لست منقذي

قالتها وهي تحاول الا تطلق العنان لدموعها .. اذهب فأنا لست مليكتك وانت لست مليكي

طلبت منه الخروج من كيانها .. حتي تستجمع ما تبقى من اشلاء قلبها

كان يرجوها ان تسامحه على موقفه السلبي لعدم قدرته على اقناع أهله من الارتباط بها

كانت بالنسبة له حلما جميلا يحاول تحقيقه .. ولكنه فشل في تحقيق حلمه وحلمها

ولكنه نجح في ان يجعل له مكان بقلبها .. بل بكيانها البرئ الضعيف

ليس من شيمها ان يظلا اصدقاء .. قالتها له "أنا لااحب حساب المثلثات"..

في الماضي كان هو بالنسبة لها لايعني شئ .. ولكنه الان أصبح كل شئ

كانت في الماضي هي الفاعل .. والان أصبحت هي المفعول به

اما هو كالورقة في مهب الريح .. لايعرف يخسر من أهله ام يخسرها هي

ظنت انه سوف يكون منقذها .. ولكن القدر لم يجعله كذلك

قالها لها" أنه في موقف لايحسد عليه" أهله يهددون بمقاطعته .. وفشل في اقناعهم مرات ومرات .. فهو يشعر بالاسي .. ولايعرف بماذا تشعر هي!!

عندما علمت بموقف أهله كانت تريد ان تصرخ لماذا قابلتك؟ لماذا أحببتك؟ أنت لست لي وأنا لست لك؟ اذن فابتعد عني

قالت له.. اخرج من قلبي .. من كياني الضعيف .. موقفك سلبي ولا استطيع السماح

فأنت لست منقذي

مشكلة بتحصل كتير وهي زي ما انتو شايفنها احيانا الشاب بيوصل لمرحلة سلبية قدام اهله ومش بيعرف

يدافع عن حقوقه في اختيار شريكه حياته ياترى دي اسمها ايه سلبية ولاضعف ولا ولاء لااهله ولا ايه بالظبط

والافضل انو يسمع لاهله باعتبار تجاربهم في الحياة اكبر ولا يمشي وراء عقله وقلبه هو

وكذلك البنت تمشي وراء قلبها وعقلها في اختيار شريك حياتها ولا تخلي اهلها هما اللي يختارولها باعتبارهم اكثر خبرة

انتو ايه رأيكم
ودي مشكلة من واقع أيامنا

دماغ أنتختي في خطر

انتختي أميرة اللي اعتزلت التدوين مؤخرا في هدوء تام .. عشان تسبلي الساحة فاضية وأقب على وش النت لوحدي ... جالها صداع فوجائي عبارة عن اثنين بيضربو بعض في نفوخها زي "فتح وحماس" كده قولتلها الحل الوحيد هو طلب اجتماع عاجل لجامعة الدماغ العربية عشان تفض الاشتباك اللي في نفوخك ده لقتها بتحتج جامعة دماغ ايه بس ياشيخة هي بتعرف تحل ولا تربط اي حاجة .. انا عايزة برشام دولي محدش هيقدر على نفوخي غير البرشام الدولي قولتلها يابنتي لما البراشيم الدولية تدخل دماغك كده هيبقي احتلال .. قالتلي احتلال احتلال المهم الاشتباك ينفض بقى انا تعبانة .. وبعدين لقتها اترمت كده فجأة وقالتلي هو البرشام الدولي ده ممكن يضرني ويقسم نفوخي وتبقا زي الكوريتين قولتلها طبعا ممكن جدا لقتها بتبرقلي طب وبعدين ايه الحل قولتلها بصراحة مش عارفة بس انا ممكن أجبلك برشام طوارئ يمكن يجيب نتيجة ويضع حد للانفلات الامني اللي في دماغك ده ... قالتلي طوارئ ايه انتي بتهرجي ده اللي في نفوخي ده لو عملتي معاه الالي مش هيتهد ... طب اعمل معاكي ايه بقى غلبتيني .... لقتها بتتوجع اووووي اااااه يادماغي ااااه يادماغي بطلو اشتباك بقى حرام عليكم هدمروني ... انتو مش هتسكتو غير لما اشرب دواء صهيوني ينزل عليكم طاخ طوخ طيخ ... وفي تلك الحالتين هتدمروني...!!!!!!!!!!........

