مزاد علني بمدونتي

خير اللهم اجعلو خير كنت نايمه في امان الله وبحلم (الحلم العربي) عارفينو طبعا الحلم ده ماعلينا ...
ليقت باب المدونة عمال يترزع ويتهبد قومت اتنطرت من مكاني في ايه زلزال زلزال لا مش زلزال ده اكيد الاسرائيليين عرفوا اني كنت بحلم بالحلم العربي طيب اعمل ايه افتح ولا اعمل ايه قولت ولايهمني هما كمان هيحسبونا على الحلم .... قومت فتحت الباب لقيت ناس كتيييييييير بس الحمد لله مطلعوش اللي في بالي قولتلهم خير ياجماعة انتو تقريبا غلطانين في العنوان

قالو لاء ابو العربي قال هنا في مدونة ايامنا الحلوة .... ابو العربي قالكم تجولي قالولي اه يلا خلصينا وقوليلنا سعر الشقة اللي على سطح القمر عايزين نتف ... يععععععععع تتفو وجاين تتفولي هنا ولا ايه لاحول ولاقوة الا بالله استهدو كده بالله قمر ايه وبتاع ايه ياجماعة بس هو انا لسه نايمة ولا ايه ... الاقي واحد تاني يقول

قوليلي من فضلك المواصلات لسطح القمر سهلة ولا صعبة ارجوكي متخبيش عليا لان انا شغلي في ستة اكتوبر وخايف اشتريها تكون بعيدة عن شغلي واتبهدل كل يوم ... يالهوووووووووووي ايه اللي بتقولوه ده ياجماعة ... وبعدين الاقي واحد تاني يقولي هيه فعلا الشقة بتطل على قصر الرئاسة يعني لما اجي اتف التفة هتوصل مباشرة للقصر ... يادي النيلة .... وبعدين واحد ثالث يقولي طب قوليلي من فضلك التنين اخرو كام .. يالهوووووووووي تنين ..... من فضلك خلصيني انا الاول انا هدفع كاش ..............
وووووووووووووووووووووووو

بسسسسسسسسسسسسسسسسسسسسسسسسسسس........ شط اب مش عايزة اسمع صوت حد ولانفس في اايه...

قولت مبدهاش رحت قولتلهم استنو هنا وجريت على مدونة ابو العربي ملقتوش موجود بس ليقتو كاتب بوست بيبيع فيه ممتلكاته وكاتب للناس يجوا مدونتي للاستفسار والاستعلام

اتاري ياحضرات المدونين ان السيد ابو العربي افتقر بعد رفضه حضور مؤتمر أنابوليس عشان كده قرر البيع .. مع انو لو كان خد بنصحتي من الاول كنت اقولوا يحضر وكان هياكل ويشرب ويتصور ويتفسح على حس المؤتمر ويقول اللي في نفسو كمان بس تقولوا ايه بقى في حماسة شباب اليومين دول تهور ....

يعني فيها ايه لو كان راح حضر المؤتمر وكان حرق دم ليفني زي ما عمل بتاع السعودية ومسلمش عليها
او كان بص لاولمرت من تحت لتحت كده
او كان مسك بوش من قفاه وعلقوا في افتتاحية المؤتمر ويخليه عبره لكل واحد يطرح مبادرة للتفاوض ارض على فلسطين

ولا كان مسك الوفد اللبناني وهزقهم وقالهم عيب عليكم تيجو لحد هنا وسايبين بلدكم كده لحد دلوقتي من غير رئيس

عارفين لو كان راح وقال اللي في نفسو في وش بوش واتباعه كانوا الغرب هيحترموه واحتمال يدولو البيت الابيض هدية ومكنش بقى ده حالو اهوه عمال يبيع في حتة البيت اللي عندو على سطح القمر .. وحتة التنين اللي طلع بيه من الدنيا

الخلاصة ياحضرات المدونين البيت اللي بيطل على القصر الرئاسي محجوز عليه من الرئاسة نفسها ومتشمع بالشمع الاحمر وباقي الممتلكات معروضة في نفق تحت الارض بين الحدود الفلسطينية الاسرائيلية ....

بس سؤال تفتكرو لو كان ابو العربي راح المؤتمر كان هيرجع من هناك اصلا بعد مايقول اللي في نفسو؟!!!


زرونا تجدو مايسركم.. أيامنا الحلوة

حسبنا الله ونعم الوكيل

أولا حسبي الله ونعم الوكيل

وثانيا حسبي الله ونعم الوكيل

وثالثا حسبي الله ونعم الوكيل بردو

اما رابعا اقولكم ليه انا بقول حسبنا الله ونعم الوكيل

رحت اشتري فاكهة من اكبر فكهاني فيكي يامنطقة

وقولتلوا لو سمحت ثلاثة كيلو موز

حاضر ياابلة

يحضرلك الخير ياخويا

وزنلي الموز وعيني على الكيس مغفلتش

وخدت الموز بكل ثقة واديتو اللي فيه النصيب

وروحت البيت

وبكل عنطظة دخلت من باب شقتنا اسمعوا وعووووووووووو .. هاتو كاميرا وصوروا هذه اللحظة التاريجية

انا جبتلكم فاكهة دفعت فيها دم قلبي

وياريت وانتو بتاكلو تدعولي

وتفتكروني دايما بالخير

ومتفتكروش انها اول ولا اخر مرة لا انا هجبلكم كده كل شهر

انا لازم ابركم ايون انا سمعت درس بيقول ان المفروض تدخل السرور على اهل بيتك قولت خلاص مفيش مفر لازم ارم بعظمكم شايفاكم هفتانين اليومين دول

اخويا .. بس بس ايه الفضايح اللي انتي عملاها دي

ايه طلعت منك انت ياخويا

لا بس خلاص مكنوش كام كيلو فاكهة يعني

لا يااستاذ دي مش اي فاكهة بص وشوف

يعععععععععععععععععععععععع اووووووووووووووووووووووووف اعععععععععععععععععععععععععع

لقد احمررت خجلا وابتللت كسوفا

ايه ده موز ده ولا عصير قصب حمضان

يالهووووي لالالالالالالالا مش ده الموز اللي انا اشتريتو

ده الراجل وازن قدامي موز زي الفل بيلعلط كده ازاي افتح الشنطة الاقي المنظر المروع ده

اتاري ان الفكهاني ياحضرات المدونين غير كيس الموز اللي بيلعلط واداني كيس موز لو البط والفراخ شافوه هيغمى عليهم منو

وتلك هي الحكاية

مش عارفة ازاي غير كيس الفاكهة اصلا وازاي في ناس تقبل على نفسها كده تدخل فلوس حرام على اولادها على العموم خذوا حذركم وقد اعذر من أنذر كل واحد يشتري فاكهة يبص في الكيس كويس قبل ما يخدوا انا بقى عن نفسي عمري ما هقرب لاي فاكهانية تاني

مش بقولكم أيامنا حلوة

يلا كلو معايا حسبنا الله ونعم الوكيل

يوم في حياتي

سكوووووت هنصوت ده من كتر فرحتنا وأيامنا حلوة طبعا واحنا مع قلوب حائرة الي بتجمع المدونيني الحلوين ومنهم دوبا اللي دايما مكانها في القلب وكلنا اتجمعنا كده على البركة عند مفيش حاجة
بالحب اتجمعنا والدنيا هتسمعنا... تم امس السبت بحمد الله لقاء بلوجرزي تحفة بجد حيث تم اقتحام منزل شاهي وزوجها ابو الدراويش اللي قال يافكيك اول ما شاف الاقتحام النسائي البلوجرزي اللي حصل في بيتو وخصوصا السطو المسلح لشرفة منزله راح خدها من قصيرها وخد شنطة هدوموا اقصد شنطة العمل وسابلنا البيت وطفش وراح قعد على كوفي شوب والله ياباو الدراويش صعبت علينا وبجد انت راجل ذوق جداااااا ربنا يكرمك وبنعتذر على الاحتلال اللي حصل لبيتك لمدة خمس ساعات تقريبا.. واحمد ربنا اننا مطولناش عن كده لان بصراحة محسناش بالوقت خالص وكان نفسنا نبات عشان يبقى احتلال بحق وحقيقي

