أنا والمدونين

ياااااااه الامتحانات ابتدت اعمل ايه بس مذكرتش اي حاجة خالص ومش لاقيه وقت اذاكر فيه والامتحان بكرة يعني غدا من الاخر الامتحان توموروووووووووووووووو ...

يالهووووووووووووي دماغي صدعت اعمل ايه اعمل ايه فضلت دايخة كده ومن كتر دوخاني وقعت واترميت على الديسك توب قومت بسرعة قبل ما اتخبطت في اي ايقونة

قلت طب ما انا اخبط على صفحة النت اكيد صاحية عشان الامتحانات .. قومت دخلت على مدونتي أيامنا الحلوة قعدت أبص على بوستاتي وعنيه مدمعه .. اعمل ايه يابوستاتي مش عارفة اذاكر ومش لاقيه اي ملخصات عشان الحق اجمع اي حاجة .. قلت اجرب كده واروح اشتكي لسمسم في بيتوا القديم واقولوا على اللي جرالي واني معنديش القدرة على القراية راح سمسم كتر الف خيروا وعدني بمذكرة من سطر واحد هتتباع على باب مدونتوا.. قلت الحمد لله اتحلت .. وخير الكلام ما قل ودل وسطر واحد هينفع برضوا اي سؤال اكتب السطر ده والسلام ..

وبعدين قعدت ادور على ادوات الامتحان القلم والمسطرة والاستيكية .. وجه في دماغي علطول اخد من مدونة اكتب بالرصاص القلم بتاعو انا عارفة انو مش هيعزوا عليا بس تراجعت على اخر لحظة قولت خليني ماشية جمب الحيط لحسن اسقط مينفعش اكتب بالرصاص في الامتحان اروح في داهيه وممكن .. اروح في الرجلين .. والامر ما يسلمش البلد مكهربة اليومين دول

وبعدين قعدت ادور على اجندة اتسند عليها كده واراجع فيها .. قلت لو كنت طلبت من البنوتة المجنونة حبتين اجندتها الحمرا كانت هتبعتهالي على الايميل في السريع بس للاسف اللون الاحمر مينفعش في الامتحانات ممكن اروح في داهيه بس لو كانت الاجندة سوداء ولا زرقا مش كانت نفعتني دلوقتي.. يلا بقى ملناش نصيب

طب وبعدين قلت اروح اخبط على مدونة جروووووووم يمكن الاقي عندو اي حاجة تنفعني .. لقيتوا مش فاضي بيدور على عروسة وتايه على الاخر ال ايه عايز يتجوز ..

طب اروح فين ولا اجي منين ياربي قولت اروح لمدونة برويد بس اروح ازاي ده الراجل كان معتزل التدوين ولسه راجع بلاش ادوش دماغوا بقى خلي عندي دم ....

قلت مفيش غيرها أميرة البلطجية اروح احتمي في مملكتها الصغيرة واحكيلها أزمتي يمكن تبعت حد من حراسها يمتحن بدالي ولا حاجة .. بس رجعت تاني لقيت على باب مدونتها حراس ماسكين مطاوي وسكاكين ومناشير وحجات كده قلت أرجع أحسن يفتكروني من حزب معارض ويعتقلوني ..

وبالصدفة كده لقيت أبو العربي يتحدث قدامي قلت احكيلوا على المشكلة اللي أنا فيها دي .. يمكن الاقي عندو حل .. لقيتوا بيقولي انا ضد الظلم .. ولازم أوصي عليكي الامم المتحدة واخلي كونداليزا رايس تراقب عليكي في اللجنة وتوزع عليكم براشيم في الامتحان كمان .. قلتلوا اشمعنى رايس يابو العربي قالي اصل ساركوزي بتاع فرنسا مرشحهالو عروسة .. من الاخر جواز صالونات يعني .. بيني وبينكم .. حسيت انو بيفشر عليا .. قلت شوية شوية بقى يقولي ان الريس اتنازل عن الحكم .. وابتسامة عريضة كده معناها بطل فشر بقى يابو العربي ده امتحان مش لعبه امتحااااااااان .. وخلعت منو ..

