معركة الخيار

اه يانا ياقليلة البخت مع البياعين .... الحكاية بكل بساطة اني في يوم من ايامي الحلوة رحت اشتري خيار لوازم السلطة

ودخلت السوق وانا كلي احساس بثقتي في ميولي المنزلية المطبخية وحظي وداني عند بياع خيار شكلوا واخد علقة

سخنة من مراته قبل ما ينزل عمال يكلم نفسه ويلعن في كل ما هو مؤنث على وجه الارض قولت يابت انتي مالك ادخلي

بقلب جامد واشتري اللي انتي عايزاه وخلاص ولما قربت للخيار اللي بيبيعه وابتديت انقي لاقيت ده بيزعق ويقول الله

يلعن اليوم اللي طلعت فيه بياع خيار ... قولت عادي يمكن كان نفسه يبيع مانجو بس مجبش مجموع عالي .... الله

يخربيت كل الستات .. قولت عادي مش مهم ده اكيد يقصد ستاته اكيد متجوز اربعة ماهو اللي يبقى بالمنظر ده اكيد

متجوز كذا واحدة ...... انا هقلب العربية دي ... قولت ومالو اكيد هيقلبها عربية كبدة أو بليلة.. الرزق يحب الخفية

وبعدين فجأة لاقيته شد مني الكيس اللي بنقي فيه الخيار ويقولي هاتي مش هبيعلك انتي لسه بتتعلمي ولا ايه شكلك جاية

تتعلمي فينا .. انا بقى تنحت واتخضيت وقولتله في ايه قالي في ايه .. مش هبيعلك انا مش هبيع لاي ستات حاجة

خلاص امشي امشي امشي الراجل انهار وانا مخضوضة فاكتفيت اني اقوله .. ايه قلة الادب دي ومشيت وانا قولت كده

وعنيكم ماتشوف الا النور فضل لحد ما خرجت من السوق وهو عمال يقول جملة واحد هو انتي طول ما انتي لابسة

النظارة دي هتفلحي .. عااااااااااااااااا بغض النظر عن الفضيحة اللي حصلت واللي كان ممكن على اثرها ابقى في تعداد

الاموات ويقوم يديني بخنجر اي فكهاني موز وابقى ساعتها "شهيدة الخيار" ازاي يعيب في النظارة بتاعتي دي تاسع

نظاره اشتريها يقوم في الاخر يقولي طول ما انتي لابسه النظارة دي مش هتفلحي ماهو لو يعرف اني مش بيعيش ليا

نظارات وان النظارة دي جت بعد شوقة مكنش جرحني بالكلمة دي .. وبعدين هو فاكرها نظارة ايه دي نظارة شمس

ياناس يعني مش نظارة لحام .. عامة انا مسمحاه في الفضيحة اللي عملهالي في السوق بس مش هسامح في حق

نظارتي ...

أيامنا حلوة

وراء كل أوباما ميشيل

ميشيل: ليه ضربت الدبانة

اوباما: اهدي ياحبيبتي دي دبانة مالك منزعجة ليه

ميشيل: اهدى ازاي انت جرالك ايه معندكش قلب تضرب دبانة مسكينة

اوباما : اعملها ايه بس قعدت تزن فوق راسي تزن فوق راسي تزن فوق راسي

ميشيل: كنت هشيتها

اوباما: قعدت اقولها هش متهشتش هش متهشتش هش متهشتش

ميشيل: كنت حاول مرة تانية

اوباما: حبيبتي انتي شاغله نفسك ليه بالموضوع ده دي حتة دبانة لاراحت ولاجت

ميشيل: يعني ايه حتة دبانة مش روح دي مش انثي دي مش ليها زوج وعيال وعيلة انت اتغيرت اوي مكنتش كده يااوباما

اوباما: حبيبتي انا مكنش قصدي خالص صدقيني ومجاش في بالي كل اللي بتقوليه ده

ميشيل: يعني ايه مفكرتش عجبك كده منظمة حقوق الدبان لما تقلب علينا وتبعتلنا كل الدبابين اللي عندها تقتحم علينا البيت الابيض