عريس لقطة

بما ان عندي جمود فكري اليومين دول قررت انزلكم بوست كنت بعتوا لبرايد في بيت العرايس والعرسان بس هي منزلتهوش قلت خلاص انزلوا انا عندي في أيامي الحلوة

القصة دي حقيقية من واقع أيامي بس فيها حبة تحابيش بسيطة كده لزوم الكتابة

المهم نبتدي الحكاية

في ليلة من ذات الليالي لقينا جرس الشقة بيرن فتحت اختي الصغيرة لقيت طنط جارتنا داخله والابتسامة عررررررريضة على وشها .. وبتقولي ازيك ياعروستنا ياامورة انا جيبالك حتة عريس هدية والنبي هدية وبقولك ايه اول ما تتخطبيلوا لازم تجبيلي هدية قيمة كده مش عايزة بخل اصلي محبوش ابدا والعريس اللي انا جيباهولك بقي ايه متريش على الاخر وقمر وصغير ومفهوش غلطة ..

استني ياطنط اهدي كده براحة عليا عريس ايه اللي بتتكلمي عنو ..

ده ياستي ضابط في القوات المسلحة وعندو 29سنة وأمور وعندو عربية احدث موديل وشقتوا جاهزة في مصر الجديدة يعني مش هتقولي عليه بم ..

اااااه طيب ..

طنط: يعني ايه ياعروستنا موافقة عليها لولولولووووووووووووي ...

استني استني في ايه بس هتلمي عليا الدنيا هو انا شفتوا ولا هو شافني ..

طنط: خلاص ما انا اتفقت معاه خلاص اننا نروح النادي بكره الساعة 6 كلنا كده ويشوفك هناك..

ايه اتفقتي ازاي بس ياطنط تتفقي على حاجة زي دي من غير ما تقوليلي الاول..

لقيت ماما برقتلي كده وقالت خلاص بكره بكره مفهاش حاجة يمكن يطلع ده كويس يابنتي وافرح بيكي ..

قلت خلاص نشوف محدش واخد منها حاجة

الساعة 6 بالظبط كنا في النادي انا وماما وجارتنا ..

لقينا حد جاي من بعيد شيك جداااا وطول بعرض كده ووقار لقيتو داخل علينا بابتسامة رقيقة ..

سلام عليكم ..
وعليكم السلام ..

طنط: اهلا ياحبيبي اعرفك بقي على الناس الحلوة دي الانسة "شيرين" ودي الست ماماتها ..

العريس: اهلا وسهلا تشرفنا ..

والنبي ياخويا انا اللي اتشرفت ده واضح ان زي ما طنط قالت انو عريس لقطة وشكلو كده هادئ ورظين وانا بحب الناس الرظينة دي طبعا الكلام ده بقولوا في سري ..
الجرسون جه : تشربوا ايه يافندم ..

انا : اشرب اي حاجة فريش ..

العريس أحب اعرفك بنفسي اسمي: شريف واحلي حاجة اكتشفتها دلوقتي ان اسمي قريب من اسمك ههههههههههههههههههههههههه

انا ضابط في القوات المسلحة وساكن في مصر الجديدة وعندي عربية هتعجبك اوي شاريها غالية اوي ومش هقولك على ثمنها لحسن يغمي عليكي ههههههههههههههههههههههه

وعندي 29 سنة طبعا عجوز واكيد بتقولي ده فاتو قطر الجواز هههههههههههههههههههه

انا والدي كان قاضي واخويا مستشار واختي مهندسة
اخويا متجوز واختي لسه معندكيش عريس ليها بقي ههههههههههههههههههههه

لقيت فجاة الجرسون جه ..

الحمد لله انو جه في الوقت المناسب عشان يوقفوا شوية عن الكلام والضحك اللي نازل عمال على الفاضي ده في ايه مالو ده ..