مكدبش عليكم فكرت اروح عند سندباد يمكن يطلعني في مغامرة من مغامراتو ويخرجني من المود ده .. بس للاسف لقيتوا غرقان في أحزانو مع بوستاتو .. وبصراحة انا مش ناقصة انا فيا اللي مكفيني

وأخر ما طهقت قلت طب اروح لطهقان وطهقانة اشكي لهم طهقي وبعدين قلت لا دول اصلا هيعقدوني في عيشتي ومش هطلع منهم بمفيد لانهم معقدين ازاي اروح احكي طهقي لطهقانين ..

يوووووووو بقى طب اعمل ايه مفيش قدامي غير انتختي أميرة دي اللي هتطلعني من اللي انا فيه ..بس أميرة دي بقى مش بلطجية .. روحت جريت عليها .. واقترحت اخدها نغير جو كده ونتمشي في مدونتها على الطريق يمكن نفسيتي ترتاح شوية .. بس لقيتها مش فاضية ال ايه رايحة للخياطة تفصل طقم جديد.. وهو ده وقتوا دا احنا في امتحانات ياعااااااااااالم

واخر ما احترت ملقتش قدامي غير انتكتي التانية قلوب حائرة قدامي قولتلها شوفتي اللي انا فيه ورايا امتحان بكره ومذكرتش اي حاجة خالص اهئ اهئ اهئ .. قالتلي متقلقيش انما الاعمال بالنيات انتي صفي قلبك كده وتوكلي على الله .. واكتبي اللي يجي في دماغك .. قولتلها ونعمه بالله ..

وبعدين مرة واحدة كده لقيت في وشي مدونة مش أنا بتاعت علاء دخلت لقيت أدعية حلوة اوووووووي وفعلا لما قريت الادعية دي هديت على الاخررررررررر

وفجأة سمعت صوت معتادة اسمعوا كل يوم ده صوت ميييييييييييين؟

شيريييييييييين انتي يابنتي قومي بقى بقالي ساعة بصحيكي قومي يلا صلي الفجر والحقي انزلي على شغلك .. هتتأخري .. ايه ياماما ده انا اتأخرت على الامتحان ولا ايه .. امتحان ايه يابنتي انتي بتحلمي بالامتحانات ولا ايه انتي مش خلصتي دراسة الحمد لله ..

وجهي يبدو عليه علامات التعجب
ايه ده هو انا خلصت دراسة بجد ياماما ولا بتهزري !!!!!

نعم في ايه مالك ياحبيبتي انتي سخنة ؟

ايييييييييييييييييه صحييييييييييييح انا دا أنا خلصت دراسة ومتخرجة بقالي سنتين .. انا الظاهر كنت بحلم ..

ياربي .. كل سنة في توقيت الامتحانات ده بتجيلي حالة نفسية غريبة وهي الرهبة من الامتحانات مع اني خلصت خلاص الحمد لله..
ده لو كان عليا امتحان بجد وانا على الحالة دي أكيد كنت هبقى في خبر كان ..
ابتسامة عريضة لان الحكاية طلعت حلم مش حقيقة ومفيش امتحااااااااااان .. هييييييييييييييييييييييييييييييه!!

الاتوبيس

يلا يلا يلا بسرعة الاتوبيس جه .. حاسب لو سمحت سبني اركب انا الاول مش تذوق كده .. ايه ده اوف .. اوعي كده يااخي ..ياااه الحمد لله لحقتلي كرسي قبل ما الدنيا تتزحم ..

ايه الهنا الي انا فيه ده انا راكبه الاتوبيس وقاعده كمان عمار يامصر !!!يلا ياعم السواق اطلع بقي الله يكرمك عايزيين نلحق معاد الشغل ...

ايه الزحمة دي اوف هو مفيش غير الاتوبيس ده في البلد دي ولا ايه..يلا اهي توصيلة والسلام ..يادي النيلة في ايه انا راكبة سحلفة مال السواق مش قادر يزوق ولا ايه ..