اوباما: أخخخخخخخ تصوري مجاش في بالي خالص أنا كل اللي حسيت بيه انها بتتحداني قدام كاميرات التليفزيون قولت لازمن أوري للجميع اخرة اللي بيتحداني ايه

ميشيل: أنت فاكر رسالتك دي هتوصل .. انا خوفت على ماليا وساشا من المنظر الفظيع ده ولحد دلوقتي معرفوش حاجة

اوباما: ارجوكي ياميشيل متقولش لعيالي اللي عملتو هيقولوا على ابوهم ايه وحش كاسر

ميشيل: ياريت ده العيال لو عرفوا كده هيفقدوا فيك الثقة خالص ومش هتعرف تربيهم وسلوكياتهم ممكن تتغير للأسوء

اوباما: طيب اعمل ايه دلوقتي اصلح غلطتي ازاي

ميشيل: تصدر مرسوم رئاسي فورا وتعتذر فيه عن الحادث الاليم ده وتعتذر وتتعهد بعدم تكرار مثل هذه الافعال امام شاشات التلفاز لازم ترجع ثقة الناس فيك

اوباما: حاضر ياحبيبتي

أبو عادل الكلابجي

يافرحة ما تمت خدها ابو عادل الكلابجي وهوهو ... أكلت لحم فاااااااااااااااااااااسد ياجرعاااااااااان
بقى انا أول مرة في حياتي اتعزم على الغداء بره بيتنا .. وطبعا أبو بلاش كتر منه .. واللي يجي من الصعايدة فايدة بس

تقولوا ايه بقى ايش ياخد الريح من البلاط .. وقليل البخت بيلاقي العظم في الكرشة ..

الحكاية باختصار ان لما المؤسسة الصحفية اللي بشتغل فيها اصدرت قرار بعزومة الموظفين على الغداء في اشهر محل

كبابجي فيكي يامهندسين انا قولت بس ده اكيد مسعى جاد من قبل السلطات لعلاج الحالة النفسوية للموظف الكادح اللي

قاسى كتير من قلة الراتب والناتج عنه بالتاكيد جفاف وحرمان وقولت خلاص بقى ياجرعااااان المسامح كريم ونفتح

صفحة جديدة واكيد دي بداية العلاج للوصول للرضا الوظيفي اللي بيقول عنه الدكتور إبراهيم الفقي

وفي اليوم الموعود قولت لازمن اتأيف بقى والبس اللي على الحبل ده انا رايحة اكل كباب ومش أي كباب ده ابو

عاااااااااااااادل رحت جريت جبت الجزمة الجديدة اللي مخبياها من اختى تحت انبوبة البوتاجاز والطرحة اللي كنت

حطاها في عداد الكهرباء والخاتم النحاس اللي كنت شيلاه في سخان الحمام ولبست اللي على الحبل وكل ما حد من أصحابي ولا من العائلة يتصل بيا أقفل معاهم وأقولهم أسفه انا مشغولة جدا وعندي غداء عمل اليوم .. ونبهت عليهم في البيت انهم ينشروا في العيلة كلها اني انا عندي غداء عمل اه زي اللي بشوفهم في التليفزيون دول بيقعدوا يقولوا غداء عمل غداء عمل اشمعني انا .... المهم بعد ما اتأيفت روحت الشغل

وياأرض هدي ما عليكي ادي كل ما واحدة من زميلاتي تقابلني تقولي.. ياعم رايحة تكلي كباب ياستي حد ادك

ياباااي على القر .. ما انتو معزومين ما تيجوا انتو كمان

لا انا ابني هجيبوا من الحضانة ... لا انا رايحة مشوار .. لا انا مروحش اكل على حساب حد حتى لو كان الشغل

وبكل قلاطة رديت عليهم .. انتو الخسرانين كباب ابو عادل لا يعلى عليه واللي مش هيجي هيندم اشد الندم اشد الندم