البلكونة اللي تم اقتحامها

اعزائي المدونيين بالرغم من بدء محادثات سرت في طرابلس لحل أزمة دارفور وبالرغم من بدء أشرس واخطر معركة انتخابية في نقابة الصحفيين .. ده غير مشكلة لبنان وسوريا والصومال واللذي منو تركتهم كلهم والقتهم وراء ظهري وقررنا نحن ايامنا الحلوة اخذ يوم اجازة من عملي من اجل الانضمام الى شلة من البلوجرز ... وبالحب اتجمعنا عند شاهي اللي داخت معانا واكلتنا ما لذا وطاب من الحلويات والمشروبات بالاضافة الى حمص شام بس مشربنهوش لانها نسيت

يوم في حياتي عمري ماهنساه لانو فعلا كان يوم تحفة اتمنى يتعاد تاني ابتدبنا اليوم لما قابلنا اوشا اللي في القلب والعقل والروح كمان بجد لو قعد اقول عنها كلام للصبح مش هوفيها حقها ربنا يكرمك يااوشا يارب ودايما صحبتنا تفضل لاخر العمررحنا بعربية اوشا وابنها ادم كان معانا تعب من المشوار ونام مننا في الطريق كتر الف خيروا استحمل كتير الراجل بردوا

ادم مقدرش يقاوم ونام مننا في الطريق

وفي طريقنا لـ6 أكتوبر حيث تطقن شاهي وزوجها ابو الدراويش خدنا مها سكوت هنصوت وقعدنا نلف ونلف ونلف على بيت شاهي وابو الدراويش يالهووووي فين البيت البيوت كلها شبه بعض ياجدعان وشاهي الغلبانة ياعيني عمالة تتصل بينا
ها وصلتو لحد فين واحنا لانعلم من اين اتينا ومن اين ذهبنا وكيف وصلنا ولماذا توهنا

طريق مجهول مجهول ياولدي 6أكتوبر احلى مدينة واللهي

راح ابو الدراويش وشاهي هووب ركبو عربيتهم وياعيني فضلو يلفوا يدوروا علينا لحد ما لقينا بعض وراحنا لبيت شاهي اقتحاااااااااااااام واحتلالالالالالالالالالالالال وسيطرة كاملة على البيت
الله اكبر الله اكبر انطلقوا يافتايات البلوجرز

طبعا احنا غير فرحتنا اننا مع بعض احنا فرحنين اننا لقينا حد يفطرنا هنااااااااااااكل
شاهي بصراحة ياجماعة ست بيت ممتازة ممتازة والله مش مجاملة زوجة بمعني الكلمة ربنا يخليهالك يابو الدراويش

جاءت شاهي بصينة فيها جرادل شاي بلبن وطبق ملئي بالكعك والبسكوت عمايل شاهي الاستاذه ماشاء الله عليها بجد تسلم ايديها اوشا اقترحت عليها تعمل كحك وبسكويت وتبيعوا وقالتلها انها هتكسب كتير من المشروع ده واللهي ياشاهي فكرة وانا ممكن اشترك معاكي واعجنلك العجينة بدل نورة البوابة اهوه بدل مشروع عربية الكبدة اللي كنت ناوية اعملو

بيتي فور جاهز انضم لصواني شاهي الشهية

المهم نزلنا حتتكك بتتك على الشاي باللبن والبسكويت والكحك ده غير علبة البيتي فور وهاتك يااكل وبيني وبينكم هما بقوا يتكلموا وانا اكل اصلي بصراحة اما بكل بيبقي كل تركيزي في الاكل هو انا هفتح بقي لاعز من الاكل الكلام جاي جاي مش كده ولا ايه

ده الاكل بس كنا خلصنا على الاطباق عالم جعانة

وبعد ما كلنا قومنا صلينا الظهر جماعة احلي حاجة اننا نتجمع وننبسط على طاعة ربنا من غير اي معاصي وقامت قلوب حائرة بينا الصلاة

وبعد الصلاة مسكتنا بقى دوبا وقعدت في النص كينج ياخواتي وفصصت واحدة واحدة من برجها وقالت عليا اني برج الاسد لوام وقماص الله يسامحك يادوبا هعديهالك عشان يوسف حبيبي اللي مكنش معبرني

يوسف ابن دوبا بيكلم حد غيري خليكو شاهدين ياناس

طبعا كل ده واحنا ماسكين في ايدينا شوب مانجو وبعدين كريم كراميل ده غير العرق سوس خلالالالالالالالاص اتنفخنا
ونيجي بقى للثورجية مها سكووووووووت هنصوت ثورجية فعلا وبنت سكره وشها بيبي فيس خالص امور .. مها معلش ياحبيبيتي انا مضطرة اقولك شئ ممكن يزعلك انتي شبه حنان ترك فعلا بس بعد عملية التجميل انا عارفة انك مش بتحبيها بس دي الحقيقة ايم سووووووووووووري
والله حنان ترك حلوة وامورة صدقيني

صحيح نسيت اقولكم ان الشنيور ابن شاهي كان هيضربني عشان طلبت ادخل على النت وسالني سؤال محرج هو انتو هتمشوا امتي وكانت الاجابة قربنا نمشي الواد اتحرج قالي لا اقعدو كمان شوية ... شنيور معلش اقتحمت جهاز الكمبيوتر بتاعك وانا عارفة انو مش من حقي ولا مكن حق شاهي ولا ابو الدراويش ذات نفسو
الجبارة بقى سلمت علينا بكل رقة واللهي عسل ال جبارة ال
والرايقة بقى فعلا رايقة بجد رقة ياخواتي طالعه لامها

فعلا يوم من احلى ايام حياتي وشاهي بجد واللهي مش مجاملة ملاك على الارض وانسانة تتحب كده من اول نظرة زي ما بيقولوا شاهي احبك في الله انتي واوشا ودوبا ومها وطبعا قلوب حائرة
دي تؤامي
وعايزة اقول لابو الدراويش بجد يابختك بزوجتك ربنا يخليكم لبعض ويبارك فيكم

واقول لاوشا فعلا قلبك جميل ويساعي من الحبايب بجد انتي انسانة رائعة وتتحبي بسرعة اوووي ربنا يكرمك

دوبا بقى السكرة بتاعتنا دي ليها مكانها كبيرة ويوسف ابنها ده حبيبي ربنا يخليهولها يااااااارب

مها سكوت هنصوت سعدت بمعرفتك اووي وكفاية تلقائيتك

وده يوم من ايامي الحلوة

لبس البوصة تبقى عروسة

جدتي اعظم عظمات الستات نفسها تفرح ببنات ولادها وطول ما هي قاعدة تدعي ربنا وتقول يارب طول في عمري لحد ما اشوف بنات ولادي في الكوشة وامسك بايدي طرحة فرحهم

............
ياحلوة حلوة
نعم ياتيته
انتي يابنتي مش بتردي عليا ليه
ما برد اهوه ياتيته
رديتي بعد عذاب بعد ما نبحتي صوتي
لا ياتيته ياحبيبتي انتي ندهتي مرتين بس وانا رديت علطول
انتي بتكدبيني ياحلوة
لاياتيه معلش حقك عليا انا اسفه
طب يلا روحي بقى
طيب كنتي عايزة ايه
نسيت هو انا مخي دفتر

ياحلوة ياحلوة
نعم ياتيته
انتي يابنتي ارحميني ده انا ست عجوزة ومش حمل نبح الصوت ده
معلش ياتيته عايزة ايه ياحبيبتي
بقى انا يابنتي نفسي افرح بيكي بقى ده اعز الولد ولد الولد
ربنا يديكي طولة العمر وتفرحي
عايزاكي تتزوقي كده وتتغندري وانتي رايحة فرح بكابوزا جارتنا
ايييييييييييه بكابوزا .. هي بكابوزا هتتجوز ياتيته
امال ايه ياخيبة ياذات الاربعة والعشرون عاما .... .... بكابوزا عندها 16 سنة وهتتجوز وانتي لسه قاعدة في أرابيز امك كده
ايه ياتيته ده انا لسه صغيرة
صغيرة ايه انتي هتضحكي على نفسك ده انا يوم ما اتجوزت كان عمري 12 سنة وامك دي انا مجوزاها 17 سنة وانتي لسه قعدالنا خيبة ايه دي بس
طيب عايزاني اعمل ايه
يابت لبس البوصة تبقى عروسة وانتي قمر بس محتاجة حبة صيانة
ايه ياتيته ده انا احتج
تحتجي ده ايه اتنيلي واتوكسي وروحي الطعيلك حبة احمر وحبة اخضر كده على وشك بدل ما انتي شبه هتلر كده
ايه ياتيته ده انتي لسه فاكره هتلر
هيهيهيهي... امال طبعا فكراه ليت الزمان يعود يوما
طيب بس انا مش بحب احط ميكياج ياتيته شوفيلي حل تاني
لاتاني ولا اولاني ابقى روحي للمزين يحطلك مكياج ولا اقولك نادي اي واحدة من اصحابك الفاقدين دول يدهنولك وشك قصدي يمكيجوكي

عاااااااااااااااااااااااااا يعني هو انا وحشة كده يعني
لا ياخيبة العيب مش فيكي العيب في الدنيا
روحي كده هاتيلك كام طقم يزغللوا عيون الشباب
يابت اسمعي كلامي انا مدوباهم اثنين لبس البوصة تبقى عروسة

طيب بس بلاش حكاية لبس البوصة دي انا مش بوصة ياتيته انا زي الفل اهوه
طبعا طبعا بس اعملي اللي بقولك عليه

بكابوزا في الكوشة....