شد حيلك شوية ياعم انا اتاخرت علي شغلي .. السواق: "في ايه الي مش عاجبوا ينزل يركب تاكسي دي هيئة نقل عام ياأنسه مش عربية بابي".... تاكسي.. ايه الي بيقولوا الراجل ده انا اركب تاكسي ليه مفيش اتوبيسات درجة ثالثة في البلد ولا ايه.. معلش ياريت تسرع شوية يااسطى .. حاضر من عنيا ياأمورة .. هياااااااااااااااااااااااااااه قال اني أمورة السواق ده كويس

مش عارفة ليه الناس بيتخنقوا كده ومش طايقيين بعض ايه ده وصلت للضرب كمان وتقطيع الهدوم والدم سايل على الارض .. ايه ده كلو ضرب ضرب ضرب مفيش شتيمه ولا ايه .. اخ هنطلع علي القسم .. لا ارجوك يااسطي بلاش القسم الله يخليك هترفد من شغلي .. السواق: "ابدا لازم نطلع علي القسم عشان نربي الاشكال الي زي دي" .. الله يخليك ياعم بلاش اقسام ابقي ربيهم في وقت تاني..

الحمد لله الناس الي اتخانقو اتصالحوا خلاص اول ما عرفوا انهم هيروحوا القسم "قالو قفا الشعب ولا قفا الحكومة" علي الاقل الشعب هيكون قلبو علي قفا التاني انما الحكومة بقي معندهاش غالي..يلا الحمد لله عدينا نص الطريق فات القليل ما بقي الا الكتير .. اخ ايه الي وقف الاتوبيس كده كتييييييييير في ايه يااسطي امشي بقي .. السواق : "امشي فين يعني اطير ولا اعمل ايه .. بصوا قدامكم ياحضرات الطريق كلو واقف .. في حادثة كبيرة والكل واقف مش بيتحرك".. اااااااااه اصلها ناقصة.. الشارع واقف علي الاخر لاحد عارف يدخل ولا يطلع .. متهيالي شوفت الفيلم ده قبل كده بس الناس كانت محشورة في اسانسير مش اتوبيس هيئة النقل العام..عدت ساعة كاملة .. والاتوبيس زي ما هو محلك سر.. والكل عمال ينفخ والمحمول اشتغل والاتصالات ابتدت .. تأجيل مواعيد واعتذارات للتأخير .. الناس خلقهم ضاق علي الاخر مش مستحملين دبانة تعدي .. وفي فئة تانية من الركاب مبسوطين اوي لان الروس كلها اتساوت يعني الي راكب تاكسي زي الي راكب مكروباص زي الي راكب الاتوبيس الشعب كلو متعطل .. بفكر اخدها جري لحد الشغل .. شغل ايه بقي ما خلاص اليوم راح والحمد لله ..

ايه الشاب الحليوة ابو شعر حرير لصقوا بسمنة "النخلتين" الي قاعد جمبي ده شكلو مش وش بهدلة الاتوبيسات قاعد مضايق اوي عمال يتصل بالموبيل بتاعو ويقول هتاخر ساعة او ساعتين وبينفخ .. عايزة اقولوا متزعلش نفسك كلنا لها .. فجأة لقيتو بيقول "معلش ياانسه انا شايفك مضايقة اوي دلوقتي الاتوبيس يطلع وكلو يبقي تمام".. ايه ده ياحلولي ياحلولي ده بيكلمني بس علي مين انا بنت مؤدبة مش برد على شبان " نعم خير بتقول ايه حضرتك" ؟.. اخ بصلي بكل خجل وسكت ولقيتو بعد كده نزل بسرعة .. ايه الي انا عملتو ده يعني انا طفشتوا قبل ما يصارحني ويقولي انو بيشوفني كل يوم في المواصلات ومعجب بيا وعايز يجي يطلب ايدي من بابا .. ياخسارتك يابو شعر سايح .. يلا خيرها في غيرها ..

