Saturday, September 8, 2007

وحوي ياوحوي


وحوي ياوحوي اليوحا
مليش دعوة انا عايزة فانوس ياعالم محدش معبرني ليه
اروح لبابا.... اقولوا بابا عايزة فانوس
بابا يرد يقول .. فانوس ايه اللي بتتكلمي عليه انتي اتسخطتي
عاااااااااااااااااااااااااااااااااا
طيب اروح فين ولا اجي منين ياربي عايزة فانوس ياعالم ويكون بيقول وحوي ياوحوي
وحوي ياوحوي اليوحا
*************************************
اتوبيس هيئة النقل العام قبل رمضان
الست ام احمد قاعدة في الكرسي وماسكة سندوتش طعمية في ايديها ... خلاص يابو احمد كلها ثلاث ايام ونصوم

ابو احمد ينظر اليها باشمئزاز ... ياستي متفكريش في الصيام ايام وهتعدي امال انا هعمل ايه بس اللي مش هشرب سجاير هقضي يومي ازاي


أم احمد.. ياسيدي متفكرش اهوه شهر ويعدي
جاحة واحدة اقولها لهم .. عليكم ان تتذكرو ان شهر رمضان اوله رحمة واوسطه مغفرة واخره عتق من النار
اللهم اعتق رقبتنا من النار وتقبله منا يارحم الراحمين

وحوي ياوحوي اليوحا
*************************************
تعالو نشوف بقى ميدوالروش ومحروسة الروشة واستعدادهم لرمضان
محروسة: كل سنة وانت طيب ياميدو
ميدو: وانتي طيبة ياحياتي
محروسة: بلاش حياتي دي احنا في رمضان
ميدو: اه صحيح انما ايه الطرحة اللي على راسك دي انتي اتحجبتي
محروسة: طبعا لازم عشان رمضان
ميدو: طب ويعني الطرحة دي مينفعش تطلع قدام شوية وتغطي شعرك
محروسة: اووووووووو هي اتزحلقت معلش ياميدو زي ما انت عارف انا شعري حرير وبينزل لوحدو
ميدو: ياسلام .. طيب خليكي جمب التليفون هكلمك انهرده بالليل
محروسة: ايييييه..... كلام وتليفونات في رمضان لاياميدو لازم نساعد بعض على الطاعة وكفاية تديني ميسد
ميدو: ماشاء الله عيني عليكي باردة ده انتي اتغيرتي خالص
محروسة: ولسه كمان هروح اصلي القيام مع اختي ناني في المسجد
ميدو: مش معقول
محروسة: وانت كمان صلي قيام وتراويح متنساش
ميدو: متخفيش انا بفضل سهران قدام التليفزيون عشان منمش والاغاني بتصحصحني تمام
محروسة: طيب ياميدو .. متنساش بقى معادنا مع الشلة اول يوم العيد
ميدو: لاطبعا ده احنا بنحضرلوا من دلوقتي
محروسة: رمضان كريم ياميدو
ميدو: الله اكرم يامحروسة
مش هقدر اقول غير ربنا يهدي امثال ميدو ومحروسة
وحوي ياوحوي اليوحا
**********************************
الطفل البرئ محمود ذات الثلاثة اعوام
هتصوم ياحودة... اه
لحد امتى... لحد امبارح
امبارح ازاي ياحودة ده شهر رمضان لازم تصوم من الفجر لحد المغرب... اه اه انا صايم اصلا
اااااااااااااااااه صايم مش تقول كده ياراجل طيب الحق انا بقى اضربلك مدفع الافطار
وحوي ياوحوي اليوحا
******************************

كل سنة وانتم طيبين
رمضان كريم
ياريت نركز كلنا ومتنسوش صلاة الفجر جماعة والتراويح
اللهم بلغنا رمضان وانت راض عنا
انه الشهر الذي أوله رحمة واوسطه مغفرة واخره عتق من النار

23 comments:

قلوب حائرة said...

كل سنة وانتي طيبة يا تؤام الروح ويامنية النفس واعام القادم ان شاء الله تكوني مع النص الحلو يارب ويعود علينا الايام بخير واكون انا بقى يااااااااااااااااارب في بيتي ازاي مش عارفة بس ربنا يفرجها ويارب يبلغنا رمضان وهوراضي عنا يااااااارب

O S A M A said...

كل سنه وانتى طيبه

اللهم بارك لنا في شعبان وبلغنا رمضان

البوست جميل

تحياتى

ولــــــــــو said...

كل سنه وانتم الى الله اقرب
و حوده دمه خرافه
مش معقول
وبعدين من اي كهربائي تقدري تجيبي اعلى فانوس ف مصر
ربنا يخليلنا الصين ولو مش معاكي اسلفك
تحياتي

Ahmed Mubarak said...

ايةدة مش انا الوحيد الي عايز فنوس
:D
كل سنة وانتي طيبه

أُكتب بالرصاص said...

كل عام وانت بخير

وماتنسيس القطايف والكنافة

رمضان كريم بقا

أيامنا الحلوة said...