الجرسون نزل الطلبات ومعاهم ازازة ميه معدنية لقيت ده بقي فجأة لالالالا من فضلك شيل المية مش محتاجنها ..
اصل ياانسة المية هنا غالية على الفاضي البوفية في النادي ده حرامية شوية فيها ايه لو يجيب مية من الحنفية ده حتي النيل روانا والخير جوانا ههههههههههههههههه

في انت بخيل اهلالالالا في سري طبعا

من اولها كده موقف غير موفق يعني المية هي اللي هتزودلك الحساب .. ازاي يخلي الراجل يشيل المية كده ده انا اصلا هموت من العطش وعايزة اشرب ماية احد احد .. طب اقول للجرسون يسيب المية وانا هدفع حسابها ولا اعمل ايه ياااااااااختي هفرقع وعايزة امشي
العريس: ها يلا بقي عرفيني على نفسك .. انا صحفية وعندي 23سنة ..
العريس : بس بس ههههههههههههه كفاية كده المعلومات دي تكفيني اصلي انا عايز واحدة صغيرة بصراحة كنت عايزاها اصغر من كده كمان بس سنك كده كويس ..
هو حضرتك ملكش اي طلبات في العروسة غير السن وبس
العريس: ههههههههههه لا طبعا اكيد في حجات تانية بس اصل السن عندي مهم اوي اصل عايز واحدة صغيرة عشان تمشي على طبعي يعني ياريت متزعليش اني صريح بس انا احب كلمتي هي اللي تمشي والصغيرة بقي هعرف اشكلها على مزاجي غير كده السن الصغير للبنت احسن مستقبلا عشان تفضل وردة مفتحة قدامي

اااااااااااااااه طيب

وبعدين قلت في سري فيها ايه يابت الراجل شكلو مبسوط منك شويتين وبيضحك والمية الي شالها مش مهم ممكن يكون وطني زيادة عن الللزوم ومقاطع المية المعدنية وبيحب مية النيل .. مشي المركب بقي وفرحي امك الغلبانة اللي قاعدة قدامك دي وعمالة تبصلك نظرات معناها اهدي بالله ومتركبيش دماغك وتحكمي على حد من اول مرة كده
ابتسمت ابتسامة صفراء كده وقلتلو فعلا عند حضرتك حق انا هقاطع المية المعدنية بتاعت النادي ده انا اصلا هقاطع البوفية بتاع النادي كلو
العريس: هههههههههههه برافوا عليكي بداية خير واضح انك مطيعة وهنتفاهم

ااااااااااااااااااااااااااااااه عايزة اصرخ في وشوا مفروسة ياخواتي بس امي وجارتنا قاعدين والغريبة انهم قاعدين لايروا ولايسمعوا ولايتكلموا ..

ها قولي بقي ايه المواصفات اللي تتمناها في زوجتك غير السن الصغيرة الولاء والطاعة

العريس: ههههههههههه واضح انك دمك خفيف اوي بصي ياستي انا عايز واحدة تحافظ عليا وعلى جيبي متكونش مبذرة يعني لانها لو مبذرة هتخرب بيتي

اقولك ايه رايك نتفق على مصروف البيت من دلوقتي احسن عشان تبقي كل حاجة في النور كده ايه رايك في 100جنية في الشهر وانا هجيب كل الاحتياجات والـ100 جنية دول مني ليكي هدية شهرية ههههههههههه انا عارف انهم كتير بس انا عايزك تحوشي منهم بقي..

عايزة اقولكم ان غير الصداع اللي جالي .. قعدة ومبرقة عنيا الاثنين اللي كانو هيطلعو من مكانهم من كتر الذهول ومتسألوش ذهول على مصروف البيت ولا على انو اصلا بيتكلم في حاجة سابقة لاوانها

اكونش خلاص اتجوزتوا ولا ايه وبعدين حكاية البخل اللي شكيت فيها في بداية القاعدة دي ابتدت تبقى أكيده عندي

انا بقي عايزة امشي باي وسيلة عشان اتخنقت ومش عارفة اعمل ايه او اقول ... فجأة لقيت نفسي بقول .. طيب مش يلا ياماما بقي ولا انتي رايك ايه ياطنط...

العريس: ليه بس لسه بدري هو انتو لسه شربتوا المشروبات اللي طلبتوها اشربوا ياجماعة ده انا هدفع فلوس مش ورق ..

لا معلش اشربهم حضرتك او اقولك انت رجعهم البوفية ومش هيحسبوك عليها ...

العريس: ايه ده انتي بتتكلمي بجد شكلك اقتصادية فعلا وهنتفق طيب انا هحاول ارجعهم البوفية ..وانا منتظر بقي تليفون عشان تحددولي معاد مع الوالد..