ايه ده الاتوبيس اتحرك احمدك يارب .. ياااااااااااه ايه الحادثة دي .. ده فعلا لازم الطريق يبقي واقف كده لبعد بكره كمان.. دي عربية انابيب كبيرة خبطة في عربية نصف نقل والعربيتين سدين الطريق علي الاخر .. والشرطة مش راضية تحرك حاجة من مكانها هيرفعو البصمات ولا ايه .. مش فاهمة ليه التعطيل ده .. ياسبحان الله الشعب كلو اتعطل عن شغلوا والطلبة اتعطلوا عن محاضرتهم بسبب الحادثة دي طيب فيها ايه لو الشرطة تخلص الموضوع بسرعة ويفتحوا الطريق .. مش امة محمد كلها تتعطل ونبقي بالمنظر ده.. بجد موقف غير متحضر بالمرة..يامسهل يارب .. يلا ياعم السواق عايزين همتك معانا امشي شوية بقي لحسن خلاص اتخنقنا .. السواق: "من عيني ياعسل"..

غريب اوي السواق ده هو مفيش غيري في الاتوبيس ولا ايه كل شوية يأمورة وعسل يعني ياربي مفيش شاب حليوة هو الي يقولي الكلام ده .. يلا مش مشكلة اهوه راجل برضوا وليه وجهة نظر ..وأخيرا وصلت ونزلت من الاتوبيس الي قررت اني عمري ما هركبو تاني حتي لو الحكومة قررت انو يكون بالمجان .. مالو المشي ده حتي رياضة مفيدة !!! .. وده يوم من واقع أيامنا الحلوة

امشي في جنازة ولاتمشيش في ....؟

الواحد من دول يضرب الجيل في شعروا ويحمي نفسوا بكالونيا خمس خمسات ويلبس الهدوم اللي على الحبل المغسولة بصابونة صن لايت عشان ينور كده ويشعشع .. عشان هيقابل عروسة واحد من معارفوا هيجبهالو.. وتيجي بقى الحلوة الامورة اللي هتشوف العريس اللي جايلها في البيت عن طريق نفس الشخصية تدي البيت الترويقة المعتبرة اللي هيه .. وتعمل حملة نظافة مبكرة لكل فرد في البيت وتجهز الحلويات والمشروبات والمحتاجات اللي هتتقدم للعريس المنتظر .. من الاخر الطرفين بيكونوا مستعدين للمقابلة دي اللي في الاصل السبب فيها فلان صديق الاثنين ..وبعدين يتقابلو العروسين ويعجبوا بعض .. وتتم الخطوبة ويكون الصديق اللي وفق ما بينهم ده حاجة كبيرة اوي عندهم ويعاملوه معاملة الاخ والصديق الوفي .. ولكن سرعان ما يتم الزواج وتأتي المشاكل ويصبح هذا الصديق اكبر عدو للطرفين وطبعا المعاملة تتحول ويعملوه معاملة مرات الاب .. ويقعدوا يدعو عليه في الرايحة والجاية .. هو طول ما هو ماشي في الشقة يقول منك لله ياللي في بالي.. انت السبب اللي وقعتني في الست المفترية دي .. وهي طول ما هي قاعدة تقشر البصل في المطبخ ترفع ايديها للسماء وتقول حسبي الله ونعم الوكيل ياللي في بالي .. انت السبب اللي وقعتني في الراجل الداهيه ده ..

واللي وفقهم ياحرام بقى ممكن لعبة القدر تلعب معاه لعبتها وتجرالو مصيبة فعلا من دعاويهم والحظ يلعلع معاه وتكون السماء مفتوحة

وعلى الرغم من انك بتاخد ثواب كبيييييييير اوي لما توفق راسين في الحلال .. بس للاسف بترجع تندم بعدين .. من كتر عتابهم ليك انك عرفتهم على بعض .. ده غير الدعاوي اللي بتاخدها من الطرفين في غيابك .. وكأنك انت اللي جوزتهم غصب عنهم وقولتلهم ههحط السيخ المحمي في صرصور ودنكم لو متجوزتوش .. وانت نيتك اصلا بتبقى خير عايز تستر الاثنين وتكسب فيهم ثواب ومنها مشاركة برضوا في حل مشكلة العنوسة .. لالا بلاش كلمة عنوسة مش لطيفة .. نخليها مشاركة في حل مشكلة البحث عن عروسة وعريس.. بس في الاخر ترجع تقول لنفسك صدق المثل الشعبي اللي بيقول امشي في جنازة ولاتمشيش في جوازة

