حدث في 2010

هكذا انا في عام 2010

مزيج من الفرح والحزن

مزيج من التفاؤل والتشاؤم

مزيج من اشتياق للغائب الحاضر

والمستقبل الغامض

هل ياسيدي فرج قريب؟

إلهي أنت تعلم كيف حالي فهل يا سيدي فرج قريب

فيا ديان يوم الدين فرج هموما في الفؤاد لها دبيب

وصل حبلي بحبل رضاك وانظر إلي وتب علي عسى أتوب

وراع حمايتي وتولى نصري وشد عراي إن عرت الخطوب

وألهمني لذكرك طول عمري فإن بذكرك الدنيا تطيب

وقل عبد الرحيم ومن يليه لهم في رأفتنا نصيب

فظني فيك يا سندي جميل ومرعى ذود آمالي جميل

وصل على النبي وآله ما ترنم في الآراك العندليب

أشرقت شمس العيد بدونك

أشرق صباح اول ايام العيد

كنت اظنه سيمر مثل باقي الايام

لكنه كان يوم الذكريات

تذكرتك ياأبي حين كنا نذهب للصلاة سويا

يدك في يدي .. ويدك الاخري في يد امي

تتركنا عند مصلى السيدات بالمسجد وتدخل انت من باب الرجل

ثم نخرج بعد الصلاة لنلتقي سويا بك انا واخواتي وامي امام المسجد بعد الصلاة

فتحاول الهرب منا بسخرية ونذهب وتتركنا فنذهب ورائك لتعطينا عيديتنا

فكلما اقتربنا منك تحاول الهرب وتضحك وتضحك وتضحك

ونحن نضحك معك بصوت عالي

نقول .. هتروح مننا فين يابابا.. فترد.. اللي عايز العيدية يحصلني

فنتسابق انا واخوتي في مدينتنا الهادئة لنفوز بالعيدية

وبعد ان ترهقنا من كثرة الجري والضحك نذهب الى البيت جميعا لنقف طابورا امامك في شغف

فانا واخوتي نريد ان نعرف ما هو نصيبنا من العيدية في هذا العيد

فتاتي بحقيبتك وتقول اللي مش هيقف عدل مالوش عيدية انا بتلكك .. فتتعالى ضحكاتنا .. يلا يابابا بقى ذلتنا

فهكذا كانت تمر بنا الساعات الاولى من العيد

ولكن هذه المرة ياحبيبي

ذهبت انا وامي الى المسجد بمفردنا .. أمي ترتدي ملابسها السوداء وانا ارتدي ملابسي الملونة
ومرت الساعات الاولي من العيد بدونك ... يااااااااه ما اكثرها من ثقل .. فهذه الساعات كانت من اثقل الساعات التي مرت

حبيبي ... حقيبتك ما زالت موجودة فانت تركت لنا عيدية هذا العام

لكنها لاتسوى بدونك

رحمك الله ياابي

للبنات فقط

عشان تقدري تعيشي حياتك وأنتي مبسوطة من غير ما حد يقدر يعكر عليكي صفو أيامك الحلوة يجب اتباع الاتي:

دايما تبقى شايلة أسلحتك في الشنطة وانتي خارج المنزل" دبوس مسمار شاكوش كعب جزمة رفيع"

لما تركبي الميكروباص أي راجل يقعد جمبك تخدي حذرك وتحطي الشنطة بينك وبينه ولو بوق فيها وشخط وقالك انتي فاكره نفسك ايه أنا أقرف أبصلك قومي اديله بالشاكوش في دماغه

ولو حد فكر يمد إيده وأبتدي يتحرك روحي جايبة الدبوس وأرشقيه في عينه ولا أقولك بلاش خليها في أيده مش عايزين نروح القسم

كمان لما تيجي نازلة من الميكروباص انزلي بسرعة لحسن السواق يزعل منك ويفضل يشتم ويلعن اليوم اللي أبوه طلعوا فيها سواق

لما تيجي تعدي الشارع متتسرعيش وتعدي بسرعة.. اصبري لحد ما أي سواق يرفق بيكي ويكون عنده دم ويعديكي

ولو ناوية تركبي مترو الانفاق حضري الكمامة عشان انفلونزا الخنازير مسبتش لانفلونزا البني أدمين حاجة

ولو قاعدة وشايفة أي واحدة شايله عيل أوعي تخديه منها وتقعديه على رجليكي هتندمي قومي أحسن بكرامتك وقعديها هيه وابنها

نصيحة مهمة .. حطي قطن في ودانك طول ما أنتي راكبة المترو عشان متتفرسيش وأنتي بتسمعي بنات الجامعة وحكاويهم اللي كلها عن فرقعت كام واحد والدكاترة والمعيدين اللي بيجروا وراها .. اضربيها طناااش

الـ26

بعد ما اتفقت مع دكتور السنان ودفعت عربون لصناعة طقم جديد لاشناني ايون اشناني بالشين على اعتبار اني هصحى

انهرده الاقي كل سناني مخلعة

ده غير اتفاقي مع حلاق منطقتنا على صناعة باروكة لونها اسود غامق بعد ما شعري يطقطق ويبيض

بالاضافة الى نيتي لصناعة نظارة كعب كوباية انقي بيها الرز

ده غير اني استغربت اوي ان صحيت من النوم فاكرة كل ده وان مرض الزهايمر لسه مااصابنيش