الف الف مبروك يابكابوزا ياحبيبتي
الله يبارك فيكي ياابلة عقبالك بقى ياابلة
ابللللللللللللللللة.. ابلة ده ايه ... ما علينا انتي عروسة ومش عايزة اشوهك

ام بكابوزا ... اهلا ياحلوة ازيك ياحبيبتي انتي ايه حكايتك مش ناوي تفرحينا بيكي بقى ولا ايه ياشيخة
لا ناوية ان شاء الله ياطنط بس لسه النصيب
لالالالا مالكيش حق دي امك عماله تحكيلي على العرسان اللي داخلة واللي خارجة وانتي اللي بترفضي
مييين ماما اه اه طبعا طبعا عرسان داخله وخارجه بس النفس بقى ياطنط
قوليلي ياحلوة هو انتي اكبر من بنتي بكابوزا باد ايه
مش عارفة ياطنط اصلي نسيت الاله الحاسبة بتاعتي واكيد المجموع هيطلع كبير ومش هعرف احسب هههه على العموم مبروك ياطنط وربنا يتم عليها بخير
الله يبارك فيكي ياحبيبتي ونصيحة مني اقبلي باي حد بقى يتقدملك العمر بيجري ياحبيبتي الحقي نفسك
طيب الحق انا بقى اجري .. اقصد الحق انا بقى تيتة عشان معاد الدواء بتاعها

الحق انزل بسرعة بقى ..... وفجاة الحلوة تلاقي قدامها واحدة من الجيران
اهلا ياحلوة
اهلا ياطنط
انتي ايه يابنتي مش ناوية تفرحينا بيكي بقى مفيش حاجة كده ولا كده
لا ياطنط ربنا يسهل دعواتك بقى
يارب يرزقك بواحد يعجب بيكي بقى بدل قعدتك جمب امك كده
طيب ياطنط سلام عليكم اصلي مستعجلة
والحلوة كل ما تنزل سلمة تلاقي حد من الجيران وكل واحدة مش بتسال غير السؤال ده ايه مش ناوية تفرحينا بيكي قريب ولا ايه ؟

يعني انا عايزة افهم في واحدة مش هتبقى ناوية تفرح وتفرح اهلها وتتجوز يعني سؤال سخيف بجد لو في فرح اكيد هيكون في اعلان والناس هتتعزم مفيش داعي للاسئلة دي زي "انتي مش بيعجيلك عرسان ولا ايه، هو انتي ليه متخطبتيش لحد دلوقتي، هو انتي لسه قاعدة ليه ده سنك كبر" وغيرها من الاسئلة ياريت نغير من نفسنا شوية عشان ايامنا تبقى فعلا حلوة
غير كده ساد اوي في مجتمعنا مفهوم ان الي لسه متخطبتس ويكون سنها عدى 25سنة يبقى مفيش عرسان بتخبط على بابها ليه منقولش النصيب مجاش او محدش من اللي بيتقدموا ليها مناسب ليها والاهم ليه بنحشر نفسنا في خصوصيات الغير كده ونقعد نشوف دي ليه اتطلقت من جوزها ودي ليه متخطبتش لحد دلوقتي..

ياريت نتغير شوية

احنا بنعيب على الدنيا وايامها والعيب فينا احنا

ايامنا حلوة

جدول أعمالك في رمضان

باختصار كده وفي السريع

اوعى تخلي شهر رمضان يمر عليك مرار الكرام كده

جدول أعمالك في رمضان يكون ازاي

انا هقولكم حجات بسيطة وسهلة تنفيذها

كل يوم تعمل حسابك في

* صدقة يعني مثلا طلع جنية واقسمو نصين او اربع تربع حتى وفرقهم على اي حد قدامك محتاج كل يوم تعمل كده

يعني اعمل حسابك مثلا على ثلاثين جنية في الشهر طلع كل يوم جنية بسيطة دي صح

*تاني حاجة الحرص على صلاة التراويح ومتفوتش يوم من غير التراويح اديني بقول اهوه

*ثالث حاجة صلة الرحم تحاولوا تصلوها ان شاء الله برسالة من موبيلك

*رابعا قراءة القرأن الكريم اوعوووووووووو تفوتوا يوم من غير قرأة القرأن ومش هوصيكم على ختموا اكثر من مرة والله المستعان

خامسا* تقوم كده من عز نومك على الساعة اثنين ولا ثلاثة وتصلي قيام ان شاء الله ركعتين بس قوم وتدعي ربنا اوووووووووي

بالاضافة طبعا لذكر الله طول الوقت سبحان الله وبحمده سحان الله العظيم

خليكم حطيبن الخمس حجات دي قدامكم كده وتذكر كل يوم هل انا عملت صدقة هل انا صليت تراويح انهرده هل انا قريت قران هل انا صلت رحمي على انا قومت في عز ما الناس نايمة وصليت قيام ودعيت ربنا

الله المستعان وربنا يتقبل منا جميعا واسألكم الدعاء

ادعو جامد اوووي ياجماعة اوعو تفوتوا رمضان

وحوي ياوحوي

وحوي ياوحوي اليوحا

مليش دعوة انا عايزة فانوس ياعالم محدش معبرني ليه

اروح لبابا.... اقولوا بابا عايزة فانوس

بابا يرد يقول .. فانوس ايه اللي بتتكلمي عليه انتي اتسخطتي

عاااااااااااااااااااااااااااااااااا

طيب اروح فين ولا اجي منين ياربي عايزة فانوس ياعالم ويكون بيقول وحوي ياوحوي

وحوي ياوحوي اليوحا

*************************************

اتوبيس هيئة النقل العام قبل رمضان

الست ام احمد قاعدة في الكرسي وماسكة سندوتش طعمية في ايديها ... خلاص يابو احمد كلها ثلاث ايام ونصوم

ابو احمد ينظر اليها باشمئزاز ... ياستي متفكريش في الصيام ايام وهتعدي امال انا هعمل ايه بس اللي مش هشرب سجاير هقضي يومي ازاي

أم احمد.. ياسيدي متفكرش اهوه شهر ويعدي

جاحة واحدة اقولها لهم .. عليكم ان تتذكرو ان شهر رمضان اوله رحمة واوسطه مغفرة واخره عتق من النار

اللهم اعتق رقبتنا من النار وتقبله منا يارحم الراحمين

وحوي ياوحوي اليوحا

*************************************

تعالو نشوف بقى ميدوالروش ومحروسة الروشة واستعدادهم لرمضان

محروسة: كل سنة وانت طيب ياميدو

ميدو: وانتي طيبة ياحياتي

محروسة: بلاش حياتي دي احنا في رمضان

ميدو: اه صحيح انما ايه الطرحة اللي على راسك دي انتي اتحجبتي

محروسة: طبعا لازم عشان رمضان

ميدو: طب ويعني الطرحة دي مينفعش تطلع قدام شوية وتغطي شعرك

محروسة: اووووووووو هي اتزحلقت معلش ياميدو زي ما انت عارف انا شعري حرير وبينزل لوحدو