بس عارفين انا مش مع المثل ده .. انا مع المثل اللي بيقول اعمل الثواب وارميه البحر

على الاقل لو مشيت وراء الجنازة هصوت وهحزن وممكن تجيلي ازمة قلبية واموت وراء الميت .. انما لو مشيت في جوازة بقى هزغرد وهفرح وهشرب كوكاكولا واحتمال يكون في بوفيه .. بذمتكم انهي الاحسن اقولكم احنا نغير المثل ونقول امشي في جوازة وامشي في جنازة برضوا علشان الواجب بيحتم عليك كده ولا انتو رايكم ايييييييييييييييييييه؟

مدونتك خارج نطاق الخدمة

ايه شعورك لو جيت في يوم من الايام تفتح مدونتك ولاقتها فجأة خارج نطاق الخدمة .. بمعنى أصح صدر قرار جمهوري بيقولك ان الدستور يمنع حق تمليك أي مواطن لمدونة .. ومش كل من هب ودب يروح فاتح النت ويبني في مدونة وتبقى باسمه كده .. لاء زمن ابو بلاش انتهى .. احنا في العصر الشريف النظيف .. اللي كلو جمال وسرور ..

وبما أننا في عصر نزيه كده ومبارك .. الدستور قررلك ما هو آت:

* يسمح بايجار المدونات (ايجار جديد فقط .. الايجار القديم مرفوض)

*عرض ما يدور بمخك على المسؤولين قبل ما تفكر تكتبوا على المدونة اللي انت مأجرها

*قبل ما ترد على التعليقات بتاعت الناس اللي بيعبروا مدونتك .. لازم تأشيرة موافقة الاول من ملاك المدونة اللي انت مأجرها

*لابد من توقيع المسؤولين على كل بوست ينزل بالمدونة .. وذلك لاجراءات أمنية .. تحسبا لوقوع هجمات على مدونتك

*الغاء حق الملكية الفكرية بالمدونات

عربة الزهور

كل يوم تنتابني حالة من الازعاج لاضطراري ركوب مترو الانفاق الذي اشعر به بالضيق من كثرة البشر ..
ها انا أضع الان تذكره المترو في المكينة واتوجه الى اخر الرصيف لكي اركب عربة السيدات التي لااستطيع ان اقطن بغيرها بالرغم من شدة ازدحامها نظرا لتكدسها بالنساء من كل شكل وكل نوع ..

المترو قادم من بعيد .. اذن يجب علي الاستعداد والوقوف الى جوار باب العربة الاولى .. الذي يتم فتحه بعد رجاء من الواقفين بالداخل والخارج ..

ها انا ادخل العربة بقوة الدفع نتخبط في بعضنا البعض ونتشاجر حتي يتم الطلوع والنزول ..

هناك كرسي وحيد بالعربة الجميع يسرع اليه في اشتياق للراحة عليه .. ها انا التي فزت به .. كلهن ينظرن الي في حقد .. وخبث .. ولكن لايهمني احدا فاني متعبه ومشواري طويل ..

ولان الزهور زي الستات لكل لون معنى ومغنى .. عندما ادخل عالم النساء .. أقصد عربة السيدات ارى كل الزهور باشكالها والوانها الفاتحة .. والغامقة.. المتفتحة .. والذابلة ..

