للبنات فقط

عشان تقدري تعيشي حياتك وأنتي مبسوطة من غير ما حد يقدر يعكر عليكي صفو أيامك الحلوة يجب اتباع الاتي:

دايما تبقى شايلة أسلحتك في الشنطة وانتي خارج المنزل" دبوس مسمار شاكوش كعب جزمة رفيع"

لما تركبي الميكروباص أي راجل يقعد جمبك تخدي حذرك وتحطي الشنطة بينك وبينه ولو بوق فيها وشخط وقالك انتي فاكره نفسك ايه أنا أقرف أبصلك قومي اديله بالشاكوش في دماغه

ولو حد فكر يمد إيده وأبتدي يتحرك روحي جايبة الدبوس وأرشقيه في عينه ولا أقولك بلاش خليها في أيده مش عايزين نروح القسم

كمان لما تيجي نازلة من الميكروباص انزلي بسرعة لحسن السواق يزعل منك ويفضل يشتم ويلعن اليوم اللي أبوه طلعوا فيها سواق

لما تيجي تعدي الشارع متتسرعيش وتعدي بسرعة.. اصبري لحد ما أي سواق يرفق بيكي ويكون عنده دم ويعديكي

ولو ناوية تركبي مترو الانفاق حضري الكمامة عشان انفلونزا الخنازير مسبتش لانفلونزا البني أدمين حاجة

ولو قاعدة وشايفة أي واحدة شايله عيل أوعي تخديه منها وتقعديه على رجليكي هتندمي قومي أحسن بكرامتك وقعديها هيه وابنها

نصيحة مهمة .. حطي قطن في ودانك طول ما أنتي راكبة المترو عشان متتفرسيش وأنتي بتسمعي بنات الجامعة وحكاويهم اللي كلها عن فرقعت كام واحد والدكاترة والمعيدين اللي بيجروا وراها .. اضربيها طناااش

الـ26

بعد ما اتفقت مع دكتور السنان ودفعت عربون لصناعة طقم جديد لاشناني ايون اشناني بالشين على اعتبار اني هصحى

انهرده الاقي كل سناني مخلعة

ده غير اتفاقي مع حلاق منطقتنا على صناعة باروكة لونها اسود غامق بعد ما شعري يطقطق ويبيض

بالاضافة الى نيتي لصناعة نظارة كعب كوباية انقي بيها الرز

ده غير اني استغربت اوي ان صحيت من النوم فاكرة كل ده وان مرض الزهايمر لسه مااصابنيش

هييييييييييييه اسمعوا وعوا

انا عيد ميلادي جه

بمممممممممممممممممممم بمممممممممممممممممممممم

دي متفجرات لعبة لزوم العيد ميلاد

كل سنة وانا طيبة

انا لسه سناني بالسين

وشعري مبيضتش

وذاكرتي حديد

والله اكبر الله اكبر

نظري ستة على ستة

معركة الخيار

اه يانا ياقليلة البخت مع البياعين .... الحكاية بكل بساطة اني في يوم من ايامي الحلوة رحت اشتري خيار لوازم السلطة

ودخلت السوق وانا كلي احساس بثقتي في ميولي المنزلية المطبخية وحظي وداني عند بياع خيار شكلوا واخد علقة

سخنة من مراته قبل ما ينزل عمال يكلم نفسه ويلعن في كل ما هو مؤنث على وجه الارض قولت يابت انتي مالك ادخلي

بقلب جامد واشتري اللي انتي عايزاه وخلاص ولما قربت للخيار اللي بيبيعه وابتديت انقي لاقيت ده بيزعق ويقول الله

يلعن اليوم اللي طلعت فيه بياع خيار ... قولت عادي يمكن كان نفسه يبيع مانجو بس مجبش مجموع عالي .... الله

يخربيت كل الستات .. قولت عادي مش مهم ده اكيد يقصد ستاته اكيد متجوز اربعة ماهو اللي يبقى بالمنظر ده اكيد