طنط: ان شاء الله ياحبيبي ومبروك مقدما متنساش الهدية بتاعتي ..

العريس: هاهاها عايزة هدية مرة واحدة ياستي هديتك عند ربنا احسن من اي حد

وخدت ماما في ايد وشنطتي في ايدي التانية

وطنط طالعة تجري ورانا استنوا استنوا ده عريس لقطة مفيش جواز اليومين دول صدقوني ... هو حريص شوية وصريح حبتين فيها ايه بس

عروسة بدرجة سكرتيره

لما كنت بتفرج زمان على مسلسل "مطلوب عروسة" بتاع أحمد بدير واسمع اغنية التتر" مطلوب عروسة على المقاس عنيها خضراء بشعر اصفر متكونش وش بهدلة وعنيها خضراء بشعر اصفر"..

كنت بقعد اضحك اوي وبقول ده تمثيل وخلاص مش معقولة في حد كده .. يطلب مواصفات بالدقة دي وتكون دي أولوياتو .. يعني عروسة بشعر أصفر وعيون خضراء وبيضاء وشيك والمصيبة ان الحجات دي أولويات ولابد منها ..

وداااااااااااار بيا الزمن واكتشفت ان فعلا في ناس كتيره كده

اكتشفت ان في كتير من الشباب القادم على الزواج بيطلب مواصفات شريكة حياته .. ولا مطالب مدير عام لسكرتيره خاصة بمؤسسة كبرى وطبعا الشاب ياعيني بيلاقي صعوبة في العرايس اللي من النوعية دي نظرا لاننا نعيش في جو بارد شتاءا وحار صيفا ومعتدل ربيعا.. ده غير ان الاحتلال البريطاني خلاص انتهى والحمد لله والنوعية دي راحت من زمان

فتلاقيه داير باعلانات وسط اهلو وناسوا وحبايبوا للبحث عن شريكة حياته والكل يبحث عن ذات الشعر الاصفر والبياض الناصع والعيون الخضراء ومفيش مانع لو كانت زرقاء مش هتقف على لون العين يعني

والشاب ياحرام بيبقى ناقص يطبع ورق من بتوع طلبات الوظائف الخالية للبحث عن سكرتيره بشركة كبرى .. أقصد للبحث عن عروسة بدرجة سكرتيره ويقول فيها ( مطلوب عروسة حسنة المظهر عشان افرجها لاصحابي .. ناصعة البياض من أجل تحسين النسل .. ملفوفة القوام .. تجيد اللغات " عربية فصحي وعامية ، فرنسية ، انجليزية ، المانية" توفيرا لمصاريف مدارس اللغات .. لبقه ومتحدثة عشان تكبسني في الكلام.. تجيد استخدام الحاسوب عشان العيال اللي هتخلفهم .. لايزيد السن عن 24 عاما .. يخلو وجهها من حب الشباب تحسبا لوقوع عدوى.. ذات بشرة ناعمة توفيرا لكريمات الوجه.. خالية من الامراض.. لايشترط التفرغ التام ) .. وعلى رأي محمد هنيدي ياريت تكون50% قشطة.. 30% ذبدة.. 20% حليب .. والاكيد انها مش 100% بقرة ..

أنا بس عايزة أعرف اللي بيطلب عروسة بالمواصفات دي بيبقى عايز يتجوزها ويكونوا اسرة سعيدة صالحة ولا عايز يعينها في مصلحة الضرايب

كارثة ان تكون المواصفات دي هي الاولويات عند شباب اليومين دول طب راح فين التربية والاخلاق اللي لازم تتسم بيه الزوجة اللي هتحمل اسمك .. والدين اللي هتربي على أساسه اولادك ويكون لك ذرية صالحة ..

مش معنى كده اني بقول ان الجمال ملوش لازمة .. اكيد الشاب بيكون عايز زوجتو جميلة على الاقل عشان عينو متزوغش بره .. ويعف نفسوا.. بس في اعتدال يعني المواصفات دي مش اساس الجمال زي ما كتير فاكر ..