قلوب حائرة
$$$$$$$$$
ربنا يخليكي ياقمر ويارب يحققلك كل ما تتمني
تحياتي

اسامة
$$$$$
وانت طيب اللهم بلغنا شهر رمضان
تحياتي

ولو
$$$$
وانت طيب رمضان كريم ... وعلى فكرة انا ممكن اديك حودة لفة وانت اللي هترجعهولي تاني في سرعة البرق ههههه
وبالنسبة للفانوس معنديش مانع تجبلي فانوس هدية وتسبهولي على باب المدونة
تحياتي

احمد مبروك
$$$$$$$$
انت كمان عايز فانوس ومحدش راضي يجبلك ياااااه دي الدنيا طلعت مليانة مشاكل ياناش الللي يشوف بلوة غيرو تهون عليه بلوتو احنا لازم نعمل مظاهرة اسمها الفوانيس للجميع صغار وكبار

تحياتي

اكتب بالرصاص
$$$$$$$$$$$$$
وانت بالصحة والسلامة ... الكنافة والقطايف متحضرين من دلوقتي مستنين رمضان يهل بس

تحياتي

shahy said...

كل رمضان وانتي طيبة يا فقرية قصدي يا برنسيسة

دمك شربات يا بت ياشيري

فانوس اية يا هانم اللي بيقول وحوي يا وحوي مفيش الكلام دة خلاص انتي خليكي في الفانوس ابو شمعة دة اذا ماكانش راحت علية هو كمان

تحياتي وابقي افتكريني بالدعاء

3abdo me7tas said...

وحى يا وحى

ازيك واخبالاك وكل سنه وانتى طيبه

بالنسبة للفانوس انا عمرى ما انا الفانوس بتاعى وانا صغير ابو شمعه ده كان جامد والله وكنت بحب امشى بيه فى الضلمة عشان ينورى واحس انه معايا

اما بالنسبة لام وابو احمد ممكن نقولهم
حبيبي يا ابو أحمد

اما ميدو ومحروسه نقولهم
حبيبي يا اسمريكا
حبيبي حرام عليكا

أما بقى للواد العصل حوده
نقوله يا رب يخليه لباباه ومامته

فيه حاجه أخيره عايز أقولها

انا عايز اعرف مين اللى قال ان رمضان اوله رحمه واوسطه مغفرة وآخره عتق من النار
انا عايز اقول ان الحديث ده ضعيييييف جدا
لان رحمه ربنا موجوده فى كل وقت ومغفرة ربنا موجوده فى كل وقت حتى العتق من النار موجود فى كل وقت
انا سمعت ان الحديث ده ضعيف من محاضرة كنت حضرتها مع شيخ وانا واثق من معلومته

جزامى الله كل خير
وبلغنا رمضان بخير باذن الله
ربنا يكرمك يا رب

Doba said...

ههههههههههههههههه
انا برده هصوم لحد امبارح

جميل البوست قوى - وعند اكبر فانوس بس من اللى يكون معدن ونحطلك فيه شمعة كمان ويقول وحوى يا وحوى اليوحااا

ربنا يخليكو ليا انتى وهبة وشاهى واصدقاء المدونات كلهم

كل سنة وانتو طيبين ورمضان كريم وليكى على خدك احلى بوسة من يوسف وعلى فكرة هخليه هو اللى يديهولك بس ابقى لاعبيه معاكى ليقطعك

تحياتى وسلامى يا احلى ايام
هبة

أيامنا الحلوة said...

شاهي
$$$$
كل سنة وانتي فانوس ... لا اقصد كل سنة وانتي طيبة ياقمر ويارب دايما منوراني في ايامي
وبعدين ياشوشو انا عايزة فانوس ابو شمعة ده قدم اوي وحوي ياوحوي موضة السنة دي ولو قدم هو كمان هطلعو انا موضة جديدة
وطبعا ان شاء الله مش هنساكي في الدعاء انتي كمان اوعي تنسيني
تحياتي


3abdo me7tas
$$$$$$$$$$$$
منورنا ... كل سنة وانت طيب وياريت تبعتلي الفانوس بتاعك وانت صغير تاخد عليا ثواب

وبالنسبة للحديث الضعيف ... طبعا رحمه ربنا موجودة في كل الشهور بس شهر رمضان حاجة تانية العبد بيتقرب من ربه اكتر وفي ناس كتيرة بتوب وبيغير مجرى حياه البعض فيما بعد

روى الحديث سلمان الفارسي رضي الله عنه قال: ( خطبنا رسول الله صلى الله عليه وسلم في آخر يوم من شعبان فقال : أيها الناس قد أظلكم شهر عظيم مبارك ، شهر فيه ليلة خير من ألف شهر ، جعل الله صيامه فريضة ، وقيام ليله تطوعاً ، من تقرب فيه بخصلة من الخير كان كمن أدى فريضة فيما سواه ومن أدى فيه فريضة كان كمن أدّى سبعين فريضة فيما سواه ، وهو شهر أوله رحمة وأوسطه مغفرة ، وآخره عتق من النار ... الحديث أخرجه الإمام ابن خزيمة في صحيحه ، والبيهقي والطبراني .. وقد ضعفه المحدثون

تحياتي وربنا يبلغنا رمضان

دوبا
$$$$
الجميلة ام يوسف كل سنة ويوسف فانوس بردو

جبتي للواد الفانوس ولا ضحكتي عليه انا هعرف كل سنة وانتي وزوجك وابنك طيبين

وابقى صومي بقى مع حودة لحد امبارح ياستي انا مش هقدر انا اخري لحد المغرب بس
وربنا يكرمك يوخليكي لكل اصدقائك المدوننين والى الله اقرب وبوسة كبيرة ليوسف وربنا يحميه ويحفظهولك

تحياتي

Anonymous said...