متجوز كذا واحدة ...... انا هقلب العربية دي ... قولت ومالو اكيد هيقلبها عربية كبدة أو بليلة.. الرزق يحب الخفية

وبعدين فجأة لاقيته شد مني الكيس اللي بنقي فيه الخيار ويقولي هاتي مش هبيعلك انتي لسه بتتعلمي ولا ايه شكلك جاية

تتعلمي فينا .. انا بقى تنحت واتخضيت وقولتله في ايه قالي في ايه .. مش هبيعلك انا مش هبيع لاي ستات حاجة

خلاص امشي امشي امشي الراجل انهار وانا مخضوضة فاكتفيت اني اقوله .. ايه قلة الادب دي ومشيت وانا قولت كده

وعنيكم ماتشوف الا النور فضل لحد ما خرجت من السوق وهو عمال يقول جملة واحد هو انتي طول ما انتي لابسة

النظارة دي هتفلحي .. عااااااااااااااااا بغض النظر عن الفضيحة اللي حصلت واللي كان ممكن على اثرها ابقى في تعداد

الاموات ويقوم يديني بخنجر اي فكهاني موز وابقى ساعتها "شهيدة الخيار" ازاي يعيب في النظارة بتاعتي دي تاسع

نظاره اشتريها يقوم في الاخر يقولي طول ما انتي لابسه النظارة دي مش هتفلحي ماهو لو يعرف اني مش بيعيش ليا

نظارات وان النظارة دي جت بعد شوقة مكنش جرحني بالكلمة دي .. وبعدين هو فاكرها نظارة ايه دي نظارة شمس

ياناس يعني مش نظارة لحام .. عامة انا مسمحاه في الفضيحة اللي عملهالي في السوق بس مش هسامح في حق

نظارتي ...

أيامنا حلوة

وراء كل أوباما ميشيل

ميشيل: ليه ضربت الدبانة

اوباما: اهدي ياحبيبتي دي دبانة مالك منزعجة ليه

ميشيل: اهدى ازاي انت جرالك ايه معندكش قلب تضرب دبانة مسكينة

اوباما : اعملها ايه بس قعدت تزن فوق راسي تزن فوق راسي تزن فوق راسي

ميشيل: كنت هشيتها

اوباما: قعدت اقولها هش متهشتش هش متهشتش هش متهشتش

ميشيل: كنت حاول مرة تانية

اوباما: حبيبتي انتي شاغله نفسك ليه بالموضوع ده دي حتة دبانة لاراحت ولاجت

ميشيل: يعني ايه حتة دبانة مش روح دي مش انثي دي مش ليها زوج وعيال وعيلة انت اتغيرت اوي مكنتش كده يااوباما

اوباما: حبيبتي انا مكنش قصدي خالص صدقيني ومجاش في بالي كل اللي بتقوليه ده

ميشيل: يعني ايه مفكرتش عجبك كده منظمة حقوق الدبان لما تقلب علينا وتبعتلنا كل الدبابين اللي عندها تقتحم علينا البيت الابيض

اوباما: أخخخخخخخ تصوري مجاش في بالي خالص أنا كل اللي حسيت بيه انها بتتحداني قدام كاميرات التليفزيون قولت لازمن أوري للجميع اخرة اللي بيتحداني ايه

ميشيل: أنت فاكر رسالتك دي هتوصل .. انا خوفت على ماليا وساشا من المنظر الفظيع ده ولحد دلوقتي معرفوش حاجة

اوباما: ارجوكي ياميشيل متقولش لعيالي اللي عملتو هيقولوا على ابوهم ايه وحش كاسر

ميشيل: ياريت ده العيال لو عرفوا كده هيفقدوا فيك الثقة خالص ومش هتعرف تربيهم وسلوكياتهم ممكن تتغير للأسوء