خليكوا فاكرينها دي اشد الندم

وهوب وجه ميعاد الغداء وابتدينا رحلتنا عند ابو عادل الكلابجي واول ما وصلنا ترحيب بقى يامرحب بالصحافة يامرحب

بالعمل الالكتروني ونزل الاكل وعنيكوا ما تشوفوا الا النور مسحنا الاطباق وكمان بيبسي كانز يالهوي ده انا كده منكن

يجرالي حاجة طيب ياجماعة مش كده خلي العزومة دي يوم ويوم يعني يوم كباب ويوم كانز مش كله مرة واحدة كده وروحت البيت قعدت اغيظ فيهم وكل اللي يعدي من جمبي يقولي طفسة مش سبتلنا حتة ويبوصولي من تحت لتحت وانا

اطلع لهم لساني اتاري لساني بيطلع كتير كده لان مفعول اللحوم عالي بعد ما كلت لحم هوهو

اصل بعد العزومة دي بحوالي شهر لاقيت منشيط في الجرنال بيقول ان لحوم ابو عادل ده فاااااااااسدة ايون فاسدة شوفتوا بقى انا يوم ما اتأرعن واتعزم بره اروح أكل لحم كلاب وحمير .. ليه امال فين جمعية الرفق بالحيوان .. ده انا لما حتى

شوفت أوباما وهو بيقتل الدبانة وسابها جثة هامدة على ارض البيت الابيض زعلت اوي وقولت هي الدبانة دي مش ليها

حق تعيش وتتعايش وتقوم بدور فعال في المجتمع ولما جمعية الرفق بالدبان شجبت اللي عملوا اوباما بعد حادث مقتل

الدبانة الغلبانة دي فكرت انظم مسيرة سلمية ندين ونشجب .

وبفراسة المفتش كورمبو وحداقة حمبوزوا لاوي بوزوا قدرت احدد نوعية اللحم اللي أكلته في اليوم المشئوم ده وتحت

شعار "نحن نضحي بالحمير عشان الشعب يعيش " ، اتاكدت ان اللحمة اليل كلتها اكيد لحم كلاب وحمير لسبب وهو ان

الريش كانت عريضة وطويلة وده يدل اني تقريبا اكلت نصف حمااااااااااااار

عااااااااااااااااااااااااااااااااااااااااا

ادي اخرة الطفاسة

منك لله ياابو عادل

يوم صعب من ايامي الحلوة

ليتك تعود لحظة

ماذا لو عاد الحبيب للنور

فتراه عيني للحظة

ويخفق قلبي للحظة

وترفرف روحي للحظة

واقبل يديه للحظة

واتحدث اليه للحظة

واروي قصصي للحظة

واودعه في لحظة

ثم يختفي مرة أخرى في غمضة عين

نصائح غلاوية

الصبح وانتي رايحة على شغلك وهو لسه نايم والمفروض انه يصحي بعدك بساعتين يروح شغله هو كمان تعمدي اسقاط اى شئ او اخبطي الباب بصوت عالى علشان تصحيه هو كمان اشمعنى انتي فين المساواة ؟

لو بتتفرجي على التلفزيون وهو عايز يغير القناة قوليله معلش الحلقة دى مهمة جدا واحدة صحبتى شافتها على القناة
الفضائية وقالتى ان الحلقة دى هى المسلسل كله.

ولو كنتي بتتفرجي على برنامج للطبخ هيبقى الموضوع أسهل لان كل ما المذيعة تجيب مقدار من المقادير قوليلوا معلش
ثوانى ياحبيبي أصل المقدار ده سر الطبخة.

لو انتي عاملة رجيم وجوزك بياكل عادي زي المفجوع ومش بيراعي شعورك ونازل هم هم وعمال يشتري في حلويات
وجاتوهات قصادك ومستمتع اوي قومي عقبيه بأسبوع أكل كميائي بحجة انه صحي ومفيد وكتري في الزبادي والخيار
لحسن يموت منك.

