في مكان تاني
والاقي نفسي بنعدي كوبري وراء كوبري وراء كوبري
هوم هوب لاقينا أسدين قصر النيل
يالهووووي احنا رحنا حديقة الحيوان ولا ايه


لايافالحة دول أسدين قصر النيل خطوتين خلاص ونبقى في التحرير
اشوف فيك يوم ياظالمة
التحرير تمشيني من المهندسين للتحرير يامفترية
واللي طالع علينا نبص لبعض ونضحك والضحك بينزل دموووع .. دمووع الوجع بعيد عنكم
انا بقى مش فيا حيل للكلام ولا شايفة حاجة قدامي نظرا لسخونة الجو .. حكم الجو كان نار ياحبيبي ناااااار
هوم هوب نوصل للمترو وننزل تحت ونلاقي نفسنا قدام ماكينة تذاكر اتجاه المرج
انتكتي بنبرة حزن وخيبة امل يالهوي احنا لسه هنمشي جوه تاني


يلا امشي يافالحة


قعدنا نلف جوه المترو عشان نوصل لاتجاه حلوان والحمد لله ركبنا ولاقينا كراسي نقعد عليها وكل واحدة فينا تبص للتانية وتضحك وتفرك في رجليهاوالناس يتفرجوا علينا ولولا سترة عربة السيدات الله يستر من اخترعها كان زمان مصر كلها عندها علم باللي جرالنا
المهم انا تقريبا جاتلي غيبوبة ونممممممممممت وصحيت بقول أحد أحد ماية ماية ادوني ماية
ربنا يخليكي ليا ياانتكت السعد والهنا وربنا مايحرمني من أفكارك الجهنمية أبداااااا

6 comments:

قلب ينبض بالحب said...

الله بقى هو الحق عليا ولاايه انت بساعدك على الرجيم الفاشل الي مش بنفلح فيه ابدن ابدن ..وبعدين وفيها ايه لما تمشي من المهندسين للتحرير يعني كنت مشيتك لحلوان .. المرة الجاية يا ستي همشيكي للمعادي ولا تزعلي ..بقلك ايه ما تيجي نأكل في جاد ها ها ها

نهياوية said...

تعيشوا وتتوجعوا في رجعليكم ، اقصد بعد الشر يعني عليكم

بس انا زعلانة منكم ازاي تبقي عاملين رجيم وموش تقولي ليا اعمله معاكم ، انا مخصماكي والمرة الجاية لما اجي موش هسلم عليكي اهو بقا

Anonymous said...


تمام كده :)

شيرين said...

قلب ينبض بالحب
**************
رجيم بذمتك ليكي عين تنطق الكلمة دي ههههههههههه
كوي ساننا لسه عايشين يابدورتي بس ما اتصابنا في رجلينا
بقولك ايه في محل كشري فتح اول الشارع تيجي نروح

شيرين said...

هوامش
*****
الحمد لله انك متعرفيش اننا عاملين رجيم يابنتي ده خير وبركة صدقيني قطيعة

تحياتي ومنوراني

شيرين said...

غير معروف
********
ياماشاء الله انا بقى يعلق عندي حد باسم غير معروف وطبعا مقدرش اقولك حاجة تمام التمام يافندم وانا هخاف ولا ايه هههههه

تحياتي وابقى تعالى زورنا بس اكتب اسمك عشان نتشرف