Wednesday, September 3, 2008

أيامنا أحلى مع رمضان


كل سنة وانتو جميعا طيبين

يااااااااااااااه رمضان ده بيفكرني بكل حاجة حلوة بجد فعلا ..

فعلا شهر رمضان ده اللي نقدر نقول عليه ايامنا الحلوة

في كل مرحلة من عمري كان رمضان ليه طعم وشكل تاني خالص بدء من وانا طفلة (ما هو انا زمااان كنت طفلة ) لما كان بابا بيجبلي الفانوس وادخل انا واخواتي اوضة ظالمة نولع فيه الفانوس ونلف حوالين بعض ونقول وحوي ياوحوي اليوحا كان اياميها الفوانيس مش هي اللي بتغني لا احنا اللي كنا بنغني ونعلي صوتنا اووي في الغنا ونضحك من قلبنا ونجري وراء بعض بالفوانيس ونقعد نقارن انهي فانوس احلى من التاني مع ان الفانويس على ايامي مكنش زي بتوع دلوقتي المتقمعين الغلسين دول اللي بصوت نانسي وغيرها بصراحة بالرغم من تطور اشكال الفوانيس دلوقتي الا اني شايفة الفوانيس بتاعت زمان " مش زمان اوي يعني" كانت احلى وليها شكل وطعم تاني ........ ياااااااااااااااه بجد احلى ايام

كان طبعا في كل رمضان يجيلي فانوس جديد والسنة الي بعدها يجيلي فانوس احلى من السنة اللي قلبها لحد ما جه اليوم اللي اطلب فيه انا الفانوس ويتقالي انتي اتسخطتي ولا ايه فانوس ايه وانتي شحطة كده عاااااااااااااااااااااا
طب وفيها ايه لما يجيلي فانوس وانا عندي ربع قرن كده وادخل انا والواد اخويا اللي عنده اربع سنين ده ونطفي النور في الاوضة ونولع الفوانيس ونغني وحوي ياوحوي اليوحا

لما كبرت بقى شوية وطلعت من مرحلة الفوانيس كانت في مرحلة حلوة بردوا كانت فيها الصحبة الصالحة اللي كنت بتجمع معاها في صلاة التراويح كنت بتجمع انا واصحابي اللي كانوا معايا في المدرسة والي كانوا في نفس الوقت جيراني نصلي ونخرج من المسجد نتمشى ونشرب عصير ونروح بيوتنا ونصحي بعض في السحور ونتقابل في صلاة الفجر في المسجد
دلوقتي مفيش اصحاب ومفيش مقابلات بينا ولا حتى تليفونات ياسبحان الله ياتري الايام دي راحت فين وليه مش بنعرف نعوضها .....

يااااااااااااه فينك
ياايامي الحلوة

7 comments:

Ahmed Mubarak said...

كل سنه وانتي طيبه يا شري

انا بالنسبالي عمري ما جالي فانوس غير تقريبا مره علشان كنت متربي بره مصر

بس ابشري وشك حلو خلتو جابتلي واحد فانوس نونو صغنن خالص

كل سنه وانتي طيبه

Anonymous said...

أحمد مبارك
************
كل سنة وانت طيب وبخير ربنا يبارك فيك
ويابختك بخالتو اللي جابتلك الفانوس عقبال خالتو انا
وكل سنة وانت فانوووووووس
تحياتي

ابو العربى said...

اشتقتى قوى يا اختى للفنوس ابو شمعه الى كان بيلسوع صوبعنا اه ايام والله
مؤولتيش ليه يا بنتى كنت جبتلك فنوس ابو جنيه وربع اوعى الراجل يضحك عليكى ويدهولك بجنيه ونص الميداليه ده عارفاه ولا ادورلك على ابوشمعه ده عشان ترجعى للماضى وصوبعينك تتلسوع

في حب مصر said...

كل سنة وسموك بخير
ورمضان كريم
ربنا يتقبل منك ومنا صالح الاعمال ويجعلنا من عتقاء هذا الشهر الكريم
ربنا يعود عليكي الايام بالخير والسعادة يارب

Wish I were a Butterfly ... said...

الكلام اللي كنتي كاتباه كان في أول رمضان خالص
أتمنى تكوني حسيتي بروح رمضان السنة دي و قدرتي تتجمعي مع الناس اللي بتحبيها مرة تانية

كل سنة و انت بألف خير يا شيرو
تقبل الله

Wish I were a Butterfly ... said...

بلوجر دوت كوم بيسلم عليكي و بيقوللك ياريت مش تسيبي التدوين. الحمدلله إنك فكرتي في وقت إنك تقفلي البلوج بس مش عملتيها... بس كمان أتمنى تبقي تظهري من وقت لوقت

يارب أيامك تكون حلوة و سعيدة يا شيري يا جميلة أوي أوي

Anonymous said...

اسفه جدا على التاخير في الرد وكل عام وانتم بخير جميعا

Wish I were a Butterfly
************************
ربنا يخليكي على اهتمامك وعلى فكرة انا كنت بفتح البلوج كل يوم لانه عزيز عليا وزواره كمان عزاز عليا جدا

تحياتي وربنا يكرمك ويوفقك