يالهوي هتجوز ازاي ياعالم انا وبنات مصر اللي معظمهم بشره قمحي وعيون سوداء و بني وشعر أسود

وللاسف نوعية الشباب دي موجودة كتير في واقع أيامنا الحلوة

اطبخي زوجك

زوجك هو طبق اليوم

لتنعمي بحياة زوجية سعيدة

ضعي زوجك في قدر من الاهتمام والمراعاة وأوقدي عليه نار الحب والأشواق بس هدى النار شوية علشان مايتحرقش

واسكبي عليه من حنانك وعطفك بس خدي بالك عشان ميغرقش

ثم ملحيه بقليل من الابتسامة الدائمة وياريت تخليها خفيفة ومتكتريش... عشان ميقولش هبلة

ثم ضعي عليه شرائح من الفكاهة والمرح الخفيف وياريت متكتريش النتائج ممكن متكونش في صالحك

واوعي يدخل في المقادير شيء من الشك ممكن كده الطبخة تخرب كلها

ثم حركي المزيج بملعقة من الأعصاب الهادئة ومعلش بقى يابنتي اتحملي

بعد ذلك احكميه بغطاء من الثقة المفتوحة يعني موش الثقة العمياء خدي بالك!! ، الرجالة مش مضمونين اوي اديني قولت بقى وانتي حرة وقد اعذر من انذر

ملحوظة: الطبخة دي جتلي على الايميل فقلت لازم لازم انزلها عندي عشان الحلوين المتجوزين يطبخوها ويفرحوا ازوجهم .. والحلوين برضوا اللي مش متجوزين زي حالاتي يكتبو المقادير والطريقة في ورقة عشان لما يتجوزوا يطبخوها

أنا والمدونين

ياااااااه الامتحانات ابتدت اعمل ايه بس مذكرتش اي حاجة خالص ومش لاقيه وقت اذاكر فيه والامتحان بكرة يعني غدا من الاخر الامتحان توموروووووووووووووووو ...

يالهووووووووووووي دماغي صدعت اعمل ايه اعمل ايه فضلت دايخة كده ومن كتر دوخاني وقعت واترميت على الديسك توب قومت بسرعة قبل ما اتخبطت في اي ايقونة

قلت طب ما انا اخبط على صفحة النت اكيد صاحية عشان الامتحانات .. قومت دخلت على مدونتي أيامنا الحلوة قعدت أبص على بوستاتي وعنيه مدمعه .. اعمل ايه يابوستاتي مش عارفة اذاكر ومش لاقيه اي ملخصات عشان الحق اجمع اي حاجة .. قلت اجرب كده واروح اشتكي لسمسم في بيتوا القديم واقولوا على اللي جرالي واني معنديش القدرة على القراية راح سمسم كتر الف خيروا وعدني بمذكرة من سطر واحد هتتباع على باب مدونتوا.. قلت الحمد لله اتحلت .. وخير الكلام ما قل ودل وسطر واحد هينفع برضوا اي سؤال اكتب السطر ده والسلام ..

وبعدين قعدت ادور على ادوات الامتحان القلم والمسطرة والاستيكية .. وجه في دماغي علطول اخد من مدونة اكتب بالرصاص القلم بتاعو انا عارفة انو مش هيعزوا عليا بس تراجعت على اخر لحظة قولت خليني ماشية جمب الحيط لحسن اسقط مينفعش اكتب بالرصاص في الامتحان اروح في داهيه وممكن .. اروح في الرجلين .. والامر ما يسلمش البلد مكهربة اليومين دول

وبعدين قعدت ادور على اجندة اتسند عليها كده واراجع فيها .. قلت لو كنت طلبت من البنوتة المجنونة حبتين اجندتها الحمرا كانت هتبعتهالي على الايميل في السريع بس للاسف اللون الاحمر مينفعش في الامتحانات ممكن اروح في داهيه بس لو كانت الاجندة سوداء ولا زرقا مش كانت نفعتني دلوقتي.. يلا بقى ملناش نصيب

طب وبعدين قلت اروح اخبط على مدونة جروووووووم يمكن الاقي عندو اي حاجة تنفعني .. لقيتوا مش فاضي بيدور على عروسة وتايه على الاخر ال ايه عايز يتجوز ..

طب اروح فين ولا اجي منين ياربي قولت اروح لمدونة برويد بس اروح ازاي ده الراجل كان معتزل التدوين ولسه راجع بلاش ادوش دماغوا بقى خلي عندي دم ....