ميدو: ياسلام .. طيب خليكي جمب التليفون هكلمك انهرده بالليل

محروسة: ايييييه..... كلام وتليفونات في رمضان لاياميدو لازم نساعد بعض على الطاعة وكفاية تديني ميسد

ميدو: ماشاء الله عيني عليكي باردة ده انتي اتغيرتي خالص

محروسة: ولسه كمان هروح اصلي القيام مع اختي ناني في المسجد

ميدو: مش معقول

محروسة: وانت كمان صلي قيام وتراويح متنساش

ميدو: متخفيش انا بفضل سهران قدام التليفزيون عشان منمش والاغاني بتصحصحني تمام

محروسة: طيب ياميدو .. متنساش بقى معادنا مع الشلة اول يوم العيد

ميدو: لاطبعا ده احنا بنحضرلوا من دلوقتي

محروسة: رمضان كريم ياميدو

ميدو: الله اكرم يامحروسة

مش هقدر اقول غير ربنا يهدي امثال ميدو ومحروسة

وحوي ياوحوي اليوحا

**********************************

الطفل البرئ محمود ذات الثلاثة اعوام

هتصوم ياحودة... اه

لحد امتى... لحد امبارح

امبارح ازاي ياحودة ده شهر رمضان لازم تصوم من الفجر لحد المغرب... اه اه انا صايم اصلا

اااااااااااااااااه صايم مش تقول كده ياراجل طيب الحق انا بقى اضربلك مدفع الافطار

وحوي ياوحوي اليوحا

******************************

كل سنة وانتم طيبين

رمضان كريم

ياريت نركز كلنا ومتنسوش صلاة الفجر جماعة والتراويح

اللهم بلغنا رمضان وانت راض عنا

انه الشهر الذي أوله رحمة واوسطه مغفرة واخره عتق من النار

كيف تكون شخصية جذابة

كيف تصبح شخصية جذابة

أولا المظهر :

لأن الشكل أول ما يجذب العين ، ويكون بمثابة تذكرة المرور إلى القلوب لا بد أن نضعه في أول أولوياتنا .. وأن نوليه القدر الكافي من الاهتمام ، وبطبيعة الحال أنا لا أعني هنا الخلقة فليس بمقدورنا تغييرها ، لكن أقصد الأناقة وحسن الهندام، والاهتمام بالنظافة الشخصية كالأظافر والعناية بالشكل، ويتم ذلك من خلال الاهتمام بالتناسق بين ألوان ملابسنا حتى وإن اتسمت بالبساطة .

الابتسامة:

حاول أن تبدو مبتسماً هاشاً باشاً ، فالابتسامة تعرف طريقها إلى القلب ، ولا تتعارض أبداً مع الوقار ، على العكس تماماً من الضحك .

ثانياً آداب المجالسة :

عندما تجلس مع أحد حاول بقدر الإمكان أن توليه كل اهتمامك ولا تتشاغل بالنظر إلى الأرض ، ولا تحرص على الالتصاق به، فقد يكون معك ما ينفره منك، وقلل من الحركة والالتفات فهي دليل الحمق ، وانتبه لكل حركاتك لأنك قد تغفل وتقوم ببعض العادات السيئة ، وحاول أن تجعل كل تفكيرك في حديث من يقابلك فقد يسألك عن نقطة ولا تستطيع الإجابة عليها فيأخذ ذلك على أن حديثه مملاً ولا يروق لك .

حاول عدم استخدام هاتفك المحمول بإجراء اتصالاتك أثناء اجتماعكما ، وألا تستخدمه إلا لضرورة أو للرد على اتصال بهدوء وصوت منخفض وأن يكون الرد بشكل مقتضب، ولا تمد يدك لتستخدم هاتفه إلا لضرورة وبعد استئذان.

ثالثاً آداب الحديث :

حاول أن تكون منصتاً ومستمعاً أكثر من أن تكون متحدثاً ، وفكر جيداً في صفة كلامك قبل أن تنطق به ، وانتق مفرداتك بشكل جيد ، ولا تتحدث فيما لا تفقه به أو ما لا يتوفر لديك معلومات كافية عنه ، ولا ترفع صوتك ، ولكن تحدث بشكل هادئ وطبيعي ، ولا تقاطع محدثك بحديثك حتى وإن كان لديك توضيحاً أو اعتراضاً ما لم يتوجه لك باستيضاح أو سؤال ، ولا تكثر من الاعتراضات حتى وإن كنت على حق، وإن كنت لا بد فاعلاً فحاول أن يكون ذلك بطريقة لطيفة ولبقة، إن كان لقاءكما هو الأول فلا تتحدث كثيراً عن نفسك حتى لا تبدو في نظره نرجسياً، ولا تتكلف ما ليس فيك ، وعليك أن تتحدث بكلمات مفهومة ، وأن تركز أفكارك حتى تبدو أكثر ثقة بنفسك ، وألا تكثر من الحديث عن عملك وحياتك الخاصة فتبدو ثرثاراً ليست لديك أي خصوصية، وابحث عن مجالات الحديث العامة المشتركة.

رابعاً حقوق الصحبة :

إن من أهم حقوق رفاقك عليك المحافظة على ما يدور بينك وبينهم ، وأن تحفظ لهم الود والاحترام ، وأن تبتعد عن المزاح الثقيل والكلام الجارح ، والأدب والتهذيب مطلوبان مع جميع الناس حتى الأقارب منك مهما بلغت درجة العلاقة والقرب ، فمن يزرع الحب لا يجني إلا الحب ، ولتعلم أن الناس كالمرآة لا يعكسون إلا ما يقع أمامهم .

لا تكن لواماً ، ولا متبرماً كثير الحجج ، ولا مستكبراً ولا بخيلاً ، وإن أخطأت فبادر بالاعتذار، وتعامل مع الآخرين بصراحة ووضوح متلمساً اللطف واللين فيها ومبتعداً عن الوقاحة وقلة الذوق، وعليك بالحياء والتواضع فإنهما من سمات الأنبياء، وحاول أن تبتعد عن نقل الأخبار السيئة حتى لا يربط الناس بينك وبينها ، وتذكر أنه ليس كل ما يعلم يقال.

إذا كنت واقفاً أو جالساً مع مجموعة وأردت الانصراف فاستأذن ولا تنصرف فجأة حتى وإن لم يكونوا يتحدثون معك ، وإذا توقفت عند بائع الصحف وشدك عنوان في أحدها فلا تلتقطها لتقرأ ، بل خذها وأدفع ثمنها ثم أقرأها بعيداً ، وإذا جلست إلى جوار أحد يقرأ كتاباً أو مجلة أو صحيفة فلا تسترق النظر إليها لتقرأ فهذا السلوكيات غير مقبولة في كل المجتمعات .

إذا هاتفت أحد معارفك فلا تطيل الحديث معه وأسأله عما إذا كان مشغولاً، وإذا هاتفك أوجز في كلامك ولا تتحدث معه في أمور يطول شرحها فقد يكون مشغولاً ويخجل أن يعتذر منك وحاول أن تجعل أمر إنهاء المحادثة في يده دائماً .

منقول من منتدى الاستاذ عمرو خالد

تاج البرنسيسة

واحد تاج هنا ياواد يابلية من قلوب حائرة وتاج كمان هنا من بوسي كات

وسع وسع وسع التاج جااااااااااااااااى

اسم مدونتك؟

أيامنا الحلوة

لماذا اخترته ..وماهي نيتك من وراء اختياره؟

دعوة للتفأول لا للتشأول على رأي السيد عمرو موسى

هل فكرت في إغلاق مدونتك؟ والسبب؟

بصراحة فكرت ... السبب ان جه عليا وقت دماغي فضية خالص ومش عارفة اقدم شئ جديد ومفيد وفي نفس الوقت خفيف ... مع اني عارفة انه لا يأس مع الحياة ولا حياة مع اليأس

صورتك في المدونة ورمزيتها ؟

صورة طفل قمر .. عجبتني الصورة ونزلتها عادي يعني

لماذا دخلت عالم التدوين من الاساس؟

دعوة لقتل الفراغ مع سبق الاصرار والترصد

جمله قيلت لك فى وصف مدونتك؟

امممممممممممممممم.... أسلوبك شيق يلا شدي حيلك و اعملي مجموعة قصصية اسمها ايامنا الحلوة