اوباما: طيب اعمل ايه دلوقتي اصلح غلطتي ازاي

ميشيل: تصدر مرسوم رئاسي فورا وتعتذر فيه عن الحادث الاليم ده وتعتذر وتتعهد بعدم تكرار مثل هذه الافعال امام شاشات التلفاز لازم ترجع ثقة الناس فيك

اوباما: حاضر ياحبيبتي

أبو عادل الكلابجي

يافرحة ما تمت خدها ابو عادل الكلابجي وهوهو ... أكلت لحم فاااااااااااااااااااااسد ياجرعاااااااااان
بقى انا أول مرة في حياتي اتعزم على الغداء بره بيتنا .. وطبعا أبو بلاش كتر منه .. واللي يجي من الصعايدة فايدة بس

تقولوا ايه بقى ايش ياخد الريح من البلاط .. وقليل البخت بيلاقي العظم في الكرشة ..

الحكاية باختصار ان لما المؤسسة الصحفية اللي بشتغل فيها اصدرت قرار بعزومة الموظفين على الغداء في اشهر محل

كبابجي فيكي يامهندسين انا قولت بس ده اكيد مسعى جاد من قبل السلطات لعلاج الحالة النفسوية للموظف الكادح اللي

قاسى كتير من قلة الراتب والناتج عنه بالتاكيد جفاف وحرمان وقولت خلاص بقى ياجرعااااان المسامح كريم ونفتح

صفحة جديدة واكيد دي بداية العلاج للوصول للرضا الوظيفي اللي بيقول عنه الدكتور إبراهيم الفقي

وفي اليوم الموعود قولت لازمن اتأيف بقى والبس اللي على الحبل ده انا رايحة اكل كباب ومش أي كباب ده ابو

عاااااااااااااادل رحت جريت جبت الجزمة الجديدة اللي مخبياها من اختى تحت انبوبة البوتاجاز والطرحة اللي كنت

حطاها في عداد الكهرباء والخاتم النحاس اللي كنت شيلاه في سخان الحمام ولبست اللي على الحبل وكل ما حد من أصحابي ولا من العائلة يتصل بيا أقفل معاهم وأقولهم أسفه انا مشغولة جدا وعندي غداء عمل اليوم .. ونبهت عليهم في البيت انهم ينشروا في العيلة كلها اني انا عندي غداء عمل اه زي اللي بشوفهم في التليفزيون دول بيقعدوا يقولوا غداء عمل غداء عمل اشمعني انا .... المهم بعد ما اتأيفت روحت الشغل

وياأرض هدي ما عليكي ادي كل ما واحدة من زميلاتي تقابلني تقولي.. ياعم رايحة تكلي كباب ياستي حد ادك

ياباااي على القر .. ما انتو معزومين ما تيجوا انتو كمان

لا انا ابني هجيبوا من الحضانة ... لا انا رايحة مشوار .. لا انا مروحش اكل على حساب حد حتى لو كان الشغل

وبكل قلاطة رديت عليهم .. انتو الخسرانين كباب ابو عادل لا يعلى عليه واللي مش هيجي هيندم اشد الندم اشد الندم

خليكوا فاكرينها دي اشد الندم

وهوب وجه ميعاد الغداء وابتدينا رحلتنا عند ابو عادل الكلابجي واول ما وصلنا ترحيب بقى يامرحب بالصحافة يامرحب

بالعمل الالكتروني ونزل الاكل وعنيكوا ما تشوفوا الا النور مسحنا الاطباق وكمان بيبسي كانز يالهوي ده انا كده منكن

يجرالي حاجة طيب ياجماعة مش كده خلي العزومة دي يوم ويوم يعني يوم كباب ويوم كانز مش كله مرة واحدة كده وروحت البيت قعدت اغيظ فيهم وكل اللي يعدي من جمبي يقولي طفسة مش سبتلنا حتة ويبوصولي من تحت لتحت وانا