ولو رفض ينشر معاكي الغسيل قومي بعد ما تخلصي نشر الهدوم ادخلي عليه وقوليله انا نازلة ياحبيبي اجيب هدومك
اللى وقعت منى فى الشارع وعشان تسبكي الحكاية ويحس انها مقصودة قوليله ان في فردة من شرباتك وقعت مع
هدومه علشان متبقاش مقصودة منك !

وانتي بتمسحي الارضيات فى البيت وهو مش مراعي تعبك طول النهار وعمال رايح جاي على المناطق المبلولة
وبيرغي في التليفون مع واحد صاحبه قومي حطي جاز على السيراميك يقوم هو متزحلق تقومي تتنطري وتتخضي عليه
وتقوليله سلامتك يابعلي

تاج الصحراء

جالي تاج هدية من صديقتي المدونة العزيزة بوس بوس صاحبة مدونة الروح يااااااه بقالي كتير مجليش هدية من حد

ميرسي يا بوس بوس على التاج الغريب والعجيب ده وانا هجاوبك عليه حالالالالالالا

بم ان شعاري في الحياة خير الكلام ما قل ودل فانا هجاوب باختصار على التاج

س1) لو ماشي في الصحراء تخيل احساسك هيكون ازاي ؟متصورها ازاي؟و هتعمل ايه؟

صحراء يعني رمال وشمس وذئاب هعمل ايه بقى هحاول اهرب وراء اي جبل عشان بشرتي متتاثر من الشمس امال ايه انتي عارفة انا بخاف عليها ازاي

س2)لو ماشي في غابة احساسك هيكون ايه ؟ و هتعمل ايه لو لقيت نفسك فيها؟

ماليش في المغامرات دي بس لو حصل يعني اتمنى مشوفش قدامي أسد ولا نمر ولا تعابين

س3) لو لقيت صندوق فى الصحراء هتحاول تفتحة ولا ؟ ولو فتحتة تتخيل هايكون فية اية؟

لا مش هحاول افتحه لحسن يكون فيه قنبلة .. هو العمر بعزقة

س5)لو لقيت حصان فى الصحراء تفتكر هايكون لونة اية؟ وهتركب ولا هتسيبة وتمشى؟

يااااااااااااااه حصان فينه من زمان ده انا نفسي اركب حصان اوي وخصوصا انه هيجيلي في وقت صعيب ده انا في صحراء ياناس وياريت يكون لونه تيركواز

س6) لو لقيت سلم فى الصحراء هتعمل اية؟ هتاخدة معاك ولا هتطلع ولا هاتسيبة وتمشى ولا اية؟

ممكن استعين بيه واخدوا معايا

س7) لو لقيت ماج فى الصحراء تفتكر هايكون شكلة ازاى؟ وهتعمل بية اية؟

ممكن يكون ماج فخار بس اكيد شكله هيكون وحش ومش نظيف خالص وبالتالي انا مش هلمسه

س8) لو كنت ماشى فى الغابة ولقيت أسد هتعمل اية؟ هاتجرى ياترى؟ ولا هتهاجم ؟ ولاهاتقف مكانك ولا اية؟

لا انا ولاهجري ولا هعمل اي حاجة لاني مش هلحق انا هيغمى عليا او ممكن اموت من الخضة

س9) لو مشيت فى الغابة ولقيت بحيرة ياترى فى تخيلك هاتكون شكلها عامل ازاى؟ وهتعديها ولا ؟

ياااااااااه بحيرة في الغابة اكيد هترعب اكتر من كتر التماسيح اللي هتكون فيها

س10) لو شفت سور فى الصحراء على شرط انة مرتفع قوى وطويل قوى قوى هتعمل اية ؟ هتمشى معاة وتشوف اخرة؟ ولا هتحاول تكسرة ولا هتعمل اية؟