التعليقات بالنسبه لك ,اهميتها؟

ليها اهمية كبيرة عندي لانها هي اللي بتحسسني بايامي الحلوة

احلى بوست كتبته ...ضع اللينك , ثم اذكر لماذا؟

اممممممم.. طب ليه الاحراج ده بس بجد مش عارفة ايه احلى بوست كتبتوا
ممكن احط لينك بوست حلو ودوا خفيف شوية الاتوبيس ... لانو حصل فعلا وكنت في غاية الخنقة بجد وبعدين لقيت نفسي بكتبوا بكل حيوية

أفضل بوست قرأته؟ وضع لينكه؟

بصراحة الخير كتيييييييييير ... في ناس بجد ما شاء الله دماغهم تحفة جدا وعجباني مووووووت

أفضل مدونة قرأتها؟

كل المدونين بيهربوا من السؤال ده عشان محدش يزعل مع اني شايفة انو مش يزعل مش معنى انك تختار مدونة من وسط مدونينك اللي بتحبهم يبقى الباقي اي كلام بقى لا طبعا
بصراحة انا بحب مدونات كتير بس اكثر اسلوب ساخر بيعجبني هو مدونة أبو العر بي بتحدث

حد قل ادبه فى التعليق إيه رد فعلك؟

لا الحمد لله ,,,, معنديش حد قليل الادب

أسوأ مدونة؟

اي مدونة بتتكلم باسلوب خارج عن العرف والدي والاخلاق بالنسبة لي سيئة جداااااااااا واتمنى بترها من على النت

أسوأ بوست أسوأ مدون؟

اي بوست خارج عن الاخلاق والدين

هيحصل ايه لإيميلك لما تموتى ؟

هيموت معايا


اديتى الباسوورد لحد قبل كده؟

لا

كانت إيه طبيعة علاقتك بيه؟

ماقولنا لا هي صورة

اسمك ؟

ايه السؤال اللي جاي متأخر ده... اسمي شيرين

اسم مشهور ببيه وسط اصحابك؟

بين صحباتي المقريبن اسم شهرتي البرنسيسة بس محدش يقول لبابي اصلي انا صعيدية ولو حد حد خبر من البلد اهلي يجطعوني يابوووووووووووي


عمرك؟

لحد اللحظة دي 23 ولكن بكرة ان شاء الله هيبقى 24
وباب المدونة مفتوح لتقديم الهدايا

برجك ؟

اوعى وشك انا بلا فخر برج العنطظة والفشخرة بس انا مش كده واللهي
برج الاسد

دراستك؟ مجالك؟

الاعلام والصحافة

شخصيتك نوعها إيه؟

اجتماعية واحيانا انطوائية

السفر بالنسبة لك؟

تغيير جو ... الواحد بيعمل ريفريش على حياته كده بدل الملل

وقت فراغك بتعملى فيه إيه؟

بناااااااااااااااااام خخخخخخخخخخخخخ

المود بتاعك؟

مرحة وواقعية

الاكلة المفضلة؟

الله ما طولك ياروح .... ايه الاسئلة الغريبة دي بس
هتجوعونا ليه بس

انا بلا فخر مبقولش لا لاي أكل بس أكتر حاجة بنهار قدامها المسقعة ولازم يكون فيها فلفل نار

الصفات اللي أخدتها من بابا؟

الحنية والواقعية

الصفات التي أخدتها من ماما ؟

الاعمال المنزلية

اكتر ست حاجات بكرهها؟

الخيانة
الكدب
التكبر
النكد
الملل
التظاهر بالتدين



اكتر ست حاجات بحبها؟

اولا الله سبحانة وتعالى ورسوله
ماما وبابا
اخواتي
اصحابي وطبعا انتو عارفين اثنين منهم انتختي وانتكتي
الصراحة
التواضع

الشغل بالنسبة لك؟

اسرتي الثانية ... وصحبتي الصالحة اللي ربنا كرمني بيهم
الشغل حياة تانية بلاقي نفسي فيه


التاج ده بقى من بوسي كات


انت مين ؟

انا الملامييييييين ... انظر لفوق هتلاقي الاجابة ولا اقولك انت لسه هتطلع تاني انا شيرين

مين اكتر 6 اشخاص بتحبهم ؟

لا بقى اطلع لفوق المرة دي هتلاقي الاجابة


انت سعيد ؟

الحمد لله

لو اجتمعت انت وحسنى مبارك فى غرفة واحدة ؟

اصلا ايه اللي يخلي مبارك يتنازل ويتواضع ويقعد معايا في غرفة واحدة ده على اساس اني بعد الشر بعد الشر مرات ابنو ولا ايه
ما علينا لو حصل هقولوا انزل شقر على شعبك بنفسك وشوف حالتوا عاملة ازاي وياريت تطلع رحلة للاماكن العشوائية اكيد هتبقى رحلة جنان ونفسيتك هترتاح

لو معاك مليون ونص جنيه .. تعمل بيهم ايه ؟

مش عارفة بس هسأل ماما وبابا نفسهم في ايه واحققهولهم .. يعني هطلعهم حج واكيد هتصدق بجزء من الفلوس دي والباقي هجيب عربية واحاول احقق لاخواتي اللي هما عايزينه

بتحب مصر ؟

مصر دي أمي

بتحب البنات /الاولاد ؟

البنااااااااااااااات

انت مسلم ؟

الحمد لله

ليه ؟

انا بشكر ربنا واحمدوا كل يوم اني مسلمة


مين اكتر شخصية متقدرش تستغنى عنها فى حياتك ؟ وليه ؟

بابا وماما ..... لانهم هما حياتي نفسها ربنا يخليهم يارب ويحفظهم من اي شر

ايه اكتر موقف محرج اتعرضت له فى حياتك ؟ واتصرفت ازاى ؟

مرة واحدة صحبتي ركبت الميكروباص كنت انا راكبة فيه بس انا كنت راكبة قبلها وبعدين انا مكنش معايا فلوس غير اجرتي انا بس فبدفع عادي لقيتها بتحلف عليا وبتقولي واللهي ابدا دخلي فلوسك في شنطنك وكده وفعلا دخلت فلوسي في شنطتي على اساس انها هتدفعلي بقى والافلام دي .. بس لقتها دفعت لنفسها بس بعد ما حلفت عليا ولمت عليا الدنيا في الميكروباص فبقيت محتارة لانها حلفت عليا ومدفعش وهي كمان مش دفعتلي اصلا المهم لقينا السواق بعد شوية بيقول في اجرة واحد ناقصة اكتشفت انها كانت بتحسبني بدفع لها هي عشان كده حلفت عليا مدفعش لقيت البنت وشها احمر جدااااااااا لان هي كمان مش معاها فلوس تدفعلي
فقالتلي بكل خجل ادفعي انتي انا مش معايا فلوس تصوروا الموقف محرج بطريقة فظييييييييييييعة

عادي بقى دفعت ونزلت وانا بنشف عرقي والبنت كانت هتموت من الاحراج



ايه الامنية اللى بتدعى ربنا دايما انه يحققها لك ؟

حاليا اللهم بلغنا رمضان وانت راضي عنا ... اللهم ارزقني زوجا صالحا


تمرر التاج ده لمين ؟

شاهي

ضد الظلم

مدون مش انا

اكتب بالرصاص

ولكل اللي بنوروني في أيامي الحلوة

تعالوا نلعب!!!!!

عندما تكون منهمك في عملك ولديك مهام طالبها منك رئيسك وتريده ان ينتهي بسرعة فائقة وبالفعل تكون أنجزت المهمة ولكن عليك بحفظها على الحاسوب الخاص بالعمل وفجأة ودون سابق إنذر ينقطع التيار الكهربائي..ياللهي ما هذا .... تجد عينيك تنظر بقوة تخرق الحاسوب ما هذا لقد ضاع .. ضاع ما انجزته.. ماذا أفعل؟
هذا ما حدث معي بالفعل ..... لقد انقطع التيار الكهربائي واصبح الظلام يسود المكان ... الجميع يصيح "هييييييييييييييييييييييه النور قطع يارب يفضل كده طول اليوم"

تجمع الزملاء في دائرة كبيرة مغلقة على ضوء بسيط يأتي لنا من خارج الحجرة وقالو "تعالو نلعب لعبة " .... نظرت اليهم في تعجب ولكني اشتقت ان ارى ما سيفعلونه واي لعبه يقومون بها هنا في مكان العمل
جلسنا جميعا في الحلقة الدائرية

وقادت اللعبة أحدى الزميلات وقالت اسال سؤال وتجيبون عليه

لماذا تحب الله؟

بالرغم من انه سؤال بسيط وتشعر انه سهل الاجابة الا انك ترى نفسك تصمت قليلا وتحاول ان تأتي باجابة ولكن تجد لسانك عاجزا !!!!!!!