قلت مفيش غيرها أميرة البلطجية اروح احتمي في مملكتها الصغيرة واحكيلها أزمتي يمكن تبعت حد من حراسها يمتحن بدالي ولا حاجة .. بس رجعت تاني لقيت على باب مدونتها حراس ماسكين مطاوي وسكاكين ومناشير وحجات كده قلت أرجع أحسن يفتكروني من حزب معارض ويعتقلوني ..

وبالصدفة كده لقيت أبو العربي يتحدث قدامي قلت احكيلوا على المشكلة اللي أنا فيها دي .. يمكن الاقي عندو حل .. لقيتوا بيقولي انا ضد الظلم .. ولازم أوصي عليكي الامم المتحدة واخلي كونداليزا رايس تراقب عليكي في اللجنة وتوزع عليكم براشيم في الامتحان كمان .. قلتلوا اشمعنى رايس يابو العربي قالي اصل ساركوزي بتاع فرنسا مرشحهالو عروسة .. من الاخر جواز صالونات يعني .. بيني وبينكم .. حسيت انو بيفشر عليا .. قلت شوية شوية بقى يقولي ان الريس اتنازل عن الحكم .. وابتسامة عريضة كده معناها بطل فشر بقى يابو العربي ده امتحان مش لعبه امتحااااااااان .. وخلعت منو ..

مكدبش عليكم فكرت اروح عند سندباد يمكن يطلعني في مغامرة من مغامراتو ويخرجني من المود ده .. بس للاسف لقيتوا غرقان في أحزانو مع بوستاتو .. وبصراحة انا مش ناقصة انا فيا اللي مكفيني

وأخر ما طهقت قلت طب اروح لطهقان وطهقانة اشكي لهم طهقي وبعدين قلت لا دول اصلا هيعقدوني في عيشتي ومش هطلع منهم بمفيد لانهم معقدين ازاي اروح احكي طهقي لطهقانين ..

يوووووووو بقى طب اعمل ايه مفيش قدامي غير انتختي أميرة دي اللي هتطلعني من اللي انا فيه ..بس أميرة دي بقى مش بلطجية .. روحت جريت عليها .. واقترحت اخدها نغير جو كده ونتمشي في مدونتها على الطريق يمكن نفسيتي ترتاح شوية .. بس لقيتها مش فاضية ال ايه رايحة للخياطة تفصل طقم جديد.. وهو ده وقتوا دا احنا في امتحانات ياعااااااااااالم

واخر ما احترت ملقتش قدامي غير انتكتي التانية قلوب حائرة قدامي قولتلها شوفتي اللي انا فيه ورايا امتحان بكره ومذكرتش اي حاجة خالص اهئ اهئ اهئ .. قالتلي متقلقيش انما الاعمال بالنيات انتي صفي قلبك كده وتوكلي على الله .. واكتبي اللي يجي في دماغك .. قولتلها ونعمه بالله ..

وبعدين مرة واحدة كده لقيت في وشي مدونة مش أنا بتاعت علاء دخلت لقيت أدعية حلوة اوووووووي وفعلا لما قريت الادعية دي هديت على الاخررررررررر

وفجأة سمعت صوت معتادة اسمعوا كل يوم ده صوت ميييييييييييين؟

شيريييييييييين انتي يابنتي قومي بقى بقالي ساعة بصحيكي قومي يلا صلي الفجر والحقي انزلي على شغلك .. هتتأخري .. ايه ياماما ده انا اتأخرت على الامتحان ولا ايه .. امتحان ايه يابنتي انتي بتحلمي بالامتحانات ولا ايه انتي مش خلصتي دراسة الحمد لله ..

وجهي يبدو عليه علامات التعجب
ايه ده هو انا خلصت دراسة بجد ياماما ولا بتهزري !!!!!

نعم في ايه مالك ياحبيبتي انتي سخنة ؟

ايييييييييييييييييه صحييييييييييييح انا دا أنا خلصت دراسة ومتخرجة بقالي سنتين .. انا الظاهر كنت بحلم ..

ياربي .. كل سنة في توقيت الامتحانات ده بتجيلي حالة نفسية غريبة وهي الرهبة من الامتحانات مع اني خلصت خلاص الحمد لله..
ده لو كان عليا امتحان بجد وانا على الحالة دي أكيد كنت هبقى في خبر كان ..
ابتسامة عريضة لان الحكاية طلعت حلم مش حقيقة ومفيش امتحااااااااااان .. هييييييييييييييييييييييييييييييه!!