مطلوب وظيفة

شغل ياولاد الحلال

باختصار مفيش قبض

باختصار القبض بالتقسيط

والقسط مش مربح

والديون كترت

يبقى ايه الحل في سمن اميرة

ولا بلاش اميرة لحسن جوزها يموتنا

الحل في البحث عن عمل جديد

فييييييييييييييييييييييييييييييين

فكرت اروح اشتغل في محل كوافير حريمي واهيص بالتبس قالولي حرام قولت محجبات ياولاد قالولي حرام بردو

فكرت اشتغل في مكتبة وابيع ادوات مدرسية قالولي وزير التربية والتعليم مبهدل الدنيا ومانع اي حاجة ليها علاقة بالدراسة تتباع بره الوزارة

فكرت اشتغل مديرة منزل واهو يبقى منصب بردو انا عمري ما وصلت في عملي الصحفي لدرجة مدير قالولي مش هتقدري دي شغلانة عايزة ناس مصحصحة ومدقدقة

فكرت اروح الم الكور من الملعب بتاع نادي الصيد قالولي ظهرك هيوجعك واحتمال يجيلك الغضروف

طيب اجيب شوية بيض واسلقهم وحبة جبنة واقعد بيهم قدام الشركة ابيعهم قالولي مش هتلاقي حد يشتري منك حاجة الناس مفلسة

اممممممممممممممممممممممممممممم اعمل ايه محدش عنده شغل

مستنياك

وحشتني اوي اكيد انا وحشتك كل يوم بستناك تيجي في الحلم مش بتيجي ليه مش بتيجي انا بخاف اكون عملت حاجة

زعلتك

اصلهم بيقولوا ان الاموات بتحس باللي بنعملوا

بس هو انت مت فعلا

عارف لما جيتلي في الحلم وانت في صندوق ونايم تحت سريري وانا طلعتلك من الصندوق وقعدت اهوي عليك واقولك

قوم اتنفس اتنفس وانت تقولي انا كويس تعبت اوي من الحلم ده عشان خاطري بلاش تجيلي وانت في صندوق تاني

في حاجات كتيرة عايزة اخد رايك فيها

صحيح انت اديتني رايك في خطيبي لما سألتك في الحلم ورديت عليا

وانا عملت زي ما قولتلي ووافقت عليه وطلع زي ما انت قولتلي انه اد المسؤولية

عارف انا كنت متاكدة انك هتوافق عليه عشان انا كنت موافقة لاننا دايما رأينا وتفكيرنا زي بعض

عارف كمان طلع فيه منك حجات كتيرة اوي

بس تصدق بخاف

بس عادي انا كده من ساعة مع مت بخاف دايما

بحس ان كل الناس اللي بحبها هتموت وتسيبني مع اني عارفة بردوا اني ممكن انا اموت في اي وقت

بس تعرف كمان انا مفيش حد حنين عليا ادك

على فكرة انا غيرت اوضتي ودلوقتي بنام في اوضتك وعلى سريرك

محتاجة وجودك معايا حتى خمس دقايق

محتاجة طبطبتك عليا

محتاجة حضنك أبكى فيه وساعتها هحس اني ارتحت هنسي كل اللي حصل ليا فى غيابك

وحشتني اوي هستناك تجيلي في الحلم بقى

نصائح زوج مدمن

نصائح زوج مدمن لكرة القدم

يقول الرجل لزوجته .. إيماناً مني بقدسية الحياة الزوجية وأهمية إبعادها عن كل ماينغصها ويكدر صفوها ..أقدم لك

نصحية من القلب عن كيفية التعايش، في فترة كأس العالم ..لكي نخرج بأقل الأضرار ..وهذه نصائح زوجك المحب ..

في الفترة ما بين 11 يونيو حتى 11 يوليو الطريقة الوحيدة الممكنة لفتح حوار بيننا، هو أن تقومي بمتابعة

الصحف الرياضية وأخبار المونديال ، فبهذه الطريقة فقط يمكننا أن نتشارك في الحوار .. وأي كلام خارج هذا النطاق

سأضطر آسفاً لعدم الرد عليه وهو ماسيزعجك ..

اذا اردتي ان تمري امام التلفاز خلال المباراة، أو قبلها أو بعدها فاني لا امانع أبدا طالما يتم ذلك زحفا على الأرض،

مثل رجال الكوماندوز في الحرب العالمية

خلال المباريات يجب ان تعلمي انني..لا أرى ولا اسمع ولا اتكلم، الا اذا احتجت منك طعاما أو شرابا، ولن اوافق

على سماع جمل مثل: رد علي الهاتف، احضر لنا طعاما من السوبر ماركت أو افتح الباب،او اريد الذهاب الي بيت

اهلي،والا سوف تذهبين الى الابد

يارب استجيب لحودة دعوته

أخي محمود ذات الستة أعوام همه كبير في الحياة

ذهب محمود لصلاة الجمعة مع اخيه الاكبر مرتديا جلبابه الابيض وقبعته البيضاء وغاب ساعتين كاملتين عن المنزل الى ان عاد سالما غانما ليقوم بخلع ملابس الصلاة مرتديا ملابس الفرنجه وهي عبارة عن شورت جينس وتيشريت احمر

فسألته .. عملت ايه ياحودة في الجامع؟

فرد قائلا .. صليت

دعيت ربنا وانت بتصلي

دعيت ربنا كتير ورفعت ايدي لفوق

فزاد فضولي .. ودعيت ربنا قولت ايه؟

رفعت ايدي وقولت بصوت عالي يارب يارب يارب حد يفتكر من اخواتي وينفخلي كاوتش العجلة عايز العب في الشارع!!!