هييييييييييييه اسمعوا وعوا

انا عيد ميلادي جه

بمممممممممممممممممممم بمممممممممممممممممممممم

دي متفجرات لعبة لزوم العيد ميلاد

كل سنة وانا طيبة

انا لسه سناني بالسين

وشعري مبيضتش

وذاكرتي حديد

والله اكبر الله اكبر

نظري ستة على ستة

معركة الخيار

اه يانا ياقليلة البخت مع البياعين .... الحكاية بكل بساطة اني في يوم من ايامي الحلوة رحت اشتري خيار لوازم السلطة

ودخلت السوق وانا كلي احساس بثقتي في ميولي المنزلية المطبخية وحظي وداني عند بياع خيار شكلوا واخد علقة

سخنة من مراته قبل ما ينزل عمال يكلم نفسه ويلعن في كل ما هو مؤنث على وجه الارض قولت يابت انتي مالك ادخلي

بقلب جامد واشتري اللي انتي عايزاه وخلاص ولما قربت للخيار اللي بيبيعه وابتديت انقي لاقيت ده بيزعق ويقول الله

يلعن اليوم اللي طلعت فيه بياع خيار ... قولت عادي يمكن كان نفسه يبيع مانجو بس مجبش مجموع عالي .... الله

يخربيت كل الستات .. قولت عادي مش مهم ده اكيد يقصد ستاته اكيد متجوز اربعة ماهو اللي يبقى بالمنظر ده اكيد

متجوز كذا واحدة ...... انا هقلب العربية دي ... قولت ومالو اكيد هيقلبها عربية كبدة أو بليلة.. الرزق يحب الخفية

وبعدين فجأة لاقيته شد مني الكيس اللي بنقي فيه الخيار ويقولي هاتي مش هبيعلك انتي لسه بتتعلمي ولا ايه شكلك جاية

تتعلمي فينا .. انا بقى تنحت واتخضيت وقولتله في ايه قالي في ايه .. مش هبيعلك انا مش هبيع لاي ستات حاجة

خلاص امشي امشي امشي الراجل انهار وانا مخضوضة فاكتفيت اني اقوله .. ايه قلة الادب دي ومشيت وانا قولت كده

وعنيكم ماتشوف الا النور فضل لحد ما خرجت من السوق وهو عمال يقول جملة واحد هو انتي طول ما انتي لابسة

النظارة دي هتفلحي .. عااااااااااااااااا بغض النظر عن الفضيحة اللي حصلت واللي كان ممكن على اثرها ابقى في تعداد

الاموات ويقوم يديني بخنجر اي فكهاني موز وابقى ساعتها "شهيدة الخيار" ازاي يعيب في النظارة بتاعتي دي تاسع

نظاره اشتريها يقوم في الاخر يقولي طول ما انتي لابسه النظارة دي مش هتفلحي ماهو لو يعرف اني مش بيعيش ليا

نظارات وان النظارة دي جت بعد شوقة مكنش جرحني بالكلمة دي .. وبعدين هو فاكرها نظارة ايه دي نظارة شمس

ياناس يعني مش نظارة لحام .. عامة انا مسمحاه في الفضيحة اللي عملهالي في السوق بس مش هسامح في حق

نظارتي ...

أيامنا حلوة

وراء كل أوباما ميشيل

ميشيل: ليه ضربت الدبانة

اوباما: اهدي ياحبيبتي دي دبانة مالك منزعجة ليه

ميشيل: اهدى ازاي انت جرالك ايه معندكش قلب تضرب دبانة مسكينة

اوباما : اعملها ايه بس قعدت تزن فوق راسي تزن فوق راسي تزن فوق راسي

ميشيل: كنت هشيتها

اوباما: قعدت اقولها هش متهشتش هش متهشتش هش متهشتش

ميشيل: كنت حاول مرة تانية

اوباما: حبيبتي انتي شاغله نفسك ليه بالموضوع ده دي حتة دبانة لاراحت ولاجت

ميشيل: يعني ايه حتة دبانة مش روح دي مش انثي دي مش ليها زوج وعيال وعيلة انت اتغيرت اوي مكنتش كده يااوباما

اوباما: حبيبتي انا مكنش قصدي خالص صدقيني ومجاش في بالي كل اللي بتقوليه ده

ميشيل: يعني ايه مفكرتش عجبك كده منظمة حقوق الدبان لما تقلب علينا وتبعتلنا كل الدبابين اللي عندها تقتحم علينا البيت الابيض

اوباما: أخخخخخخخ تصوري مجاش في بالي خالص أنا كل اللي حسيت بيه انها بتتحداني قدام كاميرات التليفزيون قولت لازمن أوري للجميع اخرة اللي بيتحداني ايه

ميشيل: أنت فاكر رسالتك دي هتوصل .. انا خوفت على ماليا وساشا من المنظر الفظيع ده ولحد دلوقتي معرفوش حاجة

اوباما: ارجوكي ياميشيل متقولش لعيالي اللي عملتو هيقولوا على ابوهم ايه وحش كاسر

ميشيل: ياريت ده العيال لو عرفوا كده هيفقدوا فيك الثقة خالص ومش هتعرف تربيهم وسلوكياتهم ممكن تتغير للأسوء

اوباما: طيب اعمل ايه دلوقتي اصلح غلطتي ازاي

ميشيل: تصدر مرسوم رئاسي فورا وتعتذر فيه عن الحادث الاليم ده وتعتذر وتتعهد بعدم تكرار مثل هذه الافعال امام شاشات التلفاز لازم ترجع ثقة الناس فيك

اوباما: حاضر ياحبيبتي