وجدت نفسي لا اتكلم انتظرت ان أرى اجابات الاخرين

أجابت الاولى ... *بانها تحب الله لانه انعم عليها بالكثير فهي ترى وتسمع وتتحدث بلباقة والاخرى تقول ... *احبه لانه هو خالقي الذي أتى بي الى هذه الدنيا ومتعني بكثير من نعمه التي لاتعد ولاتحصى

وتتوالى الاجابات ... *أحب ربي .. لأنه أهلا لكل الحب .. أحبني وأعطاني قبل أن أحبه أو اعرفه ، عندما أضل يهديني وعندما أطلب يعطيني وعندما أخاف أجد كلماته تطمئنني وتسعدني وتروي ظمأ قلبي التائه في الحياة .. وبعد أن أحببته أحببت الحياة كلها

* أحبه لأنه أعطاني نعمة حبه .. فقبل أن أحبه كنت أؤدي أوامره لأنه يجب أن أفعل هذا .. ولكن بعد أن أحببته أصبحت أحب نفسي وأهلي ولبسي والكون من حولي

وتوالت الاجابات ........................... مليئة بنعم الله علينا

وجاء دوري انا فنظرت اليهم جميعا في ابتسامة رقيقة من اعماق قلبي ... واجبت باني احب الله ... احبه جدا لانه انعم علي بهذه الصحبة الصالحة .... وأدركت ايضا ان الله يحبني لانه جعلني اجتمع مع هذه الصحبة

تخيلو معي لولا هذه الصحبة الصالحة التي انعم الله علي بها ... فما هي اللعبة التي كنا سنلعبها أذن ؟ بالتأكيد ليست هذه اللعبة التي يحيطها بالملائكة لاننا نذكر الله... لاننا استغلينا الوقت الضائع في ذكر الله

يقول الله تعالى لعباده في الحديث القدسي

"اني والانس والجن في نبأ عظيم اخلق ويعبد غيري... ارزق ويشكر سواي ...خيري الي العباد نازل وشرهم الي صاعد .. اتودد اليهم برحمتي وانا الغني عنهم .. ويتمغضون الي بالمعاصي .. وهم افقر ما يكونون الي ... اهل ذكري اهل مجالستي فمن اراد ان يجالسني فليذكرني .. اهل طاعتي اهل محبتي... اهل معصيتي لااقنطهم من رحمتي ان تابو الي فانا حبيبهم.. وان ابوا فانا طبيبهم... ابتليهم بالمصائب لاطهرهم من المعايب... الحسنة عندي بعشر امثالها وازيد ..... والسيئة عندي بمثلها واعفوا ... وعزتي وجلالي لو استغفروني منها لغفرتها لهم ... من اتاني منهم تائبا تلقيته من بعيد ... ومن اعرض عني ناديته من قريب ... اقول له اين تذهب الك رب سواى "

واللعبة دي من واقع أيامنا الحلوة مين عايز يلعب معاااااااااااااااااااااااانا

المترو مفخخ

المترو ذنبه إيه عشان يفجروه معملهمش حاجه ياناس ده مجني عليييييييييه..

المترو بتاعنا جامد مين ده اللي يفجروا لوحد منه قرب والله نكهربه... واييييييييييييييييييييييييييييييييه

ااااااه ياأيامنا الحلوة ياصغننة ياااااااااااااااااااني عمرك هيروح هدر يااااااااحبيبتي ....

معلشي ياجماعة اعذروني بعدد على نفسي اصلي منهارة شوية لاني انا واحدة من البشر الرهيب اللي بيركب مترو الانفاق في الرايحة والجاية ............ أهئ أهئ أهئ .... المترو مفخخ

ياخسارة مدونتك الحلوة وأيامك هتوحشوني ياقرائي أمانة تقرو الفاتحة كل ما تفتحوا المدونة أهئ أهئ أهئ

ده كان حالي أول ما سمعت خبر التهديد بتفجير مترو الانفاق بس اول ما سمعت اغنية شعبولا بتاعت المترو وهو نافش ريشو وبيقول باعلى صوتوا .. المترو بتاعنا جامد مين ده اللي يفجروا لوحد منه قرب والله نكهربه واييييييييييييييييييييييييييييييييه ..... عادت فيا روح الشجاعة والقوة ..... غير مجرى حياتي اااااااااااه عظيمة يامصر ..... وشعبك دايما صامد .. أي واللهي صامد

انا عارفة ليه مهددوش بتفجير منخير ابو الهول انا كنت سمعت ان منخيروا مضايقة ناس كتير يعني ملقيوش غير المترو اللي بيركبوه كل الغلابة اللي زيي ما هو انا لو من صفوة المجتمع مكنش ده كلو يجرالي كان زماني معايا العربية الربع متر بتاعتي لالالا اقصد العربية العشرة متر بتاعتني

بصراحة شعبولا كتر الف خير تواضع وركب المترو مع الغلابة عشان يقول للشعب متخفوش المترو جامد محدش هيفجروا ودعا فنانين مصر لترك سيارتهم واستقلال مترو الأنفاق لطمأنه المواطنين .... فرصة الواحد يمكن يقابل عمرو دياب ولا حتى عائشة الكيلاني في المترو

طبعا انا وانتكتي وانتختي كل يوم بنركب مع بعض مترو الانفاق واحنا رايحين نركب شوفنا واحد لابس ملكي كده عمال يفتش الناس وهي نازلة المترو واول ما قربنا ناحيتو قالنا لحظة ياانسات ممكن تتفتشوا رحت انا بقى اول واحدة رفعت حواجبي ووقفت كده بقلب جامد ورحت فتحت الشطنة وقلتلوا حاضر يابييييييييييييه بريئة اتفضل فتشني فتش .... قام الراجل فتش بزمة.. مسبش ولا شنطة وراح قايلنا انا اسف انا مكسوف واللهي وانا بفتش الناس كده بس دي التعليمات ... مكدبش عليكم عنيا دمعت الراجل صعب عليا رحت قولتلو لالالالالا براحتكم يافندم انتو الحكومة محدش يقدر يقولكم لا وبعدين اللي بتعملوه ده في مصلحتنا ارجوك ارجوك تفتش الشعب كويس كويس اوي وميغركش انو شعب غلبنان وكده لا ده في ناس لائيمة راح قالنا احنا في خدمتكم يافندم

وركبت المترو وانا ركبي بتترعش وايدي سقعت فجأة كده قلت اااه ياشيرين لو الحظ يلعب معاكي والمترو ينفجر دلوقتي بيضالك في القفص هتموتي شهيدة يابت .... وتعدي محطة ورا محطة والاقي نفسي وصلت محطتي تحيا مصر... وتحيا الشرطة ...ال يفجرو المترو ال ... ده كلام ياناس

بس خليكم في انتظار مفاجأة اكبر من تفجير المترو اصل احنا كده لما بنحب نعمل مصيبة لازم نلهي الناس بحاجة الاول عشان المصيبة تيجي خفيفة ........... ربنا يسترها بقى دعواتكم وفي الاول والاخر الشرطة والشعب في خدمة الوطن

وتحيا مصر

فرق السن

أنا قلت اروح أعصر دماغي من مية البحر وأجلكم علطول عشان نتكلم في موضوع شاغل تفكيري شوية اليومين دول وهو

ايه فرق السن المناسب اللي المفروض يكون بين الزوجين يعني الافضل ان البنت تتجوز واحد اكبر منها بخمس او عشر سنين ومعاكم كده لحد 15 سنة ولا واحد يكون قدها في السن ؟...