فهنا صمت دقيقة ثم انفجرت ضحكا فزاد فضولي اكثر مدعتش ياحودة اي دعوة تانية؟

فرد وملامحه تبدو عليها الهم والاسى .. انا بس عايز من ربنا حاجة واحدة بس حد ينفخلي كاوتش العجلة!!!

هنا شعرت كم اخي الصغير في هم وأسى وحزن عميق دون ان يشعر به أحد فجميعا لانعي أي اهتمام بما أصاب دراجته التي يعتبرها بمثابة الحياة له وتمثل له أهمية وجودة على الارض

محمود .. ليت كل هم الدنيا نفخ كاوتشات العجل

جومانة وصلت بالسلامة

يعلن سجل مواليد شبكة الإعلام العربية "محيط" انضمام عضو جديد إلى دفاتره الا وهي سليلة الحسب والنسب الأنسة

جومانه أسامة عبدالرحيم وذلك عشية الاحتفال بعيد تحرير سيناء لتثبت للجميع أن يوم ولادتها يوم تاريخي عريق لن

ينساه أحد ، خاصة قسم الخارجي الكائن في الدور الثالث بالمهندسين وطبعا العنوان ده للي عايز يبعت أي هدية او

نقطة للمولودة الجديدة ، وبما ان هذا القسم العريق هو من تابع لحظة بلحظة وصول الأنسة جومانه التي كانت تقطن

بكرش والدتها الاستاذة أميرة محمد ذكي ، والتي قامت بصرخة واحدة يلا يابنتي بقى تعالي خليني أخلص وأخد أجازة

وأمشي من وش العيال دول اللي بيذلوني طول النهار ويقولولي ياأم كرش ، لتأتي جومانة بصرختها لتقول عايزين مني

ايه انا مرتاحة كده ويأخذها والدها باحضانه ليعلن ان يوم ولدتها يوم تاريخي واللي هيستعبط ومش هيفتكر عيد

ميلادها ويجيب لها هدية فيه يبقى ياويله

ونيجي للجد بقى تهنئة جامدة اوي اوي اوي للاستاذ الصحفي أسامة عبدالرحيم والاستاذة الصحفية أميرة محمد ذكي

لوصول الانسة جومانة يارب تتربى في عزكم ويجعلها ذريتكم الصالحة

اه يارجلي

اه يارجلي
ده مش مطلع اغنية ده انا بتوجع
اي والله بتوجع
اصلي خير اللهم اجعله خير خرجت من الشغل انا وانتكتي اللي طبعا بدعيلها من كل قلبي بالرحمة والمغفرة واتغذينا بره غدوة معتبرة تملى بطن الأسد ولاني كنت عاملة رجيم فاشل وبوظته جتلنا فوكيرة مهببة وهو اننا نمشي من محطة البحوث للدقي وبالفعل تمقوم اول ما نوصل للدقي انتكتي تقولي دي محطة الاوبرا اهيه قربت تعالي نكمل قولت ومالو خلي الاكل اللي كلتوا يطحن ويطلع على شكل سعرات عرقية وطول ما انا ماشية حاسة برعشة في رجلي وتمزق في ركبي
فين يابنتي المترو
قربنا المترو هنااااااااااااااااااااااااااااااااااااااااااك اهوه
مش شيفاه فين ده
يابنتي والله هنااااااااااااااااااك عند الاوبرا
وفعلا جينا عند الاوبرا فين المترو يابنتي رجلي خلاص موش قادرة
انتي جرالك ايه قولتلك عند الاوبرا
الله مش دي الاوبرا
لاطبعا دي رأس الاوبرا
ياسلالالالام راس الاوبرا هما سابوا راسها هنا وجسمها في مكان تاني
والاقي نفسي بنعدي كوبري وراء كوبري وراء كوبري
هوم هوب لاقينا أسدين قصر النيل
يالهووووي احنا رحنا حديقة الحيوان ولا ايه

لايافالحة دول أسدين قصر النيل خطوتين خلاص ونبقى في التحرير
اشوف فيك يوم ياظالمة
التحرير تمشيني من المهندسين للتحرير يامفترية
واللي طالع علينا نبص لبعض ونضحك والضحك بينزل دموووع .. دمووع الوجع بعيد عنكم
انا بقى مش فيا حيل للكلام ولا شايفة حاجة قدامي نظرا لسخونة الجو .. حكم الجو كان نار ياحبيبي ناااااار
هوم هوب نوصل للمترو وننزل تحت ونلاقي نفسنا قدام ماكينة تذاكر اتجاه المرج
انتكتي بنبرة حزن وخيبة امل يالهوي احنا لسه هنمشي جوه تاني

يلا امشي يافالحة

قعدنا نلف جوه المترو عشان نوصل لاتجاه حلوان والحمد لله ركبنا ولاقينا كراسي نقعد عليها وكل واحدة فينا تبص للتانية وتضحك وتفرك في رجليهاوالناس يتفرجوا علينا ولولا سترة عربة السيدات الله يستر من اخترعها كان زمان مصر كلها عندها علم باللي جرالنا
المهم انا تقريبا جاتلي غيبوبة ونممممممممممت وصحيت بقول أحد أحد ماية ماية ادوني ماية
ربنا يخليكي ليا ياانتكت السعد والهنا وربنا مايحرمني من أفكارك الجهنمية أبداااااا

الصمت

عندما لانبكى على أحزاننا

فهذا لا يعنى أننا فقدنا الإحساس

بل أحزاننا كثرت علينا

فلم نجد دموعاً تعادلها

فإكتفينا بالصمت