اطلع لهم لساني اتاري لساني بيطلع كتير كده لان مفعول اللحوم عالي بعد ما كلت لحم هوهو

اصل بعد العزومة دي بحوالي شهر لاقيت منشيط في الجرنال بيقول ان لحوم ابو عادل ده فاااااااااسدة ايون فاسدة شوفتوا بقى انا يوم ما اتأرعن واتعزم بره اروح أكل لحم كلاب وحمير .. ليه امال فين جمعية الرفق بالحيوان .. ده انا لما حتى

شوفت أوباما وهو بيقتل الدبانة وسابها جثة هامدة على ارض البيت الابيض زعلت اوي وقولت هي الدبانة دي مش ليها

حق تعيش وتتعايش وتقوم بدور فعال في المجتمع ولما جمعية الرفق بالدبان شجبت اللي عملوا اوباما بعد حادث مقتل

الدبانة الغلبانة دي فكرت انظم مسيرة سلمية ندين ونشجب .

وبفراسة المفتش كورمبو وحداقة حمبوزوا لاوي بوزوا قدرت احدد نوعية اللحم اللي أكلته في اليوم المشئوم ده وتحت

شعار "نحن نضحي بالحمير عشان الشعب يعيش " ، اتاكدت ان اللحمة اليل كلتها اكيد لحم كلاب وحمير لسبب وهو ان

الريش كانت عريضة وطويلة وده يدل اني تقريبا اكلت نصف حمااااااااااااار

عااااااااااااااااااااااااااااااااااااااااا

ادي اخرة الطفاسة

منك لله ياابو عادل

يوم صعب من ايامي الحلوة

ليتك تعود لحظة

ماذا لو عاد الحبيب للنور

فتراه عيني للحظة

ويخفق قلبي للحظة

وترفرف روحي للحظة

واقبل يديه للحظة

واتحدث اليه للحظة

واروي قصصي للحظة

واودعه في لحظة

ثم يختفي مرة أخرى في غمضة عين

نصائح غلاوية

الصبح وانتي رايحة على شغلك وهو لسه نايم والمفروض انه يصحي بعدك بساعتين يروح شغله هو كمان تعمدي اسقاط اى شئ او اخبطي الباب بصوت عالى علشان تصحيه هو كمان اشمعنى انتي فين المساواة ؟

لو بتتفرجي على التلفزيون وهو عايز يغير القناة قوليله معلش الحلقة دى مهمة جدا واحدة صحبتى شافتها على القناة
الفضائية وقالتى ان الحلقة دى هى المسلسل كله.

ولو كنتي بتتفرجي على برنامج للطبخ هيبقى الموضوع أسهل لان كل ما المذيعة تجيب مقدار من المقادير قوليلوا معلش
ثوانى ياحبيبي أصل المقدار ده سر الطبخة.

لو انتي عاملة رجيم وجوزك بياكل عادي زي المفجوع ومش بيراعي شعورك ونازل هم هم وعمال يشتري في حلويات
وجاتوهات قصادك ومستمتع اوي قومي عقبيه بأسبوع أكل كميائي بحجة انه صحي ومفيد وكتري في الزبادي والخيار
لحسن يموت منك.

ولو رفض ينشر معاكي الغسيل قومي بعد ما تخلصي نشر الهدوم ادخلي عليه وقوليله انا نازلة ياحبيبي اجيب هدومك
اللى وقعت منى فى الشارع وعشان تسبكي الحكاية ويحس انها مقصودة قوليله ان في فردة من شرباتك وقعت مع
هدومه علشان متبقاش مقصودة منك !

وانتي بتمسحي الارضيات فى البيت وهو مش مراعي تعبك طول النهار وعمال رايح جاي على المناطق المبلولة
وبيرغي في التليفون مع واحد صاحبه قومي حطي جاز على السيراميك يقوم هو متزحلق تقومي تتنطري وتتخضي عليه
وتقوليله سلامتك يابعلي