ونرجع نسأل السؤال بشكل أخر ايه السن المناسب للتفاهم بين الاثنين؟

بصراحة الموضوع ده كنت حاسمتو مع نفسي من زمااااااااااااااااان من ايام ثانوي كده كنت لما اشوف حد بيرتبط وبيكونوا في سن بعض بقول ايه الهبل ده انا لايمكن أبدا وعمري عمري ما ارتبط بحد في سني خالص وده لان من وجهة نظري ان البنت دماغها بتبقى اكبر من سنها يعني ولازم ترتبط بواحد اكبر يعني مايقلش عن خمس ست سنين ولو اكتر يكون احسن وده في رأي لاني احب الراجل يكون هو صاحب القرار الصائب وده مش لقلة الثقة في المرأة او تقليل من شخصها ولكن تقدروا تقولوا كده ان الرجال قوامون على النساء وانا احب اول حاجة يكون فيها الرجل قوام على زوجتوا في دماغه في تفكيروا خبرتوا

انا حبيت اناقش الموضوع ده عايزة اعرف أراء الناس هتكون ايه يعني فرق السن بين الزوجين المفروض يكون أد ايه ولو أد بعض في السن ده ممكن يكون زواج ناجح فعلا ولا الافضل انو يكون الزوج اكبر .... طب والناس اللي بتتجوز دي وبتكون الزوجة اكبر من زوجها بخمس ولا اربع سنين دول الحياة ماشية معاهم ازاي في تفاهم مابنهم فعلا مش عارفة الموضوع اصبح محير بالنسبة لي

بالرغم من كده الا اني مازلت افضل السن الاكبر للزوج

المية والهوا

شاطئ عجيبة سبحان الخالق

بحب اثنين سوا ياهنايا بحبهم

المية والهوا

ياهناية بحبهم

اه ياسلام عليكي ياليلي يامراد نشلتي على المكان المظبوط وانا اقول ايه اللي يخلي حسين صدقي يحبك كده اتاري المية والهواء اللي في مرسى مطروح هما السبب.. وبيني وبينكم قعدت ادور على الصخرة اللي غنت عليها ليلي مراد وملقتهاش .. فضلت اتتبع خطوات ليلي اللي لسه محفورة في شاطئ الغرام طلعت خطوات المصيفيين للاسف مش خطوات ليلي يلا بقى مليش نصيب اشوف الصخرة اظاهر اتهددت بعد ليلى وحسين

من غير كتر كلام انتو وحشتوني بجد الاسبوع اللي فات ده وانا مش بدخل النت خالص ومش برد على التعليقات بتاعتكم ... معلش اعذروني لاني كنت عند المية والهوا ولسه واصلة لارض الوطن انهرده

بصراحة وانا رايحة مرسى مطروح كنت رايحة من اجل الاستجمام فقط والنووووووووووم وبس يعني قلت ابدا عمري عمري ما هنزل المية... ولكن بما اني شخصية مرهفة المشاعر والاحاسيس شفت المية من هنا ومقدرتش امسك نفسي وهوب ونزلت البحر .. وطبعا مش عايزة اقولك اني بقيت بكاكا دسا اسبوع بقى منقوعة في المية وعليكم ان تتخيلو.. يلا الحمد لله فيراند لفلي يحل الموضوع

طبعا الشاب الوديع ده محمود أخويا

محمود ده طفل برئ اي واللهي برئ عمرو ثلاث سنوات لحد دلوقتي موهوم اننا لسه في مرسى مطروح وهنروح البحر وهينزل يعوم بالعوامة بتعتوا ...

وبما ان الشهرة حلوة قررت انزلكم صورة انا فيها انا اللي قاعدة تحت الشمسية الحمرا اللي هناااااااااااااااك دي

لست منقذي

قالتها وهي تحاول الا تطلق العنان لدموعها .. اذهب فأنا لست مليكتك وانت لست مليكي

طلبت منه الخروج من كيانها .. حتي تستجمع ما تبقى من اشلاء قلبها

كان يرجوها ان تسامحه على موقفه السلبي لعدم قدرته على اقناع أهله من الارتباط بها

كانت بالنسبة له حلما جميلا يحاول تحقيقه .. ولكنه فشل في تحقيق حلمه وحلمها

ولكنه نجح في ان يجعل له مكان بقلبها .. بل بكيانها البرئ الضعيف

ليس من شيمها ان يظلا اصدقاء .. قالتها له "أنا لااحب حساب المثلثات"..

في الماضي كان هو بالنسبة لها لايعني شئ .. ولكنه الان أصبح كل شئ

كانت في الماضي هي الفاعل .. والان أصبحت هي المفعول به

اما هو كالورقة في مهب الريح .. لايعرف يخسر من أهله ام يخسرها هي

ظنت انه سوف يكون منقذها .. ولكن القدر لم يجعله كذلك

قالها لها" أنه في موقف لايحسد عليه" أهله يهددون بمقاطعته .. وفشل في اقناعهم مرات ومرات .. فهو يشعر بالاسي .. ولايعرف بماذا تشعر هي!!

عندما علمت بموقف أهله كانت تريد ان تصرخ لماذا قابلتك؟ لماذا أحببتك؟ أنت لست لي وأنا لست لك؟ اذن فابتعد عني

قالت له.. اخرج من قلبي .. من كياني الضعيف .. موقفك سلبي ولا استطيع السماح

فأنت لست منقذي

مشكلة بتحصل كتير وهي زي ما انتو شايفنها احيانا الشاب بيوصل لمرحلة سلبية قدام اهله ومش بيعرف

يدافع عن حقوقه في اختيار شريكه حياته ياترى دي اسمها ايه سلبية ولاضعف ولا ولاء لااهله ولا ايه بالظبط

والافضل انو يسمع لاهله باعتبار تجاربهم في الحياة اكبر ولا يمشي وراء عقله وقلبه هو

وكذلك البنت تمشي وراء قلبها وعقلها في اختيار شريك حياتها ولا تخلي اهلها هما اللي يختارولها باعتبارهم اكثر خبرة

انتو ايه رأيكم
ودي مشكلة من واقع أيامنا

دماغ أنتختي في خطر

انتختي أميرة اللي اعتزلت التدوين مؤخرا في هدوء تام .. عشان تسبلي الساحة فاضية وأقب على وش النت لوحدي ... جالها صداع فوجائي عبارة عن اثنين بيضربو بعض في نفوخها زي "فتح وحماس" كده قولتلها الحل الوحيد هو طلب اجتماع عاجل لجامعة الدماغ العربية عشان تفض الاشتباك اللي في نفوخك ده لقتها بتحتج جامعة دماغ ايه بس ياشيخة هي بتعرف تحل ولا تربط اي حاجة .. انا عايزة برشام دولي محدش هيقدر على نفوخي غير البرشام الدولي قولتلها يابنتي لما البراشيم الدولية تدخل دماغك كده هيبقي احتلال .. قالتلي احتلال احتلال المهم الاشتباك ينفض بقى انا تعبانة .. وبعدين لقتها اترمت كده فجأة وقالتلي هو البرشام الدولي ده ممكن يضرني ويقسم نفوخي وتبقا زي الكوريتين قولتلها طبعا ممكن جدا لقتها بتبرقلي طب وبعدين ايه الحل قولتلها بصراحة مش عارفة بس انا ممكن أجبلك برشام طوارئ يمكن يجيب نتيجة ويضع حد للانفلات الامني اللي في دماغك ده ... قالتلي طوارئ ايه انتي بتهرجي ده اللي في نفوخي ده لو عملتي معاه الالي مش هيتهد ... طب اعمل معاكي ايه بقى غلبتيني .... لقتها بتتوجع اووووي اااااه يادماغي ااااه يادماغي بطلو اشتباك بقى حرام عليكم هدمروني ... انتو مش هتسكتو غير لما اشرب دواء صهيوني ينزل عليكم طاخ طوخ طيخ ... وفي تلك الحالتين هتدمروني...!!!!!!!!!!........

عريس لقطة

بما ان عندي جمود فكري اليومين دول قررت انزلكم بوست كنت بعتوا لبرايد في بيت العرايس والعرسان بس هي منزلتهوش قلت خلاص انزلوا انا عندي في أيامي الحلوة

القصة دي حقيقية من واقع أيامي بس فيها حبة تحابيش بسيطة كده لزوم الكتابة

المهم نبتدي الحكاية

في ليلة من ذات الليالي لقينا جرس الشقة بيرن فتحت اختي الصغيرة لقيت طنط جارتنا داخله والابتسامة عررررررريضة على وشها .. وبتقولي ازيك ياعروستنا ياامورة انا جيبالك حتة عريس هدية والنبي هدية وبقولك ايه اول ما تتخطبيلوا لازم تجبيلي هدية قيمة كده مش عايزة بخل اصلي محبوش ابدا والعريس اللي انا جيباهولك بقي ايه متريش على الاخر وقمر وصغير ومفهوش غلطة ..