خير .. مش انا معايا سلم من الاول هطلع عليه بقى واكيد هشوف العالم والبشر

هيييييييييييييييييييييييييييييهها
ويبقى جيم أوفرررررررررررررررررررر

الحقوا الميكروباص هينفجر

امبارح بعد انتهاء العمل خدت شنطتي وفوريرة على البيت بس حصلي موقف طريف اوي لحد دلوقتي مش قادرة امسك

نفسي من الضحك عليه كنت راكبة الميكروباص لابيا ولا عليا وماشي عادي في امان الله وفجأة لاقينا سواق

ميكروباص بيجري ورانا

وبييييييييييب بيييييييييييب

الحق العربية بتولع

وهوب راح سواقنا ركن على جمب في فزع ونزل يجري قوم اللي جامبو يجري هو كمان يجري ويقول

يلا ياجماعة اجروا الميكروباص هينفجر

يالهوي هينفجر .... مفيش موته تانية ياولاد غير دي مش عايزة بشرتي تتأثر ولاتتشوه

قوم هوب الناس كلها طلعت تجري من الميكروباص بفزع رهيب ويكأننا في العراق

وأنا طبعا مش أحسن من حد وياروح ما بعدك روح مش كفاية قناة الجزيزة اللي قاعدة بسمعها ليل ونهار

وخصوصا اني في اللحظة دي افتكرت حديث بيني وبين احدى زميلاتي في العمل ان العربية ممكن توصل لمرحلة معينة

لما النار توصل لتانك البنزين في الحالة دي العربية بتنفجر فعلا انا بقى افتكرت كده ومفيش قدامي غير صورة

اشلاء .. ساعتها بقى كان هاين عليا انط من الشباك بس للاسف الشباك مقاسه يدوب يجيب رضيع ست شهور

المهم انا اصلا كنت قاعدة في الكرس اللي في النص جمب الشباك اللي ورايا واللي قدامي كلوا جري قوم ايه الراجل اللي

جمبي مش راضي ينزل

ويقولي اهدي ياانسه

اهدي ايه بس انزل

اهدي بس مفيش حاجة

يووووه انزل الميكروباص هينفجر

هينفجر ايه بس دي حاجة بسيطة

ياعم انت سايب الناس كلها وجاي عليا انا تقولي اهدي حاجة بسيطة اوعى كده نزلني

وكل الكلام ده وانا شكل القنبلة بتاعت فيلم بطل من ورق في دماغي وبعد الثواني وبعدها القنبلة هتنفجر واحد اثنين ثلاثة

اربعة قومت هوب خبط الراجل بالشنطة بتاعتي عشان يقوم وينزلني

وقولته انزل بقى يااخي العربية هتنفجر

وطبعا ركبي وقلبي بيخبطوا جامد ، وانا نازلة كانت رجلي تحت والرجل التانية لسه جوه العربية كنت بدعي متنفجرش

غير لما رجلي التانية تنزل واخدها معايا

وفعلا نزلت وجريت مع الناس كلها بعيد

خدلك سااااااااااااااتر

والكل خدلوا ساتر

وبعدين نلاقي عريض من البشر اتلموا على الميكروباص وفطسانين على نفسهم من الضحك والعربية مفهاش حاجة دي

سخنت بس وشربوها ماية

وبعدين السواق قال ياجماعة تعالوا اركبوا مفيش حاجة انا بقى ساعتها كنت هموت من الضحك والكسوف من الراجل

اللي كان قاعد جمبي ولمحته من بعيد بيبصلي وهيموت من الضحك على اللي انا عملتوا فيه وطلعنا العربية تاني وركبت

مكاني والراجل اللي خبطتوا بشنطتي قعد جمبي من جديد والتزمت الصمت مع لوحة دماغي في الشباك عشان اداري

كسفتي يالهوي ده انا كنت هموت الراجل ولو كان معايا مطوه كان زمانهم طلبوني في المحكمة الجنائية الدولية

والحمد لله وصلنا في سلام وأمان

يلا مش مهم بقى المهم حمد لله على سلامتي

يوم من ايامي الحلوة