كل سنة وأنت بخير وطيبة وصديقتي وحبيتي ........... البوست جميل أوي وأسلوبك الرائع في الكتابتك ........ اللهم بلغنا رمضان وأنت راضي عنا


بحبك في الله داليا

Anonymous said...

انتختي شيرين..
تحية إيمانية رمضانية وبعد

لن أقول لكي كل عام وأنتي فانوس .. ولكن كل عام وأنتي أمة الله التقية النقية المتألقة في سماء الطائعين

أحبك في الله

أميرة

The Groom said...


على فكرة الشهر اللي أوله رحمة وأوسطه مغفرة وأخره عتق من النار كلام جميل بس الحديث ده تقريبا ضعيف

عموما

كل عام وانت وكل الامة بخير وكل اخواني في الله

ادعولنا معاكم كتير قوي

وتحياتي لك من ماناساس البلد

rana 3amra said...

انا بقى جبت فانووووووس صغير كدة و عثل وبشمعه كمان طول عمرى كان نفسى ف واحد

كل سنة وانتى طيبة بقى :)

ايامنا الحلوة said...

داليا
******
وانتي طيبة ياجميل ... ربنا يكرمك ويتقبل منك يارب

تحياتي

اميرة
****
انتختي الغالية كل عام وانتي الى الله اقرب والى المعاصي ابعد

وكل سنة وانتي فانوس يامرمر
تحياتي

جروووووم
$$$$$$$$
كل سنة وانت طيب ويعود عليك الايام

ومتنساش عليك بالدعاء اوي

تحياتي


rana 3amra
&&&&&&&&&&
ايه الذل ده طب راحي شعور اختك وهاتيلي فانوس وارميه صدقة جاية على باب المدونة ..هههههه
كل سنة وانتي طيبة ويعود علينا وعليكي الايام بخير يارب

تحياتي

الكلام نوعان :كلام فارغ وكلام مليان كلام فارغ said...

وانا كمان عايزه فانوس
عااااااااااااااااا
تعالى نمسك ايدينا في ايد بعض وننادي باعلى صوت
عايزين فانوس يا عااااااااااااااااااالم
رمضان كريم
اهىء
من غير فانوس

The Groom said...


بدعيلك والله بس الظاهر انك نسيتيني خالص

تحياتي لك من ماناساس البلد

sendbad said...

رمضان كريم
كل سنة وانتي طيبة

أيامنا الحلوة said...

الكلام نوعان
$$$$$$$$$$$
رمضان كريم معلش بقى هنعمل ايه يابنتي دي ضريبة الكبر لو كنا لسه صغيريين كان الفانوس جالنا لحد عندنا بس يلا بقى معلش
اهئ اهئ كل سنة وانتي طيبة من غير فانوس
تحياتي

جروووم
$$$$$
ربنا يكرمك يارب وبعدين انا مش نسياك انا بدخل مدونتك وبعض المدونين بس معلش ياجروم واللهي الوقت مش بيكفي اني اعلق لاني ببقى في شغلي

تحياتي ودايما يارب كده منورني في ايامنا الحلوة وربنا يوفقك لما يحبه ويرضاه

تحياتي

سندباد
$$$$$$
والله انا عارفة اني مقصرة معاك
اعذرني

وكل سنة وانت طيب رمضان كريم
تحياتي

طهقان said...

ياستي تعيشي وتفتكري

وكل عام وانت بخير

أشوفك عروسة قادر يا كريم




شفتي الدعوة الحلوة دي بقا ؟

sendbad said...

كل سنة وانتي طيبة ورمضان كريم
جميل اوي البوست
دايما دمك خفيف

أيامنا الحلوة said...

طهقان
$$$$$
فينك من زمان كل سنة وانت طيب وطهقانة مراتك طيبة

ادي الدعاوي ولا بلاش ايون كده عايزاك تفضل تدعي طول شهر رمضان

تحياتي ومتغبش علينا

سندباد
$$$$$$
ربنا يكرمك يارب ويسعد ايامك
تحياتي وكل سنة وانت طيب

Eman Rashad said...

ههههههههههه
كل عام و الجميع بخير
انا بقى جالى فانوس متأكده انكم مش عندكم زيه
علشان كبييييير جدااا
بس للاسف مينفعشى يتلعب بيه
كل سنه و الجميع بخييييير
ادعوكم لزيارة مدونه
وحوى يا وحوى عن شهر رمضان
http://wahawyyawahawy.blogspot.com/