استني ياطنط اهدي كده براحة عليا عريس ايه اللي بتتكلمي عنو ..

ده ياستي ضابط في القوات المسلحة وعندو 29سنة وأمور وعندو عربية احدث موديل وشقتوا جاهزة في مصر الجديدة يعني مش هتقولي عليه بم ..

اااااه طيب ..

طنط: يعني ايه ياعروستنا موافقة عليها لولولولووووووووووووي ...

استني استني في ايه بس هتلمي عليا الدنيا هو انا شفتوا ولا هو شافني ..

طنط: خلاص ما انا اتفقت معاه خلاص اننا نروح النادي بكره الساعة 6 كلنا كده ويشوفك هناك..

ايه اتفقتي ازاي بس ياطنط تتفقي على حاجة زي دي من غير ما تقوليلي الاول..

لقيت ماما برقتلي كده وقالت خلاص بكره بكره مفهاش حاجة يمكن يطلع ده كويس يابنتي وافرح بيكي ..

قلت خلاص نشوف محدش واخد منها حاجة

الساعة 6 بالظبط كنا في النادي انا وماما وجارتنا ..

لقينا حد جاي من بعيد شيك جداااا وطول بعرض كده ووقار لقيتو داخل علينا بابتسامة رقيقة ..

سلام عليكم ..
وعليكم السلام ..

طنط: اهلا ياحبيبي اعرفك بقي على الناس الحلوة دي الانسة "شيرين" ودي الست ماماتها ..

العريس: اهلا وسهلا تشرفنا ..

والنبي ياخويا انا اللي اتشرفت ده واضح ان زي ما طنط قالت انو عريس لقطة وشكلو كده هادئ ورظين وانا بحب الناس الرظينة دي طبعا الكلام ده بقولوا في سري ..
الجرسون جه : تشربوا ايه يافندم ..

انا : اشرب اي حاجة فريش ..

العريس أحب اعرفك بنفسي اسمي: شريف واحلي حاجة اكتشفتها دلوقتي ان اسمي قريب من اسمك ههههههههههههههههههههههههه

انا ضابط في القوات المسلحة وساكن في مصر الجديدة وعندي عربية هتعجبك اوي شاريها غالية اوي ومش هقولك على ثمنها لحسن يغمي عليكي ههههههههههههههههههههههه

وعندي 29 سنة طبعا عجوز واكيد بتقولي ده فاتو قطر الجواز هههههههههههههههههههه

انا والدي كان قاضي واخويا مستشار واختي مهندسة
اخويا متجوز واختي لسه معندكيش عريس ليها بقي ههههههههههههههههههههه

لقيت فجاة الجرسون جه ..

الحمد لله انو جه في الوقت المناسب عشان يوقفوا شوية عن الكلام والضحك اللي نازل عمال على الفاضي ده في ايه مالو ده ..

الجرسون نزل الطلبات ومعاهم ازازة ميه معدنية لقيت ده بقي فجأة لالالالا من فضلك شيل المية مش محتاجنها ..
اصل ياانسة المية هنا غالية على الفاضي البوفية في النادي ده حرامية شوية فيها ايه لو يجيب مية من الحنفية ده حتي النيل روانا والخير جوانا ههههههههههههههههه

في انت بخيل اهلالالالا في سري طبعا

من اولها كده موقف غير موفق يعني المية هي اللي هتزودلك الحساب .. ازاي يخلي الراجل يشيل المية كده ده انا اصلا هموت من العطش وعايزة اشرب ماية احد احد .. طب اقول للجرسون يسيب المية وانا هدفع حسابها ولا اعمل ايه ياااااااااختي هفرقع وعايزة امشي
العريس: ها يلا بقي عرفيني على نفسك .. انا صحفية وعندي 23سنة ..
العريس : بس بس ههههههههههههه كفاية كده المعلومات دي تكفيني اصلي انا عايز واحدة صغيرة بصراحة كنت عايزاها اصغر من كده كمان بس سنك كده كويس ..
هو حضرتك ملكش اي طلبات في العروسة غير السن وبس
العريس: ههههههههههه لا طبعا اكيد في حجات تانية بس اصل السن عندي مهم اوي اصل عايز واحدة صغيرة عشان تمشي على طبعي يعني ياريت متزعليش اني صريح بس انا احب كلمتي هي اللي تمشي والصغيرة بقي هعرف اشكلها على مزاجي غير كده السن الصغير للبنت احسن مستقبلا عشان تفضل وردة مفتحة قدامي

اااااااااااااااه طيب

وبعدين قلت في سري فيها ايه يابت الراجل شكلو مبسوط منك شويتين وبيضحك والمية الي شالها مش مهم ممكن يكون وطني زيادة عن الللزوم ومقاطع المية المعدنية وبيحب مية النيل .. مشي المركب بقي وفرحي امك الغلبانة اللي قاعدة قدامك دي وعمالة تبصلك نظرات معناها اهدي بالله ومتركبيش دماغك وتحكمي على حد من اول مرة كده
ابتسمت ابتسامة صفراء كده وقلتلو فعلا عند حضرتك حق انا هقاطع المية المعدنية بتاعت النادي ده انا اصلا هقاطع البوفية بتاع النادي كلو
العريس: هههههههههههه برافوا عليكي بداية خير واضح انك مطيعة وهنتفاهم

ااااااااااااااااااااااااااااااه عايزة اصرخ في وشوا مفروسة ياخواتي بس امي وجارتنا قاعدين والغريبة انهم قاعدين لايروا ولايسمعوا ولايتكلموا ..

ها قولي بقي ايه المواصفات اللي تتمناها في زوجتك غير السن الصغيرة الولاء والطاعة

العريس: ههههههههههه واضح انك دمك خفيف اوي بصي ياستي انا عايز واحدة تحافظ عليا وعلى جيبي متكونش مبذرة يعني لانها لو مبذرة هتخرب بيتي

اقولك ايه رايك نتفق على مصروف البيت من دلوقتي احسن عشان تبقي كل حاجة في النور كده ايه رايك في 100جنية في الشهر وانا هجيب كل الاحتياجات والـ100 جنية دول مني ليكي هدية شهرية ههههههههههه انا عارف انهم كتير بس انا عايزك تحوشي منهم بقي..

عايزة اقولكم ان غير الصداع اللي جالي .. قعدة ومبرقة عنيا الاثنين اللي كانو هيطلعو من مكانهم من كتر الذهول ومتسألوش ذهول على مصروف البيت ولا على انو اصلا بيتكلم في حاجة سابقة لاوانها

اكونش خلاص اتجوزتوا ولا ايه وبعدين حكاية البخل اللي شكيت فيها في بداية القاعدة دي ابتدت تبقى أكيده عندي

انا بقي عايزة امشي باي وسيلة عشان اتخنقت ومش عارفة اعمل ايه او اقول ... فجأة لقيت نفسي بقول .. طيب مش يلا ياماما بقي ولا انتي رايك ايه ياطنط...

العريس: ليه بس لسه بدري هو انتو لسه شربتوا المشروبات اللي طلبتوها اشربوا ياجماعة ده انا هدفع فلوس مش ورق ..

لا معلش اشربهم حضرتك او اقولك انت رجعهم البوفية ومش هيحسبوك عليها ...

العريس: ايه ده انتي بتتكلمي بجد شكلك اقتصادية فعلا وهنتفق طيب انا هحاول ارجعهم البوفية ..وانا منتظر بقي تليفون عشان تحددولي معاد مع الوالد..

طنط: ان شاء الله ياحبيبي ومبروك مقدما متنساش الهدية بتاعتي ..

العريس: هاهاها عايزة هدية مرة واحدة ياستي هديتك عند ربنا احسن من اي حد

وخدت ماما في ايد وشنطتي في ايدي التانية

وطنط طالعة تجري ورانا استنوا استنوا ده عريس لقطة مفيش جواز اليومين دول صدقوني ... هو حريص شوية وصريح حبتين فيها ايه بس