والان امامي زهرة ولكنها ذابلة يبدو عليها كبر السن ملامحها بها عناء الزمن .. ونظراتها تقول لي اشفقي علي واتركي المكان ارجوكي اجلسيني مكانك .. فهرولت اليها يدي وامسكتها لتجلس بمكاني

ولكني متعبة لاحل لي غير الجلوس على الارض .. جلست على الارض وسط الزهور الجميلة المتفتحة .. فهم يتحاورون بصوت عالي جدا .. كل زهرة تحكي عن سرها مع نبات الصبار .. الذي عرفته من خلال دراستهما سويا .. وكنت مضطرة الى سماع قصصهن رغما عني .. وقلت في نفسي هن زهور كيف يمكن لهم ان يقيمون علاقة صداقة أو أخوة على حد تعبيرهم .. مع صبار يحيطه الشوك من كل اتجاه .. هن زهور صغار السن والخبرة .. ايعلمون ان الاختلاط لمجرد الاختلاط محرم شرعا .. ايعلمون ان الصبار يجرح .. أحبائي الزهور أريدكم متفتحين دوما اخاف عليكن من الذبل.

وفجأة اقتحمت علينا هذا المجلس زهرة اخرى في الثلاثيين من عمرها .. فهي بائعة متجولة بعربات الزهور فقط تبيع معلبات بها كيك وايس كريم وغيرها .. الجميع حاوطها للشراء ... وكنت أنا أولهم .. يفاصلون معها في السعر وها هي لاتوافقهم .. فيضطرون للشراء على سبيل التجربة لمنتجاتها.

يااااااااه ما هذا لقد دخل رجل بالخطأ العربة .. أخخخخخ .. الرجل يتلقى نظرات رصاصية .. يصيحون فيه ( انها عربة النساء انزل انزل انزل) .. وبعد ان سمع مالايرضيه نزل من العربة بمجرد وصول القطار للمحطة .. لقد فر الرجل ..

وهناك زهرة جديدة تريد اقتحام العربة قبل اغلاق الباب ولكنها تفشل لقد أغلق الباب يدها فتصرخ ويحاول الجميع مساعدتها .. فتنجو .

ويقف بمحطة جديدة هنا تدخل زهرة اخرى علينا العربة فهي منتقبة دخلت تقول للجميع دعاء الركوب (سبحان الذي سخر لنا هذا وما كنا له مقرنيين وان الى ربنا لمنقلبون .. الله أكبر الله أكبر الله أكبر .. الحمد لله الحمد لله الحمد لله .. اللهم اني ظلمت نفسي فاغفر لي فانه لايغفر الذنوب الا انت).

التفت جواري اجد زهرة تهندم شعرها المتمايل على كتفيها .. وأخرى تسبح وتتأمل في ملكوت الله .. وأخرى تقرأ القرأن الكريم .. واخرى غارقة في النوم و.........و.........و...............

والان وصلت لمحطتي واضع تذكرتي بالمكينة للخروج

هو أنا مالي؟

كل اللي حواليا اجمعوا على حاجة واحدة فيا ... وهي ان مزاجي مش ولابد الايام ديه..

الكل بيسألني مالي ؟

وانا بسأل نفسي برضوا مالي؟

كل اصدقائي بيقولوا أني مش طبيعية الفترة دي ودايما نرفزززززززززز .... حتى سها صحبتي بتكلمني على الماسنجر وبيني وبينها ستائر النت .. وبكلمها عادي زي كل مرة لقيتها بتقولي انتي زعلانة من حاجة !!!!! فيكي حاجة متغيرة!

طب هو انا مالي؟

انا مش حاسة نفسي فيا حاجة، وفعلا انا مش مضايقة من حاجة .. بس من كتر ما الناس بتسأل حسيت اني فعلا فيا حاجة غلط!!!!!

بيقولوا اني عصبية!

بيقولوا اني حزينة!!

وكمان بيقولوا اني مفترية!!!

دول بيأكدوا اني نكدية الايام ديه !!!!

أكونش اتحسدت ياولاد !! بس ياحسرة هتحسد على ايه !!!!

مع اني بحصن نفسي كل يوم واقول اذكار الصباح والمساء .. ولاأكونش انا نجمي خفيف ومحسودة وانا معرفش!!

أهئ أهئ .. طب وبعدين حد يقولي أنا مالي ؟؟؟؟؟؟؟؟؟

مقاعد الاحزان

يامن اختار مقاعد الاحزان لينشد فوقها الالحان

يامن اشعل النيران

يامن حطم الاسوار

يامن قرر الفرار

ابتعد لامكان لك