Thursday, July 12, 2007

المية والهوا

شاطئ عجيبة سبحان الخالق



بحب اثنين سوا ياهنايا بحبهم
المية والهوا


ياهناية بحبهم

اه ياسلام عليكي ياليلي يامراد نشلتي على المكان المظبوط وانا اقول ايه اللي يخلي حسين صدقي يحبك كده اتاري المية والهواء اللي في مرسى مطروح هما السبب.. وبيني وبينكم قعدت ادور على الصخرة اللي غنت عليها ليلي مراد وملقتهاش .. فضلت اتتبع خطوات ليلي اللي لسه محفورة في شاطئ الغرام طلعت خطوات المصيفيين للاسف مش خطوات ليلي يلا بقى مليش نصيب اشوف الصخرة اظاهر اتهددت بعد ليلى وحسين


من غير كتر كلام انتو وحشتوني بجد الاسبوع اللي فات ده وانا مش بدخل النت خالص ومش برد على التعليقات بتاعتكم ... معلش اعذروني لاني كنت عند المية والهوا ولسه واصلة لارض الوطن انهرده

بصراحة وانا رايحة مرسى مطروح كنت رايحة من اجل الاستجمام فقط والنووووووووووم وبس يعني قلت ابدا عمري عمري ما هنزل المية... ولكن بما اني شخصية مرهفة المشاعر والاحاسيس شفت المية من هنا ومقدرتش امسك نفسي وهوب ونزلت البحر .. وطبعا مش عايزة اقولك اني بقيت بكاكا دسا اسبوع بقى منقوعة في المية وعليكم ان تتخيلو.. يلا الحمد لله فيراند لفلي يحل الموضوع


طبعا الشاب الوديع ده محمود أخويا




محمود ده طفل برئ اي واللهي برئ عمرو ثلاث سنوات لحد دلوقتي موهوم اننا لسه في مرسى مطروح وهنروح البحر وهينزل يعوم بالعوامة بتعتوا ...




وبما ان الشهرة حلوة قررت انزلكم صورة انا فيها انا اللي قاعدة تحت الشمسية الحمرا اللي هناااااااااااااااك دي

12 comments:

Alaa said...

ربنا يخليلكم الشاب الوديع ويحفظكم لبعض
آمين

ولــــــــــو said...

حمدالله على السلامه
عايزينك تعوضي الغيبه الطويله دي والمدونه تتملي بوستات

rana 3amra said...

يااااااااه ليلى مراد الجامدة
وانا صغيرة صورونى على الصخرة وانا قاعدة ومربعة كمان يعنى حاجة مش رومانسية بالمرة

عسول اوى اخوكى

بس قوليلى بقى منين اتاكد ان انتى اللى قاعدة تحت السمسية الحمرا اللى هنااااااااااااااك

Anonymous said...

وحشتيني ياقمر
حمدلله علي سلامتك و كويس انك غيرتي جو
يالا بقه ارجعلنا بخمسين الف بوست وحشتينا اوي

Anonymous said...

يااااااااااه يا شوشو معرفش ان بعدك هيفرق معايا كده الحمد لله انك رجعتيلي في الوقت المناسب وحشاني قوووووووووووووووووووي والله وحشتيني قوي ياغالية معرفش انك ليكي الغلاوووووووة دي كلها وعقبال يارب ياروح قلبي ما تقضي مصيك العام القادم بأذن الله مع من يستحق هذه الدرة الغالية تحياتي ليكي ولحودة ولهدير ولطنط وانا وانتي ومحيط

Anonymous said...

شيرين_أيامنا الحلوة

علاء
$$$$
منور يابشمهندس .... يااااااارب يسمع منك ويخليلنا الشاب الوديع ويطرح فيه البركة وربنا يجعلو من الذرية الصالحة قول امييييييييين

ولو
$$$
الله يكرمك يارب ويسلمك ان شاء الله اغصر دماغي من مية البحر كده وانزل بوستات كتبر دعوتك بقى


rana 3amra
$$$$$$$$$$
فين ياستي الصخرة دي بس ده انا قعدت الف عليها ملقتهاش كان نفسي اشوفها اهئ اهئ يلا بقى السنة اللي جاية تبعتيلي الخريطة بتاعت مرسى مطروح وتشاوريلي على الصخرة
وبعدين انا اللي تحت السمسية الحمرا صدقيني وعشان اسهلهالك السمسية رقم انثني من ناحية اليمين بس متقوليش لحد

تحياتي ونورتني المدنة اتمنى التكرار

اجندة حمرا
$$$$$$$$$
الله يخليكي انتو كمان وحشتوني اكتر وان شاء الله نعصر الدماغ وننزل بوستات دعواتك بقى

قلوب حائرة
$$$$$$$$$$
وحشتيني بجد واللهي كلها ساعتين واشوفك وجها لوجه ومش عايزة اسيح بقى واقول اني جبتلك معايا لب ابيض وبسبوسة وهريسة عشان متقوليش اني بفضح الدنيا يعني او بذلك لاسمح الله

وحلو اوي السلام المربع ده للعيلة بتاعتي ومحيط كمان يادي الفضايح ههههه

تحياتي ياقمر

ابو العربى said...

يارب تكون رحله حلوة وتكونى استمتعتى بيها واوعدنا يارب
وبالنسبه ان احنا اول مره نشوف صورتك وانت تحت الشمسيه الحمرا ياريت متتصوريش تانى وانتى لونك غامق كده لفلى وظبطى بشرتك وبعدين اتصورى

تحياتى

Anonymous said...

ضد الظلم
$$$$$$$$
الحمد لله كانت رحلة سعيدة عقبال عندك يارب
ودعواتك بقى اديني عماله اديها فير اند لفلي وامثالة على الله يجيب نتبجة بس ايه رايك بذمتك في صورتي ههه

تحياتي

إبـراهيم ... said...

يا أيامك يا ستي /،،،، عيني عليكي باااردة ثـلج !!! ، أنا محصلتش ف الصيف لغاية دلوقتي إلا يومين ، خطفتهم خطف ، ادعي لي أخطف لي يومين كماااااان !!!


منورة يا بكاكا دسـا :)

أُكتب بالرصاص said...

والله واشتهرتي ودخلنا التاريخ
وطلعتي في صورة تحت الشمسية

الحمد لله على سلامتك
وعقبال مارينا

Anonymous said...

ابراهيم ... معايا
$$$$$$$$$$$$$$$$$
كان عندنا كتكوت وكبر .... وياسيدي مصيف يومين مش وحشين يعني احمد ربنا ايه الافترى ده بس ياعاااالم
تحياتي وطبعا بكاكا داسا منورة

اكتب بالرصاص
$$$$$$$$$$$$$
ايه بس الغيبة الطويلة دي كنت فين ...
حمد لله على سلامتك ومتغبش كتير كده علينا
تحياتي

الشينيور said...

و أنا كنت فى البلكونا شوفت ولد بتاع الروبابيكيا راكب عربيه حمار فجأه جت عربيت بوليس فضربو وأبضو عليه



عاب على البوليس كده